Tambo

Wikipedia Minangkabau - Lubuak aka tapian ilimu

Tambo barasal dari baso Sansekerta, tambay nan aratinyo bamulo. Tambo dalam tradisi masyarakaik Minangkabau marupoan suatu warih turun tamurun nan disampaikan sacaro lisan[1]. Panulisan tambo ko, partamo kali basobok dalam bantuak tulisan Arab. Salanjuiknyo panulisan dalam bantuak Latin dikenal baru pado awal abaik ka 20, nan isinyo adolah mambandingkannyo jo babarapo bukti sajarah nan bakaitan[2]. Walaupun mitos, lagenda dan imajinasi bacampuraduak dalam tambo ko, namun dari tambo tu masih dapek mambantu peneliti untuak mangenal budayo Minangkabau itu sandiri[3].

Tambo di Minangkabau biasonyo tabagi ateh duo bagian:[4]:

  • Tambo alam, nan mangisahkan asa usua nenek moyang sarato tantang karajaan Minangkabau.
  • Tambo adaik, nan mangisahkan adaik jo sistem sarato undang-undang tantang pamarintahan Minangkabau dimaso lalu.

Dalam panyampaian kisah tambo ko, indak pakai sistematika tatantu, kisahnyo kadang disasuaikan bagi kaparluan jo kaadaan. Jadi tambo ko marupoan karya sastra nan manjadi milik basamo, sahinggo isi kisahnyo dapek barubah-rubah manuruik kasanangan pandanganyo[4].

Tambo Alam[suntiang | suntiang sumber]

Dari mano titiak palito, dari telong nan batali, dari mano asa-asua niniak moyang kito, dari ateh puncak gunuang marapi.
(Tambo Alam Minangkabau)


Dalam tambo alam Minangkabau, dikabakan kisah palayaran putera-putera laluhur moyang Aleksander nan Aguang (Rajo Iskandar Zulkarnain) tigo basudaro basamo Nabi Nuh katiko banjir satenggi langik,[5] nan paliang tuo banamo Maharajo Alif, nan tangah Maharajo Dipang, nan bungsu banamo Maharajo Dirajo, dakek pulau Sailan tajatuah mahkota (mangkuto) ameh ka lauik. Kasado ândai silam alah diparintahkan maambiak jo mancari nyo. Tapi usaho itu indak ado hasil karano mahkota tu dibauik ula bidai di dasa lauik. Ceti Bilang Pandai maimbau pandai amaeh untuak mambuek mahkota palasu. Dek pandai ameh manggunokan camin taruih, dapeklahinyo mambuek mahkota nan samo. De Ceti, untuak manyimpan rahasia, dibunuahlah si pandai ameh tu. Katiko Sri Majarajo Dirajo tajago, diambiak baliau mahkota tu dan dipakai.

Duo urang kakak baradiak nan lain tabangun dan mandapati si bungsu manguasai mahkota. Batangka katigo badunsanak tu. Akhianyo, mareka bapisah. Sri Maharajo Alif ka Barat manjadi rajo di banua Ruhum. Sri Maharajo Dipang ka Timur mamarintah Cino jo Japang. Dan Sri Maharajo Dirajo taruih balayar ka selatan. Salain mambawo permaisurinyo, Maharajo Dirajo juo mambawo Harimau Campo, Kuciang Siam, Kambiang Hutan dan Anjiang Mualim.

Sasudah balayar sampailah mareka tu di suatu tampek nan banamo Lagundi nan baselo, sataruihnyo sampai ka Gunuang Marapi, nan samulo sagadang talua itiak, lalu mayentak naiak, sadangkan lauik mayentak turun. Kamudian dibangunlah nagari nan banamo Pariangan.

Tambo Adaik[suntiang | suntiang sumber]

Adaik bagi urang Minangkabau adolah Kain dipakai usang, adaik dipakai baru, mukasuiknyo pakaian jiko dipakai taruih akan usang, tapi adaik dipakai taruih manaruih sanantiaso awet. Dek itu adaik tatok indak barubah.

Adaik dalam masarakaik Minangkabau ado ampek kategori:

  • Adaik nan sabana adaik, adaik nan usali, indak lapuak dek hujan indak lakang dek paneh, dicabuik indak mati diasak indak layua.
  • Adaik istiadaik, marupoan kabiasaan nan balaku di tangah masyarakaik.
  • Adaik nan diadaikkan, marupoan undang-undang sarato hukum nan balaku.
  • Adaik nan taradaik, marupoan suatu konsensus atau mupakaik basamo dari masyarakaik.

Caliak juo[suntiang | suntiang sumber]

Rujuakan[suntiang | suntiang sumber]

  1. Sangguno Diradjo, Dt. (1954), Tambo Alam Minangkabau, Balai Pustaka.
  2. Batuah A. Dt., Madjoindo A, Dt., (1957), Tambo Minangkabau, Jakarta: Balai Pustaka.
  3. Djamaris E., (1980), Tambo Minangkabau: tinjauan struktural, Seminar Internasional mengenai Kesusastraan, Kemasyarakatan dan Kebudayaan Minangkabau, Bukittinggi.
  4. a b Navis A.A., (1984), Alam Terkembang Jadi Guru: Adat dan Kebudayaan Minangkabau, Jakarta: PT. Grafiti Pers.
  5. Mansoer, M.D., (1970), Sedjarah Minangkabau, Jakarta: Bhratara.