Nasi Kapau

Dari Wikipedia baso Minang, ensiklopedia bebas
Loncat ke navigasi Loncat ke pencarian
Panjua nasi Kapau di Senen, Jakarta Pusat.

Nasi Kapau adolah nasi rameh khas nagari Kapau, Tilatang Kamang, Kabupaten Agam, Sumatera Barat, nan tadiri dari nasi, lado, jo samba khas Kapau (mode gulai cubadak, tunjang, cancang, gajebo, atau paruik kabau).[1] Nasi kapau umumnyo disajian langkok jo gulai nangka sainggo manjadi ciri khas nasi kapau.[2]

Masakan nasi kapau ampiang sarupo sarato saroman jo Nasi Padang. Nan mambedaan kaduonyo adolah pado caro panyajiannyo, dan kadang ado juo samba khas Kapau nan indak tasadio di rumah makan Padang lainnyo.

Bak cando rumah makan masakan Minang lainnyo, biasonyo masakan ko dimakan jo tangan. Disadioan pulo basuah tangan (kobokan), dalam mangkuak ketek barisi aia, langkok jo irisan limau nipih sabagai pangarumnyo. Aia ko biaso dipakai untuak mambasuah tangan sabalun jo sasudah makan. Kok palanggan kurang katuju jo tangan lansuang, disadioan pulo sendok jo garpu.

Samba kapau[suntiang | suntiang sumber]

Sabagian samba nan taidang di rumah makan Kapau punyo ciri khasnyo surang. Gulai cubadak dari Kapau, biasonyo indak diagiah banyak santan dan indak talampau pakek. Gulai dicampua jo kacang panjang, lobak, rabuang, paku, jo jariang. Salain gulai cubadak, hampia sadoalah sambanyo tadiri dari masakan dagiang-dagiangan. Misanyo gulai tambunsu tadiri dari campuran talua ayam jo tahu nan dimasuakan kadalam usus jawi. Kudian ado gulai ikan, gulai tunjang, ayam panggang, teri balado, tongkol balado, dendeng balado, baluik goreng, dan samba lado ijau.

Lauak nasi kapau nan lainnyo ado ayam goreng, ayam goreng ijau, gulai ayam, randang ayam, randang dagiang. Bareh nasi Kapau umumnyo dikirim dari Bukittinggi dan Agam.[1] Barikuik samba nan ado di nasi kapau:

  • Randang, (randang dagiang, ayam, jo itiak)
  • Daun ubi tumbuak, daun ubi basantan
  • Kalio, sarupo jo randang; taro randang agak kariang, kalio labiah basah jo rononyo tarang
  • Gulai Ayam
  • Gulai Cancang, gulai dagiang nan dicampua dalaman jawi
  • Gulai Tunjang,
  • Gulai Babek, Gulai Babat atau Gulai Paruik Kabau,
  • Gulai Iso atau Gulai Usus,
  • Gulai Limpo,
  • Gulai Ati,
  • Gulai Utak atau Banak,
  • Gulai Sumsum,
  • Gulai Gajeboh,
  • Gulai Itiak,
  • Gulai Talua,
  • Gulai Kapalo Ikan Kakap Merah,
  • Gulai Jariang,
  • Dendeng Batokok,
  • Dendeng Balado,
  • Paru goreng,
  • Ayam baka,
  • Ayam goreng, ayam goreng jo bumbu sarundeng
  • Ayam Pop, ayam khas Bukiktinggi, diabuih atau kukuih nan kudian digoreng. Sadang ayam goreng rononyo kalam kacoklatan, kalau iko tarang.
  • Ikan Bilih, ikan aia tawa ketek dari genus Mystacoleucus nan digoreng
  • Baluik goreng,
  • Udang Balado,
  • Rajungan goreng,
  • Terong Balado,
  • Patai goreng,
  • Ikan Asam Padeh
  • Peyek udang,
  • Karupuak Jangek,
  • Sambal Lado,
  • Sambal Lado Tanak

Panjua nasi kapau[suntiang | suntiang sumber]

Di Jakarta, panjua nasi kapau rami manggaleh di Jalan Kramat Raya, Jakarta Pusat. Macam-macam kue jo samba khas Minang co gulai tunjang, randang, ayam panggang, jo ikan bakar. Panjua tu manyadioan hidangan panutuik co lamang jo bubua campua.

Di Bukittinggi, panjua nasi kapau ado di Pasa Bawah. Uni-uni (amak-amak) bajualan nasi kapau di dalam cambuang basi gadang nan basusun-susun. Cambuang-cambuang nan talampau jauah dari jangkauan tangan panjuanyo samaso malayani pambali dijangkau sendok gulai batangkai panjang nan dari tampuruang karambia. Sendok gulai nan panjang tu digunokan untuak manyendokan gulai ka piriang makan pambali.

Caliak pulo[suntiang | suntiang sumber]

Rujuakan[suntiang | suntiang sumber]

  1. a b Abna, Hidayati (21 April 2008). "Nasi Kapau "Nan Mangimbau-imbau"". Antara News Indonesia, One Click Away!. http://www.antara.co.id/view/?i=1208749217&c=ART&s=. Diakses pado 30 Juni 2009. 
  2. Habsari, Rinto (2007). Info boga Jakarta. Gramedia Pustaka Utama. ISBN 9-7922-2860-8. 

Pautan lua[suntiang | suntiang sumber]