Musajik Asasi Padang Panjang
| Musajik Asasi Masjid Asasi | |
| |
| Latak | Kota Padang Panjang, Sumatra Barat, Indonesia |
| Afiliasi agamo | Islam |
| Deskripsi arsitektur | |
|---|---|
| Jinih arsitektur | Musajik |
| Gaya arsitektur | Tradisional Minangkabau |
| Spesifikasi | |
| Kapasitas | 200 urang[1] |
| Tinggi (maks) | 25 meter (82 kaki)[2] |
Musajik Asasi talatak di Nagari Sigando, Kota Padangpanjang, Sumatra Barat. Musajik ko dipakirokan alah batagak sajak abaik ka-18 dan tacataik sabagai musajik paliang tuo di Padangpanjang. Modenyo maikuik bantuak musajik tradisonal Minangkabau.
Sajak didirikan, konstruksi musajik indak banyak nan ancua, walaupun dihoyak Gampo bumi Padang Panjang 1926 jo Gampo bumi Sumatra Barat 2009. Parancakan musajik nan alah dikarajoan, co panggantian atok ijuak sarato dindiangnyo, indak maubah bantuak asali musajik. Pamarentah Indonesia alah manatokkan musajik ko sabagai cagar budayo di bawah Badan Pelestarian Peninggalan Purbakala (BP3) Sumatra Barat, Riau, dan Kepulauan Riau. Kini ko, Musajik Asasi manjadi salah satu daya tarik wisata di Padangpanjang.
Sijarah
[suntiang | suntiang sumber]Indak tahu bilo pastinyo musajik ko batagakan. Namun dalam catatan Kerapatan Adat Nagari satampek manyabuik Musajik Asasi ko ditagakan pado taun 1770. Sadang, Balai Pelestarian Cagar Budaya (BPCB) Sumatra Barat mampakirokan taun 1702 sabagai awa mulo batagaknyo musajik ko. [3][4]
Awa mulo musajik ko dari surau nan didirian dek suku nan tingga di nagari Gunuang. Surau tu tabuek dari kayu dan atok tabuek dari ijuak. Manuruik sumber Harian Haluan, Musajik Asasi dulunyo tasabauik sabagai Surau Gadang. Namo Asasi baru ado sasudah taun 1930. Asasi barasa dari kato "asas" dalam bahaso Arab nan aratinyo dasa atau sasuatu nan jadi tumpuan.
Ide mambangun musajik ko digagas dek masyarakaik Nagari Gunuang dan tigo nagari disakaliliangnyo: Paninjauan, Tambangan, dan Jawo. Kaampek nagari ko manjadikan Musajik Asasi sabagai pusek padok agamonyo. Sairiang wakatu bajalan, tiok-tiok nagari mulai managakan musajiknyo surang nan tampeknyo labiah dakek.
Pado maso panjajahan, musajik ko panah manjadi pusek pangambangan Islam dek batagaknyp Madrasah Thawalib Gunuang nan talatak di sakitar musajik.
Konstruksi
[suntiang | suntiang sumber]
Kasadoalah bahan untuak pambangunan musajik ko tabuek dari kayu, mulai dari dindiang, lantai, inggo tonggak.
Ruang utamo ditopang salapan tonggak jo ciek tonggak tuo di tangah. Tonggak tuo baukuran labiah gadang dari tonggak nan lainnyo bagarih tangah 1,5 m jo tinggi 15 meter, jo bahan kayu nan balampih simin.
Dindiang musajik dihiasi bamacam gambar tanaman, ukiran khas tradisional Minangkabau. Ado jandela kaco badaun duo di dindiang sisi utara jo selatan, bajumlah ampek surang. Jandela nan sabantuak ado pulo di bagian mihrab, ciek di sabalah utara dan ciek lai di selatan mihrab.
Atok musajik tabuek dari seng, baungguak-ungguak sabanyak tigo tingkek. Babantuak sagilimo, pamukoan atok dibuek cakuang, sasuai untuak daerah baiklim tropis dek labiah capek maalirkan aia ujan. Adopun atok mihrab babantuak gonjong, tapisah dari atok utamo.
Ruangan
Musajik Asasi didirian di ateh tanah baukuran 25 x 22 m. Ruang utamo adolah ruang salat nan punyo denah dasa baukuran 13,1 m x 13,1 m. Lataknyo ditinggian sakitar sameter dari ateh tanah, mambantuak kandang. Mihrab dibuek manjorok ka sisi barat, badenah 2,2 m x 4,6 m. Ado surambi pado sisi timur mode ruangan tatutuik baukuran 5 m x 4,4 m tanpa jendela. Janjang masuak musajik ado di sabalah kida jo suok surambi nan tabuek dari simin.
Ruangan surambi bafungsi sabagai ruang panguruih musajik nan diagiah bateh dari ruang utamo. Di ruang lakang, ado sakumpulan benda kuno, co pati basi paninggalan Balanda dan saketek alai tafsir Alquran bahuruf Arab-Melayu.
Di bagian mihrab, ado mimbar nan tabuek dari kayu papan.
Bangunan lainnyo
[suntiang | suntiang sumber]Musajik dikaliliangi paga basi di bagian selatan jo paga tembok di bagian barat jo utara. Untuak masuak ka area musajik, ado pintu gerbang di sabalah selatan.
Tapisah dari bangunan induak, ado bangunan pangguang di sabalah utara cando rangkiang. Bangunan ko dipakai untuak tampek tabuah nan tabuek dari kayu karambia.
Tampek wudhu ado di lua paga, di bawah rumah garin musajik. Aia barasa mato aia di sakitar musajik, nan dek masyarakaik di sinan disabuik "bulakan". Pintu masuaknyo ado di sabalah barat, malalui janjang manurun.
Rujuakan
[suntiang | suntiang sumber]- Catatan kaki
- ↑ Kemenag.
- ↑ ANTARA 2009.
- ↑ Haluan 2016.
- ↑ ANTARA 2018.
- Daftar pustaka
- "Berteduh di Masjid Asasi, Masjid Tertua di Padang Panjang". ANTARA. 2 Juni 2018. Diakses tanggal 11 Agustus 2018.
- "Masjid Kayu Tertua di Serambi Mekah". ANTARA. 4 September 2009. Diakses tanggal 11 Agustus 2018.
- "Wisata Religi Masjid Asasi Padang Panjang". Harian Haluan. 11 Juni 2016. Diarsipkan dari versi asli tanggal 2019-07-06. Diakses tanggal 11 Agustus 2018.
- Balai Pelestarian Cagar Budaya (BPCB) Sumatra Barat (3 Mei 2018). "Masjid Asasi". Diarsipkan dari versi asli tanggal 2023-03-27. Diakses tanggal 11 Agustus 2018.
- Kementerian Agama. "Profil Masjid Asasi". Diarsipkan dari versi asli tanggal 2017-10-18. Diakses tanggal 11 Agustus 2018.