Urang Rawa

Suku Rawa Anak Rawa
Jumlah populasi
Pado maso dahulu indak di katahui Maso kini kurang labiah 1.438 Jiwa
Kawasan bapopulasi cukuik banyak
Indonesia: [[Kampuang Penyengat]: kacamatan Sungai Apit, Siak. Riau 2014 : 350 KK
Bahaso
bahaso Malayu (Bahaso Rawa)
Agamo
Alun ado Informasi Pasti, Tapi pado maso lalu suku iko manganut kapicayoan Animisme Niniak Moyang.
Kalompok etnik takaik
Suku Sakai, Suku Akit.

Urang Rawa atau Urang Anak Rawa atau Urang Akit adolah salat satu suku banso yang ado di Provinsi Riau. Sabagian sumber ado yang mangatoan kalau suku urang Rawa tingga di padalaman kacamatan Sungai Apit, kabupaten Siak, ado juo yang mangatokan sacaro spesifik tingga di daerah padalaman yang banamo Lancur Darah, di kacamatan Sungai Apit juo. Kini ko, suku iko manampati sabuah desa/kampuang adat banamo Kampuang Penyengat dan hampia 80% panduduaknyo adolah Suku Asli Anak Rawa.

Kampuang tampek bamukim Suku Anak Rawa iko konon alah dirintis sabalum maso panjajahan Balando yang mano ado sijarah manarik dalam panyabutan Lancur Darah iko. Sijarah yang dikatahui iolah kalau maso dahulu ado paparangan saudara yang tajadi dalam suku Rawa ko, yang mano manuruik sumber iko tampek pastinyo adolah pasisia Timua Sumatera, yang babateh jo Selat Rangsang, Kapaulauan Maranti, Riau.

Parang badarah dipici kadek masalah paburuan yang biaso di karajoan dek anggota suku yang mano ado sabuah kaluargo manyuruakkan hati ciliang untuak di konsumsi samo kaluarganyo surang, yang mano hal iko manuruik aturan adat urang tu hati ciliang hasia buruan wajib di bagi kapado sagalo anggota komunitas sukunyo. Hal iko kamudian mangakibatkan pakalahian jo patumpahan darah. Sagalo warga kampuang akhirnyo bacakak, dan banyak tadapek korban jiwa sahinggo disabuiklah tragedi "Lancur Darah" darah yang mangalia manganoi Rawa, sahinggo sampai hari kini masih dikenal jo Lancur Darah.

Sijarah asa-usua

Manuruik sijarahnyo, Kampuang Penyengat diparintah dek 10 (sapuluah) urang pamimpin. Pado taun 1908 Kampuang Penyengat dipimpin oleh Bathin Kundur yang bagalah Bathin Sembilan, jo pado taun 1918 Bathin Kundur diganti dek Bathin Rimbun. Pado maso kapamimpinan Bathin Rimbun iko Kampuang Penyengat bakambang dengan daerah kakuasaan maliputi Kumpai hinggo ka Sungai Lakar. Sairiang bajalannyo wakatu, Kampuang Penyengat kamudian dihuni oleh duo suku yaitu Suku Asli Anak Rawa jo Suku Malayu.

Suku anak Rawa marupokan masyarakaik paradaban Malayu Tuo, yang barasa dari Cino. Suku iko juo dikatokan alah lamo dan labiah mandahului karajaan Siak yang ado di Riau. Urang suku anak rawa iko dikenal jujua pado maso karajaan Siak, yang mano urang-urang suku anak rawa ko juo dipacayo samo karajaan untuak maambiak upeti dari daerah-daerah kakuasaannyo.

Sairiang bajalannyo wakatu dan pola kahidupan yang bapindah-pindah, Suku Anak Rawa iko bakambang lueh dari wakatu ka wakatu, hinggo akhianyo pamukiman urang iko badekatan jo urang-urang transmigrasi lokal. Ikolah yang kamudian mambuek Suku Anak Rawa mulai dikenal urang banyak.

Mato pancaharian

Suku anak Rawa iko indak mampunyo mato pancaharian yang khusus, rato-rato mato pancaharian anak suku rawa pado maso dulu iolah baburu jo maramu dari rimbo. Untuak mamanuahi kabutuhan sahari-hari biasonyo urang ko baka baburu jo caro pai ka rimbo bakalompok baburu ruso atau ciliang.

Salain baburu, urang suku rawa juo batani dengan sistim yang masih tradisional, salain batani urang ko juo mangenal kabiasoan mancari tanaman ubek jo maramunyo. Etnobotani marupokan ka ilmuan yang mampalajari pamanfaatan tumbuhan sacaro tradisional oleh suatu suku. Suku Anak Rawa marupokan suku yang masih mamanfaatkan tumbuhan sacaro tradisional elok untuak pangan maupun untuak ubek. Namun data jo informasi mangenai pamanfaatan tumbuahan iko alun tadokumentasikan.

Adaik panikahan

Ado babarapo tahap dalam proses panikahan di masyarakaik Adat Suku Asli Anak Rawa, tahapannyo adolah sabagai barikuik :

Tahapan sabalun manikah

Pado tahap iko iolah pamiliahan Jodoh, di mano mamiliah jodoh dilakukan dek urang tuo dalam manantukan pasangan anaknyo dan anak harus patuah tahadap kaputusan urang tuo. Tapi itu pado maso lalu, sadangkan dimaso kini mamiliah jodoh di kalangan Suku Asli Anak Rawa mulai luntua jo anak-anak mudo labiah mamiliah manantukan jodoh inyo surang. Dalam tahap iko ado babarapo proses yang antaro lain:

1. Merisik

Adolah kaluargo laki-laki mangutus saurang yang alah dakek jo kaluargo padusi untuak batanyo-tanyo parihal si gadih yang alah dikatahui oleh kaduo pihak sabagai calon pandampiang si laki-laki bisuak. Dalam proses merisik, urang tangah atau utusan hanyo mananyokan apokah si gadih alah ado yang punyo, dan jiko alun bagaimano kalau si gadih ditanyo apokah inyo namua dijodohkan. Jiko si gadih jo kaluargo satuju, mako hajat yang alah disampaikan baka ditaruihan jawabannyo kapado kaluargo laki-laki. Utusan menyampaikan hasil dari risik kapado kaluargo laki-laki, dan kaluargo laki-laki salanjuiknyo mananyokan bilo wakatu yang tapek untuak bisa manaruihkan rundiangan yang elok.

2. Malamar

Adolah datangnyo utusan dari kaluargo laki-laki untuak manyampaikan hajat urang tu labiah sarius lai. Dalam acara lamaran ikok pihak laki-laki datang jo mambaok tepak siriah yang barisi lengkap yoitu pinang, siriah, gambia, rokok daun saikek, dan sabuah kain salendang, jiko ado dibaok pulo sabuah cincin balah rotan.

3. Malakek Tando

Melekat Tanda (Batunang) dalam acara Melekek Tando, yang dirundiangkan adolah barapo lamo wakatu batunang, bilo wakatu acara panikahan dilakukan, jo nan paliang utamo adolah barapo taruhannyo (kepiang hantaran). Sabalun pihak laki-laki pai ka rumah padusi untuak malakek tando, pihak laki-laki alah manyampkan kepiang taruhannyo, kain salendang yang dibaok katiko lamaran, sabuah cincin balah rotan, jo tepak siriah barisi lengkap sarato ditambah jo rokok nipah samo kepiang adat atau kepiang tepak. Sagalonyo baka diagiahan kapado pihak padusi. Ado babarapo bantuak hantaran yang mangalami parubahan karano memang maikuik zaman, yaitu rokok nipah baganti jo rokok kretek jo babarapo bantuak barang lainnyo.

4. Mangundang

Mengundang adolah sabuah acara yang dilakukan oleh pihak padusi barupo acara pesta pakawinan anaknyo yang alah ditatapkan pado acara Malakek Tando. Sabalun hari pesta pakawinan tibo, kaluargo padusi mangadokan suatu acara yang dinamokan Manjapuik atau Mangundang para tamu yang baka datang pado acara pesta anaknyo. Acara iko indak di undang sacaro manurek tapi langsuang sacaro lisan karumah-rumah urang yang baka di undang, dan biasonyo yang maundang iolah dari pihak padusi.

5. Malam Mengantong

Mengantong dimulai jo mamasang hiasan jo dekorasi, tarutamo di rumah pihak padusi. Malam Mengantong dilaksanakan sahari sabalum pesta panikahan, biasonyo urang tuo kampuang dilibaikkan dalam acara malam iko jo acara dimariahkan jo acara joget adat sarupo tari gendong jo joget gong. Sagalo kaluargo gadang bakumpua basamo-samo basuko cito mameriahkan acara.

6. Masak-Masak

Sahari manjalang hari H, rumah pangantin padusi disibuakkan jo kagiatan mamasak untuak manjamu para tamu yang akan datang pado acara pesta pakawinan. Biasonyo, masakan yang manjadi masakan khas satiok acara pesta adolah ikan ukuran gadang yang baka manjadi santapan para tamu pado acara pesta pakawinan. Jenis ikan yang biaso dimasak adolah ikan Ajah, yaitu sajenis ikan duri atau sajenis ikan belukang. Salain ikan iko, indak lupo disuguahkan pulo makanan khas Suku Asli Anak Rawa barupo dagiang ciliang jo dagiang ayam yang digulai.

Tahapan upacar pakawinan

Nan partamo dikarajoan iolah Berandam, yang mano iko iolah prosesi bahias bagi padusi yang baka manikah. bahias iko sandiri indak di lakukan dek urang lain, tapi baka di karajoan surang dek pangantin padusinyo sabalum malaksanakan panikahan. Kamudian acara salanjuiknyo iolah Serah Terima Tepak yang mano kaluarga laki-laki tibo di rumah padusi jo mahantakan sasarahan yang di baok pihak laki-laki dan katiko acara iko balansuang si pangantin padusi tatap barado di dalam biliak.

Sasudah sarah tarimo sasarahan, dilanjuikkan jo acara Arahan Kapalo Adat yang mano acara iko sabalum akad, beko si pangantin laki-laki baka duduak di mungko kapalo adat di palaminan, kamudian kapalo adat baka ma agiah nasihat kapado kaduo pangantin untuak kadamaian kahidupan rumah tanggo, sadangkan pangantin padusi mandanga dari dalam biliak.

Kamudian sasudah acara iko baru beko dikarajoan akad, "Aku kawinkan mikek (kamu) dengan si Polan (nama perempuan) Dengan mahar sekian (jumlah mahar). Aku terima si Polan dengan mahar sekian (jawab lelaki)". Salasai akad beko urang mamulai acara salanjuiknyo Sembah Menyembah yang mano acara iko kaduo pangantin alah sah sabagai laki bini, kamudian di arahkan untuak maminta restu jo nasihat dari kaduo urang tuo jo panghulu-panghulu adatnyo.

kamudian baru di lanjuikkan jo tigo acara pesta, nan Partamo makan siriah, kaduo Makan Gadang, jo makan hidangan pesta sampai acara salasai dan tamu undangan alah mulai pulang.