Parang Paderi

Wikipedia Minangkabau - Lubuak aka tapian ilimu
Parang Paderi
Parang Paderi
Parang Paderi
Tangga 18031838
Tampek Sumatera Barat, Sumatera Utara jo Riau
Asia Kamanangan Balando.
Casus belli Patikaian Kaum Paderi malawan Kaum Adaik, kudian Balando talibaik.
Pihak nan talibaik
Parang 18031821:
Kaum Adaik
Parang 18211833:
Kaum Adaik
 Balando
Parang 18331838:
 Balando

Kaum Paderi

Kaum Paderi


Kaum Paderi
Kaum Adaik
Kumandan
Rajo Alam*
Mayor Jendral Cochius
Kolonel Stuers
Letnan Kolonel Raaff*
Letnan Kolonel Elout
Letnan Kolonel Krieger
Letnan Kolonel Bauer*
Letnan Kolonel Michiels
Mayor Laemlin*
Mayor Prager
Mayor du Bus*
Kapten Poland
Kapten Lange
Tuanku Nan Renceh*
Tuanku Pasaman*
Tuanku Imam Bonjol
Tuanku Rao*
Tuanku Tambusai
* Maningga dunia dalam rantang wakatu paparangan

Parang Paderi (atau diijo juo Parang Pidari) adolah parang nan balansuang di Sumatera Barat jo sakitar utamonyo di kawasan Karajaan Pagaruyuang dari taun 1803 hinggo 1838.[1] Parang ko marupokan paparangan nan pado mulonyo dek patantangan dalam masalah agamo sabalun barubah manjadi paparangan malawan panjajahan.

Parang Paderi bamulo dek muncuanyo patantangan sakalompok ulama nan disabuik subagai Kaum Paderi tahadok kabiasoan-kabiasoan nan acok dilakuan di kalangan masyarakaik nan disabuik Kaum Adaik di kawasan Karajaan Pagaruyuang jo sakitarnyo. Kabiasoan nan dimukasuikan di antaronyo pajudian, sabuang ayam, pamakaian candu, minuman kareh, timbakau, siriah, dan juo aspek hukum adaik matriarkat manganai hukum warih, sarato lungganyo palaksanoan kawajiban ritual formal agamo Islam.[2] Indak adonyo kato supakaik dari Kaum Adaik nan padohal alah baragamo Islam untuak maninggakan kabiasoan tasabuik mambuek berang Kaum Paderi, sahinggo pacahlah paparangan pado taun 1803.

Hinggo taun 1833, parang iko dapek dikatokan subagai parang sudaro nan malibaikan sasamo Minang jo Mandailiang. Dalam paparangan iko, Kaum Paderi dipimpin dek Harimau Nan Salapan sadangkan Kaum Adaik dipimpin dek Yang Dipatuan Pagaruyuang wakatu itu Sultan Arifin Muningsyah. Kaum Adaik nan alah tadasak, mamintak bantuak kapado Balando pado taun 1821. Bantuan ko diawali jo pajanjian antaro Residen du Puy nan mawakili Balando jo Tuanku Suruaso sarato ampek baleh pangulu sabagai wakil-wakil kerajaan Minangkabau. Isi pajanjian ko antaro lain "Pangulu-pangulu Minangkabau manyarahan Pagaruyuang, Sungai Tarab, jo Suruaso, sarato daerah Karajaan Minangkabau salabiahnyo kapado Balando kok Balando bajanji akan manduduki Simawang jo 100 serdadu di bawah komando opsir-opsir Balando". Salamo duo bulan di sinan, Balando mancubo mambujuak kampuang-kampuang di sakaliliang Simawang, supayo dapek tunduak kapado kekuasaan kompeni. Namun, panduduak Sulik Aia indak nio tunduak kapado Balando, sahinggo pado 28 April 1821, Sulit Air disarang tantara Balando.[3] Namun, talibaiknyo Balando ko justru mampakaruah kaadoan, sainggo sajak taun 1833 Kaum Adaik babaliak malawan Balando jo bagabuang basamo Kaum Paderi, walaupun pado akhianyo paparangan ko dimanangan Balando.

Parang Paderi tamasuak paparangan jo rantang wakatu nan cukuik panjang, mangureh harato, jo mangorobankan jiwa raga. Parang iko salain maruntuahan daulaik Karajaan Pagaruyuang, badampak juo pado manurunnyo paniagoan masyarakaik sakitarnyo sarato mamuncuakan papindahan masyarakaik dari kawasan konflik.

Latar balakang[suntiang | suntiang sumber]

Parang Paderi dilatarbalakangi dek kapulangan tigo urang Haji dari Mekkah sakitaran taun 1803, yaitunyo Haji Miskin, Haji Sumanik jo Haji Piobang nan yobana ingin mampabaiki syariaik islam nan alum samparono dijalanan dek masyarakaik Minangkabau.[4] Mangatahui hal tasabuik, Tuanku Nan Renceh sangaik tatarik dan niyo ikuik mandukuang kainginan katigo urang Haji tasabuik basamo jo ulama nan lain di Minangkabau nan tagabuang ka dalam Harimau Nan Salapan.[5]

Harimau Nan Salapan kamudian mamintak Tuanku Lintau untuak maajak Yang Dipatuan Pagaruyuang Sultan Arifin Muningsyah basarato jo Kaum Adaik untuak maningaan babarapo kabiasaan nan batantangan jo ajaran agamo islam. Dalam babarapo parundiangan nan diadoan indak ado kato sapakaik nan tabuek antaro kaum Paderi jo Kaum Adaik. Sairiang itu babarapo nagari dalam Karajaan Pagaruyuang bagajolak pulo, puncaknyo pado taun 1815, Kaum Paderi dibawah pimpinan Tuanku Pasaman manyarang Karajaan Pagaruyuang sahinggo pacahlah paparangan di Koto Tangah. Serangan iko manyababkan Sultan Arifin Muningsyah tapaso mailak jo malarian diri dari ibu kota karajaan.[6] Dari catatan Raffles nan parnah bakunjuang ka Pagaruyuang pado taun 1818, manyabuikan bahwasanyo inyo hanyo mandapekan siso-siso Istano Karajaan Pagaruyuang nan alah tabaka.[7]

Keterlibatan Balando[suntiang | suntiang sumber]

Karano tadasak dalam paparangan dan kabaradoan Yang Dipatuan Pagaruyuang nan indak pasti, mako dek itu Kaum Adaik nan dipimpin dek Sultan Tangkal Alam Bagagar mamintak bantuan kapado Balando pado tanggal 21 Februari 1821, walaupun sabananyo Sultan Tangkal Alam Bagagar wakatu itu dianggap indak punyo hak mambuek pajanjian ateh namo Karajaan Pagaruyuang.[8] Akibeknyo dari pajanjian ko, Balando manjadikannyo sabagai tando panyarahan karajaan Pagaruyuang kapado pamarentah Hindia Balando, kamudian maangkek Sultan Tangkal Alam Bagagar sabagai Regent Tanah Datar.[9]

Katerlibatan Balando dalam parang karano diundang dek Kaum Adaik, jo campua tangan Balando dalam parang iko ditandoi jo panyarangan Simawang jo Sulik Aia dek pasukan Kapten Goffinet jo Kapten Dienema pado bulan April 1821 ateh parentah Residen James du Puy di Padang.[10] Kamudian pado 8 Desember 1821 datang pulo tambahan pasukan nan dipimpin dek Letnan Kolonel Raaff untuak mampakuaik posisi pado kawasan nan alah dikuasai.

Pado tanggal 4 Maret 1822, pasukan Balando dibawah pimpinan Letnan Kolonel Raaff barasil manumbuak mundur Kaum Paderi kalua dari Pagaruyuang. Kamudian Balando mambangun benteng patahanan di Batusangka nan diagiah namo Fort Vand der Capellen, sadangkan Kaum Paderi manyusun kakuatan dan batahan di Lintau.[11] Pado tanggal 10 Juni 1822 pasukan Raaf nan mangarik ka Tanjuang Alam dihambek dek Kaum Paderi, tetapi pasukan Balando dapek taruih malaju ka Luhak Agam. Pado tanggal 14 Agustus 1822 dalam patempuran di Baso, Kapten Goffinet mandarito luko barek kamudian maningga pado 5 September 1822. Pado bulan September 1822 pasukan Balando tapaso baliak ka Batusangka karano taruih tatakan dek serangan Kaum Paderi nan dipimpin dek Tuanku Nan Renceh.

Sasudah mandapek tambahan pasukan pado 13 April 1823, Raaff mancubo baliak manyarang Lintau, tapi Kaum Paderi bakcando gigiah bana malakuan palawanan, sahinggo pado tanggal 16 April 1823 Balando tapaso baliak liak ka Batusangka. Samantaro tuh pado taun 1824 Yang Dipatuan Pagaruyuang Sultan Arifin Muningsyah baliak ka Pagaruyuang ateh pamintaan Letnan Kolonel Raaff, tetapi pado taun 1825 rajo tarakhir Minangkabau iko wafat dan kamudian dimakamkan di Pagaruyuang.[12] Sadangkan Raaff maningga sacaro mandadak di Padang pado tanggal 17 April 1824 sasudah sabalumnyo inyo mangalami damam tinggi.[13]

Samantaro pado bulan September 1824, pasukan Balando dibawah pimpinan Mayor Frans Laemlin alah barasil manguasoi babarapo kawasan di Luhak Agam di antaronyo Koto Tuo jo Ampang Gadang. Kamudian inyo jugo alah mandapekan Biaro jo Kapau, tetapi karano luko-luko nan didaritonyo di bulan Desember 1824, Laemlin maningga dunia di Padang.[14]

Gencatan sanjato[suntiang | suntiang sumber]

palawanan nan dilakuan dek Kaum Paderi sabana kuaik sahinggo sangaiklah manyulikan Balando untuak manunduakannyo. Oleh sabab tuh Balando malalui residennyo di Padang maajak pamimpin Kaum Paderi nan wakatu itu alah dipimpin dek Tuanku Imam Bonjol untuak badamai dengan maklumat banamo "Pajanjian Masang" pado tanggal 15 November 1825.[2] Hal iko dimaklumi karano disaat basamoan Pamarentah Hindia Belanda jugo kahabisan dana dalam bahadokan jo paparangan lain di Eropa jo Jawa sarupo Parang Diponegoro.

Salamo periode gencatan sanjato, Tuanku Imam Bonjol mancubo mamuliahan kakuatan jo mancubo marangkua baliak Kaum Adaik. Sahinggo akhirnyo muncua suatu mufakaik nan dikenal dengan namo "Plakat Puncak Pato" di Bukik Marapalam, Kabupaten Tanah Datar nan mawujuikan konsensus basamo Adaik Basandi Syarak, Syarak Basandi Kitabullah nan artinyo adaik Minangkabau balandaskan kapado agamo islam, sedangkan agamo islam balandaskan kapado Al-Qur'an.[15]

Tuanku Imam Bonjol, salah saurang pamimpin Parang Paderi, nan diilustrasian dek de Stuers pado taun 182

Tuanku Imam Bonjol[suntiang | suntiang sumber]

Artikel Utama: Tuanku Imam Bonjol

Tuanku Imam Bonjol nan banamo asli Muhammad Shahab muncua sabagai pamimpin dalam parang paderi satalah sabalumnyo ditunjuak dek Tuanku Nan Renceh sabagai Imam di Bonjol.[16] Kamudian manjadi pamimpin sakaligus panglimo parang sasudah Tuanku Nan Renceh maningga dunia.[17]

Pado maso kapamimpinannyo, inyo mulai manyasali babarapo tindakan kakarehan nan dilakuan dek Kaum Paderi kapado saudara-saudaranyo, sabagaimano nan tadapek dalam memoarnyo nan inyo tulih pado maso paparangan Padri. Walau di sisi lain fanatisme sarupo itu malahiaan sifaik kapahlawanan jo cinto tanah aia.[6]

Sasuai jo nan dirasokan dek Imam Bonjol, pado maso kapulangan Tuangku Tambusai (Haji Muhammad Saleh), Pakiah Muhammad (Haji Muhammad Amin), Pakiah malano (Haji Abdullah), jo Pakiah Sialu (Haji Muhammad Razak) dari Makah pado taun 1829-1830, aksi kakerasan nan dikarajoan dek kaum Padri ko alah dibarantian, dan ado juo dalam memoarnyo Imam Bonjol manyabuik kalau ado sabagian barang rampasan parang nan didapek dari masyarakaik dibaliakkan dek kaum Padri.[18]

Pangapuangan Bonjol 1835-1837[suntiang | suntiang sumber]

Frans David Cochius, Komandan Panaklukan Benteng Bonjol dan namonyo dipakai jadi namo kota di Bonjol (Kotta Generaal Cochius) pado taun 1838 sasudah Bonjol dikalahkan.

mancaliak kueknyo Benteng Bonjol, pasukan Belanda mancubo mamblokade Bonjol jo tujuan untuak malumpuahkan pangiriman makanan jo sanjato pasukan Padri. Blokade nan dilakuan ko indak efektif, dek karano justru kubu pertahanan pasukan Belanda jo bahan persenjataannyo banyak diserang dek pasukan Kaum Padri sacaro gerilya.

Samantaro itu, diwakatu nan basamoan pasukan Kaum Padri mulai tibo dari daerah-daerah nan alah dikalahkan pasukan Balando, iyolah dari babarapo nagari di Minangkabau jo sakitarnyo. Kasadonyo urang-urang ko basadio untuak manjago kubu Bonjol sampai ka titiak darah pahabisan, iduik mulia atau mati syahid.

usaho untuak malakukan serangan ofensif ka Bonjol baru dilakukan baliak sasudah bala bantuan tantara nan tadiri dari pasukan Bugis tibo, maka pado tangah Agustus 1835 mulai luncuakan serangan ka kubu patahanan Kaum Padri nan talatak di Bukit Tajadi, dan pasukan Bugis iko ado di muko pasukan Balando dalam marabuik ciek-ciek kubu patahanan strategis Kaum Padri nan talatak sakitar Bukit Tajadi.[19]

Tapi sampai awal September 1835, pasukan Balando alun dapek marabuik bukik Tajadi, malah pado tanggal 5 September 1835, Kaum Padri kaluwa dari kubu patahanannyo kalua benteng untuak mambinasokan kubu Balando nan dibuek di sakitar BukitkTajadi. Sasudah serangan tu, pasukan Kaum Padri langsung pulang masuak ka dalam Kubu Bonjol.

Pado tanggal 9 September 1835, pasukan Balando manyerang dari arah Luhak Limo Puluah jo Padang Bubus, tapi hasilnyo tetap gagal, malahan banyak manyababkan karugian pado pasukan Balando. Lt. Colonel Bauer, salah surang komandan pasukan Balando sakik sasudah tu dikirim ka Bukittinggi, nan sasudahnyo pulo digantikan dek Mayor Prager.

Blokade nan balaruik-laruik jo kaum Padri nan barani, mambangkikkan samangek urang kampuang sakitarnyo untuak malawan pasukan Balando, sahinggo pado tanggal 11 Desember 1835 urang-urang Simpang jo Alahan Mati maangkek sanjato jo malawan kubu patahanan Balando. Pasukan Balando indak dapek doh malawan iko. Tapi sasudah bantuan dari pasukan Madura nan badinas kapado pasukan balando, palawanan iko dapek ditangani.

Ampiang sataun mangapuang Bonjol, pado tanggal 3 Desember 1836, pasukan Balando malakukan baliak serangan gadang-gadang ka Benteng Bonjol, sabagai upaya panuah untuak manjatuahkan Bonjol. Serangan nan jauah ko mampu manjebol sabagian Benteng Bonjol, sainggo pasukan Belanda dapek masuak jo barasil mambunuah babarapo kaluarga Tuan Imam Bonjol. Tapi jo kabaranian samo samangek juang tinggi Kaum Padri baliak barasil mambunuah musuah sainggo Belanda tapaso baliak kalua dari benteng jo maninggakan banyak korban jiwa di satiok pihak.

kagagalan iko sabana manimpa kabijaksanoan Gubernur Jenderal Hindia Belanda di Batavia nan pado wakatu itu alah dijabaik dek Dominique Jacques de Eerens, mako pado awal 1837 ma utuih surang panglima prangnyo nan banamo Major General Cochius untuak mamimpin lansung serangan gadang-gadangan ka Benteng Bonjol untuak kali nan ka akhienyo.[20] Cochius adolah saurang panjabaik tinggi Balando nan punyo kaahlian dalam strategi parang Benteng Stelsel.

Salain itu, Balando subana kuek mangapuang Bonjol dari sagalo jurusan salamo anam bulan (16 Maret-17 Agustus 1837) di bawah pimpinan jenderal jo babarapo pajabaik.[21] Pasukan gabuangan ko sabagian gadang tadiri dari babagai suku, sarupo Jawa, Madura, Bugis jo Ambon. Ado 148 pajabaik Eropa, 36 pajabat pribumi, 1.103 pajabaik Eropa , 4.130 pajabat pribumi, tamasuak di antaronyo Sumenapsche hulptroepen hieronder begrepen (pasukan pambantu Sumenap alias Madura). Dalam daftar namo para pajabaik angkatan balando tasabuik di antaronyo adolah Mayjen Cochius, Letkol Bauer, Mayor Sous, Mayor Prager, Kapten MacLean, Lettu van der Tak, Peltu Steinmetz, jo sataruihnyo. Salain itu ado juo namo Inlandsche (pribumi) sarupo Kapitein Noto Prawiro, Indlandsche Luitenant Prawiro di Logo, Karto Wongso Wiro Redjo, Prawiro Sentiko, Prawiro Brotto, Merto Poero jo lainnyo.

Dari Batavia datang labiah banyak pasukan tentara Balando, nan tibo pado 20 Juli 1837 jo Kapalo Perle di Padang, babarapo urang Eropa jo Sepoys, prajurit dari Afrika nan bakarajo dalam pasukan Balando, diambiak dari Ghana jo Mali, tadiri dari 1 sergeant, 4 korporaal jo 112 flankeurs, sarato dipimpin dek Kapten Sinninghe.

Serangan nan balabiah jo tabik-tabik jo hujan bantuan dari pasukan artileri nan mampunyoi mariam gadang, salamo kiro-kiro anam bulan, sarato jo pasukan infantri jo kavaleri nan taruih datang. Pado 3 Agustus 1837 dipimpin dek Lt. Colonel Michiels sabagai komandan lapangan muko mulai saketek-sagak mamimpin keadaan, dan akhirnyo pado 15 Agustus 1837, Bukit Tajadi runtuah, jo pado 16 Agustus 1837 Benteng Bonjol sacaro keseluruhan dapek ditaklukkan. Tapi Tuan Imam Bonjol dapek mundur dari benteng jo babarapo pengikutnyo mancapai daerah Marapak.

Keadaan sasudah parang[suntiang | suntiang sumber]

Sasudah Balando dapek marabuik Benteng Bonjol, barulah ado babarapo usaho dari balando untuak mambuek masyarakaik Bonjol malupokan pamimpin samo identitas lamonyo (memory collective). Pado taun 1838 pamarintah Balando mangganti namo Benteng Bonjol jo namo nan ka Balando-Balandoan nan banamo Kotta Generaal Cochius.[18] Pado maso iko, usaho panggantian namo di dukuang pulo jo usaho mailangkan catatan-catatan resmi dan administrasi kolonial dan nyo ganti jo namo nan baru.

Sabananyo dimato kolonial Balando, pambarian namo saurang tokoh pentiang Balando ka sabuah kota atau daerah barati tampek atau wilayah tu dianggap pentiang sarato mampunyoi arati nan istimewa dek pamarintah Balando. Iko barati kalau Bonjol adolah tampek nan pentiang bagi balando sahinggo namonyo harus diganti jo namo tokoh Balando nan kamudian tampek ko banamo Kotta Generaal Cochius atau disabuik juo banamo Fort Cochius. Tapi, salamo bajalannyo kakuasaan Balando disitu, usaho untuak mailangkan ingatan masyarakaiknyo tentang kahebatan Bonjol indak bisa, karano masyarakaiknyo masih mamakai namo Bonjol ko untuak manyabuikkan namo daerahnyo.[18]

Rujuakan[suntiang | suntiang sumber]

  1. Cuisinier, Jeanne (1959). "La Guerre des Padri (1803-1838-1845)". Archives de Sociologie des Religions. Centre National de la Recherche Scientifique. 
  2. a b Sejarah. Yudhistira Ghalia Indonesia. ISBN 978-979-746-801-9. 
  3. Radjab 2019, hlm. 48-49.
  4. Azra, Azyumardi (2004). The Origins of Islamic Reformism in Southeast Asia: Networks of Malay-Indonesian and Middle Eastern 'Ulama' in the Seventeenth and Eighteenth Centuries. University of Hawaii Press. ISBN 0-8248-2848-8
  5. Ampera Salim, Zulkifli (2005). Minangkabau Dalam Catatan Sejarah yang Tercecer. Citra Budaya Indonesia. ISBN 979-3458-03-8.
  6. a b Nain, Sjafnir Aboe (2004). Memorie Tuanku Imam Bonjol. Padang: PPIM.
  7. Raffles, Sophia (1830). Memoir of the Life and Public Services of Sir Thomas Stamford Raffles. London: J. Murray.
  8. Amran, Rusli (1981). Sumatra Barat hingga Plakat Panjang. Penerbit Sinar Harapan.
  9. G. Kepper, (1900). Wapenfeiten van Het Nederlands Indische Leger; 1816-1900. Den Haag: M.M. Cuvee.
  10. Episoden Uit Geschiedenis der Nederlandsche Krigsverrigtingen op Sumatra’s Westkus. Indisch Magazijn 12/1, No. 7. 1844:116.
  11. H. M. Lange (1852). Het Nederlandsch Oost-Indisch leger ter Westkust van Sumatra (1819-1845). ‘S Hertogenbosch: Gebroeder Muller. I: 20-1
  12. Dobbin, C.E. (1983). Islamic revivalism in a Changing Peasant Economy: Central Sumatra, 1784-1847. Curzon Press. ISBN 0-7007-0155-9.
  13. P. C. Molhuysen en P.J. Blok (1911). Nieuw Nederlands Biografisch Woordenboek. Deel 2, Bladzijde 1148.
  14. Nederlandse Staatscourant (10 Juni 1825).
  15. Jones, Gavin W., Chee, Heng Leng, dan Mohamad, Maznah (2009). Muslim Non Muslim Marriage: Political and Cultural Contestations in Southeast Asia, Bab 6: Not Muslim, Not Minangkabau, Interreligious Marriage and its Culture Impact in Minangkabau Society by Mina Elvira. Institute of Southeast Asian Studies. ISBN 978-981-230-874-0
  16. Munasifah (2007). Ayo Mengenal Indonesia: Sumatra 1. Jakarta: CV. Pamularsih. hlm. 51. ISBN 978-979-1494-31-1
  17. Mardjani Martamin (1984). Tuanku Imam Bonjol. Departemen Pendidikan dan Kebudayaan, Direktorat Sejarah dan Nilai Tradisional, Proyek Inventarisasi dan Dokumentasi Sejarah Nasional.
  18. a b c Asnan, Gusti (2023). 200 Tahun Perang Padri. Yogyakarta: Tanda Baca. pp. 31-42. 
  19. Journaal van de Expeditie Naar Padang Onder de Generaal-Majoor Cochius in 1837 Gehouden Door de Majoor Sous-Chief van Den Generaal-Staf Jonkher C.P.A. de Salis. hlm. 59-183.
  20. Tate, D. J. M. (1971). The Making of Modern South-East Asia: The European conquest. Oxford University Press.
  21. G. Teitler (2004). Het Einde Padri Oorlog: Het Beleg en de Vermeestering van Bondjol 1834-1837: Een Bronnenpublicatie. Amsterdam: De Bataafsche Leeuw. hlm. 59-183.

Daftar pustaka[suntiang | suntiang sumber]

  • Radjab, Muhamad (2019). Perang Padri di Sumatra Barat (1803-1838). Jakarta: Balai Pustaka dan Kepustakaan Popular Gramedia. ISBN 978-602-481-232-4.