Tuanku Imam Bonjol

Wikipedia Minangkabau - Lubuak aka tapian ilimu
Infobox orangTuanku Imam Bonjol
Biografi
Lahia1772 Edit nilai pada Wikidata
Sumatera Barat Edit nilai pada Wikidata
Kamatian6 Nopember 1864 Edit nilai pada Wikidata (91/92 tahun (id) terjemahkan)
Kota Manado Edit nilai pada Wikidata
Kalompok etnisUrang Minangkabau Edit nilai pada Wikidata
AgamoSunni Edit nilai pada Wikidata
Kagiatan
KarajoPejuang (id) Terjemahkan jo pejuang perlawanan (id) Terjemahkan Edit nilai pada Wikidata
Panghargaan

Tuanku Imam Bonjol (laia di Bonjol, Pasaman, Minangkabau, Hindia Balando 1772 - wafaik dalam pangasingan lalu dikubua-an di Lotak, Pineleng, Minahasa, 6 November 1864) adolah surang ulama, pamimpin Kaum Pidari sarato pajuang nan baparang malawan Balando dalam paparangan nan disabuik Parang Pidari pado taun 1803-1838.[1] Tuanku Imam Bonjol diangkek sabagai Pahlawan Nasional Indonesia badasakan SK Presiden RI Nomor 087/TK/ Taun 1973, tanggal 6 November 1973.[2]

Namo jo gala[suntiang | suntiang sumber]

Namo asli dari Tuanku Imam Bonjol adolah Muhammad Shahab, nan laia di Bonjol pado taun 1772.[3] Baliau marupoan putra dari pasangan Bayanuddin (ayah) jo Hamatun (ibu).[3] Ayahnyo, Khatib Bayanuddin, marupoan surang alim ulama nan barasa dari Sungai Rimbang, Suliki, Limo Puluah Koto.[3][4] Amaknyo Hamatun jo mamaknyo Syekh Usman adolah parantau bangso Arab nan datang ka Alai Ganggo Mudik, nan ditarimo masuak ka dalam adaik Minangkabau di nagari ko.[5] dan terakhir Tuanku Imam.[3] Sabagai ulama sarato pamimpin masyarakaik satampek, Muhammad Shahab mandapek-an babarapo gala, iyolah Peto Syarif, Malin Basa, Datuak Bagindo Suman,[5] sarato Tuanku Imam.[3] Tuanku nan Renceh dari Kamang, Agam sabagai salah surang pamimpin dari Harimau nan Salapan adolah nan manunjuak baliau sabagai Imam (pamimpin) untuak kaum Pidari di Bonjol.[3] Baliau akhianyo labiah dikana jo sabutan Tuanku Imam Bonjol.[3]

Riwayaik pajuangan[suntiang | suntiang sumber]

Indak dapek dipungkiri, Parang Pidari maningga-an kanangan heroik sakaligus traumatis dalam memori bangso. Salamo sakitar 18 taun partamo parang tu (1803-1821) praktis nan baparang adolah sasamo urang Minang sarato Mandailing atau Batak umumnyo.

Pado awalnyo timbuanyo paparangan ko didasari kainginan dikalangan pamimpin ulama di karajaan Pagaruyuang untuak manarapan sarato manjalanan syariat Islam sasuai jo Ahlus Sunnah wal Jamaah (Sunni) nan bapagang taguah pado Al-Qur'an jo sunnah-sunnah Rasullullah shalallahu 'alaihi wasallam. Kudian pamimpin ulama nan tagabuang dalam Harimau nan Salapan mamintak Tuanku Lintau untuak maajak Yang Dipertuan Pagaruyuang sarato Kaum Adaik untuak maninggaan babarapo kabiasaan nan indak sasuai jo Islam (Bid'ah).

Dalam babarapo parundiangan indak ado kato sapakaik antaro Kaum Pidari (namo untuak kaum ulama) jo Kaum Adaik. Sairiang jo itu dibabarapo nagari dalam Kerajaan Pagaruyuang bagajolak, lalu sampai akhianyo Kaum Pidari di bawah pimpinan Tuanku Pasaman manyarang Pagaruyuang pado taun 1815, lalu pacah patampuran di Koto Tangah dakek Batusangka. Sultan Arifin Muningsyah tapaso malarian diri dari ibukota karajaan ka Lubuak Jambi.

Pado 21 Februari 1821, kaum Adaik sacaro rasmi bakarajo samo jo pamarentah Hindia-Balando baparang malawan kaum Pidari dalam pajanjian nan ditandotangani di Padang, sabagai kompensasi Balando mandapek hak akses sarato panguasaan ateh wilayah darek (padalaman Minangkabau).[6] Pajanjian tu dihadiri pulo dek siso kaluarga dinasti karajaan Pagaruyuang di bawah pimpinan Sultan Tangkal Alam Bagagar nan alah barado di Padang wakatu itu.

Campua tangan Balando dalam parang tu ditandoi jo panyarangan Simawang jo Sulik Aia dek pasukan Kapten Goffinet jo Kapten Dienema awal April 1821 ateh parentah Residen James du Puy di Padang, Dalam hal iko Kompeni malibat-an diri dalam parang karano "diundang" dek kaum Adaik.

Palawanan nan dilakuan dek pasukan pidari cukuik tangguh sahingga sangek manyulik-an Balando untuak manunduak-annyo. Oleh sabab itu Balando malalui Gubernur Jendral Johannes van den Bosch maajak pamimpin Kaum Pidari nan wakatu tu alah dipimpin dek Tuanku Imam Bonjol untuak badamai malalui maklumat Pajanjian Masang pado taun 1824. Hal iko dimaklumi karano diwakatu nan basamoan Batavia kahabisan dana pulo dalam maadok-i paparangan lain di Eropah jo di Jawa sarupo Parang Diponegoro. Tatapi kudian pajanjian ko dilangga surang dek Balando jo caro manyarang nagari Pandai Sikek.

Namun, sajak awal 1833 parang barubah manjadi parang antaro kaum Adaik jo kaum Pidari malawan Balando, kadua pihak bahu-mambahu malawan Balando, Pihak-pihak nan samulo batantangan akhianyo basatu malawan Balando. Diujuang panyasalan muncul kasadaran, maundang Balando dalam konflik justru manyangsaroan masyarakaik Minangkabau itu sandiri.[7] Basatunyo kaum Adaik jo kaum Pidari ko dimulai jo dibueknyo kompromi nan disabuik Plakaik Puncak Pato di Tabek Patah nan maujuik-an konsensus Adat basandi Syarak, Syarak basandi Kitabullah (Adat badasarkan Agama, Agama badasarkan Kitabullah (Al-Qur'an)). Panyarangan sarato pangapuangan benteang kaum Pidari di Bonjo dek Balando dari sagalo jurusan salamo sakitar anam bulan (16 Maret-17 Agustus 1837)[8] nan dipimpin dek jenderal sarato para parwira Balando, tapi jo tantara nan sabagian gadang adolah bangso pribumi nan tadiri dari babagai suku, sarupo Jawa, Madura, Bugis, jo Ambon. Dalam daftar namo para parwira pasukan Balando, tadapek Mayor Jendral Cochius, Letnan Kolonel Bauer, Mayor Sous, Kapten MacLean, Letnan Satu Van der Tak, Pembantu Letnan Satu Steinmetz sarato nan lainnyo, tatapi ado pulo namo-namo Inlandsche (pribumi) sarupo Kapitein Noto Prawiro, Inlandsche Luitenant Prawiro di Logo, Karto Wongso Wiro Redjo, Prawiro Sentiko, Prawiro Brotto, sarato Merto Poero.

Tadapek 148 parwira Eropa, 36 parwira pribumi, 1.103 tantara Eropa, 4.130 tantara pribumi, Sumenapsche hulptroepen hieronder begrepen (pasukan pambantu Sumenep, Madura). Sarangan kapado benteang Bonjol dimulai urang-urang Bugih nan barado di bagian muko dalam panyarangan patahanan Pidari.

Dari Batavia didatangan taruih tambahan kakuatan tantara Balando, dimano pado tanggal 20 Juli 1837 tibo jo Kapa Perle di Padang, Kapitein Sinninghe, sajumlah urang Eropa jo Afrika, 1 sergeant, 4 korporaals sarato 112 flankeurs. Nan balakangan ko manunjuak kapado sardadu Afrika nan direkrut dek Balando di banua tu, kini nagaro Ghana jo Mali. Mareka disabuik pulo Sepoys sarato badinas dalam tantara Balando.

Panangkok-an jo pangasingan[suntiang | suntiang sumber]

Makam Tuanku Imam Bonjol di Minahasa

Sasudah datang bantuan dari Batavia, mako Balando mulai malanjuik-an baliak pangapungan, katiko pado maso-maso salanjuiknyo, kadudukan Tuanku Imam Bonjol batambah sulik, namun baliau masih indak sudi untuak manyarah kapado Balando. Sahinggo sampai untuak katigo kali Balando mangganti komandan parangnyo untuak marabuik Bonjo, iyolah sabuah nagari ketek nan ba benteang dari tanah liek nan di sakitarnyo dikalilingi dek parik-parik. Barulah pado tanggal 16 Agustus 1837, Benteang Bonjo dapek dikuasoi sasudah sakian lamo dikapuang.

Dalam bulan Oktober 1837, Tuanku Imam Bonjol diundang ka Palupuah untuak barundiang. Tibo di tampek tu langsuang ditangkok lalu dibuang ka Cianjur, Jawa Barat. Kudian dipindahan ka Ambon lalu akhianyo ka Lotak, Minahasa, dakek Manado. Di tampek tarakhia tu baliau maningga dunia pado tanggal 8 November 1864. Tuanku Imam Bonjol dikubua-an di tampek pangasiangannyo tu.

Pangharagoan[suntiang | suntiang sumber]

Pajuangan nan alah dilakuan dek Tuanku Imam Bonjol dapek manjadi inspirasi akan kapahlawanannyo dalam manantang panjajahan,[9] sabagai pangharagoan dari pamarentah Indonesia nan mawakili rakyaik Indonesia pado umumnyo, Tuanku Imam Bonjol diangkek sabagai Pahlawan Nasional Indonesia sajak tanggal 6 November 1973.

Salain tu namo Tuanku Imam Bonjol hadir pulo di ruang publik bangso sabagai namo jalan, namo stadion, namo universitas, bahkan pado lembaran Rp 5.000 kaluaran Bank Indonesia 6 November 2001.[10]

Rujuak-an[suntiang | suntiang sumber]

  1. Radjab, M., (1964). Perang Paderi di Sumatera Barat, 1803-1838. Balai Pustaka. 
  2. Direktorat Urusan Kepahlawanan dan Perintis Kemerdekaan, (1991), Wajah dan sejarah perjuangan pahlawan nasional, Vol. 3, Departemen Sosial R.I., Direktorat Urusan Kepahlawanan dan Perintis Kemerdekaan.
  3. a b c d e f g Muttaqin, Fajriudin, dkk. (2015-08-04) (dalam bahaso id). SEJARAH PERGERAKAN NASIONAL. Humaniora. ISBN 978-979-778-269-6. https://books.google.com/books?id=RFAyDwAAQBAJ&newbks=0&printsec=frontcover&pg=PA66&dq=Khatib+Bayanuddin&hl=id. 
  4. Muhammad Syamsu As, Ulama pembawa Islam di Indonesia dan sekitarnya, Lentera, 1996
  5. a b Djaja, Tamar (1965) (dalam bahaso id). Pustaka Indonesia: riwajat hidup orang-orang besar tanah air. Bulan Bintang. pp. 340. https://books.google.com/books?id=ZQ8-AAAAMAAJ&newbks=0&printsec=frontcover&dq=Datuk+Bagindo+Suman+kadli&q=Datuk+Bagindo+Suman+kadli&hl=id. 
  6. G. Kepper, (1900), Wapenfeiten van het Nederlands Indische Leger; 1816-1900, M.M. Cuvee, Den Haag.
  7. Sjafnir Aboe Nain (2004). Memorie Tuanku Imam Bonjol (MTIB), transl., Padang: PPIM.
  8. G. Teitler, 2004, Het einde Padri Oorlog: Het beleg en de vermeestering van Bondjol 1834-1837: Een bronnenpublicatie, Amsterdam: De Bataafsche Leeuw, 59-183.
  9. Kompas 10/11/2007 Oleh Suryadi, Dosen dan Peneliti pada Opleiding Talen en Culturen van Zuidoost-Azië en Oceanië, Universiteit Leiden, Belanda
  10. http://www.tokohindonesia.com Imam Bonjol, Tuanku (diakses pada 23 Juli 2010)

Pautan Lua[suntiang | suntiang sumber]