Deliar Noer

Prof. Dr. Deliar Noer M.A.
Lahia	9 Februari 1926 Medan, Sumatera Utara, Hindia Belando
Maningga	18 Juni 2008 (umua 82) Jakarta, Indonesia
Kabangsaan	Indonesia
Karojo	Ilmuwan, dosen, politikus
Dikana dek	Pandiri Partai Ummat Islam

Prof. Dr. Deliar Noer, M.A. (lahia di Medan, Sumatera Utara, 9 Februari 1926 – maningga di Jakarta, 18 Juni 2008 pado umua 82 taun) adolah saurang dosen, pamikia, panaliti, jo politikus Indonesia. Inyo parnah manjabek sabagai rektor IKIP Jakarta, sarato pandiri jo katua umum partamo Partai Ummat Islam.

Kahidupan awal

Deliar Noer lahia dari urang tuo nan barasa dari Parak Laweh, Pakan Kamih, Tilatang Kamang, Agam, Sumatera Barat. Inyo adolah anak kaduo dari tigo basudaro. Apaknyo, Noer bin Joesof, adolah saurang kapalo pagadaian di Kota Medan, Sumatera Utara. Pado awalnyo, inyo diagiah namo Muhammad Zubair, tapi karano ecok sakik, namonyo diganti manjadi Deliar.

Karano hiduik bapindah-pindah, inyo basakolah di babagai tampek. Inyo tacatat parnah basakolah di HIS Taman Siswa Tebing Tinggi, MULO Bukittinggi, INS Kayutanam, Tyugakko di Medan, jo SMT (Kolese Kanisius) di Jakarta. Satalah lulus dari SMT, inyo malanjuikan pandidikannyo ka Universitas Nasional. Samaso bakuliah, inyo aktif baorganisasi jo manjadi katua Himpunan Mahasiswa Islam. Salapeh mandapek gala sarjana, inyo manaruihan ka Universitas Cornell, Amerika Sarikat untuak maambiak gala master (1960) jo doktor (1963). Malalui disertasinyo nan bajudul: Gerakan Islam Modernis di Indonesia 1900-1942, inyo manjadi urang Indonesia partamo nan mamparoleh gala doktor filsafat dalam ilmu politik.

Karier politik

Deliar Noer mangawali kariernyo pado taun 1947. Inyo bakarajo sabagai panyiar di Radio Republik Indonesia untuak mambiayai pandidikannyo. Salanjuiknyo, inyo bakarajo sabagai wartawan untuak surek kaba Berita Indonesia jo majalah bulanan Nusantara. Satalah tu, Deliar batugas manjadi staf parwakilan Departemen Perdagangan Republik Indonesia di Singapura.

Pado taun 1950, inyo ditunjuak manjadi katua umum Himpunan Mahasiswa Islam (HMI) cabang Jakarta. Tigo taun kamudian, inyo tapiliah sabagai Katua Umum Pengurus Besar HMI. Dari organisasi ikolah inyo kamudian bakenalan jo tokoh-tokoh nasional saroman Hamka, Natsir, jo Mohammad Roem.

Pado awal Orde Baru, Deliar ditunjuak manjadi staf panasehat Presiden Soeharto. Inyo kamudian mangundurkan diri karano adonyo pabedaan ideologi antaro inyo jo staf lainnyo. Basamo Mohammad Hatta, inyo mandirian Partai Demokrasi Islam Indonesia, tapi partai iko idak diizinkan dek pamarentah. Pado era Reformasi, inyo mandirian Partai Ummat Islam, tapi idak mamiliki cukuik suaro untuak lolos ka pamilu legislatif 1999.

Kontroversi jo kamatian

Inyo manjabek sabagai rektor IKIP Jakarta salamo tujuah tahun. Pado bulan Juni 1974, inyo dibarantian babarapo bulan karano dituduah basikap provokatif tahadap Menteri Pendidikan dan Kebudayaan Sjarif Thayeb. Kiro-kiro sapuluah taun sabalumnyo, inyo dilarang mangaja di Universitas Sumatera Utara dek Thayeb nan katiko itu manjabek sabagai Menteri Ilmu Pengetahuan Alam dan Pendidikan Tinggi karano dituduah sabagai antek Amerika Sarikat.

Satalah dilarang mangaja di saluruah Indonesia, inyo manarimo tawaran manjadi panaliti di Australian National University. Salapeh duo taun di Australia, inyo manjadi dosen tamu di Universitas Griffith. Satalah mangaja salamo limo taun, inyo jo Mohammad Natsir mambantuak Lembaga Islam untuk Penelitian dan Pengembangan Masyarakat.

Deliar Noer maningga dunia pado tanggal 17 Juni 2008.

Kaluarga

Pado bulan April 1961, Deliar malangsuangkan panikahannyo di Amerika Sarikat jo saurang padusi basuku Mandailing banamo Zahara Daulay. Dari panikahannyo iko, inyo dikaruniai duo urang anak laki-laki, yaitu Muhammad Dian jo Muhammad bin Deliar Noer. Tapi anak kaduonyo maningga dunia katiko ketek.

Karya

• Islam dan Masyarakat (2003)
• Islam dan Politik (2003)
• Mohammad Hatta, Hati Nurani Bangsa 1902-1980 (2002)
• Membincangkan Tokoh-Tokoh Bangsa (2001)
• Mencari Presiden (1999)
• Aku Bagian Ummat, Aku Bagian Bangsa: Otobiografi Deliar Noer (1996)
• Mohammad Hatta: Biografi Politik (1990)
• Culture, Philosophy, and the Future: Essays in Honor of Sutan Takdir Alisjahbana on His 80th Birthday (1988)
• Perubahan, Pembaruan, dan Kesadaran Menghadapi Abad Ke-21 1988)
• Partai Islam di Pentas Nasional 1945-1965 (1987)
• Administrasi Islam di Indonesia (1983)
• Islam, Pancasila dan Asas Tunggal (1983)
• Mengenang Arief Rahman Hakim (1983)
• Bunga Rampai dari Negeri Kanguru (1981)
• Administration of Islam in Indonesia (1978)
• Sekali Lagi, Masalah Ulama-Intelektuil atau Intelektuil-Ulama: Suatu Tesis buat Generasi Muda Islam (1974)
• Guru sebagai Benteng Terakhir Nilai-Nilai Ideal; Tuntutan: Bekerja Tertib (1973)
• The Modernist Muslim Movement in Indonesia, 1900-1942 (1973)
• Gerakan Modern Islam di Indonesia 1900-1942 (terjemahan, 1990)
• Beberapa Masalah Politik (1972)
• Kitab Tuntunan untuk Membuat Karangan Ilmiah, Termasuk Skripsi (1964)
• The Rise and Development of the Modernist Muslim Movement in Indonesia During the Dutch Colonial Period 1900-1942 (1963)
• Partisipasi dalam Pembangunan (1977)
• Pengantar ke Pemikiran Politik (1965)

Daftar pustaka

• Anwar, Rosihan (2009) (dalam bahaso Indonesia). Sejarah Kecil Petite Histoire Indonesia. Jakarta: Kepustakaan Populer Gramedia. ISBN 978-979-709-429-4. https://books.google.com/books?id=AZxdUILToFUC. 
• Rosidi, Ajip (2010) (dalam bahaso Indonesia). Mengenang Hidup Orang Lain: Sejumlah Obituari. Jakarta: Kepustakaan Populer Gramedia. ISBN 978-979-9102-22-5. https://books.google.com/books?id=9eou96EnD2gC. 
• Noer, Deliar (2001) (dalam bahaso Indonesia). Membincangkan Tokoh-Tokoh Bangsa. Jakarta: Mizan. ISBN 9789794332818. https://books.google.co.id/books/about/Membincangkan_tokoh_tokoh_bangsa.html?id=jy3YAAAAMAAJ&redir_esc=y. 
• Saripudin, HA (2001) (dalam bahaso Indonesia). Begawan politik: Deliar Noer 75 tahun. Jakarta: Panitia Buku. https://books.google.co.id/books/about/Begawan_politik.html?id=f-asGQAACAAJ&redir_esc=y.