Sumatera Barat

Wikipedia Minangkabau - Lubuak aka tapian ilimu
(Dialiahkan dari Sumatra Barat)
Loncat ke navigasi Loncat ke pencarian
Sumatera Barat
Provinsi di Indonesia
Transkripsi Bahaso Minangkabau
 • Jawiسومترا برات
 • Alfabet Baso MinangkabauSumat(e)ra Barat
Panoramaninjau.jpg
Sesudut Painan 2.jpgLembah harau 50 kota.jpg
PDIKM Sumatra.jpgNgaraisianok.jpg
Istano Pagaruyuang.jpgBeach of Sikuai island.jpgTour de Singkarak 2013 (3).jpg
Kangub Sumbar Sep 2017.jpgLahan-rata-padang mangateh.jpg
Fly Over Kelok Sembilan.jpgKA Padang Panjang (train).jpgPadang-1137101.jpg
Padang Buminang Hotel.jpgPacuan Bukik Ambacang.jpg

Dari kida ka suokː Danau Maninjau, Painan, Lambah Harau, Pusat Dokumentasi dan Informasi Kebudayaan Minangkabau, Ngarai Sianok, Istano Pagaruyuang, Pulau Sikuai, Tour de Singkarak, Kantua Gubernur Sumatera Barat, taranak jawi di Padang Mangateh, Kelok 9, kareta api di Danau Singkarak. angkutan umum, Kota Padang, dan pacuan kudo
Bandera Sumatera Barat
Bendera
Lambang Sumatera Barat
Lambang
Semboyan:
Tuah Sakato
تواه ساكتو
(Minang: Basupakaik mahasiakan mufakaik)[1]
Peta lokasi Sumatera Barat
Peta lokasi Sumatera Barat
Nagara Indonesia
Ari jadi1 Oktober 1945
Ibu kotaKota Padang
Kota gadang lainnyoKota Bukittinggi
Kota Payakumbuh
Jumlah satuan pamarintahan
Pamarintahan
 • GubernurMahyeldi Ansharullah
 • Wakia GubernurAudy Joinaldy
 • Sekretaris DaerahHansastri
 • Ketua DPRDSupardi
Laweh
 • Total42.297,30 km2 (1,633,110 sq mi)
Panduduak (2020)[2]
 • Total5.534.472
 • Paringkek12
 • Kapadatan131,73/km2 (341,2/sq mi)
Demografi
 • EtnisMinangkabau 88,35%
Mandailing 4,42%
Jawa 4,15%
Mentawai 1,28%[3]
 • AgamoIslam 97,48%
Kristen 2,29%
Protestan 1,36%
Katolik 0,93%
Buddha 0,22%
Lainnya 0,01%[2][4]
 • BahasoIndonesia (resmi)
Minang (utama)
Melayu, Mandailing, Mentawai, Tamil
 • IPM 72,38 (2020) ( Tinggi )
72,39 (2019) ( Tinggi ) [5]
Kode pos25xxx-27xxx
Kode area telepon
ISO 3166ID-SB
Plat kandaraanBA
Dasa hukum pandirianUU Darurat RI No.19 Tahun 1957[6]
DAURp 2.106.647.207.000,- (2020)[7]
Lagu daerahAyam Den Lapeh, Kampuang Nan Jauah di Mato, Kambanglah Bungo, Minangkabau.
Rumah tradisionalRumah Gadang
Sanjato tradisionalKarih, Kurambiak, Ruduih
FloraAndaleh
FaunaKuau rajo
Situs websumbarprov.go.id

Sumatera Barat (Tulisan Jawi: سومترا بارت) nan biaso disingkek Sumbar adolah sabuah provinsi di Indonesia nan talatak di sabalah barat pulau Sumatera nan baibu kota di Padang. Provinsi iko babatehan jo provinsi Sumatera Utara di sabalah utara, Riau jo Jambi di sabalah timur, sarato Bengkulu di sabalah selatan. Kapulauan Mentawai nan ado di Samudra Hindia masuak kadalam wilayah administratif provinsi iko. Sadangkan ibukota dari provinsi iko adolah Padang.

Sumatera Barat bapanduduak sabanyak 4.845.998 jiwa nan paliang banyak baetnis Minangkabau nan kasadonyo baagamo Islam. Provinsi iko tadiri dari 12 kabupaten jo 7 kota jo pambagian wilayah administratif sasudah kecamatan di saluruah kabupaten (kacuali Kabupaten Kapulauan Mentawai) dinamokan sabagai nagari—sabalunnyo pado taun 1979 diganti jo desa, kudian sajak 2001 dibaliakan ka namo samulo, iyolah nagari.

Sajarah[suntiang | suntiang sumber]

Rumah gubernur Westkust van Sumatra atau "pantai barat Sumatera" (litografi badasarkan lukisan Josias Cornelis Rappard, 1883-1889)
Istano Pagaruyuang

Asa mulo namo Provinsi Sumatera Barat bamulokan pado zaman Vereenigde Oostindische Compagnie (VOC), pagunonyo untuak sabutan wilayah administratifnyo yakni Hoofdcomptoir van Sumatra's westkust. Kamudian sairiang makin mangueknyo pangaruah politik jo ekonomi VOC, sampai abaik ka 18 wilayah administratif iko alah mancakuik kawasan pantai barat Sumatera muloi dari Barus sampai Indrapura.[8]

Sairiang jo kajatuahan Karajaan Pagaruyuang, jo talibeknyo Balando dalam Parang Padri, pamarintah Hindia Balando mulai manjadikan kawasan padalaman Minangkabau sabagai bagian dari Pax Nederlandica, kawasan nan barado dalam pangawasan Balando, sarato wilayah Minangkabau iko dibagi ateh Residentie Padangsche Benedenlanden jo Residentie Padangsche Bovenlanden.[9]

Salanjuiknyo dalam pakambangan administrasi pamarintahan kolonial Hindia Balando, daerah iko tagabuang dalam Gouvernement Sumatra's Westkust tamasuak wilayah Residentie Bengkulu nan baru disarahkan Inggirih bakeh Balando. Kamudian dipalaweh lai jo mamasuakan Tapanuli, jo Singkil. Tapi pado taun 1905, wilayah Tapanuli ditingkekkan statuihnyo manjadi Residentie Tapanuli, sadangkan wilayah Singkil diagiahkan kapado Residentie Atjeh. Kamudian pado taun 1914, Gouvernement Sumatra's Westkust, diturunkan statuihnyo manjadi Residentie Sumatra's Westkust, jo manambahkan wilayah Kapulauan Mentawai di Samudera Hindia ka dalam Residentie Sumatra's Westkust, sarato pado taun 1935 wilayah Kerinci digabuangkan juo ka dalam Residentie Sumatra's Westkust. Samantaro wilayah Rokan Hulu jo Kuantan Singingi diagiahkan kapado Residentie Riouw pasca pamacahan Gouvernement Sumatra's Oostkust, sarato juo mambantuak Residentie Djambi pado periode nan ampiang basamoan.[8]

Pado maso panduduakan tentara Japang, Residentie Sumatra's Westkust barubah namo manjadi Sumatora Nishi Kaigan Shu. Ateh dasa geostrategis militer, daerah Kampar/ Bangkinang dikaluakan dari Sumatora Nishi Kaigan Shu jo dimasuakkan ka dalam wilayah Rhio Shu.[8]

Pado awal kemerdekaan Indonesia pado taun 1945, wilayah Sumatera Barat tagabuang dalam provinsi Sumatera nan bapusaik di Bukittinggi. Pado taun 1949, Provinsi Sumatera kamudian dipacah manjadi tigo provinsi, yakni Sumatera Utara, Sumatera Tangah, jo Sumatera Selatan. Sumatera Barat sarato Riau jo Jambi marupoan bagian dari karesidenan di dalam Provinsi Sumatera Tengah. Pado maso PRRI di Sumatera, Pamarintah Pusaik badasakan Undang-undang darurat nomor 19 taun 1957, Provinsi Sumatera Tengah dipacah baliak manjadi tigo provinsi yakni Provinsi Sumatera Barat, Provinsi Riau, dan Provinsi Jambi. Wilayah Kerinci nan sabalunnyo tagabuang dalam Kabupaten Pesisir Selatan Kerinci, digabuangkan ka dalam Provinsi Jambi sabagai kabupaten tasandiri. Baitu pulo wilayah Kampar, Rokan Hulu, jo Kuantan Singingi ditetapkan masuak ka dalam wilayah Provinsi Riau. Salanjuiknyo ibu kota provinsi Sumatera Barat nan baru iko adolah masih tatok di Kota Bukittinggi. Namun badasakan Suraik Kaputusan Gubernur Sumatera Barat No. 1/g/PD/1958, tanggal 29 Mei 1958 sacaro de facto manetapkan Kota Padang manjadi ibu kota Provinsi Sumatera Barat.[8]

Geografi[suntiang | suntiang sumber]

Danau Diateh, salah satu danau di Kabupaten Solok
Pulau Sikuai, salah satu kawasan wisata bahari di Padang

Sumatera Barat talatak di pasisia barat bagian tangah pulau Sumatera nan tadiri dari dataran randah di pantai barat jo dataran tinggi vulkanik nan tabantuak dek Bukik Barisan. Provinsi iko mamiliaki daratan salaweh 42.297,30 km² nan sarupo jo 2,17% laweh Indonesia. Dari laweh tasabuik, labiah dari 45,17% marupoan kawasan nan masih tatutuik dek hutan linduang. Garih pantai provinsi ko sadoalahnyo basantuahan jo Samudera Hindia sapanjang 2.420.357 km jo laweh parairan lauik 186.580 km².[10] Kapulauan Mentawai nan talatak di Samudera Hindia tamasuak ka dalam provinsi iko.

Co daerah lainnyo di Indonesia, iklim Sumatera Barat sacaro umum basipaik tropis jo suhu udaro nan cukuik tinggi, iyolah antaro 22,6 °C sampai 31,5 °C. Garih khatulistiwa tapek malalui provinsi iko di kecamatan Bonjol, kabupaten Pasaman. Di provinsi iko bahulu sajumlah sungai gadang nan bamuaro di pantai timur Sumatera co Batang Hari, Siak, Inderagiri (disebut sabagai Batang Kuantan di bagian hulunyo), jo Kampar. Samantaro sungai-sungai nan bamuaro di provinsi ko surang umumnyo pendek-pendek, co Batang Anai, Batang Arau, Batang Agam, Batang Sinama, jo Batang Tarusan.

Danau di Sumatra Barat di antaronyo: Maninjau (99.5 km2), Singkarak (130.1 km2), Diateh (31.5 km2), Dibawah (14.0 km2), Talang (5.0 km2). Gunuang jo gunuang api nan ado di provinsi ko antaro lain: Kurinci (3.805 m), Marapi (2.891 m), Sago (2.271 m), Singgalang (2.877 m), Talamau (2.912 m), Talang (2,572 m), Tandikek (2,438 m).[11]

Sumatera Barat marupolan salah satu daerah rawan gampo di Indonesia dek sabab lataknyo ado di jalur patahan Semangko tapek di antaro patamuan duo lempeng banua gadang, iyolah Eurasia jo Indo-Australia.[12] Gampo bumi gadang nan tajadi akhia-akhia iko di Sumatera Barat di antaronyo adolah Gampo bumi 30 September 2009 jo Gampo bumi Kapulauan Mentawai 2010.

Karagaman hayati[suntiang | suntiang sumber]

Sumatera Barat marupoan salah satu provinsi di Indonesia nan kayo jo sumber kaanekaragaman hayati. Sabagian gadang wilayahnyo masih marupoan hutan tropis alami jo dilinduangi. Babagai spesies langka masih dapek dijumpoi, misalnyo Rafflesia arnoldii (bungo tagadang di dunia), harimau sumatera, siamang, tanuak, ruso, baribeh, jo babagai jinih buruang jo ramo-ramo.

Ado duo taman nasional di provinsi iko, iyolah Taman Nasional Siberut nan talatak di pulau Siberut (Kabupaten Kepulauan Mentawai) jo Taman Nasional Kerinci Seblat. Taman nasional tarakhia ko wilayahnyo mambantang di ampek provinsi: Sumatera Barat, Jambi, Bengkulu, jo Sumatera Selatan.

Salain kaduo taman nasional tasabuik ado juo babarapo cagar alam lainnyo, iyolah Cagar Alam Rimbo Panti, Cagar Alam Lambah Anai, Cagar Alam Batang Palupuh, Cagar Alam Aia Putih di daerah Kelok Sembilan, Cagar Alam Lambah Harau, Cagar Alam Beringin Sakti jo Taman Raya Bung Hatta.

Sumber dayo alam[suntiang | suntiang sumber]

Sumber dayo alam nan ado di Sumatera Barat adolah barupo batu baro, batu basi, batu galena, timah hitam, seng, mangan, ameh, batu kapua (simin), kelapa sawit, kakao, gambir, hasia tani jo parikanan.

Pasisia barat jo Kapulauan Mentawai mampunyoi banyak hasia lauik nan banilai ekonomi tinggi. Nalayan dapek manangkok baragam jinih ikan di kawasan ko. Ikan kerapu, udang, rumpuik lauik, kepiting, jo mutiara marupokan hasia lauik andalan. Daerah pasisia pantai, utamonyo kawasan kapulauan, mahasilkan banyak karambia. Di daerah darek ado banyak parak gatah, cangkiah, jo merica. Kawasan darek nan tatutuik dek utan mahasilkan kayu. Tantangan barek dari pengambangan patanian jo parak di kawasan ko iyolah medan nan balereang jo babukik-bukik.

Bahan galian banyak juo ado di daerah ko. Salah satunyo iyolah batuan kapua nan manjadi bahan pokok untuak industri simin. PT Semen Padang alah mamanfaatan kakayoan alam ko salamo puluahan taun. Batu kapua ado banyak di sakitar Pafang, Danau Singkarak, jo Padangpanjang. Di Padangpanjang, deposit batu kapua dapek mancapai 43 juta ton. Bahan galian lainnyo adolah batu baro di Sawahlunto sarato obsidian jo batu andesit di Padang Pariaman. Mato aia nan malimpah juo alah maagiah banyak manfaaik untuak pambangunan daerah ko. Parairan Danau Singkarak jo Maninjau alah lama dipakai sabagai pambangkik listrik tanago aia. Mato aia ko juo mampunyoi potensi gadang untuak diolah sarato dikamehan manjadi aia mineral.

Panduduak[suntiang | suntiang sumber]

Musajik Jami di Agam
Gareja Katolik paninggalan Balando di Sawahlunto

Etnik[suntiang | suntiang sumber]

Mayoritas panduduak Sumatera Barat marupoan urang Minangkabau. Di daerah Pasaman, salain urang Minang ado pulo urang Batak jo urang Mandailing. Urang Mentawai ado di Kapulauan Mentawai. Di sabagian kota di Sumatera Barat mode kota Padang ado baragam etnis lain sarupo Tionghoa, Tamil, jo Nieh. Di daerah-daerah transmigrasi bak cando di Sitiung, Lunang Silaut, Padang Gelugur dan lainnyo ado pulo urang Jao. Sabagian di antaronyo adolah katurunan imigran badarah Jao dari Suriname nan mamiliah baliak ka Indonesia pado maso akhia taun 1950-an. Dek Presiden Soekarno wakatu itu diputuihan basonyo ditampekan di sakitaran daerah Sitiung. Hal iko indak juo lapeh dari aspek politik pamarintah pusek sasudah rekapitulasi PRRI di Provinsi Sumatera Barat nan jolong tabantuak katiko itu.

Salain itu, ado juo baragam etnis nusantara lainnyo nan masuak sasudah kamardekaan sabagai parantau jo bakarajo di babagai bidang.

Bahaso[suntiang | suntiang sumber]

Bahaso nan digunokan dalam kasaharian iolah bahaso daerah iyolah bahaso Minangkabau nan punyo baragam dialek, sarupo dialek Bukittinggi, dialek Pariaman, dialek Pasisia Selatan, jo dialek Payakumbuh. Di daerah Pasaman jo Pasaman Barat nan babatehan jo Sumatera Utara, ditutuakan pulo bahaso Mandailing. Samantaro itu di daerah Kapulauan Mentawai dipakai bahaso Mentawai.

Agamo[suntiang | suntiang sumber]

Caliak pulo Islam di Sumatera Barat

Islam adolah agamo mayoritas nan dianuik dek sakitar 98% panduduak Sumatera Barat, nan kabanyakan pamaluaknyo adolah urang Minangkabau. Salain itu ado juo nan baagamo Kristen utamonyo di Kepulauan Mentawai kiro-kiro 1,6%, Buddha 0,26%, jo Hindu 0,01%, nan dianuik dek panduduak non-Minangkabau.

Babagai tampek ibadah nan dapek tasuo di satiok kabupaten jo kota di Sumatera Barat didominasi dek musajik jo surau. Musajik tagadang adolah Musajik Rayo Sumatera Barat di Kota Padang, sadang musajik tatuo di antaronyo adolah Musajik Rayo Gantiang di Padang jo Musajik Tuo Kayu Jao di Kabupaten Solok. Arsitektur khas Minangkabau mandominasi baiak musajik maupun surau. Musajik Rayo Sumatera Barat mampunyoi bangunan babantuak gonjong, dihiasi ukiran Minang sakaligus kaligrafi. Ado juo musajik jo atok nan tadiri dari babarapo tingkatan nan makin ka ateh makin ketek jo saketek cakuang.

Tahun 2008 2010
Jumlah panduduak 4.763.130 Green Arrow Up.svg 4.845.998
Sajarah kependudukan Sumatera Barat
Sumber:[2]

Pamarintahan[suntiang | suntiang sumber]

Provinsi Sumatera Barat dipimpin dek surang gubernur nan dipiliah dalam pamiliahan sacaro langsuang basamo jo wakianyo untuak maso jabatan 5 tahun. Gubernur salain sabagai pamarintah daerah baparan pulo sabagai pawakilan atau papanjangan tangan pamarintah pusek di wilayah provinsi nan kawenangannyo diatur dalam Undang-undang nomor 32 Taun 2004 jo Peraturan pemerintah nomor 19 taun 2010.

Samantaro hubuangan pamarintah provinsi jo pamarintah kabupaten jo kota bukan subordinat, masiang-masiang pamarintahan daerah tasabuik mangatur jo mauruih surang urusan pamarintahan manuruik asas otonomi jo tugeh pembantuan.

Daftar Gubernur[suntiang | suntiang sumber]

Namo Mulai manjabaik Akhia manjabaik Status
Karesidenan Sumatra Barat (1945–1948)
Muhammad Sjafei Moh. Sjafei, eks. Menteri Pengajaran (1946-1946).jpg 1 Oktober 1945 15 November 1945[ket. 1]
Roesad Datuk Perpatih Baringek 15 November 1945 14 Maret 1946[ket. 2]
Mohammad Djamil Mohammad Djamil.gif 18 Maret 1946 1 Juli 1946
Sutan Mohammad Rasjid Sutan M Rasjid PYO.jpg 20 Juli 1946 29 April 1947[13]
Mohammad Nasroen Prof. Mr. M. Nasroen.jpg 29 April 1947 15 April 1948[13][ket. 3]
Provinsi Sumatra Tengah (1948–1956)
Mohammad Nasroen Prof. Mr. M. Nasroen.jpg 15 April 1948 19 Desember 1948[13][ket. 4]
Sutan Mohammad Rasjid Sutan M Rasjid PYO.jpg 2 Januari 1949 Mei 1949 Gubernur Militer Sumatra Barat
Mei 1949 Oktober 1949[15] Gubernur Militer Sumatra Tengah
Mohammad Nasroen Prof. Mr. M. Nasroen.jpg Oktober 1949 1 Agustus 1950[16][ket. 5]
Ruslan Muljohardjo Ruslan Muljohardjo, Kami Perkenalkan (1954), p51.jpg 9 November 1950 1 Mei 1951 Penjabat Gubernur
1 Mei 1951 20 Desember 1956[13][ket. 6]
Provinsi Sumatra Barat (1958–sekarang)
Kaharudin Datuk
Rangkayo Basa
Kaharudin Datuk Rangkayo Basa.jpg 17 Mei 1958 5 Juli 1965[17]
Suputro Brotodihardjo PNI - Suputro Brotodihardjo.jpg 5 Juli 1965 4 Juni 1966[18]
Harun Zain Harun Al-Rasjid Zain.jpg 4 Juni 1966[ket. 7] 4 Juni 1971
4 Juni 1971 11 April 1972[ket. 8] Penjabat Gubernur
11 April 1972 11 April 1977
Azwar Anas Azwar Anas.jpg 18 Oktober 1977 18 Oktober 1982
30 Oktober 1982 30 Oktober 1987
Hasan Basri Durin Mayor of Jambi Hasan Basri Durin.jpg 30 Oktober 1987 30 Oktober 1992
29 Desember 1992 29 Desember 1997
Muchlis Ibrahim Muchlis Ibrahim.jpg 29 Desember 1997 27 Maret 1999[ket. 9]
Dunidja D. Dunidja Daswita.jpg 27 Maret 1999 24 Februari 2000 Penjabat Gubernur
Zainal Bakar Zainal Bakar.jpg 24 Februari 2000 24 Februari 2005
24 Februari 2005 14 Maret 2005[ket. 10]
Muhammad Thamrin 14 Maret 2005 15 Agustus 2005 Penjabat Gubernur[23][24]
Gamawan Fauzi Gamawanfauzi.jpg 15 Agustus 2005 22 Oktober 2009[ket. 11]
Marlis Rahman Marlis Rahman.jpg 22 Oktober 2009 7 Desember 2009 Pelaksana Tugas Gubernur[25]
7 Desember 2009[26] 15 Agustus 2010
Irwan Prayitno Irwan Prayitno.jpg 15 Agustus 2010 15 Agustus 2015[27]
Reydonnyzar Moenek Reydonnyzar Moenek as acting governor portrait.jpg 15 Agustus 2015 12 Februari 2016 Penjabat Gubernur[28]
Irwan Prayitno Irwan Prayitno 2016.jpg 12 Februari 2016 12 Februari 2021[29]
Alwis Penjabat Wali Kota Padang Alwis.jpg 12 Februari 2021 18 Februari 2021[30] Pelaksana Harian Gubernur
Hamdani Staf Ahli Mendagri, Hamdani.jpg 18 Februari 2021[31] 25 Februari 2021 Panjabat Gubernur
Mahyeldi Ansharullah Gubernur Sumatera Barat Mahyeldi.jpg 25 Februari 2021 patahana

Dewan Perwakilan[suntiang | suntiang sumber]

DPRD Sumbar baranggotakan 65 urang nan dipiliah malalui pamiliahan umum satiok limo taun sakali. Pimpinan DPRD Sumbar tadiri dari 1 Ketua jo 3 Wakil Ketua nan barasa dari partai politik pamiliak jumlah kurisi jo suaro paliang banyak. Anggota DPRD Sumbar nan tangah manjabaik kini adolah hasia Pemilu 2019 nan dilewa pado 28 Agustus 2019 dek Ketua Pengadilan Tinggi Padang, Panusunan Harahap, di Gedung DPRD Provinsi Sumatera Barat.[32] Komposisi anggota DPRD Sumbar periode 2019-2024 tadiri dari 9 partai politik dimano Partai Gerindra adolah partai politik pamiliak kurisi paliang banyak yaitu 14 kurisi, kudian disusua dek Partai Keadilan Sejahtera, Partai Demokrat, jo Partai Amanat Nasional nan masiang-masiang maraiah 10 kurisi.

Partai politik Jumlah kurisi dalam periode
2004–2009 2009–2014 2014–2019 2019–2024
 GOLKAR  16 9 Steady 9 8
 PDIP  4 3 4 3
 PPP  7 4 8 4
 PAN  10 6 8 10
 PKS  7 5 7 10
 PBB  5 3 1 0
 PKB  0 Steady 0 1 3
 PKPI  0 Steady 0 Steady 0 Steady 0
 PBR  (baru) 3 2
 DEMOKRAT  (baru) 3 14 8 10
 GERINDRA  (baru) 4 8 14
 HANURA  (baru) 5 Steady 5 0
 NASDEM  (baru) 6 3
Jumlah anggota Steady 55 Steady 55 65 Steady 65
Jumlah partai 8 10 11 9

██ Indak turuik sato dalam pemilu

Pamarintahan Nagari[suntiang | suntiang sumber]

Sampai taun 1979 satuan pamarintahan taketek di Sumatera Barat adolah nagari, nan alah ado sabalun kamerdekaan Indonesia. Jo dibalakukannyo Undang-undang nomor 5 taun 1979 tantang pamarentahan desa, statuih nagari dihilangkan manjadi desa, jo babarapo jorong ditingkekkan statuihnyo manjadi desa. Kaduduakan wali nagari juo dihapuih jo administrasi pamarintahan dijalankan dek para kapalo desa. Namun sajak bagulianyo reformasi pamarintahan jo otonomi daerah, mako sajak taun 2001, istilah "Nagari" digunokan baliak di provinsi iko.[33][34]

Pamarintahan nagari marupoan suatu struktur pamarintahan nan otonom, punyo teritorial nan jaleh jo manganuik adaik sabagai pangatua tata kahiduikan anggotanyo[35], sistem iko kamudian disasuaikan jo konstitusi nan balaku di Indonesia, kini pamarintah provinsi Sumatera Barat manatapkan pamarintah nagari sabagai pangelola otonomi daerah tarandah untuak daerah kabupaten manggantikan istilah pamarintah desa nan dipakai sabalunnyo. Sadangkan untuak nagari nan ado pado sistem pamarintahan kota masih sabagai limbago adaik alun manjadi bagian dari struktur pamarintahan daerah.

Nagari pado mulonyo dipimpin sacaro basamo dek para pangulu atau datuak di nagari tasabuik, kamudian pado maso pamarintah Hindia-Belanda dipiliah salah surang dari para pangulu tasabuik untuak manjadi wali nagari. Kudian dalam manjalankan pamarintahannyo, wali nagari dibantu dek babarapo urang kapalo jorong atau wali jorong, namun kini dibantu dek sekretaris nagari (setnag) jo babarapo pagawai nagari sipil (PNS) bagantuang jo kabutuahan tiok nagari. Wali nagari iko dipiliah dek anak nagari (panduduak nagari) sacaro demokratis dalam pamiliahan lansuang untuak 6 taun maso jabatan.

Dalam sabuah nagari dibantuak Kerapatan Adat Nagari, yakni lambago nan baanggotakan Tungku Tigo Sajarangan. Tungku Tigo Sajarangan marupoan pawakilan anak nagari nan tadiri dari Alim Ulama, Cadiak Pandai (kaum intelektual), jo Niniak Mamak marupokan pamimpin suku dalam suatu nagari, samo jo Badan Permusyawaratan Desa (BPD) dalam sistem administrasi desa. Sagalo kaputuihan pantiang nan kak diambiak salalu dimusyawarahkan antaro wali nagari jo Tungku Tigo Sajarangan di Balai Adaik atau Balairung Sari Nagari.

Daftar kabupaten jo kota[suntiang | suntiang sumber]

No. Kabupaten/kota Pusek pamarintahan Bupati/wali kota Laweh wilayah (km2)[36] Jumlah panduduak (2020)[37] Kecamatan Kelurahan/desa Lambang
Peta lokasi
1 Kabupaten Agam Lubuk Basung Andri Warman 1.804,30 529.138 16 -/82
Logo Agam Regency.PNG
2 Kabupaten Dharmasraya Pulau Punjung Sutan Riska Tuanku Kerajaan 2.961,13 228.591 11 -/52
Lambang Kabupaten Dharmasraya.png
3 Kabupaten Kepulauan Mentawai Tuapejat Yudas Sabaggalet 6.011,35 87.623 10 -/43
Logo Mentawai.jpg
4 Kabupaten Lima Puluh Kota Sarilamak Safaruddin Datuak Bandaro Rajo 3.571,14 383.525 13 -/79
Lambang Kabupaten Lima Puluh Kota.png
5 Kabupaten Padang Pariaman Parit Malintang Suhatri Bur 1.332,51 430.626 17 -/103
Lambang Kabupaten Padang Pariaman.gif
6 Kabupaten Pasaman Lubuk Sikaping Benny Utama 3.947,63 299.851 12 -/37
Wapen Pasaman.png
7 Kabupaten Pasaman Barat Simpang Ampek Hamsuardi 3.887,77 431.672 11 -/19
Pasaman Barat.png
8 Kabupaten Pesisir Selatan Painan Rusma Yul Anwar 5.749,89 504.418 15 -/182
Coat of arms of Pesisir Selatan Regency.svg
9 Kabupaten Sijunjung Muaro Sijunjung Benny Dwifa Yuswir 3.130,40 235.045 8 -/61
Lambang Kabupaten Sijunjung.jpeg
10 Kabupaten Solok Arosuka Epyardi Asda 3.738,00 391.497 14 -/74
Lambang Kabupaten Solok.png
11 Kabupaten Solok Selatan Padang Aro Khairunas 3.346,20 182.027 7 -/39
Lambang Kabupaten Solok Selatan.png
12 Kabupaten Tanah Datar Batusangkar Eka Putra 1.336,10 371.704 14 -/75
Lambang Kabupaten Tanah Datar.png
13 Kota Bukittinggi - Erman Safar 25,24 121.028 3 24/-
Logo Kota Bukittinggi.png
14 Kota Padang - Hendri Septa 693,66 909.040 11 104/-
Logo Padang.svg
15 Kota Padangpanjang - Fadly Amran 23,00 56.311 2 16/-
Logopadangpanjang.png
16 Kota Pariaman - Genius Umar 66,13 94.224 4 16/55
Lambang Kota Pariaman.png
17 Kota Payakumbuh - Riza Falepi 85,22 139.576 5 47/-
Lambang Kota Payakumbuh.png
18 Kota Sawahlunto - Deri Asta 231,93 65.138 4 10/27
Lambang Kota Sawahlunto.png
19 Kota Solok - Zul Elfian 71,29 73.438 2 13/-
Kotasolok.gif

Indeks Pambangunan Manusia[suntiang | suntiang sumber]

Barikuik iko Indeks Pambangunan Manusia (IPM) di kabupaten jo kota di Sumatera Barat. Laporan ko didapek dari Laporan Pambangunan Manusia Indonesia 2020 nan dipublikasikan dek Badan Pusat Statistik.[38]

Paringkek Kabupaten / Kota Nilai IPM (2020) Nagara Pambandiang (UNDP 2019)
Sangaik tinggi
1 Kota Padang 0.828  Romania
2 Kota Bukittinggi 0.805  Kuwait,  Mauritius,  Serbia
Tinggi
3 Kota Payakumbuh 0.789  Albania,  Cuba
4 Kota Solok 0.782  Sri Lanka
5 Kota Padang Panjang 0.779  Grenada,  Mexico,  Saint Kitts and Nevis,  Ukraine
6 Kota Pariaman 0.769  Colombia
7 Kota Sawahlunto 0.726  Tonga
8 Kabupaten Agam 0.724  Libya
Sumatera Barat 0.723  Libya
9 Kabupaten Tanah Datar 0.723  Libya
10 Kabupaten Dharmasraya 0.715  Samoa,  Turkmenistan
11 Kabupaten Padang Pariaman 0.706  Egypt
Manangah
12 Kabupaten Pesisir Selatan 0.699  Kyrgyzstan
13 Kabupaten Lima Puluh Kota 0.694  Kyrgyzstan
14 Kabupaten Solok 0.690  Maroko
14 Kabupaten Solok Selatan 0.690  Maroko
16 Kabupaten Pasaman Barat 0.684  Guyana,  Maroko
17 Kabupaten Sijunjung 0.677  Iraq
18 Kabupaten Pasaman 0.666  Cape Verde
19 Kabupaten Kepulauan Mentawai 0.610  Eswatini,  Ghana,  Vanuatu

Sabagai kabupaten baru, Dharmasraya mandapek nilai tatinggi di antaro kabupaten-kabupaten baru lainnyo.[39]

Pandidikan[suntiang | suntiang sumber]

Sumatera Barat panah manjadi pusek pandidikan di pulau Sumatera, utamonyo dalam pandidikan Islam jo surau sabagai basis utamo tampek pandidikan.[40] Pado maso kolonial panjajahan Balando, pandidikan Islam dikatapikan dibandiangan jo pandidikan model Hindia Balando nan dianggap labiah modern.[41]

Salapeh pangakuan kamardekaan Indonesia, di provinsi iko mulai banyak bamunculan lambago pandidikan utamonyo di taun 1950-an.[42] Ampia di satiok kabupaten jo kota dalam provinsi iko alah punyo perguruan tinggi, dan sabagian gadang ado di Padang, salah satu nan tanamo iyolah Universitas Andalas subagai kampus nan paliang tuo di Indonesia nan di lua Jao.

Parekonomian[suntiang | suntiang sumber]

Sacaro batahap parekonomian Sumatra Barat mulai bagerak positif salapeh mangalami takanan akibaik dampak gampo bumi tahun 2009 nan malando kawasan tasabuik. Dampak bancano ko nampak pado triwulan IV-2009, di mano patumbuahan ekonomi anyo mancapai 0,90%. Namun kini parekonomian Sumatra Barat alah mulai elok, jo tingkek patumbuahan di ateh rato-rato nasional. Pado taun 2012 ekonomi Sumatra Barat tumbuah sagadang 6,35%, labiah ancak dibandiangan taun sabalunnyo nan anyo sagadang 6,25%. Dan pado triwulan I-2013 parekonomian Sumatra Barat alah tumbuah mancapai 7,3%. Tingginyo patumbuahan ekonomi Sumatra Barat dalam tigo taun tarakhia, alah manurunkan tingkek kamiskinan di provinsi ko dari 8,99% (2011) manjadi 8% (2012). Untuak Pendapatan Domestik Regional Bruto (PDRB), pado taun 2012 provinsi ko mampunyoi PDRB mancapai Rp 110,104 triliun, jo PDRB per kapita sagadang Rp 22,41 juta.

Industri Pangolahan[suntiang | suntiang sumber]

Kantua pusek PT. Semen Padang di Indarung, Padang.

Industri Sumatra Barat didominasi dek industri skala kaciak atau rumah tanggo. Jumlah unit industri sabanyak 47.819 unit, tadiri dari 47.58 unit industri kaciak jo 234 industri gadang manangah, jo pabandiangan 203: 1. Pado taun 2001, investasi industri gadang manangah mancapai Rp 3.052 miliar, atau 95,60% dari total investasi, sadang industri kaciak investasinyo anyo Rp 1.412 miliar atau 4,40% sajo dari total investasi. Nilai produksi industri gadang manangah taun 2001 mancapai Rp 1.623 miliar, iyolah 60% dari toal nilai produksi, jo nilai produksi industri kaciak anyo mancapai Rp 1.090 miliar, atau 40% dari total nilai produksi.[43]

Untuak industri pangolahan simin, pado taun 2012 Sumatra Barat alah mamproduksi sabanyak 6.522.006 ton, labiah tinggi dibandiangan taun lalu nan anyo 6.151.636 ton. Samantaro volumen panjualan pado taun 2012 sabanyak 6.845.070 ton, maningkek 10,20% dibandiangan taun lalu nan sabnyak 6.211.603 ton.

Patambangan[suntiang | suntiang sumber]

Sumatra Barat mampunyoi potensi bahan tambang golongan A, B, C. Bahan tambang golongan A, iyolah batu baro ado di kota Sawahlunto. Samantaro bahan tambang golongan B nan tadiri dari aia raksa, balerang, pasia basi, timbago, timah itam, jo perak taseba di Sijunjung, Dharmasraya, Solok, Solok Selatan, Lima Puluh Kota, Pasaman, jo Tanah Datar. Bahan tambang golongan C manyeba di saluruah kabupaten jo kota, nan banyaknyo tadiri dari pasia, batu, jo karekel.[43]

Transportasi[suntiang | suntiang sumber]

Transportasi dari dan ka Sumatra Barat kini dihubuangkan dek Palabuahan Udaro Internasional Minangkabau jo Palabuahan lauik Taluak Bayua. Palabuahan Udaro Minangkabau mulai aktif baoperasi pado akhia taun 2005 manggantikan Palabuahan Udaro Tabiang. Palabuahan udaro ko tahubuang jo babagai kota utamo di Indonesia, mode Jakarta, Medan, Batam, Bandung, sarato Kuala Lumpur di Malaysia. Untuak maningkekan aksebilitas Palabuahan Udaro Minangkabau, kini pamarintah manyadiokan kareta palabuahan udaro dari dan manuju pusek kota Padang.

Salain Taluak Bayua, transportasi lauik untuak jarak dakek bapusek di Palabuahan Muaro. Palabuahan ko antaro lain juo malayani transportasi manuju Kapulauan Mentawai jo manggunokan kapa feri atau speed boat. Palabuahan Muaro juo manjadi tampek basanda kapa-kapa pesiar (yacht) dan kapa-kapa nalayan.


Banyak jalan pangubuang sarupo Jalan Linteh Sumatra nan mambantang sapanjang provinsi, ujuang barat daya manuju ka Medan jo uj uang tenggara manuju ka Jakarta, jalan antaro Padang jo Bukittinggi, sarato jalan antaro Bukittinggi jo Pekanbaru. Pamarintah provinsi barencana maningkekan kaduo jalan nan tarakhia disabuik salamo babarapo taun ka muko untuak malancaran jalan nan acok tasandek.[44]

Pado Januari 2012, Kelok Sambilan sapanjang 970 meter alah siap untuak dipakai dan rasmi dibukak untuak lalu linteh pado April 2012. Kelok Sambilan nan aratinyo sambilan tikungan tajam marupokan area nan malalui jalan nan taapik bukik jo tabiang nan rapek di tangah lambah jo panorama nan rancak, tapi mambuek macet.[45] Sasudah jalan layang dibukak, jalan Kelok Sambilan lamo masih tatap dibukak basamo jo jalan baru untuak tujuan palancongan.

Untuak transportasi antar kota, kini dilayani dek bus-bus AKDP dan AKAP sarato travel. Di Padang, angkutan umum bapusek di Terminal Bingkuang Aia Pacah. Di Bukiktinggi bapusek di Terminal Aua Kuniang, Payokumbuah bapusek di Terminal Koto Nan Ampek, dan Solok bapusek di Terminal Bareh Solok.

Transportasi darek lainnyo, kareta api masih digunoan untuak jalua dari Padang ka Sawahlunto, nan malalui Padang Panjang jo Solok. Pado jalua ko, kareta api anyo dipagunokan sabagai sarana paangkuik batubaro. Sadang dari Padang manuju Pariaman, kini masih digunoan untuak angkutan panumpang. Transportasi darek lainnyo nan masih digunoan, di antaronyo taksi, oplet, jo bendi.

Pariwisata, Seni, jo Budayo[suntiang | suntiang sumber]

Titian Aka, objek turis nan potensial di Pasisia Selatan
Lambah Harau di Limo Puluah Kota
Ombak Kapulauan Mentawai jadi tantangan para pasalancar

Pariwisata[suntiang | suntiang sumber]

Badasarkan data dari Badan Pusat Statistik, Sumatera Barat tacatek sabagai salah satu provinsi jo jumlah kunjungan wisatawan tabanyak.[46] Sumatera Barat punyo ampiang sado jinih objek wisata alam sarupo lauik, pantai, danau, gunuang jo ngarai, salain objek wisata budayo. Akomodasi hotel alah banyak mulai dari kelas melati sampai bintang ampek. Agen tour jo travel di bawah kaanggotaan ASITA Sumatera Barat alah labiah dari 100 buah. Untuak malangkoki fasilitas panunjang pariwisata, pamarintah juo manyadiokan kareta api wisata nan baoperasi pado jam-jam tatantu.

Objek-objek wisata nan dikunjuangi para wisatawan di antaronyo, Titian Aka di kecamatan Bayang; Rumah Gadang Mande Rubiah di Lunang; Istano Karajaan Inderapura di kecamatan Pancung Soal; Pulau Cingkuak jo paninggalan Benteng Balando jo Puncak Langkisau di Painan, kabupaten Pesisir Selatan, Danau Maninjau jo Puncak Lawang Ambun Pagi di kabupaten Agam, Lambah Anai; Istano Basa Pagaruyung, Danau Singkarak di kabupaten Tanah Datar, Danau Talang; Danau Diateh jo Danau Dibawah dikana juo jo sabutan Danau kembar di kabupaten Solok, Panorama Ngarai Sianok; Benteng Fort de Kock; Jam Gadang di kota Bukittinggi, Pantai Aia Manih; Pantai Muaro; Pantai Caroline; Pulau Sikuai di kota Padang, Tampek wisata Harau di kabupaten Lima Puluh Kota, Tampek wisata Ngalau di kota Payakumbuh, Candi Padang; Batu basurek Padang Roco di Kabupaten Dharmasraya, Pantai Kata; Pantai Gandoriah di kota Pariaman, Pantai Arta; Malibo Anai di kabupaten Padang Pariaman.

Samantaro itu babagai informasi jo literatur sijarah manganai Sumatera Barat jo kabudayoan Minangkabau sacaro umum dapek dijumpai di Pusek Dokumentasi jo Informasi Kabudayoan Minangkabau (PDIKM), nan talatak di tangah-tangah objek wisata Pakampuangan Minangkabau (Minangkabau Village) di kota Padang Panjang. Di PDIKM tadapek barupo dokumentasi foto mikrograf surek kaba, pakaian tradisional, kaset rekaman lagu daerah, dokumentasi surek-surek kapamarintahan jo alua sijarah masyarakaik Minangkabau sacaro taparinci khususnyo samanjak abaik 18 (periode panjajahan Balando) hinggo era 1980'an. Salain itu sumber literatur lain dapek ditalusuri di Perpustakaan KITLV (Koninklijk Instituut voor Taal-, Land- en Volkenkunde) jo di Perpustakaan Universitas Leiden, duo-duonyo di Leiden, Balando.

Olahraga[suntiang | suntiang sumber]

Provinsi Sumatera Barat punyo babarapo event olahraga nan baskala lokal, nasional maupun internasional dalam maningkekan pariwisatanyo, di antaronyo lomba pacu kudo. Palombaan pacu kudo iko alah manjadi tradisi jo manjadi bagian dari budayo masyarakaik Minangkabau khususnyo, kini alah manjadi rangkaian palombaan jo babarapo kota/kabupaten lain di Sumatera Barat nan mandapek kasampatan manjadi tuan rumah satu kali tiok tahunnyo, samantaro pesertanyo juo ado dari lua Sumatera Barat.[47] Babarapo lapangan pacuan kudo tasabuik taseba di kota jo kabupaten nan ado dalam provinsi iko.

Samantaro Tour de Singkarak pado taun 2014, alah mamasuaki taun kaampeknya. Kajuaroan iko sacaro rasmi alah manjadi agenda paalekan tahunan Union Cycliste Internationale (UCI). Babarapo kawasan wisata manjadi bagian dari jalur lintasan lomba tamasuk Lambah Harau, Danau Maninjau, Kelok 44, jo danau kamba Diateh jo Dibawah.[48] Di sisi lain, cabang ulahrago parahu naga (dragon boat) juo rutin diadokan di Sumatera Barat, sarupo kajuaroan Parahu Naga Internasional di Padang nan mandatangkan paserta dari mancanegara jo lua provinsi, sarato kajuaroan Dayuang Tradisional di Pantai Carocok, Painan jo Dharmasraya.

Musik[suntiang | suntiang sumber]

Nuansa Minangkabau nan ado di dalam satiok musik Sumatera Barat nan dicampua jo jinih musik apopun kini pasti ka nampak dari satiok karya lagu nan baredar di masyarakaik. Hal iko dek musik Minang dapek diracik jo aliran musik jinih apopun sahinggo lamak didanga jo dapek ditarimo dek masyarakaik. Unsur musik pambari nuansa tadiri dari instrumen alek musik tradisional saluang, bansi, talempong, rabab, pupuik, sarunai, jo gandang tabuik.

Ado pulo saluang jo dendang, yakni panyampaian dendang (carito balagu) nan diiriangi saluang nan dikana juo jo namo sijobang.[49]

Musik Minangkabau barupo instrumentalia jo lagu-lagu dari daerah iko pado umumnyo basipaik melankolis. Hal iko bakaitan arek jo struktur masyarakaiknyo nan punyo raso pasudaroan, hubuangan kakaluargoan jo kacintoan ka kampuang laman nan tinggi ditunjang jo kabiasoan pai marantau.

Industri musik di Sumatera Barat samakin bakambang jo muncuanyo seniman-seniman Minang nan dapek mambaurkan musik modern ka dalam musik tradisional Minangkabau. Pakambangan musik Minang modern di Sumatera Barat alah dimulai sajak taun 1950-an ditandoi jo lahianyo Orkes Gumarang.

Elly Kasim, Tiar Ramon jo Yan Juned adolah panyanyi daerah Sumatera Barat nan tanamo di era 1970-an hinggo kini.

Parusahoan-parusahoan rekaman di Sumatera Barat antaro lain: Tanama Record, Planet Record, Pitunang Record, Sinar Padang Record, Caroline Record nan talatak di kota Padang jo Minang Record, Gita Virma Record nan talatak di kota Bukittinggi.

Kini para panyanyi, pancipta lagu, jo panata musik di Sumatera Barat banauang di bawah organisasi PAPPRI (Pasatuan Artis Panyanyi Pancipta lagu Panata musik Rekaman Indonesia) jo PARMI (Pasatuan Artis Minang Indonesia).

Sabuah patunjuakan randai

Tarian tradisional[suntiang | suntiang sumber]

Sacaro garih gadang seni tari dari Sumatera Barat adolah dari adaik budayo etnis Minangkabau jo etnis Mentawai. Kakhasan seni tari Minangkabau umumnyo dipangaruahi dek agamo Islam, kaunikan adaik matrilineal jo kabiasoan marantau masyarakaiknyo juo maagiah pangaruah gadang dalam jiwa sabuah tari tradisi nan basipaik klasik, di antaronyo Tari Pasambahan, Tari Piriang, Tari Payuang jo Tari Indang. Samantaro itu tadapek pulo suatu patunjuakan khas etnis Minangkabau lainnyo barupo papaduan unik antaro seni bela diri nan disabuik silek jo tarian, nyanyian jo seni paran (acting) nan dikana jo namo Randai.[50]

Sadangkan untuak tarian khas etnis Mentawai disabuik Turuk Laggai. Tarian Turuk Langai iko umumnyo bacarito tantang tingkah laku hewan, sahinggo judulnyo pun disasuaikan jo namo-namo hewan tasabuik, misalnyo tari buruang, tari cigak, tari ayam, tari ula jo sabagainyo.[51]

Istano Basa di Pagaruyuang dibangun jo arsitektur khas Minang

Rumah Adaik[suntiang | suntiang sumber]

Rumah adaik Sumatera Barat khususnyo dari etnis Minangkabau disabuik Rumah Gadang. Rumah Gadang biasonyo dibangun di ateh sabidang tanah miliak suku/kaum tasabuik sacaro turun tamurun.[52] Indak jauah dari komplek rumah gadang tasabuik biasonyo juo dibangun sabuah surau kaum nan bafungsi sabagai tampek ibadah jo tampek tingga lalaki dewasa kaum tasabuik namun alun manikah.

Rumah Gadang iko dibuek babantuak ampek pasagi panjang jo dibagi ateh duo bahagian muko jo balakang,[53] umumnyo babahan kayu, jo sapinteh nampak co bantuak rumah pangguang jo atok nan khas, manonjol sarupo tanduak kabau, masyarakaik satampek manyabuiknyo Gonjong jo dahulunyo atok iko babahan ijuak sabalun baganti jo atok seng. Rumah Bagonjong[54] iko manuruik masyarakaik satampek diilhami dari tambo, nan mangisahkan kadatangan nenek moyang mareka jo kapa dari lauik. Ciri khas lain rumah adaik iko adolah indak mamakai paku basi tapi manggunokan pasak dari kayu, namun cukuik kuek sabagai pangikek.[55]

Samantaro etnis Mentawai juo punyo rumah adaik nan babantuak rumah panggung gadang jo tinggi lantai dari tanah mancapai satu meter nan disabuik jo uma.[56] Uma iko dihuni sacaro basamo dek limo sampai sapuluah kaluargo. Sacaro umum konstruksi uma iko dibangun jo indak manggunokan paku, tatapi dipasak jo kayu sarato sistem sambungan silang batakik.

Sanjato Tradisional[suntiang | suntiang sumber]

Sanjata tradisional Sumatera Barat adolah Karih jo Kurambiak. Karih biasonyo dipakai dek kaum laki-laki nan dilatakkan di sabalah muko, jo umumnyo dipakai dek para pangulu tarutamo dalam satiok acaro rasmi ado tarutamo dalam acaro malewa gala, salain itu juo biaso dipakai dek para marapulai dalam acaro majlis pakawinan nan masyarakaik satampek manyabuiknyo baralek. Sadangkan kurambiak marupoan sanjato tajam ketek nan bantuaknyo malangkuang co kuku harimau, dek memang tainspirasi dari kuku binatang lia tasabuik. Sanjato iko dipakai dek para pandeka silek Minang dalam pataruangan jarak pendek, tarutamo nan manggunokan jurus silek harimau. Babagai jinih sanjato lainnyo juo pernah digunokan sarupo tombak, pedang panjang, panah, sumpik jo sabagainyo.

Masakan khas[suntiang | suntiang sumber]

Nasi Kapau salah satu masakan di Sumatera Barat

Dalam dunia kuliner, Sumatera Barat tanamo jo masakan Padang jo restoran Padang, jo citaraso nan padeh, dapek ditamukan ampiang di sadoalah panjuru Nusantara, bahkan sampai ka lua nagari.[57] Babarapo contoh makanan dari Sumatera Barat nan cukuik populer adolah Randang, Sate Padang, Dendeng Balado, Itiak Lado Mudo, Soto Padang, jo Bubua Kampiun.

Satiok kawasan di Sumatera Barat, punyo makanan sabagai ciri khas daerah, nan biaso dijadikan sabagai buah tangan (oleh-oleh) misalnyo: kota Padang tanamo jo bingkuang, kota Padangpanjang tanamo jo pergedel jaguang, kota Bukittinggi jo karupuak sanjai, kota Payakumbuh jo galamai. Salain itu, Sumatera Barat juo punyo ratusan resep, sarupo kipang kacang, bareh randang, dakak-dakak, rakik maco, pinyaram, Karupuak Balado, jo tamasuak juo maasiakan Kopi Luwak (Kopi siso Musang).

Pers jo Media[suntiang | suntiang sumber]

TVRI Sumatera Barat

Ampia sadoalah saluran satasiun televisi nasional alah dapek manjangkau kawasan Sumatera Barat. Salain itu provinsi iko punyo juo babarapo satasiun televisi lokal, sarupo TVRI Sumatera Barat, Padang TV, Minang TV, TV E, Favorit TV jo Bukittinggi Televisi (BiTV).

Rato-rato di satiok kabupaten jo kota di provinsi iko alah punyo pamancar radio salain miliak pamarintah juo swasta, sarupo RRI Padang, Radio Classy FM, Radio Jelita FM, Radio SK FM, Radio Fanesa 5 FM jo sabagainyo.

Sumatera Barat juo banyak punyo media cetak jinih surek di antaronyo ANTARA (Kantor Berita Indonesia) Biro Sumbar,[58] Harian Padang Ekspres, Harian Haluan, Harian Singgalang jo lain-lain. Media cetak tasabuik juo tasadio jo dapek diakses sacaro online malalui internet.

Pado awalnyo Sumatera Courant marupoan koran partamo nan tabik di Sumatera Barat dek pamarintah Hindia-Balando pado taun 1862. Salanjuiknyo taun 1877 tabik Padangsche Handelsblad miliak swasta. Kaduo surek kaba iko manggunokan bahaso Balando, jo baru pado taun 1890 tabik surek kaba bulanan Pelita Kecil nan alah manggunokan bahaso Melayu.[59]

Caliak juo[suntiang | suntiang sumber]

Rujuakan[suntiang | suntiang sumber]

  1. "Arti Lambang Tuah Sakato". Pemprov Sumbar. Diakses tanggal 20 Januari 2020. 
  2. a b c "Provinsi Sumatra Barat Dalam Angka 2021" (pdf). BPS Sumbar. hlm. 139-365. Diakses tanggal 27 Februari 2021. 
  3. Indonesia's Population: Ethnicity and Religion in a Changing Political Landscape. Institute of Southeast Asian Studies. 28 September 2003. 
  4. "Visualisasi Data Kependuduakan - Kementerian Dalam Negeri 2020". www.dukcapil.kemendagri.go.id. Diakses tanggal 27 Februari 2021. 
  5. "Metode Baru Indeks Pembangunan Manusia 2019-2020". www.bps.go.id. Diakses tanggal 26 Februari 2021. 
  6. http://www.dpr.go.id/dokjdih/document/uu/1301.pdf
  7. "Rincian Alokasi Dana Alokasi Umum Provinsi/Kabupaten Kota Dalam APBN T.A 2020" (PDF). www.djpk.kemenkeu.go.id. (2020). Diakses tanggal 16 Februari 2021. 
  8. a b c d Asnan, Gusti (2007). Memikir ulang regionalisme: Sumatera Barat tahun 1950-an. Yayasan Obor Indonesia. ISBN 978-979-461-640-6. 
  9. Amran, Rusli (1981). Sumatra Barat hingga Plakat Panjang. Penerbit Sinar Harapan. 
  10. "Potensi Sektor Kelautan dan Perikanan Sumatera Barat". Dinas Kelautan dan Perikanan Sumatera Barat. Diakses tanggal 2012-05-16. 
  11. Sieh, Kerry; Natawidjaja, Danny (December 10, 2000). "Neotectonics of the Sumatran fault, Indonesia" (PDF). Journal of Geophysical Research. 105 (B12): 28295–28326. doi:10.1029/2000JB900120. 
  12. Sieh, K.; Natawidjaja, D. (2000). "Neotectonics of the Sumatran fault, Indonesia" (PDF). Journal of Geophysical Research, 105 (B12). hlm. 28, 295–28, dan 326. 
  13. a b c d e f Dt. Simaradjo, Nazwier. 1993. Cabik-Cabik Bulu Ayam, Seputar Proses Pencalonan dan Pemilihan Gubernur Sumatra Barat Periode 1992-1997. Padang: Yayasan Muballigh Sumatra Barat.
  14. https://books.google.co.id/books?id=GQJwAAAAMAAJ&q=%22Desember+1948+sampai+tanggal+1%22&dq=%22Desember+1948+sampai+tanggal+1%22&hl=en&sa=X&ved=2ahUKEwi5ks_YtejqAhUhguYKHYJKBDIQ6AEwAXoECAEQAg
  15. Asnan, Gusti (2007) (dalam bahaso id). Memikir ulang regionalisme: Sumatera Barat tahun 1950-an. Yayasan Obor Indonesia. ISBN 978-979-461-640-6. https://books.google.co.id/books?id=XFqIIm2E8cMC&pg=PA93&lpg=PA93&dq=GUBERNUR+SUMATERA+TENGAh+%22OKTOBER+1949%22&source=bl&ots=MGRid7G9IP&sig=ACfU3U2t8M2zvb-4410RDLjozCFABrooBw&hl=en&sa=X&ved=2ahUKEwjCpP-qsujqAhWPILcAHRkDCZkQ6AEwBnoECAoQAQ#v=onepage&q=GUBERNUR%20SUMATERA%20TENGAh%20%22OKTOBER%201949%22&f=false. 
  16. https://books.google.co.id/books?id=VBRIJAQx3zsC&pg=PA312&dq=GUBERNUR+nasroen++%22+Agustus+1950%22&hl=en&sa=X&ved=2ahUKEwiJqvWJuOjqAhVTjeYKHf5rCncQ6AEwAHoECAYQAQ#v=onepage&q=GUBERNUR%20nasroen%20%20%22%20Agustus%201950%22&f=false
  17. Diberhentikan
  18. Penjabat Gubernur[13]
  19. Rochman, Fathur (19 Oktober 2014). Auliani, Palupi Annisa, ed. "Siapa Almarhum Harun Al Raysid Zain yang Ditakziahi Jusuf Kalla". Kompas.com. Diakses tanggal 23 November 2014. 
  20. https://books.google.co.id/books?id=qNZwAAAAMAAJ&q=%22sebagai+Pejabat+Gubernur+yang+akan+menjalankan+tugas%22&dq=%22sebagai+Pejabat+Gubernur+yang+akan+menjalankan+tugas%22&hl=en&sa=X&ved=0ahUKEwjRqIOFwtrpAhUD63MBHYmcD88Q6AEIKDAA
  21. Alkatiri, Mansyur; Putra, Maifil Eka; Abidin, Hamid (30 Maret 1999). "Gub Muchlis Ibrahim Mengundurkan Diri". Ummat. Ohio University. Diakses tanggal 15 Desember 2014. 
  22. Sudarsono; Tjiauw, Sen; Nauli, Indra Sakti (29 Maret 1999). "Muchlis Tersodok Kursi Wagub". Majalah Forum. Ohio University. Diakses tanggal 15 Desember 2014. 
  23. "M. Thamrin akan Dilantik Jadi Pj Gubernur Sumbar, Senin". Detik.com. 11 Maret 2005. Diakses tanggal 7 Maret 2019. 
  24. "Penjabat Gubernur Sumbar M Thamrin Gantikan Zainal Bakar". Detik.com. 14 Maret 2005. Diakses tanggal 7 Maret 2019. 
  25. Widjaya, Ismoko; Erinaldi (26 Oktober 2009). "Enam Menteri Tiba di Padang Bahas Pasca-gempa". Vivanews.com. Padang: PT Viva Media Baru. Diakses tanggal 15 Desember 2014. 
  26. "Gubernur Sumbar Dilantik di Garasi Mobil". JPNN.com. 07 Desember 2009. Diakses 2 Januari 2021
  27. Widjaya, Ismoko; Erinaldi (15 Agustus 2010). "Irwan Prayitno Dilantik Jadi Gubernur Sumbar". VIVA.co.id. Diakses tanggal 23 Juni 2014. 
  28. Faruqi, Andri El (11 Agustus 2015). "Reydonnyzar Moenek Jadi Penjabat Gubernur Sumatra Barat". Tempo. Padang: Tempo Inti Media. Diakses tanggal 16 Agustus 2015. 
  29. "Sebelum Dilantik, Kepala Daerah Terpilih Jalan Kaki Bersama Jokowi" Situs Resmi Kementerian Dalam Negeri. 12 Februari 2016. Diakses 19 Februari 2016.
  30. Tito Tunjuk Alwis Jadi Plh Gubernur Sumbar RRI. 11 Februari 2021. Diakses 12 Februari 2021.
  31. Hamdani Dipercaya Jadi Pj Gubernur Sumbar RRI. 18 Februari 2021. Diakses 18 Februari 2021.
  32. "65 Anggota DPRD Sumbar Dilantik". news.detik.com. 28-08-2019. Diakses tanggal 31-10-2019. 
  33. Franz and Keebet von Benda-Beckmann, "Recentralization and Decentralization in West Sumatra," in Holtzappel and Ramstedt (eds.), Decentralization and Regional Autonomy in Indonesia: Implementation and Challenges, Singapore and Leiden, 2009, pp. 233ff. at 302.
  34. Sasdi, Ardimas (January 25, 2008). "West Sumatra reinvents its original roots". The Jakarta Post. Diarsipkan dari versi asli tanggal January 25, 2008. 
  35. Haris, Syamsuddin, 2005, Pemilu langsung di tengah oligarki partai: proses nominasi dan seleksi calon legislatif Pemilu 2004, Gramedia Pustaka Utama, ISBN 978-979-22-1695-0.
  36. "Kode dan Data Wilayah Administrasi Pemerintahan (Permendagri No.137-2017)". Kementerian Dalam Negeri Republik Indonesia (dalam bahasa Indonesia). Diarsipkan dari versi asli tanggal 2017-04-29. Diakses tanggal 2018-07-09. 
  37. "(Hasil SP dan Hasil Supas) Jumlah Penduduk Menurut Jenis Kelamin dan Kabupaten/Kota di Sumatera Barat (Jiwa), 2010-2020". Badan Pusat Statistik Provinsi Sumatera Barat (dalam bahasa Indonesia). Diakses tanggal 2021-03-17. 
  38. "Indeks Pembangunan Manusia (IPM) Provinsi Sumatera Barat Menurut Kabupaten/Kota [Metode Baru] 2018-2020" (dalam bahasa Indonesia). Diakses tanggal 2020-12-27. 
  39. Indrasafitri, Dina; Sufa, Theresia (April 26, 2011). "Awards note progress in regional autonomy". The Jakarta Post. Diarsipkan dari versi asli tanggal April 27, 2011. 
  40. Marsden, William, (2009), The History of Sumatra, BiblioBazaar, ISBN 978-0-559-09304-3.
  41. Arif, Mahmud, (2008), Pendidikan Islam Transformatif, PT LKiS Pelangi Aksara, ISBN 978-979-1283-40-3.
  42. Asnan, Gusti, (2007), Memikir ulang regionalisme: Sumatera Barat tahun 1950-an, Yayasan Obor Indonesia, ISBN 978-979-461-640-6.
  43. a b http://www.bi.go.id Profil Sumbar
  44. Tularji (April 25, 2005). "6 Infrastructure projects to boost West Sumatra's rank". Bisnis Indonesia. Diarsipkan dari versi asli tanggal September 29, 2007. 
  45. "Kelok Sembilan overpass set to open in April". The Jakarta Post. January 19, 2012. Diarsipkan dari versi asli tanggal May 22, 2013. 
  46. (Inggirih) Time for N. Maluku to become tourist destination. Antaranews. 8 Mei 2011. Diakses pada 21 November 2011.
  47. travel.kompas.com Pacu "Kudo" Bangkitkan Pariwisata Lokal (diakses 28 Oktober 2010)
  48. http://www.tourdesingkarak.com TdS (diakses pada 6 Juni 2011)
  49. Phillips, Nigel, (1981), Sijobang: sung narrative poetry of West Sumatra, Cambridge University Press, ISBN 978-0-521-23737-6.
  50. Pauka K., (1998), Theater and martial arts in West Sumatra: Randai and silek of the Minangkabau, Ohio University Press, ISBN 978-0-89680-205-6.
  51. http://www.indosiar.com Sajian Tarian Khas Mentawai (diakses pada 25 juli 2010)
  52. Graves, Elizabeth E., (2007), Asal-usul elite Minangkabau modern: respons terhadap kolonial Belanda abad XIX/XX, Jakarta:Yayasan Obor Indonesia, ISBN 978-979-461-661-1.
  53. Azinar Sayuti, Rifai Abu, (1985), Sistem ekonomi tradisional sebagai perwujudan tanggapan aktif manusia terhadap lingkungan daerah Sumatera Barat, hlm. 202, Departemen Pendidikan dan Kebudayaan, Proyek Inventarisasi dan Dokumentasi Kebudayaan Daerah.
  54. Navis, A.A., Cerita Rakyat dari Sumatera Barat 3, Grasindo, ISBN 979-759-551-X.
  55. Mengenal Rumah Adat, Pakaian Adat, Tarian Adat, Dan Senjata Tradisional, PT Niaga Swadaya, ISBN 979-788-145-8.
  56. Schefold R., (1991), Mainan bagi roh: kebudayaan Mentawai, PT Balai Pustaka, ISBN 979-407-274-5.
  57. Ramli, Andriati, 2008, Masakan Padang: Populer & Lezat, Niaga Swadaya, ISBN 978-979-1477-09-3.
  58. http://www.antara-sumbar.com Antara Sumbar
  59. Syamdani, (2009), PRRI, pemberontakan atau bukan, Media Pressindo, ISBN 978-979-788-032-3

Bacoan lainnyo[suntiang | suntiang sumber]

  • (Indonesia) Rusli Amran, (1981), Sumatra Barat hingga Plakat Panjang, Jakarta: Sinar Harapan.
  • (Indonesia) Audrey R. Kahin, (2005), Dari pemberontakan ke integrasi: Sumatra Barat dan politik Indonesia, 1926-1998, Yayasan Obor Indonesia, ISBN 979-461-519-6
  • (Indonesia) A.A. Navis, (1984), Alam Takambang jadi Guru. Jakarta: PT. Grafiti Pers.
  • (Indonesia) M.D. Mansoer, (1970), Sedjarah Minangkabau, Jakarta: Bhratara.

Pautan lua[suntiang | suntiang sumber]

Koordinat: 0°56′16.94″S, 100°21′38.3″E


Kutipan rusak: Tag <ref> ado untuak grup banamo "ket.", tapi indak ado <references group="ket."/>