Musajik Rayo Gantiang

Wikipedia Minangkabau - Lubuak aka tapian ilimu
(Dialiahkan dari Masajik Rayo Gantiang)
Loncat ke navigasi Loncat ke pencarian

Musajik Rayo Gantiang (Indonesia: Masjid Raya Ganting) adolah masjid nan talatak di Kelurahan Ganting Parak Gadang, Kecamatan Padang Timur, Kota Padang, Sumatera Barat, Indonesia. Mulai dibangun pado taun 1805, masajik ko tacatat sabagai masajik tatuo di Padang jo salah satu nan tatuo di Indonesia sarato alah manjadi cagar budayo.[1][2]Masajik nan pambangunannyo malibatkan baragam bangsa ko manjadi pusat pagerakan reformasi Islam di daerah ko pado abaik ka-19, jo presiden partamo Indonesia, Soekarno, pernah mangungsi ka masajik ko pado masa parjuangan kamerdekaan.[3][4] Masajik ko tamasuak bangunan nan tatap utuh satalah galombang tsunami manarjang kota Padang jo sakitarnyo akibaik gampo bumi taun 1833,[5] walaupun mangalami karusakan cukuik baraik akibat gampo taun 2005 jo 2009.[6][7] Saat ko, salain digunokan sabagai aktivitas ibadah umaik Islam, masajik ciek lantai ko juo digunokan sabagai sarana pandidikan agamo jo pesantren kilat bagi palajar sarato manjadi salah satu daya tarik wisata di kota Padang.[8][9]

Pambangunan[suntiang | suntiang sumber]

Indak dikatahui pasti taun barapo masajik ko mulai badiri. Manuruik Abdul Baqir Zein dalam bukunyo nan bajudul Masjid-masjid Bersejarah di Indonesia, masajik ko alah badiri sajak taun 1700 jo pado mulonyo talatak di kaki Gunuang Padang, kamudian dipindahkan ka tapi Batang Arau dek karano Balando handak mambuek jalan ka palabuhan Taluak Bayua, sampai tarakhia dipindahkan ka lokasi kini.[10][11] Namun, dalam dokumen nan ditabikkan dek Departemen Agamo, disabuikkan masajik ko dibangun pado taun 1790 dari bahan kayu jo atok babahan rumbio jo masajik nan labiah elok lai dibuek pado taun 1805.[12] Lain pulo manuruik Dinas Kabudayoan jo Pariwisata Kota Padang, nan manyabuikkan masajik ko mulai dibangun pado taun 1805 jo awalnyo dikenal sabagai "Masajik Kampuang Gantiang" jo bangunan barupo surau balantaikan batu jo dindiang baplester tanah jo atok barundak-undak.[5]

Talapeh dari pabedaan-pabedaan mangenai taun mulai badirinyo masajik ko, dari sajumlah catatan dikatahui bahwa pambangunan masajik di pusat Minangkabau di Padang abaik ka-18 jo ka-19[13] iko diprakarsai dek tigo tokoh masyarakaik satampek, yaitu Angku Gapuak (saudagar, namo asli Sjech Abdul Halim, saudara ayah Abdullah Ahmad), Angku Syekh Haji Uma (kapalo kampuang Gantiang), jo Angku Syekh Kapalo Koto (ulama), samantaro biayanyo banyak didapek dari para saudagar jo ulama Minangkabau di sajumlah tampek di Sumatra.[10][12][5] Masajik ko juo tacatat sabagai salah satu bangunan nan tatap utuh dari tajangan galombang tsunami nan marambah sabagian gadang Padang akibaik gampo bumi Sumatra pada tahun 1833, hanyo sajo lantai batunyo kamudian diganti jo lantai campuran kapua kulit kerang jo batu apuang.[5]

Masajik Rayo Gantiang sabalum mamiliki duo manara sakitar taun 1900–1923

Pado taun 1910, Balando mandirikan pabrik simin di Indaruang, Padang. Untuak mentranspor simin ka Palabuhan Taluak Bayua, Balando mambukak jalan batu malewati tanah Masajik Raya Gantiang. Hampia sapatigo dari luweh tanah wakaf untuak masajik ko digunokan untuak jalan.[5] Sabagai ganti rugi ateh tanah tu, Balando mambantu mangembangkan masajik ko malalui Komandan Korps Genie wilayah Pesisia Barat Sumatra (wilayah nan maliputi Sumatra Barat jo Tapanuli kini).[8] Pangambangan nan dilakuan tamasuak papanjangan biliak muko sapanjang 20 meter jo pambuatan bagian muko (fasad) masajik bagaya Portugis.[14] Salain itu, lantai masajik diganti jo simin nan didatangkan dari Jerman.[12] Pado taun 1900, dimulailah pamasangan tegel dari Balando nan dipesan malalui NV Jacobson van den Berg.[5] Pamasangan tegel tu ditangani dek tukang nan ditunjuak langsuang dek pabrik jo salasai pado taun 1910.[15]

Samantaro itu, etnis Tionghoa di bawah komando Kapten Lau Ch’uan-ko ikuik mangerahkan tukang-tukang Tionghoa untuak mangarajokan kubah nan dibuek persegi delapan mirip atok vihara.[16] Baitu juo, pado mihrab tampek imam mamimpin salat jo manyampaikan khotbah dibuek ukiran kayu mirip ukiran Tiongkok. Di bagian tangah masajik juo dibangun sabuah muzawir barukuran 4 × 4 m² babantuak pangguang dari kayu jo diagia ukiran Tiongkok. Muzawir bafungsi sabagai tampek mangumandangkan adzan jo panyambuang suaro imam sahinggo makmum dapek mangikuti garakan imam. Satalah ado pangareh suaro, muzawir indak digunokan lai, sahinggo panguruih masajik mambongka bangunan tasabuik pado taun 1974[5] (atau 1978).[17]

Satalah itu, pambangunan masajik dilanjuikkan pado taun 1960 jo pamasangan karamik pado 25 tiang ruang utamo nan aslinyo tabuek dari batu bata.[12] Kamudian, manara pado bagian kiri jo kanan masajik salasai dibangun pado taun 1967.[6] Pado taun 1995, dilakuan pamasangan karamik pado dindiang ruang utamo.[12]

Garih wakatu[suntiang | suntiang sumber]

Masajik Rayo Gantiang turuik baperan dalam pajalanan sajarah Kota Padang.[6] Salain sabagai lokasi pangambangan Islam di pulau Sumatra, masajik ko juo baperan dalam pagerakan pajuangan kamardekaan di Padang.[18]

Samanjak awal badirinyo, masajik ko dimanfaatkan sabagai tampek bimbingan manasik calon haji.[19] Masajik ko juo manjadi tampek embarkasi haji patamo di Sumatra Tengah malalui Palabuhan Taluak Bayua nan dibukak pado taun 1895.[5][20] Urang partamo nan mambarikan bimbingan manasik haji di Masajik Rayo Gantiang adolah Syekh Abdul Hadi, dari Arab Saudi. Konon, Syekh Abdul Hadi sempat bamukim di Padang dalam wakatu lamo jo manikah jo gadih Minang.[21]

Pado taun 1918, para ulamo di Minangkabau pernah manjadikan Masajik Rayo Gantiang sabagai tampek musyawarah partamo untuak mangambangkan agamo Islam.[5] Syekh Abdul Hadi mambarikan khotbah Jumat dalam bahaso Malayu di masajik, dicaliakkan dek polisi Hindia-Belanda, nan barisi ajakan untuak indak ikuik dalam garakan komunis.[22]

Pado taun 1920-an, badiri sakolah Thawalib di dalam pakarangan masajik sabagai sarana pandidikan agamo bagi masyarakaik kota Padang saat itu,[23][24] tapi dilaporkan pado 1929 sakolah tasabuik tutuik karano kakurangan siswa.[25] Masajik ko juo dijadikan tampek jambore nasional partamo garakan kapanduan Muhammadiyah Hizbul Wathan pado taun 1932.[19][5]Katiko Japang mulai manduduki Indonesia pado taun 1942, Soekarno nan ditahan Balando di Bengkulu diungsikan ka Kutacane. Namun, sasampainyo di Painan, tantara Japang alah labiah dahulu manduduki Bukittinggi sahinggo Balando mangubah rancana samulo jo mangungsi ka Barus jo maninggakan Soekarno di Painan. Salanjuiknyo, Hizbul Wathan, nan saat ko bamarkas di Masajik Rayo Gantiang, manjampuik Soekarno untuak dibaok ka Padang jo manggunokan padati. Babarapo hari kamudian, Soekarno nan alah tibo di Padang manginap samantaro wakatu di salah satu rumah panguruih Masajik Rayo Gantiang jo sempat mambarikan pidato di masajik ko.[26][5]

Sabagian karusakan nan dialami Masajik Rayo Gantiang sasud gampo bumi taun 2009

Salamo pandudukan tantara Japang di Indonesia, masajik ko dijadikan sabagai markas gadang wilayah Sumatra Barat jo Tangah sakaligus tampek pambinaan prajurit Gyugun jo Heiho, nan marupokan kasatuan tantara pribumi nan dibantuak dek Japang. Anggota parwira militer Gyugun tadiri ateh para ulamo, sadangkan prajurit Heiho diambiak dari para santri.[5][27]

Satalah tantara Sakutu mandaraik di Sumatra, banyak tantara Inggris dari kasatuan tantara Muslim India mambelok jo bagabuang jo tantara rakyat satampek. Inyo mangatur strategi panyarangan dari masajik ko, tamasuak panyarangan ka salah satu tangsi militer Inggris dari kasatuan Gurkha.[27] Katiko saurang prajurit Muslim ko tewas dalam pakelahian di markas militer nan hanyo bajarak 200 meter dari masajik, janazahnyo dikubuan di Masajik Gantiang.[20][8]

Samanjak taun 1950, Masajik Rayo Gantiang mulai banyak dikunjungi dek pajabat negara baik dari dalam negeri maupun lua negeri. Sajumlah pejabat negara nan pernah bakunjuang ka masajik ko, antaro lain, adolah Wakil Presiden Mohammad Hatta, Menteri Patahanan Sultan Hamengkubuwana IX, Wakil Ketua DPR-GR Achmad Syaichu, jo Ketua MPRS Abdul Haris Nasution. Samantaro itu, tokoh lua negeri nan pernah mangunjungi masajik ko, antaro lain, adolah Sekretaris Negara Malaysia sarato pajabat dari Arab Saudi jo Mesir.[5][27]

Pado 10 April 2005, tajadi gampo bumi di pantai barat Sumatra jo kakuatan 6,7 skala Richter satalah tajadinyo gampo bumi labiah gadang di sakitar Pulau Nieh duo minggu sabalumnyo. Sajumlah tiang panyangga utamo kudo-kudo atok Masajik Rayo Gantiang ratak jo patah akibaik gampo ko.[6][28][14]

Salanjuiknyo, masajik ko marupokan salah satu dari 608 unit tampek ibadah di Sumatra Barat nan rusak barek akibaik gampo bumi 30 September 2009.[29][7] Salain maruntuhkan sabagian fasad masajik, gampo ko juo maratakkan tiang-tiang ruang utamo sahinggo bangunan ko dikhawatirkan roboh.[30][31] Sabalum dilakuan renovasi pado taun 2010, karusakan nan dialami masajik ko manyebabkan aktivitas ibadah taganggu sahinggo, salamo samantaro wakatu, aktivitas ibadah harus dilakuan di halaman masajik.[32][33]

Pado taun 2011, masajik ko dimasukkan dalam daftar masajik tearancak di Indonesia nan ditabikkan dalam buku 100 Masjid Terindah Indonesia dek PT Andalan Media. Salain Masajik Rayo Gantiang, masajik lain dari Sumatra Barat nan dimuek dalam buku tasabuik iolah Masajik Rayo Bayua.[34]

Arsitektur[suntiang | suntiang sumber]

Berkas:Atapmasjidganting.jpg
Atok tumpang Masajik Rayo Gantiang, sarupo nan umum dipunyoi masajik-masajik tuo di Nusantara[15]

Masajik ko badiri di ateh tanah salueh 102 × 95,6 meter parsegi jo bangunan babantuak parsegi panjang barukuran 42 × 39 meter parsegi.[12] Bangunan tadiri dari sarambi muko, sarambi sampiang (kiri jo kanan), mihrab, jo ruang utamo. Lueh bangunan nan kurang dari saparlimo lueh lahan manyisokan halaman nan luaeh nan dapek manampuang banyaknyo jamaah pado saat palaksanaan salat Ied pado hari Idul Fitri jo Idul Adha. Halaman tasabuik dipagari basi jo babatasan langsuang jo jalan rayo di sabalah timur jo utara.[20] Di sabalah selatan jo balakang masajik tadapek babarapo makam, salah satunyo adolah makam Angku Syekh Haji Uma, ciek dari tigo urang pamrakarsa pambangunan masajik ko.[17]

Papaduan arsitektur dari babagai corak talihek jaleh pado bangunan masajik ko karano pangarajoannyo malibaikkan baragam bangsa sarupo Eropa, Timur Tengah, Tiongkok, jo Minangkabau.[3][6] Masajik ko mampunyoi susunan atok barupo atok susun barundak-undak sabanyak limo tingkek jo puncak bakubah bahiaskan mustaka.[15] Ado celah di tiok bagian atok untuak pancahayoan. Tingkek patamo babantuak parsegi, sadangkan tingkek duo sampai ampek babantuak sagilapan.

Sarambi atau biliak[suntiang | suntiang sumber]

Tiang gando babantuak silinder nan bajejer tujuah di sarambi muko

Bangunan masajik ko mamiliki duo sarambi utamo, yaitu sarambi sampiang jo sarambi muko. Kaduo sarambi sampiang masing-masing barukuran 30 × 4,5 meter parsegi jo mamiliki duo pintu masuak, nan salah satu pintunyo manuju ka tampek wuduak nan tadapek di sisi utara jo selatan.[17] Pado bagian barat tadapek sekatan nan mambantuak kamar atau ribath (tampek tingga pangurus masajik) barukuran 4,5 × 3 m². Ribath ko mamiliki pintu dari arah timur barukuran 225 cm × 90 cm jo jandela barukuran 90 cm × 90 cm. Sarambi muko babantuak parsegi panjang barukuran 12 × 39 m² sarato mamiliki anam pintu dari arah timur jo duo pintu dari arah utara jo selatan, nan masiang-masiang badaun pintu dari jaruji basi. Tadapek hiasan tiang gando semu pado anam pintu dari arah timur, kacuali pado bagian tangah nan marupokan bangunan mimbar nan manjorok ka muko jo daun pintu dari jaruji pulo. Mimbar barukuran 220 cm × 120 cm × 275 cm tasabuik hanyo digunokan pado palaksanaan salat Ied. Salain pintu, juo tadapek masiang-masiang ciek jendela jo taroli basi di sisi utara jo selatan.[17]

Di dindiang timur sarambi muko, tadapek hiasan ukiran geometri barupo panil-panil nan babantuak parsegi panjang jo bujua sangka.[15] Tadapek pulo hiasan langkuang nan ditutupi tembok jo motif cincin jo mato kapak. Taba dindiang sakitar 34 cm jo tinggi 320 cm. Di dalam ruangan tadapek tujuah tiang gando babantuak silinder dari beton jo garih tangah 45 cm. Tiang-tiang tasabuik badiri di ateh umpak beton jo lebar 113 cm, tinggi 70 cm, jo taba 67 cm. Salain itu, tadapek pulo duo tiang babantuak sagi ampek nan talatak di sisi utara jo selatan, dakek jo ruangan babantuak sagi lapan nan mamiliki ciek pintu dari arah timur jo ciek jendela.[17]

Ruang utamo[suntiang | suntiang sumber]

Langik-langik masajik di ruang utamo disangga dek 25 tiang, samo sarupo jumlah nabi jo rasul.

Ruang utamo masajik babantuak parsegi barukuran 30 × 30 meter parsegi jo ampek pintu masuak di sisi timur jo masiang-masiang duo pintu di sisi utara jo selatan. Pintu barukuran 160 cm × 264 cm tasabuik mamiliki duo daun pintu dari kayu jo hiasan langkuang kipeh pado ambang ateh. Tadapek pulo duo jandela nan tabuek dari kayu di sisi timur mangapik pintu masuak, jo masiang-masiang tigo jandela di sisi utara jo selatan, sarato anam jandela di sisi barat. Jandela-jandela tu mamiliki panjang 160 cm jo tinggi 2 m. Sarupo pado pintu, bagian ambang ateh jandela juo babantuak langkuang kipeh. Dindiang pado ruang utamo tabuek dari beton balapih karamik, sadangkan lantainyo dari tegel putiah bahiasan bungo.[12]

Di ruang utamo juo, tadapek soko guru atau tiang utamo bajumlah 25 nan babantuak sagi anam jo diameter 40 sampai 50 cm jo tinggi mancapai 420 cm.[15] Tiang-tiang nan tabuek dari bata merah jo bahan parakek kapua dicampua putiah talua ko samo sakali indak manggunokan tulang basi.[6] Jumlah 25 tiang bajajar 5 malambangkan 25 nabi, jo masiang-masinag tiang dilapisi marmer putiah bahiaskan kaligrafi nan mamuek namo 25 nabi mulai dari Adam sampai Muhammad.[19] Tiang-tiang tasabuik bafungsi sabagai panopang utamo konstruksi atok masajik nan babantuak sagi lapan.[17]

Pado sisi barat ruang utamo tadapek mihrab nan diapik dek duo kamar di sisi utara jo selatan. Mihrab tasabuik barukuran 2 m × 1,5 m jo tinggi pado sisi timur 320 cm jo sisi barat 210 cm.[17]

Bangunan lain[suntiang | suntiang sumber]

Masajik ko mamiliki tampek wuduak barukuran 10 m × 3 m nan talatak di sebelah utara jo selatan sarambi sampiang. Tampek wuduak ko dibangun pado taun 1967 sarato dibuek parmanen jo tatutuik. Salain itu, parpustakaan masajik manampati sabuah ruangan di sisi utara masajik jo masih manyatu jo bangunan masajik.[17] Di sakitar masajik juo tadapek tigo gedung tampek bimbingan teori manasik calon haji. Salah satu dari tigo gedung tasabuik dulunyo ditampati sakolah Thawalib.[19]

Caliak Pulo[suntiang | suntiang sumber]

Rujuakan[suntiang | suntiang sumber]

Catatan kaki[suntiang | suntiang sumber]

Daftar pustaka[suntiang | suntiang sumber]