Urang Ngada

Wikipedia Minangkabau - Lubuak aka tapian ilimu
Suku Ngada
Ngadha, "Nad'a", "Nga'da"
Jumlah populasi

155.000 Jiwa.

Kawasan bapopulasi cukuik banyak
Indonesia:

Nusa Tenggara Timur

Bahaso
bahasa Ngada (Rokka)
Agamo
Mayoritas Katolik dan sedikit Islam, dan masih ado yang picayo samo "animisme" jo "dinamisme"
Kalompok etnik takaik
Suku Sipopali

Ethnis Ngada (atau Ngadha, Nad'a, Nga'da) adolah etnik yang mandiami sabagian gadang daerah Kabupaten Ngada, Nusa Tenggara Timur, Indonesia. Populasinyo dipakirokan sakitar 155.000 jiwa. Mato pancaharian hiduik etnik iko umumnyo adolah baladang, sabagian di sawah, ado pulo yang bataranak jawi, kabau, kudo jo mayoritasnyo bataranak ciliang.

Ethnis Ngada marupokan panutua [bahaso Ngada atau Rokka]. Badasarkan pabedaan dialek-dialek bahasonyo, Kabupaten Ngada dibagi ateh ampek etnik yaitu Rokka, Riung, Nage, Bajawa, masiang-masiang sub-suku mampunyoi kabudayaan surang-surang yang masih dipatahankan sampai hari kini ko, sarupo rumah adat, tarian, pakaian adat, jo nan lainnyo.[1]

Etimologi[suntiang | suntiang sumber]

Namo Ngada diambiak dari namo salah surang dari suku atau woe yang tadapek di wilayah yang kini ko banamo Kabupaten Ngada. Sabutan "Ngada" dipakenalkan sabagai wilayah administrasi oleh [Hindia Balando|pamarintah kolonial Balando]] pado taun 1907. Sabalun taun 1907,etnik Ngada labiah dikenal jo banamo De Roka yang bapusek disakitar Rokkas Piek atau sakitaran gunuang Inerie. Mayoritas panduduak De Rokka barado di tangah dan salatan Kabupaten Ngada saat iko. Saurang antropolog banamo Paul Arndt pernah malakukan panalusuran manganai asal-usua namo Ngada. Dalam panalusurannyo yang dilakukan pado 1929, Paul manjalehkan kalau namo Ngada barassa dari namo suku atau klan kapalo Swapraja Ngadha partamo yang barubah manjadi "Nga da" karano labiah murah di sabuik samo lidah urang.

Dalam Ensiklopedi Suku Banso di Indonesia disabuik, tadapek mitos kalau niniak moyang suku ngada iko alah malakukan pajalanan yang jauah dari tampek yang di sabuik jo istilah "pu’u zili giu gema", artinyo tampek yang galok gulito. Dalam syair adat yang dinyanyikan disabuik kalau tampek yang jauah iko mangacu ka sabuah nagari banamo Sina One, diaratikan sabagai Nagari Chino.[1]

Rumah adat[suntiang | suntiang sumber]

Rumah urang Ngada disabuik "sa'o". Rumah-rumah ditata mambantuak pamukiman jo mamakai pola bulek talua atau pasagi panjang dan posisi mangaliliangi sabuah lapangan yang di gunoan urang untuak bakumpua jo mangadoan upacara. Di tangah-tangah lapangan, tadapek minimal ciek susunan pangguang batu untuak malengkapi upacara yang disabuik "Ture" dimano tadapek Batu ceper yang gadang dan disabuik Nabe sabagai altar dan batu tagak yang disabuik "watu lewa'

Satiok rumah adat Suku Ngada salalu manghadap ka "ngadhu" dan "bhaga" sabagai poros. Bhaga babantuak sarupo rumah barukuran ketek yang marupokan representasi niniak moyang padusi, Samantaro Ngadhu /Madhu marupokan representasi niniak moyang laki-laki dengan bantuak manyarupoi payuang dengan keri atau atok alang-alang dan ijuak dari pohon enau. Jumlah kaduonyo salalu bapasangan mangartikan banyaknyo klan atau woe di dalam ciek pamukiman.[1]

Sistim kakarabatan[suntiang | suntiang sumber]

Ethnis Ngada manganuik sistim kakarabatan matrilineal. Kaluargo inti disabuik "se sao". Babarapo "se sao" bagabuang mambantuak kaluargo Matrilineal yang di sabuik membentuk "sipopali". Babarapo sipopali yang maraso masih ciek niniak moyang jo "sipopali" lain bagabuang mambantuak klan atau woe ketek yang disabuik "ilibhou". Babarapo ilibhou tarikek ka dalam ciek kasatuan teritorial genealogis yang disabuik "woe". Masiang-masiang woe mampunyoi sapasang "Ngadhu" dan "Bhaga" yang mereka junjuang tinggi.[2]

Sosial dan kamasyarakatan[suntiang | suntiang sumber]

Suku Ngada mangenal stratifikasi sosial atau disabuik "gae" dalam istilah satampek. Pangalompokkan iko tajadi ateh dasar pabedaan sikap jo karakter. Kalompok "Ga'e" biasonyo dianggap sabagai golongan urang suci jo panuah sopan santun yang fokus pado pakarajoan dan indak bisa talibat dalam masalah urang lain sarato mampunyoi gaya bahaso yang diplomatis dan saketek babeda dari bahaso masyarakaik lainnyo. Kalompok Ga'e juo dikenal sabagai Mosa Uma karano keuletan urang tu dalam bakarajo sahari-hari.[3] Kalompok Ga'e sangaik disagani dan dihormati dalam kahidupan sosial masyarakaik. Kalompok masyarakaik kaduo disabuik "gae kisa' yakni kalompok masyarakaik yang lapeh-lapeh mangeceknyo dan saketek kasa sikap parilaku jo karakternyo. Kalompok iko biasonyo barado di Kampuang sarato acok bapesta pora dan talibaik dalam urusan atau masalah urang lain". Ado pun kalompok lainnyo yakni golongan hamba sahaya atau bakeh budak yang disabuik "azi ana" atau "So'o /ho'o".Kalompok iko biasonyo tingga di lua kampuang sarupo di kabun atau di tampek yang jauah dari Pakampuangan.[3]

Agamo dan kapicayoan[suntiang | suntiang sumber]

Dalam Ensiklopedi Suku banso di Indonesia, mayoritas agamo yang dipaluak Suku Ngada yakni Katolik jo saketek Islam. Sajak taun 1910-an, Suku Ngada alah manjadi target misionaris di bawah kalompok Societas Verbi Divini. Salain agamo Katholik, mayoritas masyarakaik juo masih manganut kapicayoan asli urang tu yang basifat [animisme] jo [dinamisme].[3]

Upacara Reba[suntiang | suntiang sumber]

Suku iko juo mampunyoi sabuah upacara yang di sabuik banamo Reba, upacara iko iolah upacara yang di lakukan untuak maagiah raso tarimo kasiah ka masyarakaiknyo tarutamo niniak moyang inyo. Ubi atau 'uwi' adolah makanan utamonyo dalam upacara adat iko. Upacara iko di sabuik mampunyoi nilai magis yang mampu mamikek urang dari babagai wilayah yang ado di sakitaran daerah Flores.

Dalam palaksanaan upacarasatiok kacamatan yang ado di Flores akan ikuik sarato dalam upacara iko, dan akan bagiliaran untuak manjadi tuan rumah dalam upacara iko satiok taun. Hal iko batujuan untuak mambarikan raso hormat untuak satiok kacamatan dan ma agiah raso adil untuak palaksanaak upacara adat Reba di satiok bulan Januari pa taunyo.[4]

Referensi[suntiang | suntiang sumber]

  1. a b c Hidayah, Dr Zulyani (2015) (dalam bahaso id). Ensiklopedi Suku Bangsa di Indonesia. Yayasan Pustaka Obor Indonesia. ISBN 978-979-461-929-2. https://books.google.co.id/books?id=w_FCDAAAQBAJ&dq=Daeng+1979,+Depdikbud+1989,+Lebar+1964&hl=id&source=gbs_navlinks_s. 
  2. "Kampung Adat Ngada Nan Ekonomis". Republika Online (dalam bahasa Indonesia). 2016-11-01. Diakses tanggal 2023-01-23. 
  3. a b c Sunarti, Sastri (2016-06-01). "Fungsi Sosial dan Transendental Tradisi Lisan Dero-Sagi Suku Bajawa-Ngada, Flores, Nusa Tenggara Timur". JENTERA: Jurnal Kajian Sastra. 5 (1): 86–101. doi:10.26499/jentera.v5i1.350. ISSN 2579-8138. 
  4. "Mengenal Suku Ngada, Upacara Adat Bentuk Rasa Terimakasih". EGINDO (dalam bahasa Inggris). 2021-03-19. Diakses tanggal 2023-01-23.