Mohammad Djamil

Dari Wikipedia baso Minang, ensiklopedia bebas
Loncat ke navigasi Loncat ke pencarian
Mohammad Djamil
Lahia 28 November 1898
Bendera Balando Kayu Tanam, Padang Pariaman, Hindia Balando
Kabangsaan Bendera Indonesia Indonesia
Karajo Politisi
Dikana dek Gubernur Maluku
Agamo Islam

Mohammad Djamil gala Datuak Rangkayo Tuo (laia di Kayu Tanam, Padang Pariaman, Sumatera Barat, 28 November 1898) adolah surang pajuang kamardekaan Indonesia sarato dotor nan bajaso dalam marintis kasehatan masyarakat. Baliau pernah pulo manjabat sabagai gubernur militer Sumatera Tangah.

Kahidupan[suntiang | suntiang sumber]

Di bidang kadokteran, M. Djamil adolah urang Indonesia partamo nan mandapek-an duo gala doktor. Gala doktornyo nan partamo jo titel Doctor Medicinae Interne Ziekten didapeknyo di Universitas Utrecht, Balando pado 31 Mei 1932, sadangkan titel doktornyo nan kaduo : Doctor of Public Health (DPH), didapeknyo dari Universitas John Hopkins, Baltimore, Maryland, Amerika Serikat pado 12 Juni 1934.

Pado taun 1925-1927, M. Djamil malakuan riset di Koto Gadang jo Sianok manganai panyakik TBC jo malaria. Dari hasil riset tu baliau mandapek-an pangaragoan dari Ratu Wilhelmina. Duo taun kudian, baliau pindah ka poliklinik Natal, Sumatera Utara. Disinan baliau melakuan panalitian manganai panyakik malaria baliak. Malalui hasil risetnyo tu, anggaran pamarentah nan alah ditatapan untuak pambarantasan malaria bisa ditakan.

Pado taun 1938-1939, baliau ditugehan di Kantua Pusek Panyakik Malaria di Jakarta. Dalam risetnyo M. Djamil manamuan caro baru untuak mambarantas jantiak-jantiak nyamuak malaria jo dadak, sarato peran salapuik protozoon di ateh aia kapado panjangkitan malaria. Karano kabahasilannyo dalam riset tu, dr. Overbeek, Kapalo Bestrijding di Indonesia, maagiahnyo titel malarialoog (ahli malaria).

Salain di bidang kadokteran, M. Djamil giat pulo bapolitik. Baliau terafiliasi ka Partai Sosialis Indonesia[1], sempat manjadi Katua Komite Nasional Sumatera Barat[2], Residen Sumatera Barat, Gubernur Mudo Sumatera Tangah, sakaligus Gubernur Militer Sumatera Tangah. Baliau baperan gadang pulo dalam pandirian Fakultas Kadokteran jo Fakultas Ilmu Pangatahuan Alam, Universitas Andalas di Bukittinggi.

Pangaragoan[suntiang | suntiang sumber]

Untuak maabadian jaso-jasonyo, sajak taun 1978, RSUP Jati di Padang baganti namo manjadi Rumah Sakik Umum Dr. M. Djamil. Pamarentah-pun manatapan M. Djamil sabagai pajuang kamardekaan di Sumatera Barat.

Catatan kaki[suntiang | suntiang sumber]

  1. Iclasul Amal, Regional and Central Government in Indonesian Politics: West Sumatra and South Sulawesi (1949-1979), Gadjah Mada University Press, 1992
  2. Djoeir Moehamad, Abrar Yusra; Memoar Seorang Sosialis, Yayasan Obor Indonesia, 1997

Sumber[suntiang | suntiang sumber]

Gusti Asnan, Dr. Mohammad Djamil: Berjuang untuk Kemerdekaan dan Kemanusiaan, Lembaga Telaah dan Implementasi Gagasan Alternatif, 2006