Urang Moronene
Urang Moronene adolah salah satu dari ampek kalompok etnik gadang (urang Tolaki, Buton, Muna) di Sulawesi Tenggara. Manuruik antropolog Universitas Haluoleo, Kendari, Sarlan Adi Jaya, Moronene adolah etnik asli patamo nan mandiami kawasan iko. Namun, pamornyo kalah dibandiangkan urang Tolaki karano pado abaik ka-18 karajoan urang Moronene-lueh kawasannyo hampia 3.400 kilometer pasegi-kalah dari karajoan urang Tolaki.
Etimologi[suntiang | suntiang sumber]
Sacaro etimologi, istilah "Moronene" barasa dari gabuangan duo kato dalam bahaso Moronene yoitu "moro" jo "nene" nan mampunyoi arti "sarupo" (kaikkannyo dengan Morotai) jo "resam" (sajenis tumbuahan paku nan biasonyo hiduik mangalompok; Gleichenia linearis), hal iko marujuak kapado kawasan kadiaman dimano kalompok masyarakaik urang Moronene barasa; nan mano banyak ditumbuahan resam.
Resam biasonyo hiduik subua di kawasan lembah atau tapian sungai nan manganduang banyak aia. Sabagai petani, pambuek ubek, jo pamburu, masyarakik Moronene memang sajatinyo hiduik di kawasan sumber aia. Kulik batang resam buliah dibuekkan manjadi tali, sadangkan daunnyo dapek digunokan untuak mambungkuih makanan contohnyo yoitu dapek dijadikan sabagai pambungkuih kue lemper.[1]
Sijarah[suntiang | suntiang sumber]
Urang Moronene tagoloang banso dari rumpun Malayu Tuo nan tibo dari Hindia Balando pado jaman prasijarah atau jaman batu mudo, kiro-kiro 2.000 tahun sabalum Masehi. Sijarah tuo moronene kamudian tabantuak pamarintah Bombana nan kamudian mamacah manjadi tigo protektorat pemerintah; Kabaena, Poleang, Rumbia. Indak dikatahui bilo pasnyo urang Moronene mului manghuni kawasan Taman Nasional Rawa Aopa Watumohai. Tetapi sabuah peta nan dibuek pamarintah Balando pado tahun 1820 alah mancantumkan namo Kampuang Hukaea, yoitu kampuang tagadang urang Moronene, nan kini masuak kadalam area taman nasional itu. Kawasan tampek tingga inyo tasebar di tujuah kecamatan, anam di Kabupaten Buton jo ciek di Kabupaten Kolaka. Di lua komunitaih itu, urang Moronene manyebar pulo di babarapo tampek saparti Kabupaten Kendari karano tajadinyo migrasi akibaik gangguan kaamanan dari Darul Islam sakitar tahun 1952-1953.
Kampuang Hukaea, Laea, jo Lampopala biaso disabuik urang Moronene sabagai Tobu Waworaha atau pakampuangan tuo bakaih tampek tingga para leluhur. Urang-urang Moronene masih acok mangunjuangan tobu untuak mambarasiahan kuburan leluhur inyo katiko hari rayo Idul Adha tibo-sabagian warga Moronene baragamo Islam. Balakangan, satalah babarapo kuburan digali jo dipindahkan oleh urang indak dikenal, urang-urang Moronene bamukim kambali di Hukaea-Laea. Di jaman administrasi pamarintah Balanda, Hukaea tamasuak kawasan Rumbia, nan dipimpin saurang mokole (kapala kawasan). Rumbia mambawahi 11 tobu, tujuah di antaronyo masuak kadalam kawasan taman nasional. Manuruik Abdi, dari LSM Suluh Indonesia, jumlah urang Moronene di Sulawesi Tenggara kini ko dipakirokan sakitar 50.000-an, 0,5 persen di antaronyo tingga dalam kawasan taman nasional.
Pulau iko pernah jugo dijuluki dengan namo Witang Karambau artinyo "tanah kabau". karano masyarakaik satampek banyak mampunyoi kabau. Pado tahun 1930- an masyarakaik pulau iko mampunyoi sakitar 15.000 ikua kabau. Akan tetapi pado maso nan labiah akhia. misalnyo pado tahun 1979, jumlah kabau di pulau iko tacataik 1.868 ikua. Kaadaan nan samakin bakurang iko ado kaikkannyo dengan tajadinyo gangguan kaamanan jo karano hambaiikan pamasarannyo.[2]
Saparti kabanyakan masyarakaik adaik lainnyo, urang Moronene jugo malaksnakan baladang bapindah dengan sistem rotasi. Tapi sistem itu alah lamo ditinggakan jo inyo mamiliah manetap. Urang Moronene dikenal jugo pandai mamaliharo ekosistemnyo. Jonga atau sajenis ruso, misalnyo, masih acok dijumpoan di sakitar pamukimannyo di Hukaea, tamasuak buruang kakatua jambul kuniang, satwa endemik Sulawesi nan dilinduangi. Namun, sipek asli masyarakaik iko, nan mamacik adaik mosombu labiah maraso tanang manyurangdiri.
Namun kahidupan tanang iko mulai taganggung katiko pamarintah pado tahun 1990 manetapkan kawasan itu sabagai taman nasional. Dengan alasan itulah aparat Pemda Sulawesi Tenggara mangerahkan polisi jo tentara manggala Operasi Sapu Jagaik untuak mausia kalua urang-urang Moronene. Alasannyo, supayo utan indak rusak sahinggo buliah dijua sabagai objek ekoturisme jo sumber pandapaikkan daerah lainnyao. Padahal, hak masyarakaik adaik ateh tanah ulayat inyo diakui oleh Undang-Undang Kehutanan tahun 1999.[3]
Adat istiadat[suntiang | suntiang sumber]
Sistem Parkawinan[suntiang | suntiang sumber]
Urang Moronene adolah salah satu suku banso nan mampunyoi beraneka ragam adaik istiadat jo kabiasoan nan dijalankan oleh masyarakaik sabagai warisan budayo leluhur nan taruih manaruih dilestarikan sampai kini. Salah satu tradisi adaik Moronene nan manjadi ciri kaunikan dengan suku lain adolah adaik parkawinan. Adaik parkawinan iko masih tatok di junjuang tinggi jo dilaksanakan karano tarikek dengan hukum-hukum adaik nan wajib ditaati oleh sagenap masyarakaiknyo. Adaik parkawinan iko juo marupokan salah satu caminan kapribadian atau panjelmaan dari pado suku Moronene tu surang dalam mampakayo budayo-budayo di Indonesia.
Masyarakaik Moronene (Kabaena) sabagai salah satu suku banso di Indonesia dengan kaanekaragaman suku nan mauni saluruah palosoak tanah aia malambangkan pulo kaanekaragaman budayo jo kaanekaragaman hukum adaik nan mangatua parkawinan. Balakunyo hukum adaik parkawinan dalam satiok masyarakaik atau suku acok babedo-bedo. Tata caro adaik parkawinan antaro masyarakaik nan satu dengan nan lain, damikian pulo adaik parkawinan suku moronene mampunyoi adaik parkawinan nan babedo-bedo dengan babagai suku banso di Indonesia akan tetapi dengan adonyo pabedoan-pabedoan tasabuik justru marupokan unsua nan pantiang sahinggo maagiah identiteh kapado satiok suku banso di Indonesia.[1]
Kasenian[suntiang | suntiang sumber]
sabuah ritual adaik sajak turun-tamurun dan masih dilestarikan hinggo kini salah satunyo adolah seni tari. Tarian itu diagiah namo Tari Lumense, khas Suku Moronene Pulau Kabaena, nan dipicayo buliah mausia wabah. Tarian iko dilakukan dengan garakan maju mundua jo batuka tampek. Kamudian para panari mambantuak konfigurasi hurup Z lalu barubah manjadi S. Klimaks dari tarian iko adolah para panari manabehkan parang pado pohon pisang sampai jatuah ka tanah.
Musik tarian iko barasa dari gong gadang nan dikenal dengan namo tawa-tawa dan ketek nan biaso disabuik ndengu-ndengu. Tarian iko digunokan masyarakaik tadahulu untuak mausia wabah dari roh jahek. "Dulu tarian iko marupokan ritual panyambahan untuak mausia wabah nan disabokkan oleh roh-roh jahek".
Dahulu ritual tasabuik dilakukan dengan mangurbankan binatang bahkan manusia sabagai tumbal pancagahan wabah tasabuik. Namun sairiang masuaknyo Islam di Pulau Kabaena, pakambangan ritual itu kamudian mangalami panyasuaian, tarutamo takaik tumbal, disiko tumbal nan mulonyo barasa dari binatang jo manusia diganti manjadi batang pisang. Sahinggo saluruah rangkaian utamo ritual tarian tasabuik hinggo saat ko manggunokan pohon pisang nan dicucuakkan ka tanah. "Satalah masuaknyo ajaran Islam mangalami panyasuaian. Sahinggo kini tari Lumense manggunokan pohon pisang sabagai pangganti tumbal dari manusia atau binatang." Tari Lumense iko marupokan tarian nan alah cukuik tuo bagi masyarakaik Kabaena pado khusuihnyo. Namun tatok dilestarikan jo dijago untuak generasi-generasi salanjuiknyo. "Tarian iko alah cukuik tuo jo masih taruih dilestarikan anak-ana muda kini ko." Kini tarian tasabuik acok digunokan untuak tari panyambuikkan tamu-tamu nan tibo dari jauah untuak maliek jo manyaksikan Kabupaten Bomana, khusuihnyo Pulau Kabaena.[4]
Pola pamukiman[suntiang | suntiang sumber]
Kawasan daratan jo kawasan lauikan (parairan) takaik sangat arek manjadi padu (manyatu) dalam fungsi spasialnyo mambantuak kawasan-kawasan pantai jo parairan (marine and coastal zones). Daerah pesisir pantai mampunyoi paran pantiang dalam parekonomian masyarakaik jo pambangunan. Badasarkan pacampuran ras pado Desa suku Moronene, Bajo, Muna, Bugis, Tolaki, pola pamukiman mangalami parubahan jo bantuak fisik bangunan pamukiman mangalami pakambangan, masih ado nan mampatahankan bangunan asli Suku Moronene jo sabagian mangalami parubahan bantuak ka bangunan modern atau semi permanen.
Papindahan pamukiman masyarakaik adaik suku Moronene nan mulonyo barado di pulau tambako dengan kondisi pamukiman nan manggunokan kayu sabagai tiang panyangga rumah, bamatopancarian sabagai nalayan tangkap. Satalah pamukiman bapindah ka daratan rumbia, pola pamukiman barubah jo mato pancarian masih tatok samo dengan kondisi katiko pado di pulau tambako. Masyarakaik adaik tasabuik rato-rato bakarajo sabagai nalayan, sahinggo masyarakaik adaik moronene biaso disabuik sabagai masyarakaik nalayan.[5]
Rujuakan[suntiang | suntiang sumber]
- ↑ a b "Nenek Moyang Suku Moronene (Asal-usul dan Kebudayaan)". MatanetNews.com (dalam bahasa Indonesia). 2019-09-02. Diakses tanggal 2023-02-14.
- ↑ Melalatoa, Junus (1995). Ensiklopedi Suku Bangsa Di Indonesia. CV. EKA PUTRA. hlm. 593.
- ↑ Tempo Interaktif - Di sana, Leluhur Mereka Dimakamkan, 13 Mei 2002[pranala nonaktif permanen].
- ↑ Attamimi, Nadhir. "Mengenal Tari Lumensa asal Bombana, Ritual Adat Moronene untuk Usir Wabah". detiksulsel (dalam bahasa Indonesia). Diakses tanggal 2023-02-14.
- ↑ http://repository.unissula.ac.id/11491/6/BAB%20I.pdf
