Galamai

Galamai nan di hidangkan di dalam sayak

Galamai adolah salah ciek makanan khas dari Payokumbuah, Sumatera Barat. Makanan nan tradisional ko mampunyoi bantuak bawarna itam. Raso nyo taraso kenyal katiko digigik sarato jo manih pulo rasonyo. Makanan iko biasonyo tabuek dari tapuang bareh katan, santan jo gulo anau atau saka. Di tampek atau didaerah lain, makanan iko bantuaknyo mirip jo dodol nan alah dibungkuih rapi. Karano marupoan makanan khas daerah Payokumbuah atau makanan nan tradisional, galamai ko manjadi oleh-oleh nan acok dibawok parantau minang nan baliak ka rantau atapun dibali dek wisatawan nan sadang bakunjuang jo baliburan di Sumatera Barat. Salain dijadian sabagai buah tangan atau oleh-oleh, galamai ko acok pulo dijadian makanan palangkok di acara-acara baralek atau katiko hari rayo gadang.

Asa mulo

Namo makanan khas atau galamai ko alah lamo tanamo dek masyarakaik Payokumbuah atau masyarakaik Sumatera Barat pado umumnyo. Sabab dek mangko baitu karano Kota Payokumbuah dari daulunyo alah tanamo atau bagala kota galamai. Panamoan makanan khas galamai ko dapek dicaliak pado duo suduik pandang, partamo dicaliak dari sipaiknyo dan kaduo dicaliak dari asa-usuanyo. Kalau dicaliak dari sipaik nyo, sacaro nan nampak jo nan taraso bahwasanyo galamai ko mampunyoi tekstur nan dapek dikatoan balemak, kalau dalam bahaso minang nyo disabuik juo jo galeme atau galemai. Di tambah teksturnyo nan kenyal nan disabuik juo galeok dalam bahaso minangnyo. Sadangkan panamoan galamai ko kalau dicaliak dari asa-usua nyo marupoan gabuangan dari duo buah kato yaitunyo gulo amai nan dipasingkek kalau disabuik manjadi galamai.

Bantuak jo raso

Galamai ko marupoan makanan tradisional dari daerah Payakumbuah nan bantuak nyo sarupo jo dodol nan ado di daerah jawa. Salain di tampek asa nyo, galamai ko dapek pulo di tamuan di babagai daerah lainnyo di Sumatera Barat sarupo di Solok, Pariaman, sarato jo di Pasaman. Makanan tradisional galamai ko di babarapo daerah di Sumatera Barat di namoi juo dalam babagai panamoan sarupo galamai, kalamai, calamai jo gelamai.

Kalau di caliak dari segi raso, untuak lidahnyo nan awam atau indak pernah mancubo makanan khas iko mako raso galamai ko sarupo rasonyo jo jenang kudus nan manih jo taraso legit atau kenyal-kenyal di muluik. Bantuak galamai nan sarupo jo dodol namun baitu makanan khas ko punyo saketek pabedaan jo dodol ataupun jo jenang. Didalam adonan galamai ko ditabuakan kacang tanah nan alah disangrai. Panambahan kacang tanah iko mambuek sabuah santuahan raso nan gurih jo renyah nan mambuek rasonyo taraso agak unik di lidah katiko mancubo mamakan galamai. Nan labiah manariknyo, dek masyarakaik Minangkabau sacaro umumnyo, masalah citoraso galamai indak sasaderhana bantuaknyo. Dengan mancicipinyo atau mancubonyo saketek sajo, lidah urang Minang dapek langsuang mambedaan manokah galamai asal asli Payokumbuah maupun dari daerah-daerah lainnyo. Karakteristik iko memang sulik untuak didefinisian sacaro jaleh karano kekhasan sarato karumitan dalam proses mambueknyo.

Bahan

Untuak mambuek sabuah galamai diparaluan babarapo bahan pokok nan tadiri dari santan karambia, tapuang katan, gulo pasia, gulo saka atau anau, sarato jo garam. Bahan-bahan utamo tasabuik harus disadion sabalum pambuatan galamai. Bahan nan disadioan tantunyo tagantuang jo baraa banyak galamai nan kadibuek. Sabagai contohnyo, untuak mambuek makanan galamai ko nan diparuntuakan untuak ciek keluarga mako diparaluan anam buah karambia nan diambiak santannyo, saliter tapuang katan, ditambah saketek gulo pasia atau gulo saka sabanyak sakilo.

Caro mambuek

Salain dibuek sacaro surang-surang nan hanyo untuk dimakan sakaluarga, galamai ko dapek juo dibuek sacaro basamo-samo katiko ado upacara adaik. Galamai biasonyo dibuek jo caro gotong royong karano mambutuakan banyak tanago untuak mangaduak adonan nan banyak dalam wakatu nan lamo. Bantuak akhia dari makanan iko harus samparano itam jo mangkilek sarato ko taraso manihnyo. Caro mamasak galamai indaklah payah. Partamo, masak gulo anau atau gulo saka nan dicampua jo santan hinggo pakek. Samantaro itu tapuang bareh atau tapuang katan diaduak jo santan nan pakek kamudian dicampuan ka dalam gulo saka atau anau nan pakek tadi. Sasudah itu masak hinggo teksturnyo kenyal jo caro taruih diaduak dan jaan sampai baranti maaduaknyo. Mamasak Galamai ko biasonyo mahabian wakatu kurang labiah ampek jam.

Filosofi galamai

Galamai mampunyoi arati nan sangaik sasuai sarato malakek kadalam filosofi masyarakaik Minangkabau, yaitunyo tagang bajelo-jelo, kandua badantiang-dantiang. Aratinyo, kareh, tapi panuah jo kaarifan sarato jo kabijaksanoan. Lunak, tapi punyo prinsip nan tageh. Hal tasabuik dapek ditamui dalam pambuatan galami pado masyarakaik Minangkabau tempo dulu nan mambuek galamai sacaro basamo-samo atau bagotong-royong. Karano dibuek sacaro bagotong-royong mako muncua nilai-nilai nan dapek diambiak dari pambuatan galamai ko yaitunyo nilai kasaimbangan, nilai kaarifan, jo nilai kabijaksanoan.