Kelok 9

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Koordinat: 0°04′11″S 100°41′51″E / 0.069818°S 100.6974923°E / -0.069818; 100.6974923

Motorway CZ.svg

Kelok 9
(Jalan dan jembatan)
Informasi rute
Panjang: 2.7 km (1,7 mi)
Persimpangan besar
Ujung selatan: Sumatra Barat
  Jalan lama sepanjang 300 meter, 4 jembatan sepanjang 959 meter, dan jalan penunjang sepanjang 1.537 meter[1]
Ujung utara: Riau
Letak
Kota besar: Payakumbuh
Sistem jalan bebas hambatan
AH 25

Jalan Tol di Indonesia

Kelok 9 atau Kelok Sambilan adolah sarueh jalan bakelok nan talatak sakitar 30 km sabalah timur dari Kota Payakumbuh, Sumatra Barat manuju Provinsi Riau. Jalan iko mambantang sapanjang 300 meter di Jorong Ulu Air, Nagari Harau, Kecamatan Harau, Kabupaten Lima Puluh Kota, Sumatra Barat dan marupoan bagian dari rueh jalan pangubuang Linteh Tangah Sumatra jo Pantai Timur Sumatra. Jalan iko mampunyoi kelok nan tajam jo leba sakitar 5 meter, babatehan jo jurang, dan diapik jo duo pabukitan di antaro duo cagar alam: Cagar Alam Aia Putiah jo Cagar Alam Harau.[2]

Di sakitar Jalan Kelok 9 kini alah dibangun jambatan layang sapanjang 2,5 km. Jambatan iko mambantang malakuak-lakuak manyusuri duo dindiang bukik curam sarato tinggi tonggak-tonggak beton nan bavariasi mancapai 58 meter. Taretong, jambatan ko anam kali manyubrang bulak baliak bukik. Jambatan ko dirasmian dek Presiden Susilo Bambang Yudhoyono pado Oktober 2013,[3] walau alah bara kali dibukak dan manunjang aruih mudiak rayo jo panyelenggaraan Tour de Singkarak duo taun sabalunnyo.[4][5]

Sijarah[suntiang | suntiang sumber]

Kelok 9 (foto tahun 1914) dibangun jo manyiasati beda tinggi nan mancolok antaro jalan bagian bawah jo bagian ateh

Jalan Kelok 9 dibangun samaso pamarintahan Hindia Balando antaro taun 1908–1914.[6][7] Jalan iko maliuk malinteh Bukik Barisan nan mamanjang dari utara ka selatan Pulau Sumatra. Jikok dirantang luruih, panjang Kelok Sambilan hanyo 300 meter jo leba 5 meter dan tinggi sakitar 80 meter.[2]

Manuruik catatan Kamantarian PU, dalam sahari jalan iko dilalui labiah dari 10 ribu unit kandaraan dan pado ari perai atau parayoan ari gadang maningkek 2 sampai 3 kali lipek.[8] Tapi, sajak dibangun Kelok Sembilan ampia indak maalami palebaran nan bamakna dek taalang medan. Sairiang paningkatan volume kandaraan nan malinteh, kondisi jalan nan nan sampik jo terjal acok mambuek kamacetan. Leba jalan nan anyo 5 meter jo tikungannyo nan tajam acok manyulikan kandaraan bamuatan gadang nan malinteh dek indak talok mananjak.[6]

Pado taun 2000, lalu linteh kandaran antaro Sumatra Barat jo Riau alah mancapai antaro 9.000 sampai 11.000 kandaraan sahari jo maangkuik sakitar 15,8 juta urang dan sakitar 28,5 juta ton barang dalam satahun.[2] Satangah dari barang nan diangkuik adolah hasia tani jo taranak. Dek panyampikan jalan di Kelok Sambilan, pajalanan dari Bukittinggi manuju Pekanbaru nan samustinyo buliah ditampuah dalam wakatu 4 jam, dapek mamakan wakatu 5 inggo 6 jam.[2] Maaatasi pamasalahan ko, Kapalo Dinas Prasarana Jalan Sumatra Barat Ir. Hediyanto W. Husaini mausuakan ka pamarintah pusek untuak mambangun jambatan layang. Pambangunan jalan layang Kelok 9 mulai dikarojoan pado November 2003 salepeh dapek pasatujuan pamarintah pusek malalui Badan Perencanaan Pembangunan Nasional pado Agustus 2003.[9]

Jambatan layang[suntiang | suntiang sumber]

Salah sarueh jambatan layang Kelok 9

Pambangunan jambatan layang Kelok 9 mulai dikarajoan pado 2003. Pangarajoannyo ditangani dalam duo tahapan pambangunan. Panjang kasadoalahan jambatan jo jalan nan dibangun adolah 2.537 meter, tadiri dari anam jambatan jo panjang 959 meter dan jalan pangubuang sapanjang 1.537 meter.[1][10]

Jambatan layang Kelok 9 tadiri dari anam jembatan dan mamiliki rueh jalan saleba 12,5 meter. Bantang jambatan partamo mamiliki panjang 20 meter, bantang kaduo 230 meter, sarato bantang katigo 65 meter.

Bantang kaampek mamiliki panjang 462 meter. Bantang jambatan kaampek marupoan jambatan jinih palangkuang beton jo pondasi bore pile sadalam 20 meter untuak manahan barek jambatan jo gaya horizontal gampo. Bantang jambatan kalimo mamiliki panjang 31 meter jo bantang kaanam 156 meter.[11][12]

Galeri[suntiang | suntiang sumber]

Caliak pulo[suntiang | suntiang sumber]

  • Kelok 44, jalan lainnyo nan dibuek bakelok-kelok jo 44 tikungan

Rujuakan[suntiang | suntiang sumber]

Pautan lua[suntiang | suntiang sumber]