Bareh randang

Bareh randang adolah makanan nan barasa dari darek Minangkabau utamonyo dari Limopuluah Koto jo Payokumbuah. Makanan ko tabuek dari tapuang bareh nan dimasak jo caro diangai alah tu dicampua jo gulo, jo santan nan alah bamasak.

Bareh randang

Sacaro kasaluruhan, kudapan ko diolah jo tapuang bareh nan diangai sampai kariang, tu dicampua jo aia gulo samo jo santan nan alah dimasak tadi. Sampai mambantuak gumpalan bawarna putiah jo bantuaknyo nan lunak tapi mampunyoi sakileh nampak kasa jo raso nan manih. Gumpalan tu dilatakkan pado cetakan nan data, dibantuak manjadi bulek atau sagi ampek pipiah jo taba kiro-kiro sasenti. Sasudah itu bareh randang disajikan jo caro di potong malintang dan memanjang.

Bareh randang biasonyo disajian dalam prosesi adaik manjapuik marapulai untuak dibaok karumah anak daro. Bareh randang disajian untuak niniak mamak atau nan dituokan dalam kaum bakumpua dalam patamuan adaik.