Sijobang

Dari Wikipedia baso Minang, ensiklopedia bebas
Loncat ke navigasi Loncat ke pencarian

Sijobang atau Basijobang marupoan ciek dari banyak bantuak sastra lisan nan bakambang di Minangkabau. Sijobang marupokan kesenian nan ado di Limo Puluah Koto dan manjadi ciri khas masyarakat Limo Puluah Koto itu sandiri. Kato Sijobang barasa dari kato Jobang, dalam dialek Minang urang Limo Puluah Koto, Payokumbuah. Si Jabang itu adolah namo balakang dari Nan Tongga Magek Jabang.[1]

Urang nan batugas atau bakarajo sabagai tukang carito di dalam kesenian Sijobang disabuik jo tukang Sijobang. Nan mambuek kesenian Sijobang babeda jo kesenian nan lain dapek diliek dari alaik musik nan mangiriangannyo. Adopun alat musik nan digunokan dalam Sijobang adolah korek api nan biaso diabuik jo catuih dek urang Minang. Sacaro modern ado juo nan manggunoan Kacapi sabagai alat musik pangiriang dalam Sijobang. Sijobang ko indak hanyo diiriangi dek alat musik. Tapi juo diiriangi dek lagu atau nanyian. Mocam-mocam lagu nan acok dipakai dalam Sijobang antaro lain sarupo Lagu Angkek Pariaman, Lagu Sungai Talang, Lagu Concang Munin jo Lagu Piaman.

Sijobang acok disabuik sabagai sabuah bantuak seni bacarito nan bakisah tantang pajalanan iduik urang-urang tatantu pado zaman daulu. Sabananyo banyak carito nan bisa dan buliah dicaritoan dalam kesenian Sijobang ko. Tapi samantangpun baitu, dari sakian banyak carito nan ado, carito nan paliang acok dipakai atau dicaritoan dalam Sijobang adolah carito Anggun Nan Tongga Magek Jabang jo Puti Gondoriah. Sabab baa ko baitu, carito Anggun Nan Tongga Magek Jabang ko mamiliki banyak nasihaik jo pasan moral nan barasa dari budaya satampek.

Pertunjukan Sijobang biasonyo dipatontonan pado banyak acara misalnyo kutiko ado acara-acara adaik, kutiko urang baralek, kutiko sunaik rasul dan alek batagak pangulu nan ado di Limo Puluah Koto. Pado wakatu iko kini, pertunjukan Sijobang alah batambah fungsinyo untuk mampaarek silaturahmi antaro sasamo masyarakat Limo Puluah Koto khususnyo. Dek zaman nan samakin maju masyarakat samakin cadiak, Sijobang milai dikambangan dalam bantuak baru oleh para palaku seni. Indak hanyo dilakuan dek urang nan disabuik jo akademisi tapi juo dilakuan den urang nan non-akademisi. Babarapo diantaro urang atau kalompok nan alah mangambangan atau mamodifikasi Sijobang antarolain sarupo Grup Musik Talamo Bumi jo judul karyanyo “Galuik Sijobang”. Salanjuiknyo La Gandie Jazz Etnic jo judul karyanyo “Sijobang Dalam Ritem”.[2]

Tukang Sijobang nan cukuik tanamo di Luhak Limo Puluah Koto adolah:

  1. Tuen Islamidar dari Nagari Talang Maua, Kecamatan Mungka, Kabupaten Limo Puluah Koto
  2. Datuak Kodo dari Nagari Sungai Talang, Kecamatan Guguak, Kabupaten Limo Puluah Koto.

Caliak pulo[suntiang | suntiang sumber]

Rujuakan[suntiang | suntiang sumber]

  1. Djamaris, Edward (2001). Pengantar Sastra Rakyat Minangkabau. Jakarta: Yayasan Obor Indonesia. pp. 128-131. ISBN 979-461-395-9. 
  2. Rahim, Abdul dkk (2016). Stimul Of Tradition. Padang: e-jurnal sendratasik FBS Universitas Negeri Padang.