Urang Lom

Urang Lom atau Lom bararti alun mangenal Agamo, jadi suku iko bararti suku yang alun mangenal agamo. Suku Lom iko marupokan suku tatuo yang ado di kapulauan Bangka Belitung, tapeknyo di Kampuang Mapur, Kacamatan Riau Silip, Kabupaten Bangka. Kamudian sairiang bajalannyo wakatu suku Lom yang di kenal iko indak mangenal agamo palahan alah mamaluak agamo yang di akui dek Negara.

Suku Lom tasebar di babarapo kampuang yaitu kampuang Air Rabik, Pejem, Tuing, (Riau Silip dan Kacamatan Belinyu, Kabupaten Bangka) atau diantaro Gunuang Muda jo Gunuang Pelawan, yang mano urang suku iko hiduik mulai dari daratan tinggi sampai ka daerah pasisia pantai.

Kampuang Tuing, dahulunyo disabuik Tu Wing, marupokan kampuang yang barado di pasisia Tanjung Tuing yang manghadap Lawik Natuna. Pabatasan Kampuang jo lawik adolah sabuah bukik dengan katinggian sakitar 300-an meter, dinamokan Bukik Tuing. kampuang iko dipicayo sabagai titiak awal kadatangan niniak moyang Suku Lom sakian abad lalu ka Pulau Bangka.

Asa-usua

Urang suku Lom iko dipacayo sabagai suku tatuo yang ado di Kapulauan Bangka, yang mano manuruik sumber urang suku Lom iko barasa dari Karajaan Funan (Vietnam), kamudian ado juo ado yang manyabuik sabagai palarian dari Mojokerto, Jawa Timua, jo palarian dari Kedatuan Sriwijaya katiko tajadi wabah lepra atau kusta di Sumatra.

Salain itu, Suku Lom dipicayo katurunan dari Akek Antak (Kakek Antak), legenda di Pulau Bangka. Urang iko dipahami sabagai manusia sakti yang hiduik pado abad ka-10. Jajak kabaradoanyo ado di sajumlah artefak batu granit, elok barupo talapak kaki, topi, jo lainnyo.

Sijarah iko marupokan asal-usua urang Lom yang di caritokan sacaro turun-tamurun dari urang tuo suku Lom. Kamudian manuruik saurang panaliti dari Norwegia yang pernah tingga salamo babarapo taun di tangah suku Lom, Olaf H Smedal, manulih buku yang manarik, "orang Lom: Preliminary Findings on a Non-Muslim Malay Group in Indonesia (1988)". Manuruik Smedal, tadapek catatan anonim barangko taun 1862 yang mancaritokan duo legenda asal-usua Suku Lom.

Salah satu legenda mancaritokan, sakitar abad ka-14 Masehi, sabuah kapa yang ditumpangi sakalompok urang dari daerah Vietnam tadampar dan rusak di pantai Tanjung Tuing, Kacamatan Belinyu. Sagalo panumpang mati, kacuali duo laki-laki dan surang padusi. Katigo urang asiang iko mambuek pakampuangan surang di daerah Gunuang Pelawan, Belinyu. Legenda lain mangisahkan, suku Lom marupokan katurunan pasangan laki-laki jo padusi yang datang sacaro misterius dari bukik Semindang di Belinyu sasudah banjir gadang suruik.

Katuo Lembaga Adat Provinsi Bangka Belitung Suhaimi Sulaiman mampakirokan, suku Lom marupokan katurunan dari bangsawan Majapahit di Mojokerto, Jawa Timur, yang lari karano indak nyo mamaluak Islam, sakitar abad ka-16 Masehi. Kaum palarian itu manyubarangi lawik untuak mancari panghidupan baru kamudian tadampar di Tanjung Tuing.

Urang iko masuak ka padalaman di daerah Gunuang Muda jo mambuek pakampuangan di tangah hutan yang tasuruak. Karakter sabagai palarian mambbuek suku iko hiduik jo manutuik diri dari dunia lua. Suku iko juo di sabuik banyak urang, karano tampek tingga inyo di Mapur.

Lapeh dari sagalo pakiroan iko, sabagian gadang masyarakaik kapulauan Bangka Belitung yakin, suku Lom iko marupokan suku tatuo di daerah itu dan budayawan mudo yang tingga di Pangkal Pinang Willy Siswanto mamparituangkan suku Lom barasa dari komunitas Vietnam yang mandarat jo manatap di Gunuang Muda, Belinyu sakitar abad ka-5 Masehi. Jadi suku iko alah ado jauah sabalun karajaan Sriwijaya yang bakambang di abad ka-7 Masehi sarato kuli kontrak timah dari Chino datang sakitar abad ka-18 Masehi.

Kabudayaan suku lom

Suku Lom yang sarupo di sabuik di ateh, kahidupannyo indak bisa lapeh dari alam. Mako dari itu kabudayaan urang suku Lom iko iolah tata caro urang suku Lom dalam manjago kaarifan jo kalestarian alam. Urang suku Lom picayo kalau gunuang, Rimbo, batang aia, bumi, langik, jo binatang manyatu jo roh niniak moyang urang iko.

Jadi bagi urang suku Lom, marusak alam adolah palangaran adat yang barek karano kahidupan urang Lom sagalonyo bagantuang dari alam, mulai dari makan sampai mancari kabutuhan hiduik lain. Kalau di rimbo urang suku Lom baka baburu, tapi cuman sakadar untuak mamanuahi kabutuhan hiduik sahari-hari dan indak basifat eksploitasi, jiko di lawik urang suku Lom cuman ma ambiak kabutuhannyo sajo sarupo lawuak jo hasil lawik untuak kapaluan ubek jo pangan.

Salain kabiasoan manjago lingkungan yang kuek, urang Lom juo mampunyoi ritual adat yaitu banamo Nujuh Jerami, yang mano iko iolah budaya atau acara adat yang akan diadokan sasudah musim panen tibo. Kamudian juo ado ritual pamakaman yang uniak dari urang Lom iko yang mano urang suku Lom yang mati katiko di makamkan indak bisa sumbarangan untuak di kubuan, tapi harus mampunyoi katentuan khusus.

Katiko ado urang yang mati dan di kubuan kapalo mayat baka di hadokkan ka arah Timua, kaki ka arah Barat, jo wajahnyo manghadap ka arah Gunuang Maras. Tampek urang dimakamkan juo akan manjadi rimbo adat yang indak buliah diganggu gugat, karano area rimbo iko disakralkan oleh urang Mapur atau suku Lom.

Kapicayoan

Sabagaimano urang Lom iko di sabuik di ateh, maso dahulunyo urang Lom iko dikatokan indak baragamo atau alun mangenal agamo. Hal iko dalam artian bukan barati urang Lom indak punyo agamo di maso lalu, malainkan panyebutan iko barawla dari urang Balando yang manyabuik urang-urang Mapur dengan sabutan Lom atau alun indak kenal agamo tarutamo Islam, sabagaimano umumnyo urang Malayu dalam aggapan urang Balando.

Sabananyo urang Lom pado maso lalu alah ado agamo niniak moyangnyo yang urang tu kenal banamo Mapur Dangkel yang marupokan agamo lokal yang satara jo agamo-agamo lain yang di akui negara. Namun pado maso kini urang Lom alah banyak yang mamaluak agamo yang di akui tarutamo Islam sabagai agamo mayoritasnyo. Tapi banyak juo yang masih mamaluak agamo niniak moyangnyo atau bisa dikatokan inyo baragamo islam tapi masih picayo jo ajaran agamo niniak moyang, dan kini pun agamo Mapur Dangkel alah di akui negara sabagaimano Putusan Mahkamah Konstitusi Republik Indonesia Nomor: 97/PUU-XIV/2016 tanggal 7 November 2017 takaik Administrasi Kependudukan (Undang-undang Administrasi Kependudukan). Putusan Mahkamah Konstitusi iko manjadi angin segar bagi penghayat kapicayoan Terhadap Tuhan Yang Maha Esa, tamasuak urang Mapur, dibuliahkan mancantumkan kapicayoan urang tu di dalam dokumen Kartu Keluarga (KK) dan Kartu Tanda Penduduk (KTP).