Urang Aneuk Jamee

Wikipedia Minangkabau - Lubuak aka tapian ilimu
(Dialiahkan dari Suku Aneuk Jamee)
Loncat ke navigasi Loncat ke pencarian
Aneuk Jamee
Ughang Jamu
Jumlah populasi

100.000 jiwa

Kawasan bapopulasi cukuik banyak
Aceh
Bahaso
Bahaso Aneuk Jamee, Bahaso Aceh
Agamo
Islam
Kalompok etnik tadakek
Minang, Aceh, Kluet, Singkil

Urang Aneuk Jamee adolah sabuah etnis nan taseba di sapanjang pasisia barat jo selatan Aceh mulai dari Singkil, Aceh Selatan, Aceh Barat Daya, jo Simeulue. Urang Aneuk Jamee mulonyo adolah urang-urang Minangkabau nan pai marantau ka Aceh antaro abaik ka-17 inggo 19 [1], lalu baasimilasi jo urang Aceh, Kluet, Singkil, jo Devayan. Aneuk Jamee batutua jo bahaso Jamee, na masih dianggap salah satu dialek dari bahaso Minangkabau nan alah bacampua jo bahaso-bahaso satampek.[2]

Sijarah[suntiang | suntiang sumber]

Pado maso abaik ka-17, Rantau Pasisia Barat Minangkabau nan tadiri dari Pasaman, Padang, Pariaman, jo Painan (Pesisir Selatan) dikuasoi Kasultanan Aceh. Daerah Pasisia Barat dijadikan tujuan baniago urang-urang Minangkabau dari Darek untuak dagang hasia-hasia bumi. Apolai masalah dalam kuaso Aceh, mobilisasi parantau sampai pulo ka pasisia barat Aceh untuak baniago. Sampai pado maso Balando manguasoi Pasisia, urang Minang di Pasisia nan indak suko jo Balando pun adopulo nan pai marantau ka pasisia Aceh.[2]

Kondisi Ranah Minang pado mulo abaik ka-19 samakin indak aman sajak malatuihnyo Parang Paderi. Galombang rantau ka lua daerah pun (khususnyo Aceh) samakin maningkek. Urang Minang pai marantau untuak mailakkan dampak buruak dari parang sudaro. Di tampek baru, parantau-parantau Minang ko manaruko kampuang jo ladang sainggo tajadi komunikasi jo panduduak satampek. Dek urang Aceh, parantau Minangkabau ko disabuik sabagai Aneuk Jamee nan aratinyo anak tamu.[2][3]

Panyebaran[suntiang | suntiang sumber]

Urang Aneuk Jamee umumnyo indak tingga padek di ciek tampek, tapi daerah unian utamonyo di daerah pasisia barat Aceh, sarupo di Aceh Selatan, Aceh Barat Daya, Aceh Barat jo Simeuleu. Daerah-daerah tasabuik talatak di taluak-taluak tapi pantai nan taapik bukik-bukik barisan. Antar daerah Aneuk Jamee tapi jo wilayah etnis lain sarupo etnis Aceh, Kluet, jo Singkil. Populasi Aneuk Jamee paliang banyak di Kabupaten Aceh Selatan sarato manjadi mayoritas di Kota Tapaktuan. Walaupun baitu, urang Aneuk Jamee banyak juo nan pai marantau ka babagai tampek di Aceh.[2]

Pado maso daulu, urang-urang Aneuk Jamee bakarajo jo malauik, ka ladang, atau pai baniago. Namun sairiang pakambangan, banyak urang Aneuk Jamee nan bakarajo sabagai pagawai pamarintahan dan manyeba ka sadoalah Aceh.[2]

Kawasan-kawasan nan rami dek urang Aneuk Jamee:[2]

Kabupaten Kawasan
Aceh Selatan Kecamatan: Kluet Selatan, Labuhan Haji, Labuhan Haji Barat, Labuhan Haji Timur, Sama Dua, jo Tapak Tuan
Aceh Barat Daya Kecamatan: Susoh.
Aceh Barat Ado di kampuang-kampuang di Kecamatan Meureubo (bacampua jo urang Aceh) di antaronyo Kampuang Gunong Kleng, Peunaga, Meureubo, Ranto Panyang dan sakitarnyo. Disampiang itu, sabagian ketek juo mandiami Kmapuang Padang Seurahet nan tamasuak dalam Kecamatan Johan Pahlawan. Umumnyo nan disabuik taakhia ko marupoan katurunan pandatang nan barasa dari Kabupaten Aceh Selatan sarato alah tingga lamo di Aceh Barat sacaro turun tamurun.
Simeulue Sinabang
Aceh Singkil Kota Singkil, kecamatan Pulau Banyak (ado 3 kampuang, yaitu: Pulau Balai, Pulau Baguk jo Taluak Nibung)

Budayo[suntiang | suntiang sumber]

Aneuk Jamee tingga di wilayah nan diuni jo etnis-etnis asali satampek, sarupo urang Aceh, urang Kluet, atau urang Singkil. Kasamoan agamo (Islam) jo katigo etnis lainnyo mambuek urang Aneuk Jamee mudah baasimilasi. Dari proses asimilasi mambuek unsur budayo Minangkabau nan dibaok manjadi barubah dek panyasuaian.[2]

Bahaso[suntiang | suntiang sumber]

Bahaso nan dipakai dek urang Aneuk Jamee disabuik sabagai bahaso Jamee. Bahaso Jamee barasa dari bahaso Minangkabau nan maalami proses pambauran jo bahaso satampek, utamonyo bahaso Aceh. Apolai dek tapisah dari bahaso induaknyo, bahaso Jamee maalami panambahan kosakato dari bahaso Aceh. Walau baitu, bahaso ko masih tamasuak dialek bahaso Minangkabau. Bahaso Jamee mampunyoi kamiripan jo dialek-dialek pasisia Minangkabau (Pasaman-Pariaman).[4][3]

Bahaso Jamee dipakai baiak dalam kasaarian ataupun dalam acara-acara adaik. Bahaso Jamee pun indak anyo dipakai dek sasamo urang Aneuk Jamee sajo, tapi dipakai juo dek urang Aceh. Katiko mangecek jo urang Aneuk Jamee, urang Aceh labiah suko jo bahaso Jamee dek murahnyo dipalajari dek agak sarupo jo bahaso-bahaso Malayu. Sabaliaknyo, urang Aneuk Jamee agak payah untuak bisa mangecek jo bahaso Aceh dek banyak pabedaan utamonyo dari fonologi bahasonyo. Namun, parantau-parantau Aneuk Jamee nan pai ka daerah Aceh lainnyo alah lazim mamakai bahaso Aceh dek alah jadi bahaso pagaulan saari-ari (lingua franca).[5][2]

Caliak pulo[suntiang | suntiang sumber]

Rujuakan[suntiang | suntiang sumber]

  1. John Fitzgerald McCarthy (2006). The Fourth Circle: A Political Ecology of Sumatra's Rainforest Frontier. Stanford University Press. ISBN 0-8047-5212-5. 
  2. a b c d e f g h Sufi, Rusdi; A, Shabri; Budi Wibowo, Agus; Dewi Wanti, Irini; Widarni, Elly; Djuniat, Djuniat; Seno, Seno; Setiawan, Irvan et al. (1998-01-01). Sufi, Rusdi. ed (dalam bahaso en). Keanekaragaman suku dan budaya di Aceh. Banda Aceh: Direktorat Jenderal Kebudayaan. ISBN 978-979-95312-6-1. http://pustaka.kebudayaan.kemdikbud.go.id/index.php?p=show_detail&id=6589&keywords=keanekaragaman+suku+dan+budaya+aceh. 
  3. a b Banda Aceh, Tim Balai Bahasa (2012-01). Bahasa, Tim Aceh. ed (dalam bahaso en). Inilah bahasa-bahasa di Aceh. Balai Bahasa Aceh: Balai Bahasa Aceh. ISBN 978-602-95989-3-3. http://repositori.kemdikbud.go.id/11930/. 
  4. Shiv Shanker Tiwary & P.S. Choudhary (2009). Encyclopaedia Of Southeast Asia And Its Tribes (Set Of 3 Vols.). Anmol Publications. ISBN 81-261-3837-8. 
  5. Lesley McCulloch (2009). Aceh: Then And Now. Minority Rights Group International. ISBN 1-904584-28-4.