Talempong

Dari Wikipedia baso Minang, ensiklopedia bebas
Loncat ke navigasi Loncat ke pencarian
Patunjuakan talempong.

Talempong, atau disabuik juo jo namo calempong (Kuantan Singingi),[1] caklempong (Malaysia),[2] atau canang,[3] adolah saparangkek alaik musik (ansambel) sarupo aguang ketek nan tabuek dari logam kuniangan atau parunggu.[4] Kasenian talempong Minang dapek dimainan sacaro diam atau bagarak, tagantuang tujuan panyalanggaraannyo.[4] Talempong biasonyo tadiri dek tigo atau ampek pasang aguang sajaja, atau duo pasang jo aguang tungga, sapasang gandang basisi duo, gandang basisi tungga atau gandang rapano, sarato kok di daerah Sawahlunto-Sijunjung batambah jo aguang baukuran sadang atau sapasang aguang nan tagantuang.[4]

Dalam patunjuakan talempong nan dibaoan sacaro bagarak, satiok pamain mamainan ciek atau duo talempong nan tadapek di langan jo tangan kirinyo.[4] Talempong umumnyo dimainan sacaro baarak-arak dalam upacara adaik kampuang sabalun mulai maso tanam padi, atau mairiangan panari piriang pado alek pakawinan, atau upacara malewakan gala surang datuak atau pangulu.[2][3][4]

Dalam patunjuakan talempong nan indak bagarak nan umumnyo untuak patunjuakan dalam ruangan, limo atau anam talempong dilatakan pado suatu karangko nan balapih bahan lambuik, untuak mampajaleh danguang alaik musik ko.[4] Para pamain bapasang-pasangan mamainan babagai jinih talempong manuruik urutan masuaknyo, nan dapek balain antaro satiok nagari.[4] Pangaturan nada, kombinasi alaik, sarato alaik musik kusuih nan bapakai dalam parangkek talempong, lai babeda dari nagari ka nagari.[3][4]

Talempong dibao ka Nagari Sambilan, Malaysia, dek masarakaik Sumatera Barat pado abaik ka-14.[2][3] Pangajaran kasenian ko dapek basuo di daerah salatan Semenanjung Malaysia, dima banyak taseba urang-urang katurunan Minangkabau.[2]

Rujuakan[suntiang | suntiang sumber]

  1. Hamidy, U.U. (1986), Kesenian jalur di Rantau Kuantan, Riau, Bumipustaka, p. 41. Diakses 19 Juni 2013.
  2. a b c d Matusky, Patricia Ann, Sooi Beng Tan (2004), The Music of Malaysia:The Classical, Folk, and Syncretic Traditions, Ashgate Publishing, Ltd., p. 165. Diakses 19 Juni 2013.
  3. a b c d May, Elizabeth (1983), Musics of Many Cultures: An Introduction, University of California Press, p. 114. Diakses 19 Juni 2013
  4. a b c d e f g h Miller, Terry E., Sean Williams (2008), The Garland Handbook of Southeast Asian Music, Routledge, p. 340. Diakses 19 Juni 2013.