Yang Dipatuan Pagaruyuang

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Yang Dipatuan Pagaruyuang atau Rajo Alam marupoan gala bagi rajo-rajo nan mamarintah Karajaan Pagaruyuang dan salah satu urang nan disabuik Rajo Tigo Selo.

Etimologi[suntiang | suntiang sumber]

Yang Dipatuan marupoan gala nan ado di Minangkabau dan tanah Melayu nan mandapek pangaruah dari Minangkabau sarupo Nagari Sambilan. Gala iko bamakna baso urang nan manjadi rajo dituankan dalam masyarakaik Minangkabau. Manuruik Tambo, Rajo Alam iolah salah satu dari tigo katurunan Iskandar Zulkarnain nan marantau ka Minangkabau, banamo Maharajodirajo, niniak muyang urang Minangkabau.[1]

Paran[suntiang | suntiang sumber]

Paran pantiang Yang Dipatuan Pagaruyuang adolah sabagai pamarsatu dan managokan daulat Alam Miangkabau.[2] Basamo Rajo Adat jo Rajo Ibadat, Yang Dipatuan Pagaruyuang mamacik Pucuak Pimpinan Minangkabau. Rajo Alam mambawahi Rajo Adat jo Rajo Ibadat. Tigo pimpinan itu disabuik Rajo Tigo Selo. Rajo Alam marupoan kapalo pamarintahan, Raja Adat mauruih masalah-masalah adaik istiadat, sarato Rajo Ibadat mauruih masalah-masalah agamo jo pandidikan.

Tiok-tiok rajo mampunyoi kadudukannyo surang. Rajo Alam bakadudukan di Pagaruyuang, Rajo Adat di Buo, jo Rajo Ibadat di Sumpur Kudus. Raja Alam manguasoi daerah-daerah rantau, di mano Rajo Alam maangkek wakia-wakianyo sabagai pajawek kuaso rajo nan bagala “urang gadang” atau “rajo kaciak”. Satiok taun wakia-wakia itu maantaran “ameh manah” kapado rajo.

Daerah-daerah rantau itu tabagi duo wilayah; Rantau Pantai Timur jo Rantau Pantai Barat. Rantau Pantai Timur tadiri dari Rantau nan Kurang Aso Duo Puluah (sapanjang Batang Kuantan) atau Rantau Tuan Gadih; Rantau Duo Baleh Koto (sapanjang Batang Sangir) atau Nagari Cati nan Batigo; Rantau Juduhan (Lubuak Gadang dan sakitarnyo) disabuik pulo Rantau Yang Dipatuan Rajo Bungsu; Rantau Bandaro nan 44 (sakaliliang Sei Tapung jo Kampar); Nagari Sambilan. Sadangkan Rantau Pantai Barat tadiri dari daerah Bayang nan Tujuah, Tiku Pariaman, Singkil jo Tapak Tuan disabuik pulo Rantau Rajo; Bandar X disabuik pulo Rantau Rajo Alam Surambi Sungai Pagu.

Sijarah[suntiang | suntiang sumber]

Dari Tambo urang Minangkabau, ado nan dapek dikaitkan jo bukti-bukti sijarah, misanyo kato Maharajodirajo diubuangkan jo panamuan batu-batu basurek di wilayah Darek Minangkabau pado maso Adityawarman nan bagala sabagai Maharajodirajo di Malayapura. Salain itu kato "tuan" alah ado pado zaman Adityawarman, misanyo pado Batu Basurek Ananggawarman sabagai yuwaraja (putra mahkota) manyabuik ayahnyo sabagai Surawasawan atau "Tuan Suruaso".[3]

Salanjuiknyo pangaruah Islam jo parubahan politik mampangaruahi pulo struktur kakuasoan, di tambo disabuik baso janjang kuaso Rajo Minangkabau tabagi tigo. Adonyo pambagian kuaso iko didukuang dek Tomé Pires dalam Suma Oriental nan ditulih pado abaik ka-16, nan manyabuik baso di Darek ado tigo rajo dan salah satunyo manjadi muslim sajak 15 taun lalu. Tacataik urang nan panah mamakai gala Rajo Alam iolah Puti Sipanjang Rambuik 2 bagala Yang Dipatuan Puti Rajo Alam Minangkabau, dan putranyo Remondung bagala Dang Tuanku Syah Alam Rajo Alam Minangkabau. Dalam Kaba Cindua Mato, duo urang itu ilang dari Alam Minangkabau.

Rujuakan[suntiang | suntiang sumber]

  1. Reid, Anthony (2005). An Indonesian frontier: Acehnese and other histories of Sumatra. NUS Press. ISBN 9971-69-298-8.
  2. Tsuyoshi., Kato,; Akiko., Iwata,; (Jakarta)., Balai Pustaka (2005). Adat Minangkabau dan merantau dalam perspektif sejarah. Jakarta: Balai Pustaka. ISBN 9796903601. OCLC 236620160. https://www.worldcat.org/oclc/236620160. 
  3. M., Mangkudimedja, R. (1979). Serat Pararaton. Departemen P dan K, Proyek Penerbitan Buku Sastra Indonesia dan Daerah. OCLC 18689017. http://worldcat.org/oclc/18689017.