Mohammad Yamin

Wikipedia Minangkabau - Lubuak aka tapian ilimu
(Dialiahkan dari Muhammad Yamin)
Loncat ke navigasi Loncat ke pencarian
Mohammad Yamin
Mohammad Yamin, Pekan Buku Indonesia 1954, p251.jpg
Mantari Panarangan ka-14
Maso jabatan
6 Maret 1962 – 13 November 1963
Presiden Soekarno
Didaului jo Maladi
Digantian dek Roeslan Abdulgani
Mantari Pandidikan Nasional Indonesia ka-8
Maso jabatan
30 Juli 1953 – 12 Agustus 1955
Presiden Soekarno
Didaului jo Bahder Djohan
Digantian dek R.M. Suwandi
Mantari Kahakiman Republik Indonesia ka-6
Maso jabatan
27 April 1951 – 3 April 1952
Presiden Soekarno
Didaului jo Wongsonegoro
Digantian dek Lukman Wiriadinata
Data paribadi
Lahia 24 Agustus 1903
Bendera Balando Sawahlunto, Hindia Belanda
Wafaik 17 Oktober 1962 (umua 59)
Bendera Indonesia Jakarta
Kabangsaan Bendera Indonesia Indonesia
Pasangan hiduik Siti Sundari
Anak Rahadian Yamin
Agamo Islam

Mr. Prof. Mohammad Yamin, S.H. (lahia di Talawi, Sawahlunto, Sumatera Barat, 24 Agustus 1903 – maningga di Jakarta, 17 Oktober 1962 pado umua 59 taun) adolah surang pajuang kamardekaan nan alah dianugerahi gala sabagai Pahlawan Nasional Indonesia karano jasonyo nan banyak kapado bangso. Baliau dikana pulo sabagai sastrawan, sajarawan, budayawan, politisi, sarato ahli hukum.

Baliau-pun salah satu parintis puisi moderen Indonesia sarato palopor Sumpah Pamuda sakaligus "pancipta imaji kaindonesiaan" nan mampangaruahi sajarah pasatuan Indonesia.[1][2]

Latar belakang[suntiang | suntiang sumber]

Mohammad Yamin dilahiaan di Talawi, Sawahlunto pado 24 Agustus 1903. Baliau adolah putra dari pasangan Usman Baginda Khatib jo Siti Saadah nan masiang-masiang barasa dari Sawahlunto jo Padang Panjang. Bapaknyo punyo anam baleh anak dari limo bini, nan ampia kasadonyo kudian manjadi intelektual nan bapangaruah. Saudaro-saudaro Yamin antaro lain : Muhammad Yaman, surang pandidik; Djamaluddin Adinegoro, surang wartawan takamuko; sarato Ramana Usman, palopor korps diplomatik Indonesia. Salain itu sapupunyo, Mohammad Amir, adolah tokoh pagarakan kamardekaan Indonesia.

Yamin mandapek-an pandidikan dasarnyo di Hollandsch-Inlandsche School (HIS) Palembang, lalu malanjuik-annyo ka Algemeene Middelbare School (AMS) Yogyakarta. Di AMS Yogyakarta, baliau mulai mampalajari sajarah purbakala jo babagai bahaso, iyolah Yunani, Latin, sarato Kaei. Namun sasudah tamaik, niaik untuak malanjuik-an pandidikan ka Leiden, Balando harus dibatakannyo karano bapaknyo maningga dunia. Kudian baliau manjalani kuliah di Recht Hogeschool (RHS) nan kudian manjadi Fakultas Hukum Universitas Indonesia), Jakarta lalu bahasil mandapek-an gala Meester in de Rechten (Sarjana Hukum) pado taun 1932.

Kasusastraan[suntiang | suntiang sumber]

Mohammad Yamin mamulai karier sabagai panulih pado dekade 1920-an samaso dunia sastra Indonesia mangalami pakambangan. Karya-karya partamonyo ditulih manggunoan bahaso Malayu dalam jurnal Jong Sumatera, sabuah jurnal babahaso Balando pado taun 1920. Karya-karyanyo nan mulo-mulo masih tarikek kapado bantuak-bantuak bahaso Malayu Klasik.

Pado taun 1922, Yamin mancogok untuak partamo kali sabagai panyair jo puisinyo, Tanah Air; nan dimakasuik tanah airnyo iyolah Minangkabau di Sumatera. Tanah Air marupoan himpunan puisi moderen Malayu partamo nan pernah ditabik-an.

Himpunan Yamin nan kaduo, Tumpah Darahku, kalua pado 28 Oktober 1928. Karyanyo ko sangek pantiang dari sagi sajarah, karano pado wakatu itulah Yamin jo babarapo urang pajuang kabangsaan mamutuihan untuak mahormati satu tanah air, satu bangsa, jo satu bahasa Indonesia nan tungga. Dramanyo, Ken Arok dan Ken Dedes nan badasarkan sajarah Jawa, kalua pulo pado taun nan samo.

Dalam puisinyo, Yamin banyak manggunoan bantuak soneta nan dipinjamnyo dari literatur Balando. Walaupun Yamin malakuan banyak eksperimen bahaso dalam puisi-puisinyo, baliau masih labiah manapati norma-norma klasik Bahaso Malayu, dibandiang jo generasi-generasi panulih nan labiah mudo. Baliau manabik-an banyak drama, esei, novel sajarah, sarato puisi. Baliaupun manajamahan karya-karya William Shakespeare (drama Julius Caesar) sarato Rabindranath Tagore.

Politik[suntiang | suntiang sumber]

Karier politik Yamin dimulai katiko baliau masih manjadi mahasiswa di Jakarta. Katiko itu baliau bagabuang dalam organisasi Jong Sumatranen Bond[3] sarato manyusun ikrar Sumpah Pamuda nan dibacoan pado Kongres Pemuda II. Dalam ikrar tu, baliau manatapkan Bahaso Indonesia, nan barasa dari Bahaso Malayu, sabagai bahaso nasional Indonesia. Malalui organisasi Indonesia Muda, Yamin mandasak supayo Bahaso Indonesia dijadian sabagai alat pasatuan. Kudian sasudah kamardekaan, Bahaso Indonesia manjadi bahaso rasmi sarato bahaso utama dalam kasusasteraan Indonesia.

Pado taun 1932, Yamin mandapek-an gala sarjana hukum. Baliau kudian bakarajo dalam bidang hukum di Jakarta hinggo taun 1942. Di taun itu juo, Yamin tacatat sabagai anggota Partindo. Sasudah Partindo bubar, basamo jo Adenan Kapau Gani sarato Amir Sjarifoeddin, baliau mandirian Gerakan Rakyat Indonesia (Gerindo). Taun 1939, baliau tapiliah sabagai anggota Volksraad.

Samaso panduduak-an Japang (1942-1945), Yamin batugeh pado Pusat Tenaga Rakyat (PUTERA), suatu organisasi nasionalis nan disokong dek pamarentah Japang. Pado taun 1945, baliau tapiliah sabagai anggota Badan Panyalidik Usaho Pasiapan Kamardekaan Indonesia (BPUPKI). Dalam sidang BPUPKI, Yamin banyak mamainkan paran. Baliau bapandapek supayo hak asasi manusia dimasuak-an ka dalam konstitusi negara.[4] Baliaupun mausulan supayo wilayah Indonesia pasca-kamardekaan, mancakup Sarawak, Sabah, Samananjuang Malaya, Timor Portugis, sarato sado wilayah Hindia Balando. Soekarno nan marupoan anggota BPUPKI manyokong ide Yamin tu. Sasudah kamardekaan, Soekarno manjadi Presiden Republik Indonesia nan partamo, lalu Yamin diangkek untuak jabatan-jabatan nan panting dalam pamarintahannyo.

Sasudah kamardekaan, jabatan-jabatan nan parnah dipangku Yamin antaro lain anggota DPR sajak taun 1950, Mantari Kahakiman (1951-1952), Mantari Pangajaran, Pandidikan, jo Kabudayoan (1953–1955), Mantari Urusan Sosial jo Budayo (1959-1960), Katua Dewan Parancang Nasional (1962), sarato Katua Dewan Pangawas IKBN Antara (1961–1962).

Pado wakatu manjabat sabagai Mantari Kahakiman, Yamin mambebaskan tahanan politik nan dipanjaro tanpa proses pangadilan. Tanpa grasi jo remisi, baliau mangaluaan 950 urang tahanan nan dicap komunis atau sosialis. Ateh kabijakannyo tu, baliau dikritik dek banyak anggota DPR. Namun Yamin barani batangguang jawab ateh tindakannyo tu. Kudian di wakatu manjabat Mantari Pangajaran, Pandidikan, jo Kabudayoan, Yamin banyak mandorong pandirian univesitas-universitas nagari jo swasta di saluruh Indonesia. Diantaro paguruan tinggi nan baliau dirian adolah Universitas Andalas di Padang, Sumatera Barat.

Kaluarga[suntiang | suntiang sumber]

Pado taun 1937, Mohammad Yamin manikah jo Siti Sundari, puti surang bangsawan dari Kadingalu, Demak, Jawa Tengah nan aktif pulo dalam pajuangan kamardekaan.[5] Mareka dikaruniai surang putra, Dang Rahadian Sinayangish Yamin (Dian). Pado taun 1969, Dian malangsuangan panikahan jo Gusti Raden Ayu Retno Satuti, Templat:Clarify span

Karya[suntiang | suntiang sumber]

Berkas:Mohammad Yamin.jpg
Sampul Buku Muhammad Yamin dan cita cita persatuan
  • Tanah Air (puisi) (1922)
  • Indonesia, Tumpah Darahku (1928)
  • Kalau Dewa Tara Sudah Berkata (drama) (1932)
  • Ken Arok dan Ken Dedes (drama) (1934)
  • Sedjarah Peperangan Dipanegara (1945)
  • Tan Malaka (1945)
  • Gadjah Mada (novel) (1948)
  • Sapta Dharma (1950)
  • Revolusi Amerika (1951)
  • Proklamasi dan Konstitusi Republik Indonesia (1951)
  • Kebudayaan Asia-Afrika (1955)
  • Konstitusi Indonesia dalam Gelanggang Demokrasi (1956)
  • 6000 Tahun Sang Merah Putih (1958)
  • Naskah Persiapan Undang-undang Dasar (3 jilid) (1960)
  • Ketatanegaraan Madjapahit (7 jilid)

Panghargaan[suntiang | suntiang sumber]

  • Bintang Mahaputra RI, tando panghargaan tatinggi dari Presiden RI ateh jaso-jasonyo pado nusa jo bangso
  • Tando panghargaan dari Corps Polisi Militer sabagai pancipta lambang Gajah Mada jo Panca Darma Corps
  • Tando panghargaan Panglimo Kostrad ateh jasonyo manciptaan Pataka Komando Strategi Angkatan Darat

Caliak pulo[suntiang | suntiang sumber]

Rujuak-an[suntiang | suntiang sumber]

  1. "Tokoh Bangsa Multitalenta: M. Yamin". Jurnal Nasional. 27 Juli 2011. http://nasional.jurnas.com/halaman/8/2011-07-27/177430. Diakses pado 5 Juni 2012. 
  2. "Posisi M. Yamin dalam Sejarah Indonesia". Okezone.com. http://news.okezone.com/read/2009/10/28/58/269920/posisi-m-yamin-dalam-sejarah-indonesia. Diakses pado 5 Juni 2012. 
  3. Simbolon, Parakitri Tahi (2006). Menjadi Indonesia. Penerbit Buku Kompas. 
  4. Hukumonline.com Muhammad Yamin, Pelopor Hak Asasi Manusia di Awal Republik
  5. Tempo Edisi Khusus Sumpah Pemuda, Sundari, Kacamata Merah Muda, 2008.

Pautan lua[suntiang | suntiang sumber]

Didaului jo:
Wongsonegoro
Mantari Kahakiman
1951–1952
Digantian dek:
Lukman Wiriadinata
Didaului jo:
Bahder Djohan
Mantari Pandidikan, Pangajaran jo Kabudayoan
1953–1955
Digantian dek:
RM Suwandi
Didaului jo:
Maladi
Mantari Panarangan
1962–1963
Digantian dek:
Roeslan Abdulgani