Marapalam
Marapalam adolah namo bukik nan manjulang satinggi 1.175 meter di bagian selatan Gunuang Sago, labiah kurang 12 km timur laut Fort Van der Capellen (sekarang Batusangkar), Sumatra Barat, Indonesia. Di siko, ado sabuah dusun nan banamo samo. Di kaki bukik ko, antaro lambah Batang Selo jo Batang Sinamar, dulunyo ado jalan panghubuang dari Fort Van der Capellen manuju Lintau nan hanyo dapek ditampuah jo bajalan kaki.[1][2]
Sijarah
[suntiang | suntiang sumber]Pra-Islam
[suntiang | suntiang sumber]Jalan panghubuang di kaki bukit Marapalam sangaik pantiang di abaik ka-14, katiko Tanjuang (namo nagari di situ) marupoan daerah nan bapangaruah. Sabalaum pamarintahan Balando mambuek Lintau jo Buo dapek di akses malalui jalan raya, jalan nan hanyo bisa ditampuah dari Fort Van der Capellen adolah malewati Marapalam.[1] Daerah di sabalah utara Buo di tapi Sinamar sampai ka Tanjuang di sabarang Marapalam disabuik dalam Nagarakertagama (1365) sabagai barisi upeti duo negara untuak Majapahit. Christine Dobbin mangiro kalau daerah ko takaik jo negara baru nan didirikan Adityawarman, jo indak dapek diragukan bahsonyo inyo jo pangikuiknyo malewati tampek iko dalam pajalanan mereka ka Tanah Datar jo Tepi Selo.[3]
Katiko pacah parang saudara sasudah maningganyo Adityawarman, tampaknyo kaluarga rajo pindah ka daerah iko jo lambek lamo mamantapkan kadudukannyo sabagai mitra dagang Malaka. Anggota-anggota kaluarga manatap di banyak tampek di lambah-lambah Sinamar jo Sumpua, tamasuak Buo di tapi Sinamar, Sumpur Kudus di tapi Sumpur, sarato tampek nan dulu manjadi pusek Pagaruyuang[4] banamo Kumani (di siko dulunyo Batang Sinamar bisa dilayari parahu dagang nan ka Inderagiri). Pado wakatu tingga di sikolah kaluarga rajo bahubuangan jo padagang Muslim jo pikiran Islam, kamudian pado akhia abaik ka-16 sacaro batahap mereka manjadi Islam.[3] Bakambangnyo ide Islam di daerah padalaman marupokan sabuah kontribusi dari padagangan ameh nan manjadi komoditas utamo karajaan-karajaan Islam takah Malaka.
Pado suatu katiko fungsi karajaan dibagikan kapado tigo anggota kaluarga nan disabuik Rajo Tigo Selo, tadiri dari Raja Ibadat nan paliang dakek jo dunia dagang di selat di Sumpua Kudus, Raja Adat di Buo, jo Raja Alam di Pagaruyuang. Sumpua Kudus mungkin nan paliang partamo masuak agamo Islam, karano adonyo Sungai Kampar jo Inderagiri nan rami untuak padagangan. Daerah ko diagaiah juluakan Makah Darek nan manjadi tampek mukim kaluarga karajaan; mereka punyo andia manyebarkan Islam ka daerah padalaman.
Parang Paderi
[suntiang | suntiang sumber]
Katiko Parang Paderi, Marapalam marupokan basis pertahanan Kaum Padri nan payah ditaklukan dek Balando. Pado taun 1823, Letnan Kolonel Antoine Theodore Raaff manyarang pimpinan Padri nan tanamo jo Tuanku Pasaman di Lintau malewati Marapalam. Partempuran tajadi di Marapalam pado 14–17 April 1823 jo Padri bisa mamukul pasukan Raff.[5] Balakangan, pamarintah kolonial Balando mambuek jalan lain nan labiah gadang jo indak payah bana. Latak dusun Marapalam jo bukik-bukik nan payah didaki, lambah-lambah panuah ranjau, partahanan nan balapis-lapis, manyababkan tiap sarangan Balando salalu kandas jo dipakso mundua jo korban lumayan gadang.[1]
Sasudah pajanjian indak ka ado sarangan antaro Kaum Padri jo Balando ditandatangani pado 15 November 1825, patahanan Kaum Padri nan tadinyo sangaik kuek di Marapalam, indak bagitu dijago lai jo indak ditaruihkan mampakueknyo, malah disio-siokan. Muhamad Radjab manulih, Kaum Padri manyangko bahsonyo Balando indak ka manyarang Marapalam karano kagagalan mereka pado taun 1823. Kubu patahanan Padri di Marapalam dibiakan talantar sarato indak dijago takah biaso. Samantaro tu, Residen Elout bapandapek bahsonyo Marapalam marupokan kunci untuak mambukak jalan di Lintau sahinggo Kaum Padri di situ harus ditaklukkan. Marapalam harus disergap sacaro diam-diam.[6]
Katiko parak siang tanggal 6 Agustus 1831, saratuih serdadu Balando nan basanjato langkok di bawah komando Kapten de Quay jo Veltman diam-diam mandakati kubu patahanan Marapalam. Muhamad Radjab manulih, hanyo duo atau tigo Padri nan sadang bajago di kubu patahana jo mereka dalam tangah lamak lalok. Sergapan nan indak disangko-sangko iko mangajuikkan jo mambingungkan mereka sahinggo mereka capek-capek lari jo maninggalkan sanjato. Kaum Padri manganggap sarangan ko sabagai palanggaran jo pangkhianatan ateh pajanjian damai tanggal 15 November 1825. Namun, Balando mamandang tindakan mereka alah sapantasnyo.[6]
Sasudah Marapalam jatuah, komandan tentara Balando mamajukan garih patahanannyo ka muko, sampai ka lereng Bukit Barisan nan di sabalah timurnyo tabantang daerah Lintau.[6]
Rujuakan
[suntiang | suntiang sumber]- ↑ a b c De Graaf, S. & D. G. Stibbe 1918.
- ↑ Rusli Amran 1981, hlm. 524.
- ↑ a b Christine Dobbin 1992, hlm. 74.
- ↑ Ahmad Syafii Maarif 2009, hlm. 27.
- ↑ Sjafnir Aboe Nain 1988, hlm. 69.
- ↑ a b c Muhamad Radjab 2019, hlm. 124–127.
Daftar pustaka
[suntiang | suntiang sumber]- Christine Dobbin (1992). Kebangkitan Islam dalam Ekonomi Petani yang Sedang Berubah: Sumatera Tengah 1784-1847. London: Indonesia Netherlands Cooperation in Islamic Studies. https://books.google.co.id/books?id=JzR6DQAAQBAJ&printsec=frontcover&source=gbs_ge_summary_r&cad=0#v=onepage&q&f=false. Diakses pado 19 Mei 2021.
- Ahmad Syafii Maarif (2009). Titik-titik Kisar di Perjalananku: Autobiografi Ahmad Syafii Maarif. Jakarta: Mizan Publika. ISBN 979-433-553-3. https://books.google.co.id/books?id=BLt3_fQw7-IC&pg=PA27&lpg=PA27&dq=pagaruyung+%22Kumanis%22&source=bl&ots=pFP48Lgp4W&sig=ACfU3U0_c1R_6cwxOJfBmKbZDkAXPhXjlg&hl=en&sa=X&ved=2ahUKEwiblIP26YjpAhUk63MBHT32BF0Q6AEwCHoECAkQAQ#v=onepage&q=pagaruyung%20%22Kumanis%22&f=false. Diakses pado 19 Mei 2021.
- Rusli Amran (1981). Sumatra Barat hingga Plakat Panjang. 1. Jakarta: Sinar Harapan. https://www.google.co.id/books/edition/Sumatra_Barat_hingga_Plakat_Panjang/Z_YdAAAAMAAJ?hl=en&gbpv=1&bsq=lembah+selo+%22marapalam%22&dq=lembah+selo+%22marapalam%22&printsec=frontcover. Diakses pado 19 Mei 2021.
- Muhamad Radjab (2019). Perang Paderi di Sumatra Barat, 1803–1838. Jakarta: Balai Pustaka. ISBN 978-602-481-232-4.
- Sjafnir Aboe Nain (1988). Tuanku Imam Bonjol: Sejarah Intelektual Islam di Minangkabau, 1784–1832. Padang: ESA. https://www.google.co.id/books/edition/Tuanku_Imam_Bonjol/Ui0eAAAAMAAJ?hl=en&gbpv=0&bsq=%22Bukit%20Marapalam%20dari%20arah%20desa%20Tanjung%22.
- De Graaf, S. & D. G. Stibbe (1918). Encyclopaedie van Nederlandsch-Indie Tweede Druk. 'S Gravenhage: Martinus Nijhoff. https://resolver.kb.nl/resolve?urn=MMKB02:000117875:pdf.