Urang Kedang

Urang Kedang
Jumlah populasi
sakitar 41.136 jiwo
Kawasan bapopulasi cukuik banyak
Kabupaten Lembata Kacamatan Omesuri & Kacamatan Buyasuri Nuso Tanggaro Timua Indonesia
Bahaso
bahaso Kedang, bahaso Indonesia
Agamo
mayoritas Kristen minoritas Islam
Kalompok etnik takaik
Florest Urang Lio, Urang Nagekeo, Urang Sikka, Urang Manggarai, Urang Ende

Urang Kedang adolah salah ciek suku banso nan ado di Kabupaten Lembata, Nuso Tanggaro Timua nan mambantuak ciek komunitas adaik di bawah kaki gunuang Uyelewun. Sacaro administratif pamarintahan ado di 42 dusun, di duo Kacamatan yakni Kacamatan Omesuri jo Buyasuri. Manuruik dato BPS Lembata 2020, jumlah masyarakaik Kedang sabanyak 41.136 jiwo jo rincian, Kacamatan Omesuri 19.280 jiwo jo Buyasuri 21.856 jiwo.

Masyarakaik Kedang nan ado di Kabupaten Lembata tasabuik uniak. Sacaro geografis mereka mamang manampeki wilayah sabalah timua daratan Pulau Lembata. Namun sacaro budayo, adaik-istiadaik jo bahaso, urang Kedang babeda jo urang Lembata, Solor, Adonara, Flores Timur daratan jo sabagian Pulau Alor nan sabagian gadangnyo babudayo jo babahaso Lamaholot.

Sijarah

Pamarintahan Urang Kedang dipimpin dek saurang Kapitan. Kapitan marupokan gala Rajo di Urang Kedang. Kapitan patamo bakuaso banamo Rian Bara’ Musa Sarabiti, nan diakui subagai Rajo agamo jo Rajo Pamarintahan dek Belanda. Kapitan Kedang dilanjuikan dek Rian Bara’ Bapak Dia Sarabiti, jo nan taakhia Rian Bara’ Mas Musa Sarabiti. Wilayah kakuasoan Kapitan Kedang tadiri dari 44 Leu (kampung) disaluruah wilayah Kedang. Panduduak 44 kampuang marupokan turunan asli Uyolewun. Pado tahun 1968 kampuang-kampuang itu ditata baliak susunannyo, adonan tatap tagak surang ado nan digabuangkan juo manjadi ciek dusun jo jumlah panduduak sakitar 1.000 angguta kaluargo. Kampuang-kampuang bantuakan baru itu diagiah namo jo gaya baru.

Pado bulan Juni tahun 1970 wilayah Urang Kedang rasmi dipacah manjadi 2 Kacamatan, yakni Kacamatan Omesuri dan Buyasuri. Ibu kota Kacamatan Omesuri di dusun Balauring, sadangkan Ibu Kota Kacamatan Buyasuri di weiriang dusun Umaleu. Jo baitu, kakuason Kapitan Kedang baakhia juo. Kaduo Kacamatan diagiah namo badasakan hubuangan turunan urang Kedang, yakni Buja’ Suri (ejaan lamo) bajanis kalamin laki-laki, sadangkan Ome Suri bajenis kalamoan padusi. Buya jo Ome marupokan duo badunsanak kanduang anak dari Suri Ula, apobilo dirunuik ka ateh mako susunannyo sarupo Suri Ula, Ula Loyo, Loyo Buya’, Buya’ Subang, Subang Pulo, Pulo Pitang, Pitang Raya, Raya Ula, Uyolewun.

Kuburan dari Kapitan Kedang patamo disabuik Kubur Buya’ Rian Bara’ nan tadapek di pabatehan dusun Kekar jo dusun Kalikur, nan marupokan juo pabatehan antaro wilayah Kacamatan Buyasuri jo Kacamatan Omesuri.

Agamo

Sabalun tibonyo agamo Islam, masyarakaik suku Kedang manganuik kapicayoan animisme, manyambah toang ala (sang pancipta) jo caro poan kemer, yakni ritual adaik jo media lapa’ (batu ceper baukuaran sadang) tampek untuak manyimpan sasajian barupo kapeh putiah, talua ayam, tuak (nira nan sudah difregmentasi), disartoi tetesan darah ayam putih atau ayam merah (tagantuang janis masalah jo pamintaan) untuak didabiah dek molan (dukun). Molan, kamuncualannyo hanyo pado urang dari turunan tatantu. Kamampuannyo malafazkan mantro Kedang indak bisa dirakayaso atau dipelajari, malainkan hadia jo surangnyo malalui mimpi atau caro–caro ghaib lainnyo, dalam bahaso Kedang disabuik tuben niong todi hen (urang nan manarimo patunjuak). Patunjuak nan dimakasuik diyakini dari toang ala (sang pancipta).

Islamisasi marupokan paristiwo nan pantiang dalam sijarah Urang Kedang. Antara islamisasi Urang Kedang jo islamisasi di Nusantaro indak dapek dipisahkan, karano malalui jalua padagangan lah Islam masuak di Nusantaro, jo Urang Kedang marupokan bagian dari masyarakaik Nusantaro.

Manuruik catatan sijarah salah saurang tokoh agamo di Kedang yakni Husen Noer, bahso urang Kedang mamaluak agamo Islam sajak tahun 1600 saaik agamo Islam tibo dibawo dek padagang Arab dari Gujarat nan basanda biduaknyo di Palabuahan Kalikur sakaliguih manjadikan Kalikur subagai padagangan jo panyebaran agamo Islam di wilayah Kedang jo ciek Hamente (Rajo), yakni Musa Sarabity (Rajo Kedang patamo nan sangaik disagani).

Pado tahun 1602 tibo kolonial Balando menjajah Nusantaro indak takacuali wilayah Kedang. Balando tibo jo mambawo misi Kristen–Katolik, managakan sikolah–sikolah swasta di dusun-dusun di Kedang kacuali di dusun Kalikur jo dusun Leubatang.

Balando tibo mambawo agamo Katolik, tapi indak ingin babantuaran jo kapamimpinan Rajo Kedang nan baagamo Islam, mako Balando mambuek Rajo Kedang subagai Rajo agamo untuak urusan agamo jo Rajo pamarintah untuak urusan pamarintahan di wilayah kakuasoanyo. Agamo Islam di Suku Kedang bapusek di Kalikur jo dari sikolah agamo Islam di kambangkan lo ka daerah Kedang bagian padalaman.

Ekonomi

Kondisi sosial ekonomi Urang Kedang manangah ka bawah, karano sabagian gadang Urang Kedang mampatahankan hiduiknyo jo manjadi patani, sahinggo untuak mandapekkan makanan dari hasia lauik Urang Kedang manuka hasia pataniannyo jo hasia lauik di pasa-pasa tradisional. Sistem barter iko cukuik lamo batahan sampai kini di Urang Kedang, Kabupaten Lembata Nuso Tanggaro Timua (NTT). Salain Urang Kedang, tadapek Urang Binongko, Urang Alor jo Buton.

Panikahan adaik

Bujang dari suku Kedang hanyo buliah manikah (Mure’wanan) jo padusi dari urang Kleden, urang Hadjon, urang Tukan Amadoren, urang Kromen, urang Tukan Weru’in, jo urang Weking. Paro bujang dari urang Kedang manganggok paro bujang dari urang-urang iko subagai belake sabab mereka nan maagiah istri kapado urang Kedang. Paro bujang dari urang Kedang indak buliah manikah jo padusi dari urang Tukan Amalau, urang Weking, urang Kerans, urang Tobin, urang Kean, urang Letor, karano suku-suku iko manjadi opu’ dari urang Kedang. Salain itu bujang dari urang Kedang indak buliah manikah jo padusi dari urang Koten, urang Balun, urang Betan, jo urang Marang karano urang iko adolah urang kele’kematek dari suku Kedang, artinyo urang nan dianggok subagai dunsanak dari urang Kedang.

Masyarakaik Lembata takhusuihnyo Kedang manggunokan Gong subagai mas kawin atau belis. Mengenai gadangnya mas kawin atau belis, ditantukan dek tinggi randahnyo statuih sosial padusi jo dek hasia perundingan antaro pihak laki-laki jo pihak padusi. Gong adolah salah ciek bando budayo nan tatap dipaliharo, dibina jo dikambangkan dek masyarakaik Kedang hinggo saaik iko. Gong juo marupokan salah ciek media atau alaik komuniakasi tradisional nan manganduang nilai jo raligius. Bagi masyarakaik Kedang, makno Gong surang marupokan hargo diri padusi (walaupun hargo diri indak diukua jo materi) jo baleh jaso tahadok aia susu mande. Simbol-simbol iko mambantu urang untuak manyadari bahso manusio mampunyoi hargo diri nan luhua.

Pado masyarakaik Kedang mas kawin marupokan unsua tapantiang jo utamo dari ritual pakawinan adaik dalam manantukan sah atau indaknyo pakawinan adaik nan dilangsuangkan. Ditatapkan bahso kahadiran mas kawin diamini subagai tradisi jo juo subagai ritual adaik nan harus dilalui dimano kahadirannyo mampunyoi nilai-nilai luhua jo bantuak panghargoan dari kaluargo mampelai laki-laki kapado kaluargo mampelai padusi demi mambangun hubuangan kakaluargoan jo subagai simbol untuak mampaciekkan kaduo kaluargo tasabuik. Kahiduikan saurang padusi dalam adaik istiadaik Kedang mampunyoi nilai nan sangaik tinggi, nan dapek dikatahui dari gadangnyo mas kawin atau belis nan diagiahkan dalam bantuak Gong maupun Gading. Suatu hal nan uniak jo fenomenal dimano pado daerah tasabuik indak dipaliharo gajah jo indak tadapek masin pabrik gong, tatapi kabaradoan gong jo gading indak parnah punah jo salalu ado di daerah Kedang.

Dalam budayo pakawinan masyarakaik Kedang, untuak mangatahui nilai sabuah mas kawin indak hanyo mancaliak dari sagi jumlah bando atau objek tasabuik tatapi mamparhatikan barapo nilai nan takanduang di dalamnyo. Dalam pahituangan mas kawin, masyarakaik Kedang mangenal istilah Munaq, Kasuen, Telun, Ka’apa, Lemen. Muna bararti ciek, Kasuen bararti duo. Telun bararti tiga. Ka’apa bararti ampek jo Lemen bararti limo. Sado janis gong itu sasuai jo pahituangan adaik Kedang. Istilah-istilah tasabuik mampunyoi paran pantiang dalam maagiah arti jo nilai dalam sabuah objek atau bando nan bahubuangan jo budayo jo tradisi setampek. Siek objek atau bando indak hanyo dicaliak samato-mato sacaro kualitas objek itu surang, elok dari sagi jumlah maupun mutu malainkan juo dapek dinilai sacaro kuantitas mangenai nilai nan takanduang dalam objek itu surang. Hal iko nan manjadikan budayo Kedang babeda jo budayo masyarakaik lain di luar Kedang.

Musiak

Masyarakaik suku Kedang Kabupaten Lembata mampunyoi alaik musiak tradisional nan diwariskan turun temurun sajak dahulu kalo. Alaik musiak itu banamo Tatong jo sampai hari iko masih acok dimainkan dari ganarasi ka ganarasi. Di babarapo pentas seni jo festival budayo tingkek kabupaten, Tatong alah acok dimainkan dek paro musisi dari Kedang. Diiriangi dantuman gandang, bunyi Tatong tadanga uniak jo khas maski inyo hanyo tadiri dari ampek senar.

Dawai atau senar Tatong marupokan irisan dari badan bambu. Untuak mambagi bunyi nado, sapotong kayu dijadikan pamisah samacam fret pado alaik musiak gitar. Tatong dimainkan jo caro dipatiak. Bisa dipatiak jo jari tatapi bisa juo jo bantuan pick nan tabuek dari bambu. Alaik musiak baumua ratuihan tahun iko acok dimainkan di wilayah Kedang. Tatong alah ado sajak nenek moyang urang Kedang nan manampeki Gunung Uyelewun.

Subagai upayo palestarian, Tatong juo diajarkan di sikolah-sikolah di Kedang. Katanyo, anak-anak di Kedang juo pandai bamain Tatong. Pado zaman dulu, alaik musiak iko dimainkan untuak mamujo dewa Wula Loyo (dewa matohari). Alaik musiak iko labiah tuo dari alaik musiak Sasando dari Pulau Rote jo alah ado sabalun masyarakaik Kedang mangenal gong jo gandang.

Kahadiran alaik musiak gong jo gandang sampek manggerus Tatong jo babarapo alaik musiak tradisional asli Kedang sarupo edang, peku, jo nureng (seruling). Pasalnya, gong jo gandang nan dibawo masuak basamoan jo masuaknya panjajah sakitar tahun 1700-an dianggok dek urang Kedang subagai barang mewah jo bahargo. Gong dijadikan belis (mahar). Gong jadi bagian dari belis sampai kini. Dalam kabudayoan Kedang, ado istilah 'edang tatong lia namo' nan sacaro harafiah bararti mamainkan edang tatong untuak batandak jo manari. Hinggo kini, alaik musiak tatong jo nureng masih bisa disobokan di wilayah Kedang. Sadangkan edang jo peku alah mulai punah.