Martabak Mesir

Dari Wikipedia baso Minang, ensiklopedia bebas
(Dialiahkan dari Martabak Kubang)
Loncat ke navigasi Loncat ke pencarian
Tukang masak sadang mamasak martabak mesir jo roti canai di gerai Martabak Kubang, wakatu festival kuliner Kampoeng Legenda, Mal Ciputra, Jakarta Barat, Indonesia.

Martabak Mesir atau Martabak Kubang adolah makanannan tabuek dari adonan tapuang nan barisi talua, dagiang babumbu, jo bawang perai nan disajikan basamo kuah cuko dan barasa dari Nagari Kubang, sabuah nagari di Kabupaten Lima Puluh Kota, Sumatera Barat. Masyarakaik di lua Sumatera Barat, labiah acok manyabuiknyo sabagai Martabak Kubang. Adopulo nan manyabuiknyo sabagai Martabak Padang, dek karano masyarakaik non Minangkabau labiah tau jo etnis nan manggalehnyo sabagai Urang Padang.[1]

Martabak Mesir nampak sarupo jo martabak talua, namun babeda dari bahan-bahan nan dipakai maupun panyajiannyo. Makanan ko marupokan papaduan antaro kuliner Timur Tengah - India jo kuliner lokal Minang.[2]

Sijarah[suntiang | suntiang sumber]

Asa usua martabak, tamasuak martabak Mesir, adolah dari Timur Tengah jo India. Martabak barasa dari kato mutabbaq (bahaso Arab: مطبق) nan baarati "talipek", marujuak pado makanan roti pipih nan dilipek-lipek samaso dibuek. Dulu sambia manggaleh, tajadi pulo akulturasi budayo Arab dan India jo masyarakaik satampek, tamasuak dalam hal makanan. Martabak dek bangso Arab jo India disajikan jo baragam macam jinih olahan sarato bumbu.

Istilah "Mesir" pado martabak ko ado dek karano wakatu itu makanan iko partamo kali dibaok dek urang Arab jo India bakulik hitam. Kudian manjadi salah sangko dek masyarakaik satampek dan disabuik sabagai "Urang Mesir". Inggo akhianyo dinamokan Martabak Mesir dek masyarakaik satampek.

Talapeh dari itu, masyarakaik satampek manyukoi martabak tasabuik inggo dipadukan jo raso Minangkabau. Campuran dagiang giliang nan digunokan sabagai isian martabak dicampua jo baragam bumbu inggo manyarupoi dagiang Randang.

Martabak Mesir awalnyo dikenalkan dek saudagar dari Kubang nan banamo H. Yusri Darwis (alm) nan labiah acok dipanggia Hayuda pado tahun 1971 di Jalan M Yamin, Padang. Wakatu itu gerai partamonyo dibuko jo namo "Martabak Mesir Kubang" nan identik jo logo foto sang pandirinyo, namun pado wakatu mandaftaran hak paten kato "Mesir" indak buliah dipakai karano marupokan namo nagara. Sainggo namonyo baganti manjadi Martabak Kubang Hayuda. Sajak masuak ka Jakarta 1988, gerai ko alah punyo 4 cabang: Tebet, Kali Malang, Margonda (Depok) jo Kedung Halang (Bogor)[3].

Inggo kini martabak mesir indak hanyo tanamo di Sumatera Barat jo Jakarta sajo, tapi alah dibaok ka babagai daerah dek para perantau dari Kubang nan mambuko usaho Martabak Mesir di daerahnyo marantau.

Pabedaan jo Martabak Talua[suntiang | suntiang sumber]

Sapinteh martabak mesir jo martabak talua nampak samo, baitupun asa muasa nan juo samo yaitu dari makanan Arab jo India. Namun, pabedaan tampek  dimano partamo kali diperkenalkan mambueknyo bakambang manjadi saketek babeda. Martabak nan diperkenalkan di Sumatera Barat bakambang manjadi Martabak Mesir[4], sadangkan martabak nan diperkenalkan di Jawa Tengah bakambang manjadi Martabak Talua[5].

Pabedaan lainnyo yaitu dari bahan nan dipakai. Untuak isiannyo, kaduonyo mamakai bawang perai, talua, jo dagiang giliang. Taluanyo bisa dipiliah antaro talua ayam jo talua itiak, sadangkan dagiangnyo bisa pakai dagiang giliang ayam atau jawi. Untuak bumbu dagiang martabak talua umumnyo labiah sadarano, yakni bawang bombay, bawang putiah, jo garam-merica sacukuiknyo. Sadangkan bumbu dagiang martabak mesir adolah bawang merah, bawang putiah, pala, langkueh, sipadeh, jintan, bungo lawang, daun atau bubuak kari, daun salam, dan bahkan santan, manyarupoi Randang.

Salah satu kaunikan lain nan mambedakan kaduonyo iolah bahan minyaknyo. Martabak talua umumnyo mamakai minyak karambia untuak manggoreang martabak, sadangkan martabak mesir mamakai margarin atau minyak samin.

Kaduo jinih martabak iko samo-samo disajikan jo kuah cuko nan taraso padeh-asam, namun tetap mamiliki pabedaan. Kuah cuko martabak talua dibuek dari gulo merah, aia asam atau cuko, aia, jo garam sacukuiknyo sarato diagiah tambahan potongan wortel, bawang merah, antimun, jo lado kutu. Namun, campuran kuah cuko untuak martabak mesir labiah sadarano, yakni potongan bawang bombay, lado kutu, jo tomat. 

Martabak talua biasonyo dikudok jo maambiak sapotong bagian martabak lalu dibanamkan dalam kuah cuko. Namun, kok dikudok di rumah makan khas Minang atau Sumatera, kuah cuko biasonyo langsuang dituangan ka ateh sapiriang martabak mesir nan alah dipotong-potong.

Rujuakan[suntiang | suntiang sumber]