Lambah Anai

Wikipedia Minangkabau - Lubuak aka tapian ilimu
(Dialiahkan dari Cagar Alam Lambah Anai)
Aia Tajun Lambah Anai
Aia Mancua Lambah Anai
Aia Tajun Lambah Anai
TampekSumatera Barat, Indonesia
Tinggi total35 m
Jumalah titiak1
Batang aiaBatang Lurah
Rato-rato laju aliran700 m³/s (38,430 cu ft/s)

Lambah Anai marupokan kawasan lambah nan talatak di antaro Kayu Tanam, Padang Pariaman jo Padangpanjang nan masuak dalam Cagar Alam Lambah Anai.[1] Kawasan ko ditatapkan sabagai cagar alam dek pamarintah kolonial malalui surek kaputusan No. 25 Stbl No. 756 tanggal 18 Desember 1922.[2] Lambah ko tanamo dek adonyo Aia Tajun Lambah Anai nan aksesnyo mudah dek lataknyo di tapi Jalan Lintas Sumatra, pangubuang Padang jo Padangpanjang, tapeknyo di Jorong Aie Mancua, Nagari Singgalang, Kecamatan X Koto, Kabupaten Tanah Datar.[3] Dek masyarakaik satampek disabuik juo jo Aia Mancua Lambah Anai. Sabananyo aia tajun ko masih salah satu dari total tujuah aia tajun nan ado di cagar alam.[4]

Aia Tajun Lambah Anai marupokan bagian dari Batang Lurah nan baulu di Gunuang Singgalang dan mampunyoi katinggian kurang labiah 35 meter.[5] Panorama sakaliliangnyo manjadi tujuan wisata. Pangunjuang dapek mancaliak banyak cigak nan malala di sakaliliang aia tajun. Pado musim liburan, aia tajun iko dapek dikunjuangi inggo ratusan pangunjuang.[6]

Sijarah[suntiang | suntiang sumber]

Pamandangan kawasan sakitar Lambah Anai sakitar tahun 1880

Lambah Anai mulai rami dilalui jo dikunjuangi sajak pamarintah kolonial Hindia Balando, jo Gubernur Jenderal Van den Bosch taun 1833, mamarintahan karajo paso pambangunan jalan antaro Kayu Tanam jo Padangpanjang sapanjang 17 km (6 km rueh jalan ado di Lambah Anai).[1] Jalan ko dibangun untuak mampamudah akses niago pamarintah kolonial nan maubuangan wilayah darek jo pasisia. Pado maso Parang Pidari, jalan ko bafungsi untuak mobilisasi pasukan kolonial dari Padang. Salain untuak mambangun jalan, karajo paso ko juo mangarajoan proyek pambangunan rel kareta api untuak maangkuik batubaro Sawhlunto atau bahan tambang lainnyo dari darek ka Emmahaven, Padang.[1] Pambangunan rel kareta di Lambah Anai dibuek khusus iyolah jo rel bagigi sainggo paralu kareta khusus rel bagigi dan manjadi ciek dari duo rel bagigi nan ado di Indonesia.[7] Karajo paso ko indak anyo malibaikan rakyaik nan tingga di sakitar nagari tu nan saketek jumlahnyo, tapi rakyaik dari babagai daerah dek payahnyo medan nan dikarajoan.[2][8]

Galodo nan mambuek cayia jalan raya jo rel kareta api pado zaman kolonial.

Banyak kajadian alam sarupo galodo nan acok tajadi inggo marusak jalan. Hal iko mambuek biayo parawatan jalan manjadi maha. Dek itulah, pamarintah kolonial mangaluaan aturan untuak pangguno jalan mambayia retribusi atau nan sangkek tu disabuik kloofgelden (pitih lewaik). Pado maso Japang, acok juo tajadi kacilakoan kareta api nan mamakan koroban.[2]

Pado maso Agresi Militer Balando II, Lambah Anai manjadi garih patahanan malawanan Sekutu. Pajuang-pajuang kamardekaan mamanfaaikkan alam lambah untuak maambek pagarakan Tantara Sekutu. Pajuang mamutuih jalan di Lambah Anai jo manumbangan batang-batang pohon sarato manjadian puncak-pucak bukik jo salo-salo hutan untuak manembak musuah.[2]

Lalu linteh[suntiang | suntiang sumber]

Jalan raya jo rel nan malintasi Lambah Anai kini

Jalan nan mambalah Lambah Anai ko marupokan bagian dari Jalan Lintas Sumatra, nan indak anyo maubuangan antaro Padang jo Padangpanjang, tapi juo Sumatra Barat jo Riau. Jalan nan dibangun sajak zaman Balando ko cukuik babahayo ditampuah dek jalannyo sampik, mandaki, manurun, sarato ado tabiang curam jo jurang dalam ka batang aia di sisi jalannyo. Samakin babahayo katiko cuaco buruak nan mambuek aia dari Aia Tajun Lambah Anai malimpah ruah ka jalan[9] ataupun galodo dari ateh tabiang.[10] Kondisi pangandara nan acok mambaok kandaraannyo kancang juo manjadi salah satu panyababnyo. Kacalakaan nan panah tajadi di antaronyo kacalakaan tungga truk paangkuik aspal nan maantam paga pambateh aia tajun,[11] kacalakaan motor,[12] kacalakaan baruntun,[13] atau bahkan jatuah ka jurang.[14][15] Dek itulah, pangamudi paralu baelok-elok katiko malalui jalua ko.[8][16] Pado kondisi Jalan Lambah Anai indak dapek talalui, jalan Padang-Padangpanjang biaso dialiahan malalui Malalak atau Singkarak, Solok.[17]

Salain kacalakaan di jalan rayo, tajadi pulo kacalakaan kareta api di rel nan malintang sapanjang Lambah Anai. Panyabab tajadinyo antaro lain cuaco buruak ataupun kondisi rel nan mananjak-manurun.[2] Di antaro kacalakaan kareta nan panah tajadi iyolah pado taun 2000 gerbong kareta batubaro tajatuah dari jambatan kareta batinggian 25 meter nan manewasan balasan urang.[18]

Wisata[suntiang | suntiang sumber]

Aia Tajun Lambah Anai talatak di tapi Jalan Lintas Sumatra, nan manjadi jalan pangubuang Padang jo Padangpanjang, sainggo manjadi tujuan wisata nan mudah diakses masyarakaik. Biasonyo pangguno jalan nan sadang manampuah pajalanan antaro Padang jo Padangpanjang ko manyampatkan diri barehaik di aia tajun ko.[5] Pado ari-ari perai, jumlah kunjuangan ka aia tajun ko dapek maningkek dan manyababan kamacetan panjang.[19]

Pangunjuang dapek manikmati kaelokan aia tajun ko baiak sambia bajalan jo kandaraan atau turun lansuang ka aia tajun. Di sakitar aia tajun ado lahan-lahan parkir nan cukuik untuak mamarkiran kandaraan nan dikalola masyarakaik sakitar. Untuak pangunjuang nan ka marasoan sajuaknyo aia tajun ko, pangunjuang musti malewati pos bayia nan dikalola anak nagari. Fasilitas lain nan tasadio di sakitaran aia tajun antaro lain mushalla, rumah makan, sarato tampek jua oleh-oleh khas Sumatra Barat. Indak jauah dari aia tajun, pangunjuang dapek mancaliak banyak cigak nan balalu-lalang.[20]

Pangunjuang nan hobi trackking, dapek juo manalusuri kawasan Cagar Alam Lambah Anai untuak mancaliak anam aia tajun lainnyo. Aia tajun lainnyo dapek ditampuah kiro-kiro duo jam dari aia tajun tapi jalan dan anyo dapek ditampuah jo bajalan kaki.[5]

Indak jauah dari aia tajun ka arah Padangpanjang, ado pamandian nan dinamokan Pamandian Mega Mendung. Mato aia pamandian ko barasa dari aliran Batang Lurah nan saaliran jo Aia Tajun Lambah Anai. Di pamandian ko disadiokan lahan parkir jo tampek rehaik nan labiah laweh pado di sakaliliang aia tajun. Pamandian ko kini kalola dek BUMNag (Badan Usaha Milik Nagari) satampek.[21]

Galeri[suntiang | suntiang sumber]

Rujuakan[suntiang | suntiang sumber]

  1. a b c Asnan, Gusti. (2003). Kamus sejarah Minangkabau. Pusat Pengkajian Islam dan Minangkabau. ISBN 9799740703. OCLC 68192734. http://worldcat.org/oclc/68192734. 
  2. a b c d e "Ada Sejarah Memilukan di Balik Keindahan Lembah Anai". tirto.id (dalam bahasa Indonesia). Diakses tanggal 2019-09-02. 
  3. "MENGENAL LEBIH DEKAT: WISATA ALAM INDONESIA". Diakses tanggal 05 Agustuih 2017. 
  4. Kaya, Indonesia. "Lembah Anai, Anugerah Sang Maha Agung di Jalur Padang-Bukittinggi - Situs Budaya Indonesia". IndonesiaKaya (dalam bahasa Indonesia). Diakses tanggal 2019-09-02. 
  5. a b c "Pesona Lembah Anai, Air Terjun Alami di Jalur Trans Sumatera". tirto.id (dalam bahasa Indonesia). Diakses tanggal 2019-09-02. 
  6. "Ini Keindahan Lembah Anai, Objek Wisata di Tepi Jalan Padang-Bukittinggi". Diakses tanggal 05 Agustuih 2017. 
  7. bpcbsumbar (2018-07-17). "Tinggalan Teknologi pada Jembatan Kereta Api Lembah Anai". Balai Pelestarian Cagar Budaya Sumatera Barat (dalam bahasa Inggris). Diarsipkan dari versi asli tanggal 2019-04-14. Diakses tanggal 2019-09-02. 
  8. a b Wijanarko, Tulus (2018-12-13). "Ambruknya Jembatan Kalu dan 5 Fakta Mengenai Lembah Anai". Tempo (dalam bahasa Indonesia). Diakses tanggal 2019-09-02. 
  9. Okezone. "Air Terjun Lembah Anai Meluap, Jalan Raya Padang-Bukittinggi Terendam : Okezone News". news.okezone.com (dalam bahasa Indonesia). Diakses tanggal 2019-09-02. 
  10. Media, Kompas Cyber. "Longsor dan Laka Lantas di Padang Panjang, Lalu Lintas Macet Total". KOMPAS.com (dalam bahasa Indonesia). Diakses tanggal 2019-09-02. 
  11. Nusantara; Nasional; Polhukam; Olahraga; Bisnis, Ekonomi; Otomotif; Ragam; Pendidikan; Sosial. "Kecelakaan tunggal di Lembah Anai, korban dievakuasi ke rumah sakit dan pagar objek wisata rusak". Antara News Sumbar. Diakses tanggal 2019-09-02. 
  12. Agusmanto. "Kecelakaan di Mega Mendung, Dua Mahasiswi Unand Meninggal". KlikPositif (dalam bahasa Indonesia). Diarsipkan dari versi asli tanggal 2018-08-19. Diakses tanggal 2019-09-02. 
  13. "Empat Kendaraan Kecelakaan Beruntun di Lembah Anai". www.harianhaluan.com. Diarsipkan dari versi asli tanggal 2019-09-02. Diakses tanggal 2019-09-02. 
  14. "Bus Masuk Jurang di Sumbar, 12 Orang Diperkirakan Tewas". detiknews. Diakses tanggal 2019-09-02. 
  15. "Truk Pengangkut Tisu Terjun ke Jurang di Lembah Anai". Portal Berita Singgalang (dalam bahasa Indonesia). 2017-10-04. Diakses tanggal 2019-09-02. 
  16. "Hujan Badai, Hati-hati Lewat Lembah Anai". Portal Berita Singgalang (dalam bahasa Indonesia). 2016-08-24. Diakses tanggal 2019-09-02. 
  17. VIVA, PT VIVA MEDIA BARU- (2018-12-11). "Jembatan Ambruk, Jalur Utama Padang Tak Bisa Dilintasi - VIVA". www.viva.co.id (dalam bahasa Indonesia). Diakses tanggal 2019-09-02. 
  18. Media, Kompas Cyber. "Hari Ini Dalam Sejarah: Kereta Api Anjlok di Lembah Anai, Belasan Orang Tewas Halaman all". KOMPAS.com (dalam bahasa Indonesia). Diakses tanggal 2019-09-02. 
  19. "Air Terjun Lembah Anai di Sumatera Barat, Ikon Wisata yang Melegenda". kumparan (dalam bahasa Indonesia). Diakses tanggal 2019-09-02. 
  20. "Libur Lebaran Usai, Air Terjun Lembah Anai Tetap Ramai". Republika Online. 2019-06-10. Diakses tanggal 2019-09-02. 
  21. Akbar, Pundi F. "BUMNag Singgahan Alang Kelola Wisata Pemandian Mega Mendung". KlikPositif (dalam bahasa Indonesia). Diakses tanggal 2019-09-02. [pranala nonaktif permanen]