Lompat ke isi

Mohammad Natsir

Wikipedia Minangkabau - Lubuak aka tapian ilimu
Infobox orangMohammad Natsir
Namo dalam bahaso usali(id) Mohammad Natsir Edit nilai pada Wikidata
Biografi
Lahia17 Juli 1908 Edit nilai pada Wikidata
Alahan Panjang Edit nilai pada Wikidata
Kamatian6 Pebruari 1993 Edit nilai pada Wikidata (84 tahun (id) terjemahkan)
Rumah Sakik Dr. Cipto Mangunkusumo Edit nilai pada Wikidata
  Menteri Pertahanan (id) Terjemahkan 

17 Desember 1950 – 27 April 1951
Bagian dari kabinet (id) Terjemahkan: Kabinet Natsir (id) Terjemahkan

  Daftar Pardana Mantari Indonesia 

5 September 1950, 6 September 1950 – 26 April 1951, 27 April 1951
Bagian dari kabinet (id) Terjemahkan: Kabinet Natsir (id) Terjemahkan

  Menteri Penerangan Indonesia (id) Terjemahkan 

29 Januari 1948 – 4 Agustus 1949
  Menteri Penerangan Indonesia (id) Terjemahkan 

12 Maret 1946 – 26 Juni 1947 Edit nilai pada Wikidata
Data pribadi
Kalompok etnisUrang Minangkabau Edit nilai pada Wikidata
AgamoIslam Edit nilai pada Wikidata
Kagiatan
KarajoPolitikus, guru jo Ulama Edit nilai pada Wikidata
Partai politikPartai Masyumi (1945) Edit nilai pada Wikidata
Creative work
Kaluarga
Pasangan hiduikNur Nahar (id) Terjemahkan (1934–) Edit nilai pada Wikidata
AnakSitti Muchlisah (id) Terjemahkan
Aisjahtul Asrijah Natsir (id) Terjemahkan Edit nilai pada Wikidata
AbakMohammad Idris Sutan Saripado (id) Terjemahkan Edit nilai pada Wikidata, Chadijah (id) Terjemahkan Edit nilai pada Wikidata
Sanak saibu/sabapakRabi'ah (id) Terjemahkan, Yukinan (id) Terjemahkan jo Johanizoen (id) Terjemahkan Edit nilai pada Wikidata

Mohammad Natsir (lahia di Alahan Panjang, Solok, Sumatera Barat, 17 Juli 1908 – maningga di Jakarta, 6 Februari 1993 pado umua 84 taun) adolah surang pajuang kamardekaan Indonesia, tokoh Islam, sarato politisi tanamo Indonesia. Natsir marupoan pardana mantari Indonesia nan kalimo. Inyo panah pulo dipicayoi manjadi Presiden Liga Muslim sa-Dunia.

Natsir mulai mampalajari ajaran Islam nan mandalam sasudah pindah dari tampek kalahiarannyo di Solok, Sumatera Barat ka Banduang untuak basikola di sinan. Tulisan-tulisannyo mulai ditabik-an sajak 1929, dan pado maso 1930-an, inyo manulih babarapo makalah nan batema Islami. Inyo masuak dunia politik pado patangahan 1930-an, paranannyo taruih batambah maningkek diantaro partai-partai Islam. Pado 5 September 1950, inyo tapiliah manjadi pardana mantari, jabatan tu dipaciknyo sampai 26 April 1951. Salapeh indak manjabaik lai, inyo acok mausaoan paningkatan pangaruah Islam jo fungsi otonomi daerah di Indonesia.

Natsir adolah pamimpin partai Masyumi nan tanamo. Di bawah kapamimpinannyo, Masyumi dapek maimpun sabagian gadang partai nan baaluan Islam di bawah ciek payuang, sainggo dapek maraiah suaro nan banyak dalam Pemilu 1955.

Natsir banyak manulih tantang Islam, mancapai total 45 buku jo baratuih-ratuih artikel. Inyo mamandang Islam adolah bagian hakiki dari budayo Indonesia dan maraso kacewa taadok caro pamarentahan Soekarno jo Soeharto manangani agamo. Inyo mandapek tigo gala doktorat samaso iduiknyo, ciek dari Lebanon dan duo lai dari Malaysia.

Natsir nan mandukuang garakan PRRI lalu dipanjaro sajak taun 1962 dek pamarentahan Soekarno karano dituduah nak mambarontak. Inyo dilapehan taun 1966 sasudah Orde Baru bakuaso, tapi inyo taruih sajo balaku kritis taadok pamarentah, nan akianyo mambueknyo dilarang pai ka lua nagari.

Pado 10 November 2008, di bawah pamarentahan Soesilo Bambang Yudhoyono, Natsir diangkek manjadi salah surang Pahlawan Nasional Indonesia, sasudah bapuluah-puluah taun salamo Orde Lamo jo Orde Baru inyo disabuik sabagai pambarontak.

Kaidupan

[suntiang | suntiang sumber]
Rumah kalahiran Mohammad Natsir

Mohammad Natsir dilahiaan di Alahan Panjang, Lambah Gumanti, Kabupaten Solok, Sumatera Barat pado 17 Juli 1908 dari pasangan Mohammad Idris Sutan Saripado jo Khadijah.[1][2][3] Pado maso keteknyo, Natsir sakaluarga iduik di rumah Sutan Rajo Ameh, saurang sudaga kopi nan tanamo di sinan. Dek pamiliaknyo, rumah itu dibalah manjadi kaduo bagian: pamiliak rumah basarato kaluarga tingga di bagian kida, sadangkan Mohammad Idris Sutan Saripado tingga di sabalah suoknyo.[4] Inyo punyo tigo urang sudaro kanduang, nan banamo Yukinan, Rubiah, jo Yohanusun. Jabatan tarakhia ayahnyo adolah sabagai pagawai pamarentahan di Alahan Panjang, sadangkan atuaknyo marupoan saurang ulama. Inyo isuak manjadi pamangku adaik untuak kaumnyo nan barasa dari Maninjau, Tanjung Raya, Agam jo gala Datuk Sinaro Nan Panjang.[5]

Natsir mulai manampuah pandidikan di Sikolah Rakyat Maninjau salamo duo taun inggo kelas duo, kudian pindah ka Hollandsch-Inlandsche School (HIS) Adabiyah di Padang.[6][4] Sasudah babarapo bulan, inyo pindah baliak ka Solok dan dititipan di rumah panggaleh nan banamo Haji Musa.[7] Salain baraja di HIS di Solok pado siang ari, inyo juo baraja ilimu agamo Islam di Madrasah Diniyah pado malam ari.[8][2][3] Tigo taun kudian, inyo baliak pindah ka HIS di Padang basamo kakaknyo. Pado taun 1923, inyo malanjuikan pandidikannyo di Meer Uitgebreid Lager Onderwijs (MULO) lalu ikuik bagabuang jo parhimpunan-parhimpunan urang mudo takah Pandu Nationale Islamietische Pavinderij jo Jong Islamieten Bond.[9][3][10] Sasudah lulus dari MULO, inyo pindah ka Bandung untuak baraja di Algemeene Middelbare School (AMS) inggo tamaik pado taun 1930.[3][10] Dari taun 1928 sampai 1932, inyo manjadi Katua Jong Islamieten Bond (JIB) Bandung.[11] Inyo juo manjadi pangaja sasudah mandapek palatihan guru salamo duo taun di parguruan tinggi. Inyo nan alah mandapekan pandidikan Islam di Sumatra Barat sabalunnyo juo mampadalam ilimu agamonyo di Bandung, tamasuak dalam bidang tafsir Al-Quran, hukum Islam, jo dialektika.[12] Kudian pado taun 1932, Natsir baguru pado Ahmad Hassan, nan kudian manjadi tokoh organisasi Islam Persatuan Islam.[13][14]

Pado 20 Oktober 1934, Natsir manikah jo Nurnahar di Bandung.[15][16] Dari parnikahan itu, Natsir dikaruniai anam anak.[17][18] Natsir juo dikatahui manguasoi babagai bahaso, takah bahaso Inggirih, bahaso Balando, bahaso Prancis, bahaso Jerman, bahaso Arab, jo bahaso Esperanto.[18] Natsir juo punyo kasamoan hobi sarato punyo ubuangan dakek jo Douwes Dekker, yakni bamain musik. Natsir suko mamainan biola jo Dekker suko bamain gitar. Mohammad Natsir juo acok mangecek pakai bahaso Balando jo Dekker dan acok mangecekan musik sakelas Ludwig van Beethoven jo novel sakelas Boris Leonidovich Pasternak, novelis kanamoan Rusia pado maso itu. Ubuangan dakek jo Dekker, manyababkan Dekker amuah masuak Masyumi. Ide-ide Natsir sarato Dekker tantang parjuangan, demokrasi, jo kaadilan memang sajalan jo Natsir.[19]

Inyo maningga pado 6 Februari 1993 di Jakarta, dan dimakamkan saari kudian.[16]

Karier

[suntiang | suntiang sumber]
Menteri-menteri dari Kabinet Natsir jo Presiden Soekarno sarato Wakia Presiden Mohammad Hatta

Natsir banyak bakawan jo cadiak condokio Islam, cando Agus Salim; salamo patangahan 1930-an, inyo jo Salim taruih batuka pikiran tantang ubungan Islam jo nagara untuak maso ka muko pamarintehan Indonesia nan dipimpin Soekarno.[20][21][22] Pado taun 1938, inyo bagabuang jo Partai Islam Indonesia, sarato diangkek sabagai pimpinan untuak cabang Bandung dari taun 1940 sampai 1942.[22][11] Inyo juo bakarajo sabagai Kapalo Biro Pendidikan Bandung sampai taun 1945. Salamo pandudukan Japang, inyo bagabuang jo Majelis Islam A'la Indonesia (lalu barubah manjadi Majelis Syuro Muslimin Indonesia atau Masyumi), jo diangkek sabagai salah satu katua dari taun 1945 sampai katiko Masyumi jo Partai Sosialis Indonesia dibubarkan dek Presiden Soekarno pado taun 1960.[11][22][23]

Sasudah Proklamasi Kamardekaan Indonesia, inyo manjadi anggota Komite Nasional Indonesia Pusat. Sabalun manjadi Perdana Menteri, inyo manjabaik sabagai mantari panarangan.[24] Pado tanggal 3 April 1950, inyo maajuan Mosi Integral Natsir dalam sidang pleno parlemen.[25] Mohammad Hatta sabagai Wakil Presiden Indonesia nan mandorong sado pihak untuak bajuang sacaro taratik, maraso tabantu dek adonyo mosi iko.[26] Mosi iko mampelokan baliak kautuahan banso Indonesia dalam Nagara Kasatuan Republik Indonesia nan sabalunnyo babantuak sarikaik, sainggo inyo diangkek manjadi Pardana Mantari dek Presiden Soekarno pado 17 Agustus 1950.[27] Namun, inyo undua diri dari jabatannyo pado tanggal 26 April 1951 dek basalisiah paham jo Soekarno. Soekarno nan maanuik paham nasionalisme mangkritik Islam sabagai ideologi tapi mamuji sekularisasi nan dilakuan dek Mustafa Kemal Ataturk di Kasultanan Utsmaniyah, sadangkan Natsir manyayangan ancuanyo Kasultanan Utsmaniyah jo manunjuakan akibaik-akibaik negatif sekularisasi.[28] Natsir juo mangkritik Soekarno baso inyo kurang mamparatian kasejahteraan di lua Pulau Jawa.[24] Manuruik Hatta, sabalun paunduran diri Natsir, Soekarno salaku presiden sakaligus katua Partai Nasionalis Indonesia (PNI) taruih mandasak Manai Sophiaan sarato mantari-mantarinyo jo anggota parlemen dari PNI untuak manjatuahan Kabinet Natsir, dan indak mandukuang kabijakan-kabijakan nan diusuakan dek Natsir jo Hatta.

Mohammad Natsir (1950)

Salamo era demokrasi tapimpin di Indonesia, inyo turuik sarato dalam patantangan jo pamarentah nan samakin otoriter jo bagabuang basamo Pamarintah Revolusioner Republik Indonesia sasudah maninggaan Pulau Jao;[24] PRRI nan manuntuik adonya otonomi nan labiah lueh disalahtafsiran dek Soekarno sabagai pambarontakan. Akibaiknyo, inyo ditangkok jo dipanjaroan di Malang dari taun 1962 sampai 1964, dan dibebasan pado maso Orde Baru pado tanggal 26 Juli 1966.[29][24]

Sasudah dibebaskan dari panjaro, Natsir baliak talibaik dalam organisasi-organisasi Islam, takah Majelis Ta'sisi Rabitah Alam Islami jo Majelis Ala al-Alami lil Masjid nan bapusek di Mekkah, Pusat Studi Islam Oxford (Oxford Centre for Islamic Studies) di Inggris, jo Liga Muslim sa-Dunia (World Muslim Congress) di Karachi, Pakistan.[30]

Di era Orde Baru, inyo mambantuak Yayasan Dewan Dakwah Islamiyah Indonesia. Inyo juo mangkritisi kabijakan pamarentah, sarupo katiko inyo manandotangani Petisi 50 pado 5 Mei 1980, nan manyababan inyo dilarang pai ka lua nagari. Pado maso-maso bamulo Orde Baru iko, inyo bajaso mangirim nota ka Tunku Abdul Rahman dalam rangka mancaiaan hubungan jo Malaysia. Salain itu pulo, inyolah nan mangontak pamarentah Kuwait supayo mananam modal ka Indonesia dan mayakinan pamarentah Japan tantang kasungguahan Orde Baru mambangun ekonomi.[5] Soeharto manyabuik urang nan mangkritik dirinyo sabagai panantang Pancasila. Inyo ikuik manandotangani Petisi tasabuik basamo jo Jenderal Hoegeng, Letjen Ali Sadikin, Sanusi Hardjadinata, SK Trimurti, jo nan lain-lain.[5] Akibaik dilarangnyo inyo pai ka lua nagari, banyak seminar nan indak bisa inyo ikuti.[24] Natsir manolak kacurigaan Soeharto tarhadap partai-partai, tarutamo partai Islam. Apolai Opsus (Operasi Khusus) nan barado di bawah pimpinan lansuang Soeharto juo ikuik dikritisi.[31] Apo lai, badan intel ikolah nan mamintak Natsir dalam mamulai ubuangan jo Malaysia dan Timur Tangah sasudah naiaknyo Soeharto.[32]

Panulih

[suntiang | suntiang sumber]

Salamo manjalani pandidikannyo di AMS, Natsir alah sato pulo dalam dunia jurnalistik. Pado 1929, duo artikel nan ditulihnyo dimuek dalam majalah Algemeen Indische Dagblad, yaitu bajudul ''Qur'an en Evangelie'' (Al-Quran dan Injil)[33] dan ''Muhammad als Profeet'' (Muhammad sabagai Nabi). Kudian, inyo basamo tokoh Islam lainnyo managakan surek kaba ''Pembela Islam'' nan tabik dari taun 1929 sampai 1935.[34] Inyo juo banyak manulih tantang pandangannyo tarhadap agamo di babagai majalah Islam sarupo Pandji Islam, Pedoman Masyarakat, jo Al-Manar. Manuruiknyo, Islam marupoan bagian nan indak tapisahan dari budaya Indonesia.

Natsir alah manulih sakitar 45 buku atau monograf jo ratusan artikel nan mamuek pandangannyo tantang Islam. Inyo aktif manulih di majalah-majalah Islam sajak karya tulih patamonyo ditabikan pado taun 1929. Karya paling awalnyo umumnyo babaso Balando jo Indonesia, nan banyak mambahas tantang pamikiran Islam, budaya, ubuangan antaro Islam jo politik, jo padusi dalam Islam.[35][36] Karya-karya salanjuiknyo banyak nan ditulih dalam baso Inggirih, dan labiah tafokus pado politik, kaba tantang Islam, jo ubuangan antaro umaik Kristiani jo Muslim.[37][lower-alpha 1] Ajip Rosidi jo Haji Abdul Malik Karim Amrullah manyabuikan basonyo tulisan-tulisan Natsir alah manjadi catatan sijarah nan dapek manjadi panduan untuak umaik Islam.[35] Salain manulih, Natsir juo managakan sikolah Pendidikan Islam pado taun 1930; sikolah tu ditutuik sasudah panduduakan Japang di Indonesia.[30][39]

Sakalipun Natsir mamiliki latar balakang pandidikan Balando, Natsir indak tagarik samo sakali untuak malakuan westernisasi atau sekularisasi dalam dunia pandidikan Islam. Inyo juo paduli akan pangaruah pandidikan Barat taadok generasi mudo.[38] Sabananyo, langkahnyo iko nan paduli jo dunia pandidikan disababan sasudah inyo mambaco karangan Snouck Hurgronje nan malawan Islam, takah Netherland en de Islam nan mamaparan strategi Hurgronje dalam malawan Islam. Buku iko pado akianyo kudian mambuek Natsir gigiah malawan Balando liwaik jalua pandidikan.[40]

Panghormatan

[suntiang | suntiang sumber]
Natsir dalam parangko Indonesia taun 2011

Pamarentah Indonesia sangkek itu, baiak nan dipimpin dek Soekarno baitupun Soeharto, samo-samo manudiang Mohammad Natsir sabagai pambarontak jo pambangkang, bahkan tudingan tasabuik mambueknyo dipanjaroan. Adapun dek nagara-nagara lain, Natsir sangaik dihormati jo diaragoi, inggo banyak panghargaan nan dilewakan kapadonyo.

Dunia Islam maakui Mohammad Natsir sabagai pahlawan nan malinteh bateh banso jo nagara. Bruce Lawrence manyabuikan baso Natsir marupoan politikus nan paliang nampak mandukuang pambaruan Islam.[41] Pado taun 1957, inyo manarimo bintang Nichan Istikhar (Grand Gordon) dari Rajo Tunisia, Lamine Bey dek jasonyo mambantu parjuangan kamardekaan rakyaik Afrika Utara. Panghargaan internasional lainnyo yaitu Jaa-izatul Malik Faisal al-Alamiyah pado taun 1980, jo panghargaan dari babarapo ulama jo condokio tanamo saroman Syekh Abul Hasan Ali an-Nadwi jo Abul A'la Maududi.

Pado taun 1980, Natsir dianugerahi panghargaan Faisal Award dari Rajo Fahd Arab Saudi malalui Yayasan Rajo Faisal di Riyadh, Arab Saudi. Inyo juo maraiah gala doktor kahormatan di bidang politik Islam dari Universitas Islam Libanon pado taun 1967. Pado taun 1991, inyo mamparoleh duo gala kahormatan, yaitu dalam bidang sastra dari Universitas Kabangsaan Malaysia jo dalam bidang pamikiran Islam dari Universitas Sains Malaysia.[16] Pamarentah Indonesia baru mahoromatinyo sasudah 15 taun kamatiannyo. Pado 10 November 2008, Natsir dinyatoan sabagai pahlawan nasional Indonesia.[42] Soeharto anggan maagiah gala pahlawan kapado salah satu "bapak banso" iko.[24] Pado maso B.J. Habibie, inyo diagiah panghargaan Bintang Republik Indonesia Adipradana.[5]

Reporter Ramadhian Fadillah malaporan bahasonyo Natsir adolah tokoh sederhana sapanjang zaman. Inyo juo malaporkan bahasonyo Natsir "indak punyo baju rancak, jasnyo batamba. Inyo dikanang sabagai mantari nan indak punyo rumah jo manulak diagiah hadiah oto polah."[24][lower-alpha 2] George McTurnan Kahin, pangaja di Universitas Cornell, mandapek info dari Agus Salim bahasonyo ado staf dari Kamantarian Panarangan nan handak mangumpuaan pitih untuak Natsir supayo bapakaian labiah rancak. Apolai, kemejanyo anyo duo setel dan alah lapuak pulo. Sangkek inyo mundua sabagai Pardana Mantari pado Maret 1951, sekretarisnyo Maria Ulfa manyarahan padonyo siso dana taktis jo banyak saldo nan sabananyo juo hak Pardana Mantari. Natsir manulak, dan dana itu dilimpahan ka koperasi karyawan jo indak sakepeang pun inyo ambiak.[43] Natsir dikatoan manulak oto Chevrolet Impala. Padohal, di rumahnyo inyo anyo punyo oto lamo, De Soto nan inyo bali surang untuak maanta-japuik anak-anaknyo.[5] Sabalun inyo pindah ka Jalan Jawa, inyo bapindah ka Jalan Pegangsaan Timur nan ado di Jakarta. Mako, dek turuik sato dalam PRRI, inyo kalua masuak panjaro salamo taun 1960-66, dan kaluarganyo kailangan rumah di Jalan Jawa jo oto De Soto tu. Aratonyo diambiak pamarintah.[43]

Wafaik

[suntiang | suntiang sumber]

Natsir maningga pado tanggal 14 Maret 1993 di Jakarta.[16]

Katarangan

[suntiang | suntiang sumber]
  1. ↑ Manyoal ubuangan antaro umaik Krisitiani jo Muslim, pado tahun 1938, Mohammad Natsir panah mangaluaan artikel Suara Azan dan Lonceng Azan nan mangomentari asia Konferensi Zending Kristen di Amsterdam. Inyo baitu banyak mangaluaan artikel nan mangomentari ubuangan kaduo agamo iko [38].
  2. ↑ Dalam ciek referensi, disabuikan baso oto polah tu diagiah dek saurang pangusaho [5].

Rujuakan

[suntiang | suntiang sumber]
Catatan kaki
  1. ↑ Lukman Hakiem 2019, hlm. 6.
  2. ↑ a b Ma'mur 1995, hlm. 29.
  3. ↑ a b c d Luth 1999, hlm. 21 – 23.
  4. ↑ a b Shahab 2008, hlm. 9 – 15.
  5. ↑ a b c d e f Adam 2009, hlm. 72-76.
  6. ↑ Lukman Hakiem 2019, hlm. 7.
  7. ↑ Lukman Hakiem 2019, hlm. 8.
  8. ↑ Lukman Hakiem 2019, hlm. 9.
  9. ↑ Lukman Hakiem 2019, hlm. 11 – 12.
  10. ↑ a b Dzulfikriddin 2010, hlm. 19 – 20.
  11. ↑ a b c Luth 1999, hlm. 23 – 24.
  12. ↑ Lukman Hakiem 2019, hlm. 13 – 14.
  13. ↑ Ma'mur 1995, hlm. 30 – 31.
  14. ↑ Lukman Hakiem 2019, hlm. 22 – 25.
  15. ↑ Lukman Hakiem 2019, hlm. 49 – 50.
  16. ↑ a b c d Luth 1999, hlm. 27.
  17. ↑ Lukman Hakiem 2019, hlm. 54 – 55.
  18. ↑ a b Ma'mur 1995, hlm. 30.
  19. ↑ Setiadi dkk. 2012, hlm. 150-151.
  20. ↑ Lukman Hakiem 2019, hlm. 29 – 30.
  21. ↑ Ma'mur 1995, hlm. 33.
  22. ↑ a b c Ma'mur 1995, hlm. 34.
  23. ↑ Noer 2012, hlm. 155.
  24. ↑ a b c d e f g Fadillah 2013, Mengenang M Natsir.
  25. ↑ Luth 1999, hlm. 24 – 25.
  26. ↑ Noer 2012, hlm. 124.
  27. ↑ Noer 2012, hlm. 128.
  28. ↑ Khouw 2008, In search of Mohammad.
  29. ↑ Luth 1999, hlm. 25 – 26.
  30. ↑ a b Ma'mur 1995, hlm. 30 – 33.
  31. ↑ Noer 2012, hlm. 169.
  32. ↑ Noer 2012, hlm. 169, 171.
  33. ↑ Lukman Hakiem 2019, hlm. 26.
  34. ↑ Lukman Hakiem 2019, hlm. 32 – 35.
  35. ↑ a b Ma'mur 1995, hlm. 37.
  36. ↑ Ma'mur 1995, hlm. 38–41.
  37. ↑ Ma'mur 1995, hlm. 42–46.
  38. ↑ a b Adian 2012, Keteladanan Mohammad Natsir.
  39. ↑ Lukman Hakiem 2019, hlm. 59.
  40. ↑ Shahab 2008, hlm. 21.
  41. ↑ Ma'mur 1995, hlm. 36.
  42. ↑ Tempo 2008, Sumatra Barat Sambut.
  43. ↑ a b Shahab 2008, hlm. 47-49.
Daftar pustaka

Pautan lua

[suntiang | suntiang sumber]
Ikon portal Portal Islam
Didaului jo:
Abdul Halim 		Perdana Menteri Indonesia
1950—1951 		Digantian dek:
Sukiman Wirjosandjojo
Didaului jo:
Amir Sjarifuddin 		Menteri Penerangan
1946—1947 		Digantian dek:
Setiadi
Didaului jo:
Sjahbudin Latif 		Menteri Penerangan
1948—1949 		Digantian dek:
Sjafruddin Prawiranegara
Diambiak dari "https://min.wikipedia.org/w/index.php?title=Mohammad_Natsir&oldid=3154588"