Randang

Dari Wikipedia baso Minang, ensiklopedia bebas
Loncat ke navigasi Loncat ke pencarian
Randang
Rendang daging sapi asli Padang.JPG
Randang dagiang jo katupek
Asa
Namo lain Randang Padang
Nagara Indonesia
Daerah Sumatera Barat
Pambuek Urang Minangkabau
Detail Makanan
Jinih Makanan Utamo
Panyajian Angek atau suhu ruangan
Bahan Utamo Dagiang, santan karambia, lado, bumbu
Variasi Randang ayam, randang itiak , randang hati jawi, randang talua, randang paru
Marandang

Randang dagiang atau biaso disingkek randang (Jawi: رندڠ) adolah masakan masakan tradisional khas dari Sumatera Barat, Indonesia. Bahan utamonyo dagiang jawi, santan, lado, jo bumbu. Masakan iko dibuek jo caro mamasak baulang-ulang nan dicampua karambia. Proses mamasaknyo nan lamo inggo bajam-jam (biasonyo sakitaran ampek jam) inggo mangariang dan barono itam kaliang. Dalam suhu ruang, randang dapek batahan inggo baminggu-minggu. Randang nan dimasak dalam wakatu nan singkek dan santannyo alun mangariang disabuik kalio, rononyo coklat tarang kaamehan.

Randang lah tanamo di masyarakaik inggo dapek murah basobok di Rumah Makan Padang di saluruah dunia. Masakan ko populer di Indonesia dan nagara-nagara Asia Tenggara lainnyo, co Malaysia, Singapura, Brunei, Filipina, dan Thailand. Di daerah asalnyo, Minangkabau, randang disajikan di berbagai upacara adaik dan perhelatan istimewa. Walau randang marupokan masakan tradisional Minangkabau, masing-masing daerah di Minangkabau mampunyoi teknik mamasak sarato ragam jo piliahan bumbu nan babeda.

Pado tahun 2011, randang dilewakan sabagai hidangan nan ado di paringkek partamo dalam daftar World's 50 Most Delicious Foods (50 Hidangan Talamak Dunia) versi CNN International.[1]

Randang ju digunoan sabagai bantuan pangan untuak korban bancano alam deknyo tahan lamo sarato kanduangan gizinyo, sarupo wakatu gampo bumi Lombok 2018, gampo bumi dan tsunami Sulawesi 2018, tsunami Selat Sunda 2018, jo Banjir sarato galodo Bengkulu 2019.[2][3][4]

Sajarah[suntiang | suntiang sumber]

Munuruik sajarahnyo, randang partamo kali dibuek di nagari Minangkabau. Manuruik pandapaik dari masyarakaik Minangkabau, randang alah ado samanjak zaman dahulu kudian alah manjadi masakan tradisi nan disajikan di sadoalah kagiatan masyarakaik Minangkabau. Karano masakan tradisi, randang iko dipakiroan alah lahia samanjak urang Minangkabau maadoan acara adat partamonyo. Samanjak itu, seni mamasak randang bakambang ka wilayah rantau babudayo Malayu diantaronyo : Riau, Mandailing, Jambi inggo ka nagari subarang Nagari Sambilan, Malaysia nan banyak diuni parantau Minangkabau. Dek karano itu randang samakin tanamo dek urang Sumatera khususnyo Sumatera Barat jo Nagari Sambilan, Malaysia.

Kalau manuruik hikayaik sastra melayu klasik takah Hikayat Amir Hamzah, manunjuakan baso randang itu alah adoh samanjak 1550-an (kiro kiro abaik 16).

Lahianyo randang di Minangkabau indak lapeh dari pangaruah babarapo negara, misanyo bumbu-bumbu masak dari padagang Gujarat, India. Karano dimasak sampai kariang makonyo randang diingek urang Minangkabau bawarno itam sarato indak mampunyoi kuah.


Bahan[suntiang | suntiang sumber]

Randang adolah masakan nan manganduang banyak bumbu. Untuak mambuek randang, dagiang sapi dimasak jo santan karambia dan campuran babagai bumbu khas, antaro lain lado, langkueh, sarai, bawang dan aneka bumbu lainnyo nan biaso disabuik jo pamasak. Kaunikan randang talatak pado pamakaian pamasak alami, nan basifek antiseptik sarato bisa mambunuah bakteri patogen sainggo bafungsi sabagai bahan pengawet alami sakali. Bawang putih, bawang merah, sipadeh, dan langkueh diketahui mampunyoi aktivitas antimikroba nan kuek.[5] Sainggo wajar kok randang dapek batahan saminggu hinggo ampek minggu lamonyo, bahkan labiah.

Randang punyo tampek tahormat dalam adat budayo masyarakaik Minangkabau. Filosofi randang untuak masyarakaik Minang di Sumatra Barat yaitu musyawarah, nan barangkaik dari 4 bahan pokok, yaitu:

  1. Dagiang, lambang dari Niniak Mamak (para pamimpin Suku adat)
  2. Karambia, lambang Cadiak Pandai (Kaum Intelektual)
  3. Lado, lambang Alim Ulama nan padeh, tageh untuak maajaan syarak (agama)
  4. Pamasak, lambang dari kasaluruhan masyarakaik.


Caro mamasak[suntiang | suntiang sumber]

Proses mamasak randang asali dapek maabihan wakatu bajam-jam (biasonyo sakitar ampek jam). Dek itulah mamasak randang mambutuahkan wakatu jo kasabaran.[6] Potongan dagiang dimasak basamo pamasak jo santan dalam baro api nan tapek, diaduak lambek-lambek inggo santan jo bumbu marasok ka dagiang.[7] Sasudah mandidiah, apinyo dipaketek dan taruih diaduak inggo santannyo pakek jo mangariang. Mamasak randang musti saba dan ditunggui, sarato elok-elok mangacau supayo santan mangariang dan bumbu tarasok samparono, jo indak maanguihan atau mambuek dagiang cayia. Proses mamasak iko tanamo dalam seni kuliner modern jo istilah karamelisasi, kalau di Minang disabuik sabagai marandang. Dek pamakaian banyak jinih langkok-langkok, randang tanamo juo jo raso nan kompleks jo unik.

Ragam[suntiang | suntiang sumber]

Randang hati jawi

Randang umumnyo manggunokan dagiang jawi atau kabau, tapi ado pulo baragam jinih bahan dasa lainnyo nan dimasak sasuai bumbu jo resep. Ragam randang antaro lain:[8]

  1. Randang dagiang: randang dagiang jawi atau kabau, jinih randang nan paliang lazim ditamui.
  2. Randang ayam: Randang nan tabuek dari dagiang ayam
  3. Randang itiak: Randang nan tabuek dari dagiang itiak
  4. Randang hati: Randang nan tabuek dari ati jawi
  5. Randang talua: Randang khas Payokumbuah nan tabuek dari talua ayam nan dikariangan co karipiak
  6. Randang paru: Randang nan tabuek dari paru jawi, khas Payokumbuah
  7. Randang lauak/ikan: Randang nan tabuek dari lauak tongkol
  8. Randang runtiah: Randang khas Payokumbuah nan tabuek dari dagiang ayam, jawi, atau kabau nan serat dagiangnyo baruntiah atau diurai ketek-ketek. Randang runtiah ampia sarupo abon, namun pabedaannyo nampak dari runtiah dagiang nan labiah gadang sarato babumbu randang kariang
  9. Randang lokan: marupokan ragam randang nan tabuek dari lokan, khas dari daerah pasisia Ranah Minang, yaitu Pesisir Selatan jo Pariaman.[9]
  10. Randang pensi: randang khas dari Danau Maninjau, Kabupaten Agam, nan tabuek dari pensi (sajinih lokan aia tawa ketek).[10]

Pautan lua[suntiang | suntiang sumber]

Rujuakan[suntiang | suntiang sumber]