Kota Sawahlunto

Dari Wikipedia baso Minang, ensiklopedia bebas
Jump to navigation Jump to search
Kota Sawahlunto
Balaikota Sawahluto

Logo
Motto: Sawah Lunto Kota Wisata Tambang Yang Berbudaya
Latak Sawah Lunto di Sumatera Barat
Kota Sawahlunto terletak di Indonesia
Latak Sawah Lunto di Indonesia
Koordinat: 0°40′40,16″LU 100°47′13,21″BT / 0,66667°LS 100,78333°BT / -0.66667; 100.78333
Nagara Indonesia
Provinsi Sumatera Barat
Hari jadi 1 Desember 1888
Pamarintahan
 • Walikota Ali Yusuf, S.Pt.
 • Wakil Walikota Ismed, S.H.
 • Ketua DPRD Emeldi, S.E.
 • Sekretaris Daerah Zohirin Sayuti
Area
 • Total 273.45 km2 (105.58 sq mi)
Populasi panduduak (2008[1])
 • Panduduak 54.310
 • Kapadatan 200/km2 (510/sq mi)
Zona wakatu WIB (UTC+7)
Kode Area +62 754
Laman web www.sawahluntokota.go.id

Kota Sawahlunto adolah salah satu kota di provinsi Sumatera Barat, Indonesia. Kota nan talatak 95 km sabalah timua lauik Kota Padang iko, dikuliliangi dek 3 kabupaten di Sumatera Barat, yakni Kabupaten Tanah Data, Kabupaten Solok, jo Kabupaten Sijunjuang. Kota Sawahlunto punyo laweh 273,45 km² nan tadiri dari 4 kacamatan nan punyo jumalah panduduak labiah dari 54.000 jiwa. Pado maso pamarentah Hindia-Balando, Kota Sawalunto tamusaua sabagai kota tambang batu baro. Kota iko sampek mati, satalah panambangan batu baro dihantian.

Kini Kota Sawahlunto bakambang manjadi kota wisata tuo nan multi-etnik, sainggo manjadi salah satu kota tuo taelok di Indonesia.[2] Di kota nan didirian pado taun 1888 iko, banyak badiri bangunan-bangunan tuo paninggalan Balando. Sabagian alah ditatokan sabagai cagar budaya dek pamarentah satampek dalam rangka mandorong pariwisata jo mancanangkan Sawahlunto manjadi Kota Wisata Tambang yang Berbudaya (Minang: Kota Wisata Tambang nan babudayo).[3]

Sejarah[suntiang | suntiang sumber]

Namo Sawahlunto manuruik legenda nan ado barasal dari kato "sawah" jo "lunto". Jauah sabalum kadatangan Balando, di kawasan iko tadapek sawah-sawah nan di sakitanyo tumbuah pepohonan nan alun dikatahui namonyo. Jikok ado nan mananyoan namo batang tasabuik, beko dijawek alun tau nan lamo-kalamoan barubah tutua manjadi "lunto", sabuikan dalam bahasa Minangkabau nan ba arti "tidak tahu".

Sajarah dijadikannyo Sawahlunto sabagai kota takaik jo panalitian nan dikarajoan dek geolog asa Belanda ka padalaman Minangkabau (wakatu itu dikenal sabagai Dataran Tinggi Padang), nan ditugaskan dek Gubernur Jenderal Hindia-Belanda. Panalitian patamo dikarajoan dek Ir. C. De Groot van Embden pado taun 1858, kamudian dilanjuikan dek Ir. Willem Hendrik de Greve pado taun 1867. Dalam panalitian De Greve, dikatahui jikok tadapek 200 juta ton batu baro nan takanduang di sakitar aliran Batang Ombilin, salah satu sungai nan ado di Sawahlunto.[4] Sajak panalitian tasabuik diumumkan ka Batavia pado taun 1870, pamarintah Hindia-Belanda mulai marancanokan pambangunan sarana jo prasarana nan dapek mamudahkan eksploitasi batu baro di Sawahlunto. Salanjuiknyo Sawahlunto juo dijadikan sabagai kota pado taun 1888, tapeknyo pado tanggal 1 Desember nan kamudian ditatokan sabagai Hari Jadi kota Sawahlunto.

Kota iko mulai mamproduksi batu baro sajak taun 1892.[5] Sairiang jo itu, kota iko mulai manjadi kawasan pamukiman pakarajo tambang, nan taruih bakambang manjadi sabuah kota ketek jo panduduak nan intinyo adolah pagawai jo pakarajo tambang. Sampai taun 1898, usaho tambang di Sawahlunto masih mangandalkan narapidana nan dipaso bakarajo untuak manambang nan dibayiajo harago murah. Pado taun 1889, pamarintah Hindia-Belanda mulai mambangun jalur kereta api manuju kota Padang untuak mamudahkan pangangkuikan batu baro kaluar dari kota Sawahlunto. Jalur kereta api tasabuik mancapai kota Sawahlunto pado taun 1894, sahinggo sajak angkutan kereta api mulai dioperasian, produksi batu baro di kota iko taruih mangalami paningkekan hinggo mancapai ratusan ribu ton per taun.

Geografi[suntiang | suntiang sumber]

Bantang alam kota Sawahlunto mampunyoi katinggian nan sangek bavariasi yaitu antaro 250 meter sampai 650 meter di ateh pamukaan lauik. Bagian utaro kota iko mampunyoi topografi nan relatif data meski barado di sabuah lembah, tarutamo daerah nan dilalui dek Batang Lunto, dimano di sakita sungai ikolah dibantuaknyo pamukiman jo fasilitas-fasilitas umum nan didirian sajak maso pamarintahan Hindia-Belanda. Samantaro itu bagian timur jo selatan kota iko relatif curam jo kamiriangan labiah dari 40%.

kota Sawahlunto talatak di daerah dataran tinggi nan marupakan bagian dari Bukit Barisan nan mampunyoi laweh 273,45 km². Dari laweh tasabuik, labiah dari 26,5% atau sakita 72,47 km² marupoan kawasan pabukikan nan ditutuik hutan linduang. Panggunoan tanah nan dominan di kota iko aoalah pakabunan sekitar 34%, jo danau nan tabentuak dari bakeh galian tambang batu bara sakita 0,2%.

Takah daerah lainnyo di Sumatera Barat, kota Sawahlunto mampunyoi iklim tropis nan kisaran suhu minimun 22,5 °C jo maksimum 27,5 °C. Sapanjang taun tadapek duo musim, yaitu musim hujan dari bulan November sampai Juni jo musim kemarau dari bulan Juli sampai Oktober. Tingkek curah hujan kota Sawahlunto mancapai rato-rato 1.071,6 mm per taun nan curah hujan tatinggi tajadi pado bulan Desember.[6]

Kapanduduakan[suntiang | suntiang sumber]

Garejo Katolik di Sawahlunto

Jumlah panduduak kota Sawahlunto mangalami panurunan nan sangek tajam sajak marosotnyo produksi batu baro di kota iko pado tahun 1940, dari 43.576 urang pado tahun 1930 manjadi 13.561 urang pado tahun 1980. Kamudian sacara palahan, jumlah panduduak kota iko maningkek pado tahun 1990, sajalan jo puliahnyo produksi batu baro sajak tahun 1980.

Pado tahun 1990, wilayah administrasi kota Sawahlunto dipalueh dari hanyo 0,778 km² manjadi 27,345 km² jo mambao konsekuensi jumlah panduduaknyo maningkek. Sahinggo pado tahun 1995, jumlah panduduak kota Sawahlunto mancapai 55.090 orang. Namun pado tahun 2000, jumlah panduduak kota Sawahlunto manurun manjadi 50.668 orang, artinyo salamo limo tahun alah tajadi panurunan sakitar 8%. Hal iko disababkan dek sabagian parumahan pagawai PT Bukit Asam Unit Pertambangan Ombilin dipindahkan ka lua daerah Kota Sawahlunto. Sahingga dari sagi iko tampak kaitannyo antaro usaho patambangan batu baro jo jumlah panduduk Kota Sawahlunto.

Hasil Sensus Panduduak 2010 manunjuakkan jumlah panduduak kota Sawahlunto mangalami paningkatan, dari sabalunnya 54.310 orang pada tahun 2008 menjadi 56.812 orang. Kecamatan Talawi merupakan kecamatan dengan penduduk terbanyak, yaitu 17.676 orang atau sekitar 31,11% dari jumlah penduduk kota Sawahlunto. Kepadatan penduduk kota Sawahlunto pada tahun 2010 adolah 238 urang per km², dimano kacamatan Lembah Segar adolah kacamatan nan paliang tinggi tingkek kapadekan panduduaknyo yaitu 431 urang per km². Sadangkan rasio jenis kalamin panduduak Kota Sawahlunto adolah 98, nan artinyo jumlah panduduak laki-laki 2% labiah saketek dibandiangkan jumlah panduduak padusi.

Tahun 1930 1980 1990 1995 2000 2005 2008 2010
Jumlah panduduak 43.576 Green Arrow Down.svg 13.561 Green Arrow Up.svg 15.279 Green Arrow Up.svg 55.090 Green Arrow Down.svg 50.668 Green Arrow Up.svg 52.457 Green Arrow Up.svg 54.310 Green Arrow Up.svg 56.812
Sajarah kependudukan kota Sawahlunto[1]

Suku Bangso[suntiang | suntiang sumber]

Panduduak Kota Sawahlunto wakatu iko didominasi dek kalompok etnik Minangkabau jo Jao. Etnik lain nan juo manjadi panghuni adolah Tionghoa jo Batak. Sajak dijadikannya Sawahlunto sabagai kota tambang batu baro atau sajak didirikannya kota iko pado abaik ka-19, pamarintah Hindia-Belando mulai mangirim narapidana dari babagai pinjaro di Indonesia ka Kota Sawahlunto sabagai pakarajo pakso, sahingga sakitar 20.000 narapidana alah dikapakan ka Sawahlunto.[7] Pakarajo pakso ikolah nan dikenal dek masyarakat satampek sabagai Urang Rantai.

Pandidikan[suntiang | suntiang sumber]

Untuak maningkekkan mutu pandidikan jo kompetensi siswa di Kota Sawahlunto, salah satu program pamarintah satampek adolah jo maagiah palatiahan bahaso Inggirih sajak dini[8].

Pandidikan formal SD atau MI nagari jo swasta SMP atau MTs nagari jo swasta SMA nagari jo swasta MA nagari jo swasta SMK nagari jo swasta Paguruan tinggi
Jumlah satuan 66 13 4 1 3 2
Data sekolah di kota Sawahlunto
Sumber:[9]

Pamarintahan[suntiang | suntiang sumber]

Sajak tahun 1918, Sawahlunto alah bastatus gemeente (kota). Namun alun sampek manjadi stadsgemeente walaupun hinggo tahun 1930 alah mamiliki panduduak nan banyak. Pado tanggal 10 Maret 1949, Sawahlunto basamo jo wilayah kabupaten Solok, kota Solok, kabupaten Sijunjung, jo kabupaten Dharmasraya kini, ditatokkan manjadi Afdeeling Solok nan dipimpin dek saurang bupati. Salanjuiknyo jo dikaluakannyo Undang-Undang Nomor 18 Tahun 1965, status Sawahlunto kamudian barubah manjadi daerah tingkek II jo sabuikan Kotamadya Sawahlunto jo mulai dipimpin dek saurang wali kota.

Tahituang mulai tanggal 11 Juni 1965, ditunjuaklah Achmad Noerdin, S.H. sabagai wali kota Sawahlunto patamo nan mamarintah hinggo tahun 1971. Indak lamo kamudian tapiliahlah Drs. Shaimoery, S.H. manjadi wali kota salanjuiknyo hinggo tahun 1983, lalu digantikan dek Drs. Nuraflis Salam jo Drs. H. Rahmatsjah nan masiang-masiang manjabek salamo 5 tahun barikuiknyo. Pado tahun 1993, Drs. H. Subari Sukardi manjadi pamimpin kota iko salamo duo pariode hinggo tahun 2003. Kemudian sajak tahun 2003, kota iko mulai dipimpin dek Ir. H. Amran Nur nan juo mamimpin salamo duo pariode hinggo tahun 2013.

Parekonomian[suntiang | suntiang sumber]

Salah satu pintu masuak manuju lubang tambang batu bara di kota Sawahlunto pado tahun 1971

Badasarkan data dari Badan Pusat Statistik, Sawahlunto marupokan kota jo angko kamiskinan kaduo tarandah di Indonesia, sasudah Kota Denpasar, Bali. Sawahlunto juo tamasuak kota jo pandapaikan pa kapita kaduo tatinggi di Sumatera Barat,[10] dimano mato pancaharian panduduak sabagian gadang ditopang dek sektor patambangan jo jaso. Salain itu, sektor lain takah patanian jo pataranakan juo masih diminati masyarakaik. Bahkan babarapo kawasan sadang dikambangkan untuak manjadi daerah sentral industri karajinan jo makanan ketek.

Salamo saratuih tahun labiah, batu baro alah dieksploitasi mancapai sakitar 30 juta ton, dan masih tasiso cadangan labiah dari 100 juta ton. Namun maso depan panambangan batu bara di Kota Sawahlunto masih alum jaleh, sabab cadangan nan tasiso hanyo bisa dieksploitasi sabagai tambang dalam. Sadangkan dapek indaknya eksploitasi tasabuik sangek bagantuang kapado panguasaan teknologi jo pamintaan pasa. Salain itu, panyalanggaroan panambangan batu baro juo sadang mangalami reorientsi dek bakembangnya samangek desentralisasi atau tuntuntan otonomi daerah nan mambangkitkan kainginan masyarakaik satampek untuak mangarajokan panambangan surang.

Pahubuangan[suntiang | suntiang sumber]

Kereta api wisata Padang Panjang–Sawahlunto nan tangah malintasi Danau Singkarak

Panamuan cadangan batu baro di kota Sawahlunto alah manundo pamarintah Hindia-Balando mambangun jalur kareta api manuju kota Padang dalam mandistribusikan batu baro. Pambangunan iko dimulai pado tahun 1889 dan salesai pado tahun 1896.[11] Jalur kareta api iko salain mangubuangkan kota Padang jo kota Sawahlunto, juo mancapai kota-kota lain takah kota Solok, kota Pariaman, kota Bukittinggi, kota Padang Panjang, jo kota Payakumbuh. Namun akibek manurunnyo produksi batu baro sajak tahun 2000, kagiatan pangangkutan batu baro jo kareta api baranti total.

Jarak kota Padang ka Sawahlunto adolah sakitar 95 km nan dapek ditampuah baik jo bus maupun kandaraan pribadi. Dapek pulo diakses jo kareta api nan baroperasi pado hari tatantu dari kota Padang Panjang.

Pariwisata[suntiang | suntiang sumber]

Kota Sawahlunto mampunyoi banyak bangunan-bangunan tuo paninggalan Balando.[12][13] Sabagian bangunan alah ditatokkan dek pamarintah satampek sabagai cagar budaya jo objek wisata, salah cieknyo adolah Gedung Pusat Kebudayaan Sawahlunto. Bangunan tuo lainnyo adolah Kantua PT Bukit Asam Unit Pertambangan Ombilin nan dibangun pado tahun 1916.[14] Bangunan iko mampunyoi menara pado bagian tangah dan di sakitarnyo tadapek taman nan dikenal sabagai Taman Segitiga.

Salain itu, dapua umum nan sabalunnyo dapek mamproduksi makanan satiok wakatu untuak ribuan pakarajo paso jo stasiun kereta api sabagai tampek dikarajokannyo aktivitas pangangkuikan batu baro dijadikan museum pado tahun 2005. Masiang-masiang dinamokan Museum Gudang Ransum jo Museum Kereta Api Sawahlunto.[15] Sadangkan bangunan pusek pambangkit listrik nan didirikan pado tahun 1894, sajak tahun 1952 dijadikan musajik dengan namo Masjid Agung Nurul Islam atau dikenal sabagai Masjid Agung Sawahlunto.[16] Masajik iko mampunyoi ciek kubah gadang di tangah yang dikaliliangi dek ampek kubah jo ukuran nan labiah ketek, dan mampunyoi menara nan tingginyo mancapai 80 meter.[17]

Kagiatan tambang batu baro di kota Sawahlunto juo maninggakan sajumlah bangunan lain takah Silo. Silo bafungsi sabagai panimbun batu baro nan alah dibarasiahan dan siap diangkuik ka palabuahan Taluak Bayua. Silo masih badiri kokoh di tangah kota, kandati indak bafungsi apo-apo. Salain itu, sirene pado Silo masih babunyi satiok pukua 07.00, 13.00, dan 16.00 waktu setempat, dimano pado maso pamarintahan Hindia-Belanda, sirene di Silo iko manandokan jam karajo Urang Rantai atau narapidana nan dijadikan kuli pangambiak batu baro.[18]

Silo

Objek wisata unggulan nan ado di kota ini adolah atraksi wisata tambang, dimano pangunjuang dapek mangarajokan napak tileh pado areal bakeh panambangan nan dibangun pado maso pamarintahan Hindia-Belanda. Objek wisata iko dinamokan Lubang Suro nan diambiak dari namo saurang mandor pakarajo paso, Mbah Suro. Indak jauah dari objek wisata Lubang Suro, didirikan Gedung Info Box nan manyadiokan babagai informasi jo dokumentasi tantang sajarah patambangan batu baro di kota Sawahlunto.[19]

Kota iko juo mampunyoi objek wisata lain takah kabun binatang nan mampunyoi lueh sakitar 40 hektare[20] jo Resort Wisata Kandi dengan lueh 393,4 hektare. Ado 3 danau nan tabantuak dari bakeh galian panambangan batu baro di Resort Wisata Kandi, yaitu Danau Kandi, Danau Tanah Hitam, dan Danau Tandikek. Selain itu, juo tadapek wahana rekreasi kaluargo nan dikenal dengan namo Waterboom Sawahlunto.[21]

Ulahrago[suntiang | suntiang sumber]

Di kota iko tadapek lapangan pacuan kudo milik pamarintah satampek nan banamo Lapangan Pacuan Kuda Bukit Kandih. Satiok tahunnyo disalnggarokan lomba pacuan kudo di lapangan iko. Lapangan pacuan kudo salueh 39.69 hektare tasabuik mampunyoi track pacuan kudo sapanjang 1.400 meter jo leba 20 meter dan dapek manampuang sakitar 30.000 panonton.[22] Salain itu, kota iko juo mampunyoi arena road race salueh 10 hektare dengan track lintasan baaspal hotmix sapanjang 1,2 km dan alah barstandar nasional.

Kota Sawahlunto tamasuak kota nan manjadi bagian dari tahapan palombaan balap sapeda Tour de Singkarak. Pado Tour de Singkarak 2011, kareta uok wisata batanago batu baro nan dek masyarakat satampek dinamoi Mak Itam dipakai untuak mambaok pambalap sapeda manuju lokasi start etape 5a di Silungkang.[23] Dalam tigo kali panyalanggaroan ajang balap sapeda Tour de Singkarak, kota Padang taruih manjadi titik start palombaan. Namun untuak tahun 2012 titiak start lomba dipindahkan ka kota Sawahlunto, sadangkan Padang sabagai ibu kota Sumatera Barat dijadikan titiak finish lomba.

Kota Kamba[suntiang | suntiang sumber]

  1. Malaka, Malaysia[24]

Rujuakan[suntiang | suntiang sumber]

  1. a b sumbar.bps.go.id Profil Kota Sawahlunto
  2. www.tempo.co Tour de Singkarak 2012 Dimulai dari Sawahlunto. Tempo. Diakses pado 3 Februari 2012.
  3. Andi Asoka (2005). Sawahlunto, Dulu, Kini dan Esok: Menyongsong Kota Wisata Tambang yang Berbudaya. Pusat Studi Humaniora (PSH), Unand Kerja Sama dengan Kantor Pariwisata, Seni dan Budaya, Kota Sawahlunto, Sumatera Barat. ISBN 978-979-3723-50-1.
  4. Hendrik de Greve, Willem (1871). Het Ombilien Kolenveld in de Padangsche Bovenlanden en Het Transportstelsel op Sumatra’s Westkust. 
  5. Profil Daerah Kabupaten dan kota. Penerbit Buku Kompas. 3 Desember 2001. ISBN 978-979-709-009-8. 
  6. www.sawahlunto-tourism.com Sekilas Tentang Sawahlunto. Portal Resmi Pariwisata Kota Sawahlunto. Diakses pada 29 Januari 2012.
  7. www.kompasiana.com Urang Rantai, Elegi Miris Kota Sawahlunto. Diakses pada 29 Januari 2012.
  8. www.sawahlunto.go.id Meningkatkan Kompetensi Siswa Dengan Pelatihan Bahasa Inggirih. Diakses pado 11 Juli 2010.
  9. nisn.jardiknas.org Rekap data
  10. Sjafrizal. Ekonomi Regional. Niaga Swadaya. ISBN 978-979-17475-2-3. 
  11. Colombijn, Freek. Paco-Paco (Kota) Padang. pp. 65. 
  12. www.investor.co.id Sawahlunto Kembangkan Wisata Tambang dan Sejarah Kota Lama. Diakses pado 29 Januari 2012.
  13. www.okezone.com Pelajari Sejarah Warisan Kolonial di Sawahlunto. Diakses pado 29 Januari 2012.
  14. www.thearoengbinangproject.com Gedung PT Bukit Asam Unit Pertambangan Ombilin. Diakses pado 29 Januari 2012.
  15. www.indonesia.travel/id Sawahlunto: Kota Tua Bernuansa Pertambangan. Diakses pado 29 Januari 2012.
  16. www.hariansumutpos.com Pembangkit Listrik Jadi Masjid. Diakses pado 29 Januari 2012.
  17. www.thearoengbinangproject.com Masjid Agung Nurul Islam. Diakses pado 29 Januari 2012.
  18. www.kompas.com Sawahlunto, Kota Arang yang Terjaga. Diakses pado 29 Januari 2012.
  19. www.sawahlunto.go.id Orang Rantai dari Tambang Batubara Sawahlunto. Diakses pado 29 Juni 2010.
  20. www.sawahlunto.go.id Kebun Binatang. Diakses pado 11 Juli 2010.
  21. www.kompas.com Sawahlunto Akan Bangun "Skylift". Diakses pada 29 Januari 2012.
  22. www.kompasiana.com Sawahlunto Bukan Sekedar Batubaro. Diakses pado 29 Januari 2012.
  23. www.okezone.com Mak Itam Semarakkan Tour De Singkarak, 5 Juni 2011. Okezone.com. Diakses pado 13 Desember 2011.
  24. Herwandi (2007). Sawahlunto dan Malaka: Kerjasama Kota "Kembar" dalam Bidang Pengelolaan Sumberdaya Budaya. http://repository.unand.ac.id/2369/. Diakses pado 28 Desember 2012. 

Pautan lua[suntiang | suntiang sumber]