Urang Cino Padang

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Urang Cino Padang
Tionghoa Padang
Klenteng See Hin Kiong.jpg
Kelenteng See Hien Kiong.
Jumlah populasi

9.498 (Sensus 2010)[1]

Kawasan bapopulasi cukuik banyak
Kecamatan Padang Selatan
Bahaso
Bahaso Minang Pondok
Agamo
Agamo tradisional Cino, Kristen, Islam

Urang Cino Padang atau Tionghoa Padang adolah urang katuruan Cino nan batampek tingga sarato bakaturunan di Kota Padang, Sumatera Barat, Indonesia. Urang Cino Padang marupoan ciek dari babagai etnis nan mauni Padang salain urang Minangkabau, Jawa, Batak, Nieh, Melayu, Sunda, jo Mentawai.[1] Kabanyakan mereka bakarajo sabagai padagang. Parmukiman urang Cino Padang takonsentrasi di daerah Pondok jo sakitarnyo di wilayah Kecamatan Padang Selatan nan tanamo sabagai Kampuang Cino.[2][3]

Indak ado catatan pasti bilo urang Cino patamo tibo ka Padang. Dipakiroan urang Cino mulai tibo samanjak parusahaan dagang Balando Vereenigde Oostindische Compagnie (VOC) managakkan markasnyo di Padang pado abaik ka-17.[4][5] Pado tahun 2000, populasi urang Cino Padang parnah masuak tigo paliang banyak sasudah urang Minangkabau jo Jawa dengan presentasi 1,90% dari populasi kota. Namun, sasudah gampo bumi pado tahun 2009, banyak urang Cino Padang nan maninggaan Padang dan pindah kalua wilayah Sumatera Barat.[6] Manuruik data Badan Pusat Statistik (BPS) pado tahun 2010, presentasi urang Cino Padang tingga 1,1% dari populasi kota atau sabanyak 9.498 jiwa, urutan kaampek sasudah Minangkabau, Jawa, jo Batak.[1]

Urang Cino Padang mampu baradaptasi jo budaya Minangkabau. Bahkan, generasi urang Cino Padang kini banyak nan indak dapek mangecek dalam rumpun bahaso Cino dek mereka alah baasimilasi jo Minangkabau. Bahaso nan mereka partuturan tanamo sabagai Bahaso Minang Pondok.[7] Namun baitu, mereka indak maninggaan adat jo tradisi mereka. Lewat parkumpulan sosial, budaya, jo kamatian Himpunan Tjinta Teman (HTT) jo Himpunan Bersatu Teguh (HBT) nan alah tagak sajak abaik ka-19, eksistensi adat jo tradisi di Padang tetap tajago di tangah-tangah masyarakaik Kota Padang hinggo kini.[8][9][10]

Sijarah awal[suntiang | suntiang sumber]

Kadatangan[suntiang | suntiang sumber]

Takah di daerah lainnyo di Nusantara, kabaradaan urang Cino indak di Padang indak lapeh dari fenomena diaspora atau kaluanyo urang Cino dari tanah kelahiran mereka untuak tujuan parniagaan. Walaupun indak ado catatan pasti bilo urang Cino bamulo tibo di Padang, urang Cino dipakiroan alah ado di pantai barat Sumatera pado abaik ka-17, sabalun urang Balando jo Inggirih tibo. Mereka datang dari Banten, nan sangkek itu marupoan pusek niaga di Nusantara.[11] Pado tahun 1630-an, diketahui alah banyak basanda kapa-kapa Cino di sakitar parairan pantai barat Sumatera. Di antaro kota nan rami dikunjungi dek kapa-kapa Cino adolah Piaman. Di daerah iko, urang Cino manggaleh kabutuhan pokok, utamonyo garam. Namun, kabanyakan mereka hanyolah agen dari padagang Cino nan ado di Banten.[12] Pado tahun 1633, dilaporkan alah ado urang Cino nan manetap di Piaman.[13]

Pado tahun 1664, Balando manjadian Padang sabagai markas gadangnyo di pantai barat Sumatera nan ditandoi dengan ditagakannyo sabuah benteng.[14] Balando mancubo mangaliahan parniagaan dari Pariaman ka Padang. Mancaliak kondisi iko, urang Cino mulai batadangan dan manetap di Padang untuak dapek ikuik sato dalam parniagaan.[15] Urang Cino di Padang dipakiroan marupoan pindahan dari Pariaman. Pado tahun 1673, ado laporan tantang "Nahkoda Banten" Cino nan punyo rumah surang di Padang basamo beberapa urang Cino lainnyo.[5] Rumah nan mereka punyo labih rancak dibandiangan jo rumah panduduak satampek.[16] Mereka tingga mangalompok di salah satu kawasan di sakitar tapian Batang Arau. Mereka dapek mambali tanah dari panguaso satampek nan bagala panglimo rajo. Mulai banyaknyo jumlah urang Cino di Padang manyebabkan pado tahun 1682 diangkek saurang "Letnan Cino" untuak mangatur dan mangontrol sasamo urang Cino.[17]

Manjadi mitra datang Balando[suntiang | suntiang sumber]

Sajak kadatangan Balando di bawah bendera VOC, Padang makin bakembang manjadi palabuhan nan rami.

Sairiang wakatu, urang Cino mulai mamacik pangaruah dalam parniagaan di Padang. Mereka manjalin hubungan karajo samo jo Vereenigde Oostindische Compagnie (VOC), parusahaan dagang Balando. Hubungan mereka kian lamo kian arek dek adonyo kauntuangan nan samo-samo didapek. VOC nan indak punyo banyak pagawai di Padang maagih hak ka pihak swasta untuk mamunguik pajak impor jo ekspor. Banyak di antaro pihak swasta nan mandapek hak iko adolah urang Cino. Pado tahun 1785, saurang Kapitan Cino banamo Lau Ch'uan-ko mamacik hak mamungik pajak di Padang.[18] Katiko parniagaan ameh di Minangkabau makin marosot, pamarentah kolonial Balando pado tahun 1790 manyatujui untuak manarimo mato uang urang Cino sabagai pambayia persentase tertentu (dalam hal panjualan kain) untuak Balando. Samantaro itu, urang Minangkabau masih bagantuang ka ameh sabagai alaik tuka. Ditarimonyo mato uang Cino sabagai alaik tuka mambuek urang Cino makin diuntuangan.[19]

Pado awal abaik ka-19, urang Cino di Padang alah malibatkan diri dalam parniagaan lua nagari, tarutamo jo kawasan selat takah Penang, Malaka, jo Singapura. Hal iko didorong dek kebijakan Gubernur Pantai Barat Sumatera Andreas Victor Michiels nan mandorong urang asiang untuak labiah banyak tibo ka Padang dengan tujuan maningkekan parsaingan. Babagai kamudahan jo fasilitas diagiah ka para padagang Cino nan dianggap mampu mamajuan parekonomian.[20] Salah satunyo adolah pinjam pitih untuak modal dari Nederlandsche Handel-Maatschappij (NHM), nan manggantian fungsi VOC nan bangkrut pado 1799.[21][22] Dengan dukungan modal sarato jaringan regional dan internasional, padagang Cino dapek manjadi agen bagi parniagaan barang-barang impor, sarupo kain jo porselen.[23] Akibaiknyo, banyak padagang Minangkabau bagantuang ka padagang Cino.[24] Pado tahun 1829, tasabuik ado ampek urang pialang Cino nan tanamo, yaitu Lie Heng (atau Lie Gieng), Lie Ma-ch’ao (Lie Matjiaw), Lie Sing, jo Hu A-chiao (Hoi Atjouw).[25] Pado tahun 1833, ado sakitar 700 urang Cino di Padang, kabanyakan urang kayo.[26]

Indak hanyo manguasai parniagaan barang impor nan dibutuhan dek masyarakaik Minangkabau di darek, padagang Cino mulai manggarap parniagaan komoditas ekspor nan barasa dari kawasan darek atau padalaman Minangkabau. Pado 1847, saurang Cino banamo Lie Saay mandapek kontrak pamarentah kolonial Balando untuak maangkuik kopi, komoditas ekspor Minangkabau nan tanamo maso itu. Lie Saay malalui parusahaan ekspedisi nan inyo punyo maangkuik kopi dari Padang Panjang ka Kayu Tanam sarato mangangkuik garam jo barang-barang lainnyo dalam parjalanan pulang.[27] Wakatu itu, transportasi hanyo jalan satapak. Jalan darat jo jalur kareta api alun dibangun. Angkutan transportasi nan digunoan Lie Saay hanyo barupo padati nan dielo dek kudo. Dalam parjalanan, Lie Saay didampingi kakaknyo, Lie Maa Toon nan santiang bela diri kungfu sabagai pangawal. Sasudah transportasi dibangun, Lie Saay pindah ka Padang dan diangkek manjadi Kapitan Cino pado tahun 1860.[28][29]

Managakkan parmukiman, kelenteng, jo pasa[suntiang | suntiang sumber]

Kelenteng See Hien Kiong sakitar tahun 1870.

Sairing tanamonyo Padang sabagai pusek pardagangan VOC untuak pulau Sumatera, parusahaan-parusahaan Balando tumbuah bak cindawan. Hal iko mambuek bangsa asing samakin banyak bardatangan, tamasuak urang Cino. Dalam Encyclopaedia Britannica edisi ka-9, Padang pado partangahan abaik ka-19 digambaran sabagai kota nan punyo 2.000 rumah dengan panduduak sabanyak 15.000, alah tamasuak di dalamnyo parmukiman urang Cino.[30] Paniliti tantang sijarah urang Cino di Sumatera Barat, Erniwati manulih pantang Cino di Padang samulo tingga mangalompok di salah satu sisi tapian Batang Arau arah ka muaro nan kini banamo Pondok. Baa kok banamo "Pondok" dek banyak urang Cino Padang managakkan rumah jo tampek manggaleh nan babantuak pondok.

Pado tahun 1852, urang Cino di Padang alah bajumlah 1.140 urang.[31][32] Jumlah iko maningkek manjadi 1.564 pado tahun 1858.[33] Mulai banyaknyo pandatang Cino nan tingga di Padang maakibaikan kabutuhan adonyo kelenteng timbua. Pado awalnyo, urang Cino di Padang indak punyo kelenteng samo sakali. Sakalompok pantadang bainisiatif untuak managakan kelenteng pado partangahan abaik ka-19. Kelenteng iko dinamoan Kelenteng Kwan Im (Kwan Im Teng). Patamo kali tagak, Kwan Im Teng hanyo barupo bangunan kayu baatok atap rumbio. Namun, pado tahun 1861, dek kalalaian pendeta Sae Kong, Kwan Im Teng tabaka hinggo manjadi abu. Samaso Kapitan Cino dipacik dek Lie Goan Hoat pado 1893, didampingi dek Letnan Liem Soen Mo jo Letnan Lie Bian Ek, bamufaakaiklah urang Cino Padang untuak managakan baliak Kelenteng Kwan Im. Kelenteng nan baru tagak dinamoan Kelenteng See Hien Kiong. Pambangunannyo salasai pado tahun 1893.[34]

Urang Cino di Padang indak hanyo manjadian kelenteng sabagai tampek sumbayang atau ibadah, malainkan juo sabagai tampek tingga samantaro bagi pandatang Cino nan indak punyo dunsanak. Dari siko, mereka bisa bakenalan jo urang Cino lainnyo sahinggo manjadi paubuang bagi mereka untuak marintis usaho. Di sakitar kelenteng, mereka managakkan kos-kios dari buluah untuak tampek manggaleh. Sasudah kelenteng mangalmi kabakaran pado tahun 1861, kios-kios iko disewaan, nan hasil labonyo digunaan untuak mambayia cicilan pinjaman pambangunan kelenteng. Lamo kalamoan, kios-kios di sakitar kelenteng bakambang manjadi pasa nan kini tanamo sabagai Pasa Tanah Kongsi.[35] Pasa iko manjadi rami sahinggo dalam wakatu nan relatif capek mampu manyaingi Pasa Mudiak nan sabalunnyo alah ado dan lataknyo badakekan.[36]

Akhia pamarentahan kolonial Balando[suntiang | suntiang sumber]

Kamajuan Padang nan samulo hanyo kampuang nalayan manjadi pusek parniagaan jo pamarentahan di Sumatera manyebabkan daerah iko rami dikunjungi para pandatang, tamasuak urang Cino.

Pado tahun 1865, jumlah urang Cino di Padang adolah 2.973 urang. Pado tahun 1874, 10% dari populasi panduduak Padang nan sangkek itu bajumlah sakitar 25.000 urang adolah urang Cino.[14] Pado tahun 1878, jumlah urang Cino di Padang adolah 2.640 urang. Jumlah iko mangalami panurunan dibandiangan tahun 1865. Pado tahun 1880, jumlah urang Cino di Padang naik baliak manjadi 3.468 urang.[31][32]

Mancaliak jumlah urang Cino di Padang nan cenderung maningkek, pamarentah kolonial Balando maabik kabijakan untuk manata parmukiman di Padang. Panataan iko mangikui kabijakan Besluit No. 758 nan diteken dek Gubernur Pantai Barat Sumatera tangga 30 Oktober 1884 tantang Panetapan Wilayah untuak Urang Cino di Kota Padang. Dek populasi urang Cino taruih maningkek, baitu pulo urang asiang lainnyo, paraturan tahun 1884 kudian diparbarui jo Beslit No. 34 tangga 3 Februari 1891. Dalam paraturan itu, wilayah urang Cino dipalaweh sampai ka masuak ka daerah Balakang Tangsi.[37][38][39] Di siko, saurang padagang Cino banamo Gho Lam San mambukak sabuah pasa basubarangan jo bakeh pasa milik parusahaan urang Minangkabau Badu Ata & Co. nan tabaka pado tahun 1882.[40][41]

Pado tahun 1900, pamarentahan kolonial Balando malunggaan izin masuak urang Cino di Hindia Balando. Kabijakan iko bapangaruah tarhadap jumlah urang Cino di Padang.[42][43] Jumlah urang Cino pado tahun 1905 adolah sabanyak 5.000 urang, kudian naiak manjadi 6.765 pado tahun 1920, dan maningkek manjadi 8.516 urang pado tahun 1930.[31][32][44] Paningkatan jumlah urang Cino Padang antaro tahun 1905 sampai 1930 sajalan jo galombang migrasi massal nan dilakuan dek urang Cino.[45]

Sasudah kamerdekaan Indonesia[suntiang | suntiang sumber]

Parjuangan kamerdekaan Indonesia[suntiang | suntiang sumber]

Urang Cino Padang mambaok arak-arakan Sipasan dalam parayaan Cap Go Meh pado 4 Januari 1948.

Sasudah Indonesia mamproklamasian kamerdekaannyo pado 17 Agustus 1945, sikap urang Cino Padang tabagi ka dalam tigo kalompok. Ado nan maagih dukungan terhadap Balando, ado nan ikuik sato mambantu parjuangan kamerdekaan Indonesia, dan ado nan basikap netral.[46] Karagaman orientasi urang Cino Padang samaso parjuangan mampartahankan kamerdekaan Indonesia manyebabkan masyarakatik umum sariak mangenali sikap mereka.[47]

Urang Cino Padang nan bapihak ka Balando nio Balando bakuaso baliak di Indonesia. Di antaro mereka tasabuik namo Nyo Hok Seng. Inyo acok maagih informasi ka Balando tantang parkambangan situasi Padang, tamasuak kabaradoan posisi pajuang kamerdekaan.[48] Ado pulo urang Cino Padang nan bapihak ka Balando untuak mampakayo diri. Mereka mamanfaatkan kamampuan manembus blokade Balando untuak mancari kauntungan. Umumnyo mereka adolah panggaleh bahan makanan.[49]

Ada pulo urang Cino Padang nan bapihak ka pajuang kamerdekaan. Mereka maagih pertolongan dalam bantuak mamasok sanjato untuak kabutuhan pajuang kamerdekaan.[50] Oei Ho Tjeng jo Sho Bun Seng adolah di antaro urang Cino Padang nan dikana jasonyo dalam mamasok sanjato untuak pajuang kamerdekaan.[51] Adapun urang Cino Padang nan netral iyolah mereka nan indak manentukan sikap. Mereka hanyo manunggu parang usai dan kaadaan stabil sahinggo mereka bisa malakuan aktivitas paniagaan takah samulo.[52]

Pangakuan kadaulatan Indonesia[suntiang | suntiang sumber]

Sairing jo pangakuan kadaulatan kamerdekaan Indonesia dek Balando pado tahun 1949, kondisi politik jo kamaanan Padang baransua puliah. Pamarentah mulai manata baliak kahidupan masyarakaik dari babagai aspek, tamasuak parsoalan status kawarganegaraan urang Cino di Indonesia nan alun salasai. Presiden Soekarno mauman tantang kaharusan urang Cino di Indonesia untuak mamiliah status kawarganegaraan mereka. Mereka diagiah tigo pilihan. Patamo manjadi warga negara Balando, kaduo manjadi warga negara Indonesia, atau katigo manjadi warga negara Republik Rakyat Tiongkok. Di Padang, adonyo pilihan status kawarganegaraan urang Cino mambuek babarapo kaluarga punyo status kawarganegaraan yang babedo hinggo manyebabkan mereka tapisah. Manuruik Erniwati, parbedaan pilihan status kawarganegaraan tajadi akibaik babedonyo orientasi jo kapentingan di antaro urang Cino Padang.[53]

Salain mangatur parsoalan status kawarganegaraan urang Cino, pamarentah Indonesia maantian masuaknyo imigran dari Cino. Walaupun baitu, masih ado paningkatan jumlah urang Cino di Padang. Paningkatan iko dipakiroan marupoan akibaik kadatangan imigran dari Medan jo Pekanbaru sarato parpindahan urang Cino dari babarapo daerah di Sumatera Barat untuak mancari parlindungan katiko ado peristiwa Pemerintahan Revolusioner Republik Indonesia pado tahun 1958 jo Gerakan 30 September pado tahun 1965.[54]

Sajak 1966 sampai kini[suntiang | suntiang sumber]

Pado tahun 1966, Pamarentah Indonesia mangaluaan Keputusan Presidium Kabinet Nomor 127 Tahun 1966 nan isinyo mangharuskan urang Cino di Indonesia mangganti namo mereka dengan namo Indonesia. Di Padang, hampiang 8.000 urang Cino malakuannyo.[55] Kabijakan untuak urang Cino di Indonesia kudian dibuek pulo dek rezim Orde Baru di bawah Presiden Soeharto nan dikenal dengan kabijakan asimilasi. Pado tahun 1967, Presiden Soeharto mangaluaan Instruksi Presiden Nomor 14 Tahun 1967 nan isinyo mambatasi aktivitas agamo, adat, jo tradisi Cino di muko umum. Urang Cino Padang manuruti kabijakan tersebut. Namun baitu, pamarentah dan masyarakat Kota Padang maagih kalonggaran tarhadap mereka.[56] Mereka tetap dapek malaksanoan kagiatan agamo, adat, jo tradisi mereka di bawah pangalolaan parhimpunan kaluarga (marga) maupun parkumpulan sosial, budaya, jo kamatian.[57]

Sangkek tajadinyo karicuahan Mei 1998, katiko urang Cino di banyak tampek di Indonesia mandapek parlakukan indak elok, indak pernah dilaporan adonyo tindak kekerasan jo kriminal nan manjadian urang Cino sabagai sasaran di Padang.[58] Pado tahun 2000, Presiden Abdurrahman Wahid mangaluaan Keputusan Presiden Nomor 6 Tahun 2000 untuak mancabuik Instruksi Presiden Nomor 14 Tahun 1967. Sajak itu, urang Cino Padang dapek bebas malaksanoan kagiatan agamo, adat, jo tradiis mereka.[59]

Sasudah tajadinyo gampo bumi nan maoyak Sumatera Barat pado 30 September 2009, banyak urang Cino Padang nan mamiliah pai mangungsi kalua kota. Akibaiknyo, jumlah urang Cino Padang agak manurun dibandingkan pariode sabalunnyo. Hinggo kini, alun sadoalah urang Cino nan maninggaan Padang baliak, walaupun kondisi kota alah pulih. Dek Padang rawan kanai tsunami, apolai kawasan urang Cino talatak di tapi pantai, manyebabkan urang Cino banyak nan pindah kalua kota, utamonyo takah Pekanbaru, Medan, jo Jambi.[6][60] Katiko dilakuan Sensus Penduduk pado tahun 2010, presentasi urang Cino Padang hanyo tingga 1,1% dari populasi kota atau bajumlah 9.498 jiwa.[1]

Dampak paliang taraso dari gampo bumi 2009 adolah runtuahnyo Kelenteng Se Hien Kiong. Akibaiknyo, aktivitas kaagamoan urang Cino Padang manjadi taambek. Salamo babarapo wakatu, urang Cino Padang manyalanggaroan ibadahnyo di bangunan sederhana nan basipaik samantaro di muko bangunan kelenteng.[34][61] Pado Desember 2010, para urang Cino Padang supakaik untuak managakan kelenteng baru. Mode bangunannyo indak jauah beda jo kelenteng lamo, tapi lataknya dipindahan ka lokasi baru. Kelenteng diresmian pado Maret 2013. Pambangunannyo mamakan dana sakitar Rp5 miliar.[62]

Sosial jo kakarabatan[suntiang | suntiang sumber]

Bangunan Kelenteng See Hien Kiong nan baru dibangun, sasudah hancua dek gampo bumi 2009.

Urang Cino Padang barasa dari babagai marga. Sistem marga dalam kaluarga etnis Cino didasarkan pado asa katurunan dari leluhur nan sama. Kabaradaan ciek marga biasonyo ditandai jo rumah marga. Aktivitas utamo rumah marga adolah manyalanggaroan sumbayang tarhadap leluhur jo dewa-dewa nan diyakini. Selain itu, anggota rumah marga saling mambantu jo mamparatian antaro ciek dan nan lain.[63] Namun, dek babarapo marga jumlahnyo indak banyak, hanyo ado tujuah marga di Padang nan punyo rumah marga surang, yaitu marga Tan, marga Oei, marga Ong, marga Choa, marga Lie & Kwee, marga Gho, jo marga Lim.[64]

Selain rumah marga, urang Cino Padang bagabaung ka dalam parkumpulan sosial, budaya, jo kamatian nan basipaik heterogen, yaitu Himpunan Tjinta Teman (HTT) jo Himpunan Bersatu Teguh (HBT). HTT ditagakkan sajak tahun 1863 dengan toako patamo Lee Po Keng, samantaro Heng Beng Tong (HBT) ditagakkan sajak tahun 1873 dengan toako patamo Oei A King. Meskipun alah tagak sajak lamo, kaduo parkumpulan iko sacaro administrasi baru resmi tardaptar sajak tahun 1895.[65] Parkumpulan HTT jo HBT utamonyo fokus maagih bantuan palaksanaan upacara kamatian sasuai adat jo tradisi leluhur. Gadangnyo biayo sarato banyaknyo tanago yang diparaluan salamo prosesi pamakaman mambuek urang Cino Padang bagantuang pado parkumpulan.[66][9] Namun, manuruik Erniwati, kabaradoan kaduo parkumpulan iko saakan-akan mambagi urang Cino Padang dalam duo kelompok.[8] Mereka berkompetisi menarik pangaruah jo mampartahankan citra positif di mato urang Cino di Padang. Dalam panampilan, upacara, maupun acara ritual jo formal, HTT jo HBT bausaho untuak manonjolkan identitas surang-surang.[67] Upayo untuak mandapekan prestise jo panghargaan acok manjadi pamicu munculnyo konflik. Walaupun baitu, konflik terbuka antaro HTT jo HBT indak pernah tajadi dek dapek langsuang diredam oleh para pamimpinnyo.[68]

Budaya[suntiang | suntiang sumber]

Arakan Sipasan pado maso pamarentahan kolonial Balando.

Urang Cino Padang alah baradaptasi dengan masyarakat lokal tampek mereka barado. Hal iko ditandoi jo digunoannyo bahaso Minangkabau dek urang Cino Padang sabagai bahaso sahari-hari. Bahkan, mayoritas urang Cino Padang alah indak dapek mangecek jo bahaso asa mereka.[69] Bahaso Minang nan dipartuturan dek urang Cino Padang tanamo sabagai bahaso Pondok atau bahaso Minang dialek Pondok, hasil pancampuran antaro bahaso Indonesia dengan bahaso Minang tapi mamakai logat Mandarin.[7] Bahaso iko mambuek mereka bisa labiah berbaur jo masyarakat Minangkabau.[70]

Sipasan adolah salah satu budayo Cino Padang nan indak basarobok di kota lainnyo di Indonesia. Indak jaleh dari ma asa mulo tradisi Sipasan. Namun, samaso pamarentah kolonial Balando, tradisi iko alah balangsuang. Sipasan marupoan arak-arakan tandu babantuak kursi nan tabuek dari kayu dan disusun sapanjang kamampuan anggota parhimpunan kamatian nan manjadi si pangka maangkuiknyo. Di ateh kursi nan bajejer panjang, duduak anak-anak nan manggunoan pakaian dari babagai daerah. Pado umumnyo anak-anak itu manggunoan pakaian tradisional, utamonyo pakaian Cino. Dengan kompak, anggota parhimpunan maangkuik kursi sahinggo mambantuk sipasan nan dibaok bakaliliang Kampuang Cino. Di bagian muko, ado hiasan nan bantuaknyo saroman kapalo nago. Tradisi iko dilaksanoan satiok parayoan Tahun Baru Cino (Imlek).[71][72]

Urang Cino Padang mancubo pulo untuak manjago adat jo tradisi mereka di tangah parubahan zaman lewat parkumpulan sosial, budaya, jo kamatian nan banamo Himpunan Tjinta Teman (HTT) jo Himpunan Bersatu Teguh (HBT). Kaduo parkumpulan iko maagiah bantuan dalam panyalanggaraan upacara kamatian sarato parkawinan sasuai adat jo tradisi luluhur Cino.[10] Kabaradoan HTT jo HBT mambuek eksistensi adat jo tradisi Cino di Padang tetap tajago.[8][9]

Kampuang Cino[suntiang | suntiang sumber]

Kampuang Cino Padang pado maso pamarentahan kolonial Balando.

Urang Cino di Padang tingga mangalompok dan mambantuak parmukiman nan tanamo sabagai Kampuang Cino.[2] Latak kawasan iko barado di sisi utara tapian Batang Arau arah ka muaro di di Kecamatan Padang Selatan. Urang Cino saisuak mamiliah tingga di dakek muaro dengan tujuan supayo dakek jo akses transportasi aia nan sangkek itu marupoan sarana utamo dalam parniagaan ekspor jo impor. Mangolompoknyo tampek tingga urang Cino indak lapeh pulo dari adonyo paraturan nan dikaluaan dek pamarentah kolonial Balando, yaitu sistem sentralisasi parmukiman pado ciek tampek bagi panduduak pandatang. Dek Balando, parmukiman urang Cino Padang dikonsentrasikan pado ciek kawasan, yakni di daerah Pondok jo sakitarnyo sahinggo lamo-kalamoan daerah itu manjadi permanen sabagi parmukiman urang Cino Padang sampai kini.[3]

Takah Kampuang Cino atau pecinan pado umumnyo, bantuak bangunan tampek tingga urang Cino di Padang adolah barupo bangunan balenggek duo atau tigo baatok pelana kudo nan dibuek baleret mamanjang maikuik alua jalan. Antaro ciek bangunan jo bangunan nan basubalahan indiangnyo saliang baimpikan.[73] Baa kok dibuek balenggek duo atau tigo supayo dapek dijadian toko tampek manggaleh di lenggek bawahnyo dan tampek tingga di lenggek atehnyo. Konsep bangunan takah iko kini lazim disabuik ruko dan banyak basobok di kota-kota gadang Indonesia nan banyak dihuni dek urang Cino.[74]

Aktivitas ibadah urang Cino Padang dipusekan di kelenteng nan banamo Kelenteng See Hien Kiong. Lataknyo barado dakek tapi Batang Arau, maadok ka Bukiik Gado-Gado di Subarang Palinggam. Kapan tahun pambangunannyo indak diketahui pasti. Dipakiroan kelenteng iko ditagakan sakitar partangahan abaik ka-19, badasaran tinggalan barupa lonceng (genta) nan ado Kelenteng See Hien Kiong nan batarikh tahun 1841.[34] Kelenteng See Hien Kiong manjadi tampek sumbayang urang Cino tarhadap dewa atau leluhur nan mereka sembah. Paruntuakan kelenteng iko adolah untuak urang Cino di Padang pado umumnyo. Kabaradoan kelenteng di Kampuang Cino nan hanyo ciek manunjuakan bahasonyo mayoritas urang Cino Padang mampunyoi leluhur nan samo. Hal iko mambueknyo babeda jo urang Cino nan tingga di babarapo kota di Indonesia, misalnyo urang Cino di Jakarta jo Semarang nan punyo banyak kelenteng surang-surang bagantuang leluhur mereka.[75] Kelenteng See Hien Kiong bahkan manjadi kelenteng satu-satunyo di Sumatera Barat.[74]

Di sakitar kelenteng, tagak rumah-rumah marga. Di subalah timur kelenteng, ado rumah marga Tan, rumah marga Oei, rumah marga Ong, jo rumah marga Choa. Adapun di subalah barat kelenteng, ado rumah marga Lie & Kwee. Rumah marga Gho jo rumah marga Lim talatak di sekitar daerah Pulau Karam.[76]

Sabagai parmukiman, Kampuang Cino dilengkapi pulo jo pasa nan banamo Pasa Tanah Kongsi. Pasa iko lataknyo barado di tangah-tangah Kampuang Cino. Walaupun manuruik samulo marupoan tampek manggalehnyo urang Cino, padagang Minangkabau ikuik pulo manggaleh di pasa iko.[77] Padagang Minangkabau di Pasa Tanah Kongsi sabagian gadang marupoan patani jo nalayan nan langsuang mambaok barang dagangannyo barupo sayua, talua, buah, jo kabutuhan pokok lainnyo dari daerah pasisia. Pasa iko rami dikunjungi dek pambali sajak Subuah sampai siang hari.[78]

Hubungan antaretnis[suntiang | suntiang sumber]

Partunjukan barongsai (atau kudo-kudo api) di Padang.

Kabaradoan Padang sabagai pusek parniagaan jo pamarentahan di Sumatera pado maso pamarentahan kolonial Balando diiringi jo partumbuhan penduduk jo pandatang dari babagai etnis. Pado pangujuang abaik ka-19, Padang alah manjadi kota majemuk nan panduduaknyo terdiri dari babagai etnis. Salain Minangkabau nan marupoan etnis mayoritas, Padang dihuni dek urang Cino, Nieh, Jawa, Aceh, jo Tamil. Hal iko taruih balanjuik hinggo maso-maso sasudah kamerdekaan. Khusus antaro urang Minangkabau jo urang Cino, hubungan di antaro duo entis iko relatif aman dari konflik, walaupun dalam bidang parniagaan diwarnai jo adonyo parsaingan jo kompetisi. Sampai kini, indak parnah ado konflik nan malibatkan tindak kekerasan antaro urang Minangkabau jo urang Cino di Kota Padang, baitu pulo antaretnis lainnyo.[79][80][81]

Manuruik Erniwati, areknyo hubungan antaro urang Minangkabau dengan urang Cino Padang sabagai kakuatan ekonomi jo sosial nan dominan di Kota Padang maakibaikan kabijakan represif rezim Orde Baru tarhadap urang Cino di Indonesia indak baitu dirasoan dek urang Cino Padang. Di Padang, urang Cino mandapek parlakuan nan samo jo etnis lainnyo. Pamarentah Kota Padang indak maagih pambatasan maupun palarangan bagi urang Cino Padang untuak malaksanakan sarato malestarian adat jo tradisi mereka. Sampai kini, Pamarentah Kota Padang taruih malibatkan urang Cino Padang untuak ikuik sato satiok parayaan ulang tahun kota. Bahkan, atraksi nan ditampilkan dek urang Cino takah barongsai jo sipasan dijadiaan sabagai dayo tarik wisata di Kota Padang.[82][83]

Pamarentah Kota Padang sacaro rutin mandukuang kagiatan nan manampilkan budaya Cino Padang jo pembaurannya. Dalam satiok parayaan Imlek, ditampilkan atraksi seni jo budaya nan ado dari babagai etnis nan mauni Kota Padang. Di antaro atraksi nan ditampilan dek urang Cino Padang adolah barongsai, arak-arakan kio, jo sipasan.[71] Pado 2013, atraksi sipasan nan ditampilan dek parkumpulan HTT mancatat rekor dunia di Guinness World Records sabagai atraksi maarak tandu paliang panjang, yakni panjang arak-arakan 243 meter jo jarak tampuah 1,9 km. Pancapaian iko mangalahan rekor sabalunnyo untuak atraksi sarupo nan tacatat di Kinmen, Taiwan.[72][84] Sajak 2018, parayaan Imlek alah masuak manjadi kalender wisata Kota Padang nan dikemas dalam Festival Multikultural.[85][86] Pado 2019, untuak kali patamo diadoan Festival Bakcang Ayam dan Lamang Baluo. Pado alek iko, dibagian sabanyak 10.000 bakcang ayam jo lamang baluo sacaro perai. Kaduonyo marupoan kuliner babahan utamo katan, mamiliki isian, jo dibungkuih daun.[87] Salain pambagian makanan, festival iko diramaian pulo jo babagai partunjukan seni jo budaya urang Cino Padang jo Minang.[60]

Catatan kaki[suntiang | suntiang sumber]

Rujuakan[suntiang | suntiang sumber]

  1. a b c d Riniwaty Makmur (2018), hlm. 16.
  2. a b Mardanas Safwan (1987), hlm. 15.
  3. a b Riniwaty Makmur, dkk (2018), hlm. 135.
  4. Freek Colombijn (1994), hlm. 55a: "Padang has an old Chinese community and Chinese were among the first permanent inhabitants of Padang, arriving soon after the establishment of the VOC trading post."
  5. a b Christine Dobbin (2016), hlm. 135a: "Almost immediately after the establishment of the Dutch factory at Padang some Chinese must have settled there as agents for Batavian Chinese, possibly moving south from Pariaman. In 1673 there are reports of a Chinese 'Nakoda Banten' living at Padang in his own house, and other Chinese were also settled there performing services for company officials as they did at Batavia."
  6. a b Rahmi Surya Dewi (2018), hlm. 28.
  7. a b Riniwaty Makmur, dkk (2018), hlm. 138-139.
  8. a b c Erniwati (2011), hlm. 190: "Kedua perkumpulan ini berperan besar dalam menjaga budaya dan adat istiadat leluhur meskipun untuk saat ini genrasi muda kehilangan maknanya. Namun keberadaan kedua perkumpulan ini juga seakan-akan membagi etnis Cina Padang atas dua kelompok."
  9. a b c Riniwaty Makmur (2018), hlm. 56.
  10. a b Kompas.com (5 Februari 2008).
  11. Christine Dobbin (2016), hlm. 134: "Before the Dutch and the English came to Sumatra for pepper, Chinese pepper traders had been visiting west Sumatra from their commercial base at Banten."
  12. Christine Dobbin (2016), hlm. 134–135: "Very few of these Chinese traded with their own capital, and they had meagre capital resources; they were generally agents for Banten Chinese, who in turn operated a commenda trade using money and goods supplied by merchants in China and, later on, by Europeans in Banten."
  13. Christine Dobbin (2016), hlm. 134: "In the 1630s their vessels were reported to be swarming to the coast in search of pepper, and it seems likely that there were Chinese settled at Pariaman to act as agents for their compatriots; certainly they were reported to be established there in 1663."
  14. a b Freek Colombijn (1994), hlm. 134: "In 1666 the Dutch made Padang their headquarters on Sumatra's west coast and built a fortress."
  15. Freek Colombijn (1994), hlm. 55: "Padang has an old Chinese community and Chinese were among the first permanent inhabitants of Padang, arriving soon after the establishment of the VOC trading post."
  16. Steven Adriaan Buddingh (1861). Neerlands Oost-Indië Reizen (1852–1857). Rotterdam: M. Wijt & Zonen. hlm. 161.
  17. Christine Dobbin (2016), hlm. 135b: "In that year several Chinese bought land from the panglima raja to establish a brickworks, and by 1682 there were so many Chinese at the entrepôt that a Lieutenant Chinese had to be appointed to regulate matters concerning them."
  18. Christine Dobbin (2016), hlm. 136a: "In 1785 the farm for collecting import and export duties at Padang was sold to the Captain Chinese, Lau Ch'uan-ko."
  19. Christine Dobbin (2016), hlm. 136b: "With the decline of the gold trade, it was agreed by the Batavia government in 1790 to accept specie for a certain percentage of the company's cloth sales at Padang, so that the cloth trade would not be totally paralysed by the absence of gold. This too benefited the Padang Chinese, who were the only group at the port with access to specie, and enabled them now to act as brokers in the company's cloth trade, bypassing the Minangkabau brokerage system which relied on exchanging gold for cloth."
  20. Erniwati (2011), hlm. 46a: "Gubernur Michiels mendorong orang asing untuk lebih banyak datang ke Padang dengan tujuan meningkatkan persaingan, sehingga Padang menjadi pelabuhan yang ramai dan dinamis. Berbagai kemudahan dan fasilitas diberikan kepada para pendatang, terutama kepada pedagang Cina yang dianggap mampu memajukan perekonomian."
  21. Gusti Asnan (2003), hlm. 59.
  22. Erniwati (2007), hlm. 79: "Bahkan NHM memberikan uang muka kepada pialang Tionghoa sebagai modal untuk mengumpulkan hasil produksi dari daerah pedalaman."
  23. Christine Dobbin (2016), hlm. 158: "They imported Chinese goods such as cloth and porcelain for domestic use from Batavia, Penang and later Singapore,..."
  24. Erniwati (2011), hlm. 67: "Orang Cina yang waktu itu memiliki mata uang akhirnya menduduki posisi penting, bahkan mereka berhasil menjadi pialang dan mampu menggeser kelompok pialang tradisional Minangkabau hingga memasuki daerah pedalaman. Akibatnya orang Minangkabau sangat tergantung terhadap barang-barang pokok yang diperoleh melalui pedagang pengecer di pasar-pasar tradisional, sedangkan pedagang pengecer juga tergantung kepada pedagang monopoli Belanda dan Cina."
  25. Christine Dobbin (2016), hlm. 159: "The four leading Chinese brokers in Padang in 1829, just as the American coffee boom was passing, were Li Heng, Li Ma-ch'iao, Li Sing and Hu A-chiao."
  26. Millies 1850, hlm. 35.
  27. Erniwati (2011), hlm. 46b: "'Untuk pertama kalinya pada tahun 1847 Lie Saay berhasil membuat kontrak dengan pemerintah kolonial Belanda untuk mengangkut kopi dari Padang Panjang ke Kayutanam dan mengangkut garam dan barang-barang lainnya dalam perjalanan baliknya. ."
  28. Erniwati (2011), hlm. 46c: "Perusahaan ekspedisi Lie Saay membawa hasil bumi mengunakan pedati (gerobak) kuda melewati lereng Lembah Anai di bawah pengawalan kakaknya Lie Maa Toon yang bisa bela diri kungfu. Perusahaan ekspedisi ini berkembang hingga dibangun jalan darat dan jalur kereta api."
  29. Rusli Amran (1988), hlm. 31.
  30. Thomas Spencer Baynes (1887), hlm. 639, Volume 22: "Padang is a town of some 2,000 houses and 15,000 inhabitants, with a Chinese settlement and a European quarter. It is the chief market in Sumatra for gold."
  31. a b c Elizabeth E. Graves (2007), hlm. 92-93.
  32. a b c Erniwati (2011), hlm. 38.
  33. Erniwati (2007), hlm. 72.
  34. a b c Balai Pelestarian Cagar Budaya Sumatra Barat (8 Juni 2017).
  35. Erniwati (2011), hlm. 55a: "Untuk membayar cicilan pinjaman pembangunan klenteng setelah mengalami kebakaran di tahun 1861, kios-kios bambu tersebut disewakan kepada para pedagang. Lama kelamaan kios-kios bambu berkembang menjadi pasar yang dikenal dengan nama pasar Tanah Kongsi."
  36. Erniwati (2007), hlm. 93a: "Walaupun letak Pasar Tanah Kongsi berdampingan dengan Pasar Mudik yang sebelumnya sudah didirikan oleh pedagang Minangkabau, namun dalam waktu yang relatif singkat, Pasar Tanah Kongsi berkembang dengan cepat dan mampu menyaingi Pasar Mudik."
  37. Erniwati (2007), hlm. 68: "Lama-kelamaan lokasi perkampungan Tionghoa semakin berkembang seiring dengan meningkatnya jumlah orang Tionghoa yang bermukim. Di Padang, perluasan permukiman Tionghoa ini sampai ke daerah Belakang Tangsi..."
  38. Padangkita.com (23 Oktober 2017).
  39. Mardanas Safwan (1987), hlm. 101.
  40. Freek Colombijn (1994), hlm. 235: "Badu Ata & Co. started their second market-place in the Belakang Tangsi area, further north. It was successful until destroyed by fire in 1882. Immediately afterwards the Chinese Gho Lam San opened a new market next to the charred remains of Badu Ata & Co."
  41. Rusli Amran (1988), hlm. 23.
  42. Freek Colombijn (1994), hlm. 55b: "Chinese have come to Indonesia in several waves of migration, the last one after the Dutch government's relaxation on Chinese entry after 1900."
  43. Erniwati (2011), hlm. 62: "Imigran Cina yang datang menjelang akhir abad ke-19 sampai awal abad ke-20 (1930-an) merupakan migrasi yang dilakukan secara massal."
  44. http://repository.unp.ac.id/1227/1/MESTIKA%20ZED_213_11.pdf
  45. Erniwati (2011), hlm. 40: "Pada tahun 1930 ditemukan 51% perantauan Cina berasal dari keturunan ke tiga yang terdiri dari 80% Hokkian, 15% Kwongfu, 2% Hakka, dan 3% dari suku lainnya. Dari perkiraan penduduk tahun 1930 terlihat bahwa penduduk Cina Padang mayoritas berasal dari kelompok bahasa Hokkian yang tergolong ke dalam pedagang yang berasal dari Amoy."
  46. Erniwati (2011), hlm. 85a: "Sebagai akibat peristiwa yang terjadi pada masa revolusi, etnis Cina Padang kemudian dapat dibagi atas tiga kelompok orientasi, yaitu pro Republik, pro Belanda, dan kelompok netral."
  47. Erniwati (2011), hlm. 86b: "Keragaman orientasi kelompok etnis Cina ini menyebabkan masyarakat umumpun sulit mengenali mereka. Ketidakjelasan sikap etnis Cina tersebut menyebabkan masyarakat umum akhirnya menyamakan penilaian terhadap etnis Cina sebagai kelompok yang hanya mengambil keuntungan di negara Indonesia."
  48. Erniwati (2011), hlm. 86a: "Nyok Hok Seng selalu memberi informasi kepada Belanda tentang perkembangan situasi Padang dan menjadi penunjuk jalan kemungkinan di mana posisi pejuang kemerdekaan. Dengan sombong, setiap sore Nyo Hok Seng berkeliling kampung Pondok dan kota Padang dengan tentara Sekutu dan Belanda mengunakan mobil Jeep. Sikap Nyo Hok Seng menyebabkan etnis Cina lainnya sering mendapat masalah dan digeneralisasikan sebagai antek-antek Belanda dan diangap hanya mengambil keuntungan saja oleh masyarakarakat umum."
  49. Erniwati (2011), hlm. 84-85: "Sebagian kecil dari kelompok ini juga ada orang-orang yang berusaha memperkaya diri sendiri dengan mengadakan penyelundupan dan menerobos blokade Belanda."
  50. Erniwati (2011), hlm. 85b: "Kemampuan etnis Cina Padang dalam menyelundupkan senjata untuk kebutuhan pejuang kemerdekaan menjadikan mereka memiliki kedekatan dengan perwira militer yang sangat mempengaruhi hubungan mereka di masa selanjutnya."
  51. Freek Colombijn (1994), hlm. 135b: "Regardless of these forced changes, the Chinese in Padang were well assimilated. It seems that one Chinese, Oei Ho Tjong, who had provided the Republic with weapons, even became member of the LKAAM."
  52. Erniwati (2011), hlm. 85-86: "Sikap yang tidak jelas disebabkan karena kurangnya posisi mereka dalam bidang ekonomi menyebabkan kelompok ini tidak berani menentukan sikap. Kelompok ini hanya akan menunggu siapapun sebagai pemenang perang. Namun karena mereka telah terbiasa dengan kehidupan pada masa kekuasaan kolonial Belanda, maka harapan mereka hanyalah kembalinya keamanan pribadi dan keadaan ekonomi yang relatif stabil."
  53. Erniwati (2011), hlm. 89: "Dengan adanya tiga pilihan status kewarganegaraan tersebut, beberapa keluarga memiliki status kewarganegaraan yang berbeda. Perbedaan pilihan status kewarganegaraan ini terjadi sebagai akibat perbedaan orientasi dan kepentingan. Konsekuensi dari pilihan yang berbeda menyebabkan banyak keluarga-keluarga dari etnis Cina di Indonesia termasuk yang tinggal di Padang terpisah-pisah."
  54. Freek Colombijn (1994), hlm. 134: "After 1949 the immigration of Chinese to Indonesia was virtually called to a halt by the Indonesian government, but there was still an increase in absolute numbers in Padang. Chinese who lived dispersed over the area fled to Padang after 1945 and 1965 for protection and the army started to move Chinese from the countryside to cities in 1959."
  55. Freek Colombijn (1994), hlm. 135a: "The presidential decree No. 127 of 1966 compelled them to change their names to autochthonous ones; nearly eight thousand Chinese in Padang did so."
  56. Erniwati (2011), hlm. 4-5: "Kelonggaran ini tidak saja diberikan oleh pemerintah, tetapi juga oleh masyarakat kota Padang. Bahkan di saat perayaan ulang tahun kota Padang, pemerintah juga mengundang barongsai dan sipasan untuk beratraksi melalui dua perhimpunan kematian Himpunan Tjinta Teman dan Himpunan Bersatu Teguh."
  57. Erniwati (2011), hlm. 4: "Pada masa pemerintahan Orde Baru, etnis Cina Padang tetap bisa melaksanakan budaya dan adat istiadat leluhur di bawah pengelolaan perhimpunan keluarga (marga) dan perhimpunan kematian Himpunan Tjinta Teman (HTT), serta Himpunan Bersatu Teguh (HBT)."
  58. Erniwati (2011), hlm. 7a: "Pengalaman buruk bagi sebagian etnis Cina di beberapa kota di Indonesia tidak dialami oleh etnis Cina Padang, termasuk saat peristiwa Mei 1998. Sepanjang era Reformasi bahkan tidak ditemukan tindak kekerasan dan kriminal yang menjadikan etnis Cina Padang sebagai sasaran kekerasan, seperti yang terjadi di Jakarta, Solo, Surabaya, Medan, maupun kota lainnya. Fenomena nasional yang menjadikan etnis Cina sebagai sasaran untuk mengungkapkan kekecewaan dan ketidakpuasan terhadap pemerintah, krisis ekonomi, dan kekacauan politik tidak dialami oleh etnis Cina Padang."
  59. Erniwati (2011), hlm. 3-4: "Perubahan terjadi setelah tahun 2000, ketika Presiden Abdurrahman Wahid mengeluarkan Keppres no 6/2000 untuk mencabut Inpres no.14/1967 dan membebaskan etnis Cina untuk merayakan hari besar dan adat istiadat serta tradisi mereka."
  60. a b Kompas.id (8 Juni 2019).
  61. Balai Pelestarian Cagar Budaya Sumatra Barat (2018), hlm. 13.
  62. Padang.go.id (23 September 2018).
  63. Erniwati (2011), hlm. 63: "Rumah marga atau yang disebut kongsi oleh Cina Padang mengayomi etnis Cina berdasarkan suku yang sama, sehingga aktivitas utama rumah marga adalah membantu sesama anggota, menyelenggarakan sembahyang kepada leluhur dan dewa-dewa yang diyakini sebagai pelindung. Selain itu, rumah marga juga berperan dalam melestarikan kebudayaan dan tradisi leluhur, termasuk menyelenggarakan upacara-upacara yang bersifat kekeluargaan, seperti pesta perkawinan, menyelenggarakan sembahyang kepada leluhur dan dewa-dewa yang diyakini sebagai pelindung, serta prosesi pemakaman secara tradisional."
  64. Riniwaty Makmur (2018), hlm. 147.
  65. Erniwati (2011), hlm. 65-66: "Selain rumah marga, etnis Cina Padang juga bergabung ke dalam perkumpulan sosial, budaya, dan kematian yang bersifat heterogen, yaitu Hok Teek Tong (HTT) yang berdiri sejak tahun 1863 dengan Toako pertama Lee Po Keng dan Heng Beng Tong (HBT) yang berdiri sejak tahun 1873 dengan Toako pertama Oei A King. Meskipun sudah berdiri sejak lama, namun secara administrasi kedua perkumpulan sosial, budaya, dan kematian ini baru resmi terdaftar sejak tahun 1895."
  66. Erniwati (2011), hlm. 66: "Kebutuhan terhadap adanya perkumpulan kematian bagi orang Cina disebabkan oleh faktor budaya dan adat istiadat tradisional Cina. Adanya dorongan dan kebutuhan orang Cina, jika mati harus memiliki peti mati dan membutuhkan biaya serta tenaga yang banyak untuk mengurus pemakaman menyebabkan kebersamaan dalam perkumpulan pemakaman sangat penting."
  67. Erniwati (2011), hlm. 172: "Mereka berkompetisi menarik pengaruh dan mempertahankan citra positif di mata etnis Cina di kota Padang terutama sejak kebebasan diberikan. Dalam penampilan, upacara, acara-acara ritual dan formal, kedua perhimpunan besar ini berusaha untuk menunjukkan dirinya berbeda."
  68. Erniwati (2011), hlm. 175: "Upaya untuk mendapatkan prestise dan penghargaan ini sering menjadi pemicu munculnya konflik di antara lembaga sosial budaya etnis Cina Padang. Namun konflik terbuka hingga saat ini tidak pernah terjadi. Hal ini disebabkan karena kontrol pemerintah dan masyarakat yang sangat tinggi. Ketika terjadi gejala konflik muncul dengan segera dapat diredam karena adanya keinginan dari etnis Cina untuk menjaga tatanan sosial masyarakat yang ada."
  69. Rahmi Surya Dewi (2018), hlm. 29.
  70. Riniwaty Makmur (2018), hlm. 277.
  71. a b Kompas.com (10 Pebruari 2009).
  72. a b Tempo.co (25 Agustus 2013).
  73. Erniwati (2007), hlm. 73: "Bentuk bangunan tempat tinggal orang Tionghoa di daerah pecinan biasanya hampir sama. Bangunan terdiri dari dua atau tiga tingkat dan dibangun secara berderet memanjang , berhimpitan antara dinding bangunan yang satu dengan dinding bangunan yang berikutnya."
  74. a b Erniwati (2011), hlm. 52: "Klenteng See Hien Kiong merupakan satu-satunya yang terdapat di Sumatera Barat."
  75. Erniwati (2011), hlm. 53: "Klenteng See Hien Kiong merupakan tempat untuk melakukan sembahyang terhadap dewa atau leluhur yang mereka sembah menunjukkan bahwa mayoritas etnis Cina Padang memiliki leluhur yang sama. Berbeda halnya dengan etnis Cina yang tinggal di beberapa kota di Indonesia, misalnya di Jakarta dan Semarang ditemukan banyak klenteng yang masing-masing memiliki spesifik tersendiri dengan leluhur dan dewa yang berbeda pula."
  76. Erniwati (2011), hlm. 55c: "Secara berkelompok di sekitar klenteng terdapat rumah marga-rumah marga, yaitu di sebelah timur klenteng terdapat rumah marga Tan, rumah marga Oei, rumah marga Ong, dan rumah marga Choa, sedangkan di sebelah barat klenteng terdapat rumah marga Lie & Kwee. Rumah marga Gho dan Lim terletak di sekitar daerah Pulau Karam."
  77. Erniwati (2007), hlm. 93b: "Pasar ini ramai dikunjungi oleh pedagang dan pembeli dari berbagai tempat, baik oleh penduduk pribumi maupun oleh orang Tionghoa."
  78. Erniwati (2011), hlm. 55b: "Pedagang Minangkabau yang berdagang di pasar Tanah Kongsi sebagian besar petani atau nelayan yang langsung membawa barang dagangannya berupa sayuran, telur, buah-buahan, dan kebutuhan hidup lainnya dari daerah pesisir, seperti dari Painan, Kambang, Muko-Muko, dan dari daerah lainnya. Pasar Tanah Kongsi ramai dikunjungi pembeli sejak Subuh sampai siang hari (sekitar jam 12)."
  79. Erniwati (2011), hlm. 7b: "Sepanjang sejarah, tidak ditemukan adanya konflik antar etnis di kota Padang, terutama konflik antar etnis Minangkabau dengan etnis pendatang lainnya, termasuk etnis Cina."
  80. Rahmi Surya Dewi (Juni 2018), hlm. 28.
  81. Nafriandi (2016), hlm. 189.
  82. Nerosti (2002), hlm. 73.
  83. Republika.co.id (10 Januari 2020).
  84. Taiwan Today (16 Mei 2011).
  85. Harian Haluan (10 Pebruari 2020).
  86. Posmetro Padang (7 Pebruari 2019).
  87. Antara (6 Juni 2019).

Daftar pustaka[suntiang | suntiang sumber]

Buku
Ensiklopedia
Disertasi
Jurnal
Situs web