Abdurrahman Baswedan

Wikipedia Minangkabau - Lubuak aka tapian ilimu
Infobox orangAbdurrahman Baswedan
Biografi
Lahia9 September 1908 Edit nilai pada Wikidata
Kota Surabaya Edit nilai pada Wikidata
Kamatian16 Maret 1986 Edit nilai pada Wikidata (77 tahun (id) terjemahkan)
Daerah Kusuih Ibukota Jakarta Edit nilai pada Wikidata
  Anggota Konstituante Republik Indonesia 

9 Nopember 1956 – 5 Juli 1959
Data pribadi
AgamoIslam Edit nilai pada Wikidata
Kagiatan
KarajoWartawan Edit nilai pada Wikidata
Partai politikPartai Masyumi (1945) Edit nilai pada Wikidata
Kaluarga
AnakRasyid Baswedan (en) Terjemahkan
Salim Baswedan (en) Terjemahkan Edit nilai pada Wikidata
Kerabat (id) TerjemahkanAliyah Rasyid (id) Terjemahkan (daughter-in-law (en) Terjemahkan)
Anies Baswedan (grandson (en) Terjemahkan)
Fery Farhati (id) Terjemahkan (granddaughter-in-law (en) Terjemahkan)
Novel Baswedan (id) Terjemahkan (grandson (en) Terjemahkan)
Mutiara Annisa Baswedan (en) Terjemahkan (great-granddaughter (en) Terjemahkan)
Mikail Azizi Baswedan (en) Terjemahkan (great-grandson (en) Terjemahkan)
Kaisar Hakam Baswedan (id) Terjemahkan (great-grandson (en) Terjemahkan)
Ismail Hakim Baswedan (en) Terjemahkan (great-grandson (en) Terjemahkan) Edit nilai pada Wikidata
Panghargaan

H. Abdurrahman Baswedan (Jawi: عبدالرحمن باسويدان) atau nan populer dikana jo namo A.R. Baswedan (lahia di Kota Surabaya, Jawa Timur pado 9 September 1908, maningga di Jakarta pado 16 Maret 1986) adolah saurang pahlawan nasional Indonesia. Samaso hiduiknyo, baliau dikana sabagai urang nan nasionalis, jurnalis, pajuang kamardekaan Indonesia, diplomat, muballigh, sarato sastrawan Indonesia. A.R. Baswedan pernah manjadi anggota Badan Penyelidik Usaha dan Persiapan Kemerdekaan Indonesia (BPUPKI), Wakil Menteri Muda Penerangan RI pado Kabinet Sjahrir, Anggota Badan Pekerja Komite Nasional Indonesia Pusat (BP-KNIP), Anggota Parlemen, sarato Anggota Dewan Konstituante. A.R. Baswedan adolah diplomat patamo Indonesia nan berhasil mandapekan pangakuan de jure jo de facto patamo untuak eksistensi Republik Indonesia dari Mesir.[1] Salain mangecek jo manulih dalam bahasa Indonesia, A.R. Baswedan fasih pulo manguasoi bahaso Arab, bahaso Inggrih, jo bahaso Balando.

Karier[suntiang | suntiang sumber]

Pajuang Kamardekaan Indonesia[suntiang | suntiang sumber]

AR Baswedan (1958)
A.R. (kanan) mamakai blangkon jo surjan. Foto ko manjadi ilustrasi untuak tulisannyo bajudul Peranakan Arab dan Totoknya di Harian Matahari, 1 Agustus 1934. Foto jo tulisan ko nan mandorong "revolusi" dalam peranakan Arab di Indonesia.

A.R. Baswedan adolah saurang pambarontak pado zamannyo. Harian Matahari Semarang mamuek tulisan Baswedan tantang urang-urang Arab, 1 Agustus 1934. A.R. Baswedan memang ado katurunan dari Arab, walau lidahnyo lakek jo bahaso Jawa Surabaya katiko mangecek. Dalam artikel tu tapampang foto Baswedan mamakai surjan jo blangkon. Baliau maimbau urang-urang Arab untuak basatu manolong pajuangan Indonesia. Baliau maajak pulo urang-urang katurunan Arab sarupo dirinyo untuak manganuik asas kewarganegaraan ius soli: dima ambo lahia, disitulah tanah airnyo. Di titik itulah baliau manjalani parubahan haluan dalam dirinyo hinggo bakontribusi dalam pajalanan kamardekaan Indonesia.

Pado maso-maso revolusi, A.R. Baswedan baparan manyiapan gerakan pemuda katurunan Arab untuak baparang malawan Balando. Pamuda nan tapiliah tu dilatih di barak-barak jo palatihan semi militer. Di palatihan disiapan fisik pamuda untuak siap baparang.[2]

A.R. Baswedan pernah ditahan pado maso pandudukan Japang (1942). Katiko Indonesia mardeka, baliau mangorbanan kasalamatan dirinyo katiko mambaok dokumen pangakuan kamardekaan Indonesia dari Mesir pado 1948. Baliau dapek banyak gangguan jo hambatan katiko mambaoknyo.[3] Katiko itu sadolah bandara di kota-kota gadang tamasuak Jakarta alah dikuasoi dek Balando jo sekutu. Tapi dek kelihaian jo kanekatannyo, baliau malatakan dokumen tu di kaus kakinyo,[4] hinggo akhianyo dokumen tu selamat sarato Indonesia dapek pangakuan sabagai negara mardeka sacaro de jure dan de facto.

Jurnalis[suntiang | suntiang sumber]

A.R. Baswedan tamasuak saurang nan otodidak.[5] Baliau mampalajari banyak hal sacaro mandiri, tarutamo kamampuan manulihnyo. Tapi dunia jurnalisme baru tabukak katiko baliau basuo wartawan patamo dari katurunan Arab di Hindia Balando, Salim Maskati,[6] nan di kudian hari manolong A.R. Baswedan manjadi Sekretaris Jenderal PAI. Dek karano itulah profesi utamo jo patamo A.R. Baswedan adolah jurnalis. Baliau sempat pulo manjalani kagiatan perniagaan malanjuikan usaho toko urang tuonyo di Surabaya. Tapi baliau labiah suko jo dunia jurnalisme daibandiangan jo dunia usaho. Soebagio I.N., dalam buku Jagat Wartawan mamiliah A.R. Baswedan sabagai salah saurang dari 111 parintis pers nasional nan tagok jo badedikasi.[7]

Katiko karajo di Sin Tit Po, baliau dapek 75 gulden, wakatu itu bareh sakuintal hanyo 5 gulden. Salanjuiknyo baliau kalua ko mamiliah bagabuang jo Soeara Oemoem, punyo dr. Soetomo nan gajinyo 10-15 gulden sebulan. Sasudah itu baliau karajo di Matahari. Tapi sasudah mandapek amanah untuak manjalanan roda organisasi Persatuan Arab Indonesia (PAI), baliau maninggaan Matahari, padahal baliau dapek gaji dari sinan 120, setara jo 24 kuintal bareh wakatu tu.

Sabagai wartawan pajuang, A.R. Baswedan produktif dalam manulih. Katiko era revolusi, tulisan-tulisan A.R. acok dimuek di media-media propaganda kabangsaan Indonesia nan manunjuakan nada positif jo optimis, sarupo nan tacataik dalam buku The Crescent and the Rising Sun: Indonesian Islam Under the Japanese Occupation, 1942-1945 karya Harry J. Benda.

Suratmin jo Didi Kwartanada marangkum pajalanan AR dalam dunia jurnalistik sabagai barikuik:[8]

  1. Redaktur Harian Sin Tit Po di Surabaya (1932).
  2. Redaktur Harian Soeara Oemoem di Surabaya nan dipimpin dr. Soetomo (1933).
  3. Redaktur Harian Matahari, Semarang (1934).
  4. Penerbit dan Pemimpin Majalah Sadar.
  5. Pemimpin Redaksi Majalah internal PAI, Aliran Baroe (1935-1939).
  6. Penerbit dan Pemimpin Majalah Nusaputra di Yogyakarta (1950-an).
  7. Pemimpin Redaksi Majalah Hikmah.
  8. Pembantu Harian Mercusuar, Yogyakarta (1973).
  9. Penasihat Redaksi Harian Masa Kini, Yogyakarta (70-an).

Karier politik[suntiang | suntiang sumber]

Jalan politik A.R. Baswedan dimulai katiko manjaid katua PAI. PAI mampajuangan panyatuan panuah katurunan Arab jo masyarakaik Indonesia sarato ikuik aktif dalam pajuangan bangsa.[9] PAI mandapekan banyak kritikan jo cacian dari banyak sisi dek cita-citanyo tu.[10]

A.R. Baswedan mangonsolidasikan kakuatan internal sakaligus mambangun komunikasi jo pihak lua, yaitu gerakan pajuangan kamardekaan Indonesia lainnyo, searupo Soekarno, Moh. Hatta, Sutan Sjahrir, jo Moehammad Husni Thamrin. Pado 21 Mei 1939, PAI turuik bagabuang dalam Gerakan Politik Indonesia (GAPI) nan dipimpin dek Moehammad Husni Thamrin. Dalam GAPI partai-partai politik basapakaik untuak manyatuan diri dalam wadah negara kelak banamo Indonesia. Dek masuaknyo PAI ka dalam GAPI ini, posisi PAI sabagai gerakan politik jo kabangsaan samakin kuek. Salain masuak dalam GAPI, A.R. Baswedan mambaok pulo PAI ka dalam lingkaran gerakan politik kabangsaan nan labiah lueh jo masuak ka dalam Majelis Islam ala Indonesia (MIAI) pado 1937.

Pado maso pendudukan Japang, A.R. Baswedan diangkek sabagai anggota Chuo Sangi In, samacam Dewan Penasihat Pusat nan dibantuak Panguasa Japang. Organisasi ko langsaung dikatuai dek Ir. Soekarno. Manjalang Indonesia mardeka, A.R. Baswedan ikuik manjadi anggota Badan Penyelidik Usaha-usaha Persiapan Kemerdekaan Indonesia (BPUPKI), disinan A.R. basamo para pandiri bangsa lainnyo aktif manyusun UUD 1945. Sasudah Indonesia merdeka, A.R. Baswedan manjadi anggota Komite Nasional Indonesia Pusat (KNIP).

Pajuangan A.R. Baswedan balanjuik di republik baru. Basamo jo H. Agus Salim (Menteri Muda Luar Negeri), Rasyidi (Sekjen Kementrian Agama), Muhammad Natsir jo St. Pamuncak, A.R. Baswedan (Menteri Muda Penerangan) manjadi delegasi diplomatik patamo nan dibantuak dek negara baru mardeka ko. Delegasi tu malobi para pamimpin negara-negara Arab. Pajuangan ko berhasil mandapekan pangakuan patamo untuak eksistensi Republik Indonesia sacara de facto jo de jure dek Mesir. Lobi panjang malalui Liga Arab di Mesir tu manjadi tonggak patamo kaberhasilan diplomasi nan diikuti dek pangakuan negara-negara lain tahadok Indonesia, sabuah republik baru di Asia Tenggara.

Pado 1950-an, A.R. Baswedan bagabuang dalam Partai Masyumi. A.R. Baswedan manjadi pajabaik teras partai Islam paliag gadang dalam sijarah Indonesia wakatu tu. Deliar Noer manyimpulan basonyo A.R. Baswedan tamasuak dalam kalompok pandukuang Moh. Natsir dalam Masyumi.[11]

Muballigh[suntiang | suntiang sumber]

Katiko basikolah di Hadramaut School Surabaya, A.R. Baswedan bakenalan jo KH. Mas Mansoer, imam jo khatib Masjid Ampel, Surabaya. KH. Mas Mansoer pernah manjadi Ketua Cabang Muhammadiyah Surabaya. Dari perkenalan itu A.R. Baswedan acok dimintak KH Mas Mansoer untuak ikuik badakwah ke banyak daerah.[12]Dek kagiatan tu, komitmen kaislaman baliau mangental jo kamampuan pidatonyo. Dek kamampuan pidatonyo itulah nan manolongnyo dalam manyampaian kampanye tantang PAI ka sajumlah daerah.[13]

Salain bapidato, A.R. Baswedan badakwah pulo malalui tulisan-tulisannyo nan dimuek di sajumlah majalah jo koran Islam. Baliau maurus kolom Mercusuana pado harian milik Muhammadiyah, Mercusuar (di kamudian hari barubah namonyo manjadi Masa kini). Pado akhia 40-an sampai akhia 50-an A.R. Baswedan manjadi pamimpin redaksi Majalah Hikmah, sabuah majalah mingguan Islam populer. Dalam dewan redaksi, salain A.R. Baswedan, ado pulo Moh. Natsir jo Buya Hamka. Para panulih majalah ko adolah tokoh-tokoh Islam tapandang, sarupo Sjafruddin Prawiranegara.

Dalam bidang dakwah, A.R. Baswedan pernah pulo manjadi katua Dewan Dakwah Islamiyah (DDI) Cabang Yogyakarta. Bahkan, baliau manjadi palinduang jo rumahnyo nan di Tamah Yuwono manjadi tampek bataduah untuak mahasiswa atau seniman Islam nan tagabuang dalam Teater Muslim.

Kahidupan pribadi[suntiang | suntiang sumber]

A.R. Baswedan manikah jo Sjaichun. Pado tahun 1948 Sjaichun maningga di Kota Surakarta dek malaria. Tahun 1950 A.R. Baswedan manikah baliak jo Barkah Ganis, saurang tokoh pergerakan padusi. Baliau manikah di rumah KH Ahmad Dahlan di Yogyakarta, Muhammad Natsir batindak sabagai wali nan manikahan baliau. Dari panikahan tu, baliau dikarunia 11 anak jo 45 cucu.[14]

Baswedan urangnyo sederhana jo indak pernah mamikian harato jo material. Sampai akhia hayatnyo A.R. Baswedan indak punyo rumah. Baliau jo kaluargonyo tingga di rumah pinjaman di dalam kompleks Taman Yuwono Yogyakarta, nan marupoan sabuah kompleks perumahan nan dipinjaman dek Haji Bilal Atmojoewana. Rumah tu dipinjaman untuak pajuang revolusi katiko Ibu kota RI barado di Yogyakarta. Oto patamo nan dimiliki dek baliau adolah hadiah ulang tahun ka-72 dari sahabatnyo Adam Malik, katiko manjabaik sabagai Wakil Presiden.

Cucunyo, Anies Baswedan adoalah Menteri Kebudayaan, Pendidikan Dasar dan Menengah Republik Indonesia pado Kabinet Kerja era Presiden Joko Widodo tahun 2014 hinggo 2016. Pado 15 Oktober 2017 Anies dilantik manjadi Gubernur Daerah Khusus Ibu kota Jakarta untuak pariode 2017-2022. Cucu A.R. Baswedan lainnyo adolah penyidik antirasuah, Novel Baswedan.

Pahlawan Nasional[suntiang | suntiang sumber]

Piagam Penghargaan Gelar Pahlawan Nasional untuak A.R. Baswedan nan ditandotangani Presiden Joko Widodo pado 6 November 2018.

Pado 2011-2013,[15] Drs. Eddie Lembong malalui Yayasan Nation Building (Nabil) mainisiasi gala pahlawan ka A.R. Baswedan.[16] Ado 6 partimbangan Yayasan Nabil mausulan A.R. Baswedan sabagai pahlawan nasional:

  1. Sabagai salah saurang pambantuak bangsa (nation builder).
  2. Sabagai salah satu Bapak Bangsa (Founding Father).
  3. Turuik sato bajaso dalam Pengakuan Diplomatik Pertama bagi RI.
  4. Salah saurang parintis Pers Nasional Indonesia.
  5. Tokoh Multikultural nan mampajuangan kesetaraan gender.
  6. Seniman jo agamawan.

Dalam rangka proses pangusulan ko, Yayasan Nabil maadoan diskusi di sajumlah universitas jo tampek di sajumlah daerah.[17] Yayasan Nabil manarbitan pulo buku biografi A.R. Baswedan karya Suratmin jo Didi Kwartanada.[18] Walau damikian, sacaro formal nan maajuan jo mausulan anugerah Pahlawan Nasional untuak A.R. Baswedan adolah Daerah Istimewa Yogyakarta malalui perkenan Sultan Hamengku Buwana X jo Wali kota Yogyakarta Herry Zudianto.

Salain Yayasan Nabil, ado pulo upayo nan dilakuan dek AM Fatwa dalam proses panganugerahan ko sajak 2015. Pado hari Kamis 8 November 2018, Abdurrahman Baswedan, kakek dari Anies Baswedan jo Novel Baswedan, diagiah gala Pahlawan Nasional dek Presiden Republik Indonesia Ir. Joko Widodo, di Istana Kepresidenan Jakarta.[19]

Panghargoan jo Tando Jaso[suntiang | suntiang sumber]

Dek kontribusinyo dalam pajuangan bangsa, negara maagiahan panghargoan ka A.R. Baswedan. Indak hanyo Republik Indonesia nan turuik dirintis dek A.R. Baswedan, tapi ado pulo duo negara Islam lain nan turuik maagiah baliau panghargoan dek kontribusi antarnegaranyo tu, sarato sikap mandorong kamardekaan Mesir jo Aljazair.

  1. Negara pado 1970 mangakui A.R. Baswedan sabagai salah saurang Parintis Kamardekaan.
  2. Pado 9 November 1992, negara mangakui jo manghargoi kontribusi A.R. Baswedan nan turuik manyusun UUD 1945 dalam BPUPKI. Dek karano itulah negara maanugerahan Bintang Mahaputra Utama ka A.R. Baswedan jo 44 anggota BPUPKI lainnyo.
  3. Pado Juli 1995 Duta Mesir untuak Indonesia, Sayed K El Masry maagiahan panghargoan ka A.R. Baswedan barupo piagam dari bahan papirus, nan barisi naskah Pajanjian Persahabatan RI-Kerajaan Mesir pado 10 Juni 1947 dalam bahaso Indonesia jo bahaso Arab.
  4. Pado 23 Desember 1995, Aljazair maagiahan medali ka A.R. Baswedan untuak hubungannyo jo tokoh Aljazair sarato bantuan moril di paristiwa Revolusi Aljazair 1 November 1954.[20]
  5. Pado 2013, Presiden Soesilo Bambang Yoedhoyono maanugrahan A.R. Baswedan Bintang Mahaputra Adipradana pado 10 Agustus 2013.[21][22]
  6. Pado 8 November 2018, negara maagiahan anugerah Pahlawan Nasional ka A.R. Baswedan untuak jaso-jasanyo dalam kamardekaan Indonesia.[23]

Karya[suntiang | suntiang sumber]

Tulisan-tulisan A.R. Baswedan banyak dimuek media. Tapi sayangnyo, indak sadolah tulisannyo sempat takumpuan jo ditabikan sacaro kronologis. Berikut ko sabagian karya A.R. Baswedan nan sempat dikumpuan jo dicetak :

  • Debat Sekeliling PAI (tahun 1939)
  • Beberapa Catatan tentang Sumpah Pemuda Indonesia Keturunan Arab (1974)
  • Buah Pikiran dan Cita-cita AR Baswedan (diterbitkan Sekjen PAI, Salim Maskati).
  • Menuju Masyarakat Baru, sebuah cerita Toneel dalam 5 Bagian.
  • Rumah Tangga Rasulullah diterbitkan Bulan Bintang pada 1940 (Shalahuddin Press menerbitkan ulang buku ini pada 1980-an; pada 2018 ini Qafmedia menerbitkan kembali buku ini atas permintaan pembaca yang kangen dengan buku ini dan kebutuhan khalayak saat ini atas bacaan berkualitas tentang Nabi Muhammad saw.).
  • AR Baswedan: Revolusi Batin Sang Perintis [2016] (buku ini dikumpulkan dan disunting Nabiel A. Karim Hayaze dan berisi tulisan terpilih A.R. Baswedan dan tentang A.R. Baswedan dari peneliti).[24]

Rujuakan[suntiang | suntiang sumber]

  1. ↑ "Pejabat Kabinet" (dalam bahasa Indonesia). Diarsipkan dari versi asli tanggal 2014-11-02. 
  2. ↑ van der Kroef, Justus M. (1953). "The Arabs in Indonesia". Middle East Journal. 7 (3): 300–323. 
  3. ↑ Suranta Abd. Rahman, 2007, "Diplomasi RI di Mesir dan Negara-Negara Arab pada Tahun 1947" dalam Wacana Vo. 9 No. 2, Oktober 2007, hal. 166.
  4. ↑ Om affandi (2013-01-17), AR Baswedan 
  5. ↑ de Jonge, Huub (2004). "Abdul Rahman Baswedan and the Emancipation of the Hadramis in Indonesia". Asian Journal of Social Science. 32 (3): 373–400. 
  6. ↑ MOBINI-KESHEH, NATALIE (1996). "The Arab Periodicals of the Netherlands East Indies, 1914-1942". Bijdragen tot de Taal-, Land- en Volkenkunde. 152 (2): 236–256. 
  7. ↑ "Kegigihan dan Kesederhanaan Wamen AR Baswedan". Merdeka Daily. 6 June 2012. Diakses tanggal 1 September 2014. 
  8. ↑ Suratmin dan Didi Kwartanada, 2014, Biografi A.R. Baswedan, Membangun Bangsa, Merajut Keindonesiaan (Jakarta: Penerbit Buku Kompas), hal. 251
  9. ↑ Alatas, Ismail Fajrie (2011). "Becoming Indonesians: The Bā ʿAlawī in the Interstices of the Nation". Die Welt des Islams. 51 (1): 45–74. 
  10. ↑ de Jonge, Huub (1993). "Discord and Solidarity among the Arabs in the Netherlands East Indies, 1900-1942". Indonesia (55): 73–90. doi:10.2307/3351087. 
  11. ↑ Deliar Noer, Partai Islam di Pentas Nasional, Kisah dan Analisis Perkembangan Politik Indonesia 1945-1965 (Bandung: Mizan), hal. 117.
  12. ↑ Muhammad Husnil, 2014, Melunasi Janji Kemerdekaan (Jakarta: Penerbit Zaman), hal. 20.
  13. ↑ Muhammad Husnil, 2017, Ketika Anies Baswedan Memimpin, Menginspirasi, Menggerakkan (Jakarta: Mahaka Publishing), hal. 21.
  14. ↑ Mobini-Kesheh, Natalie (1999). The Hadrami Awakening: Community and Identity in the Netherlands East Indies, 1900-1942 (edisi ke-illustrated, reprint). SEAP Publications. p. 132. ISBN 978-0877277279. https://books.google.com/books?id=c45Xvsq2q4UC&pg=PA132. 
  15. ↑ "AR Baswedan dan Kasman Singodimedjo Menjadi Pahlwan Nasional | Republika Online". Republika Online. 
  16. ↑ Susilo, Nina (9 November 2018). "Indonesia Rumah Bersama". Kompas. Hlm.1 dan 15.
  17. ↑ haidarpesebe, Nabil Foundation by. "Peluncuran dan Diskusi Biografi AR Baswedan - Berita". Nabil Foundation (dalam bahasa Inggris). 
  18. ↑ haidarpesebe, Nabil Foundation by. "Telah terbit :". Nabil Foundation (dalam bahasa Inggris). 
  19. ↑ [1]
  20. ↑ "Aljazair Anugerahkan Medali kepada 13 Tokoh RI - Sabtu, 28 Mei 2005". archive.li. 2007-10-19. Archived from the original on 2007-10-19. 
  21. ↑ haidarpesebe, Nabil Foundation by. "Bintang Mahaputra Adipradana untuk Tokoh Pejuang A.R. Baswedan - Artikel". Nabil Foundation (dalam bahasa Inggris). 
  22. ↑ Media, Kompas Cyber (2013-08-13). "8 Menteri Dapat Bintang Mahaputera Adipradana - Kompas.com". KOMPAS.com (dalam bahasa Inggris). 
  23. ↑ "Enam Tokoh Bakal Dianugerahi Gelar Pahlawan Nasional - nasional Tempo.co". nasional.tempo.co. 
  24. ↑ "Beli buku a.r baswedan terbaru, paling murah | Mizanstore". mizanstore.com (dalam bahasa Inggris). 
Diambiak dari "https://min.wikipedia.org/w/index.php?title=Abdurrahman_Baswedan&oldid=3145157"