Benteng Bukik Tak Jadi

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Benteng Bukik Tak Jadi adolah bekas benteng patahanan Kaum Padri nan talatak di Kampuang Chaniago, Nagari Ganggo Hilie, Kecamatan Bonjol, Kabupaten Pasaman, Sumatra Barat, Indonesia. Katiko malatuihnyo Parang Padri, benteng iko manjadi pusek komando pasukan Padri. Lokasi benteng maliputi bukik babantuak persegi panjang nan punyo kamiariangan hampie tagak luruih ka ateh. Di ateh bukik, pasukan Padri dulunyo mambangun struktur manyarupoi benteng sabagai basis patahanan Tuanku Imam Bonjol jo pangikuiknyo dari sarangan pasukan Balando sahinggo pado literatur Balanda nagari iko disabuik juo sabagai Benteng Bonjol.[1]

Pado catatan harian saurang prajurit Balando nan bapangkek Letnan I Boelhouwer, Benteng Bonjol digambaran puyo tembok-tembok nan tabuek dari batu-batu gadang nan teknik mambueknyo hampie samo jo benteng-benteng di Eropa. Sisi bukik dikalialingi dek parik patahanan dan rumpun batuang baduri nan sulik ditembus. Sajak 1833, pasukan Balanda bakali-kali manyarangan untuak manaklukan Benteng Bonjol, namun ruponyo manuai kagagalan. Balando baru dapek manjatuhan Benteng Bonjol dek karano sarangkaian sarangan nan batubi-tubi pado 15 Agustus 1837.[2]

Pado 2007, Balai Pelestarian Cagar Budaya (BPCB) Sumatra Barat manatapkan bekas Benteng Bonjol sabagai cagar budaya. Namun, kondisinyo kini ko indak tarawat jo indak ditamuan lai struktur bangunan nan manandoan adonyo sabuah bangunan patahanan. Untuak manandoannyo di maso kini, mako didirianlah monumen di puncak bukik untuak manganang pajuangan Tuanku Imam Bonjol. Dari ateh bukik, namapak pamandangan nagari Bonjol dan sakitaranyo.[3]

Deskripsi[suntiang | suntiang sumber]

Bukik Tajadi ko mamanjang sakitar 1 kilometer. Topografi tanahnyo barundak hinggo katinggian 400 sampai 500 meter. Sisi bukik mampunyoi suduik kamiriangan nan curam, bahkan hampie tagak luruih. Jejeran rumpun batuang baduri ditanam rapek-rapek mangualilingi sisi bukik nan dulunyo baguno sabagai sistem patahanan nan sulik ditambuih dek musuah, samantaro Kaum Padri dapek mangamati garak musuah tapi indak taliek.[4][3][5]

Lukisan Bonjol pado tahun 1839.

Bukik Tajadi babantuak segi ampek nan dipisahan dek sabuah batang aia nan arusnyo dareh. Dalam buku Kenang-kenangan Sewaktu di Sumatera Barat tahun 1831–1834, saurang prajurit Balando bapangkek Letnan I Boelhouwer manyabuik Benteng Bonjol dibangun jo teknik nan hampia samo jo benteng-benteng di Eropa. Tigo sisi Bonjol dikalialingi dek dindiang patahanan duo lapih satinggi kurang labiah 3 meter. Tembok lua tadiri dari batu-batu gadang, manuruik Boelhouwer, marupoan tembok benteng nan kokoh. Di antaro kaduo tembok benteng, dibuek parik nan dalam jo lebanyo 4 meter. Di ateh tembok benteng, ditanam batuang baduri " nan alah hampie barupo rimbo duri nan indak dapek ditambuih". Urang-urang Padri, manuruik kato Boelhouwer marujuik pado Kaum Padri, manampekan pangintai dan panembak jitu dibaliak batuang baduri untuak mamantau pagerakan pasukan Balanda.[6]

Di babarapo tampek taliek mariam-mariam kaliber 12 pon jo padati baroda kayu indak pakai jari-jari untuak. Di dakek mariam tasabuik, tadapek batu bulek sabagai pangganti paluru. Boelhouwer manulih, "Sungguh mengherankan bagaimana mereka dapat membawa meriam sebesar itu ke atas bukit, sedangkan kami (maksudnya Belanda) hanya mampu membawa meriam kaliber tiga pon. Itu pun harus dipereteli."[7]

Di lua Bonjol, tadapek musajik babantuak sagi ampek nan dibangun indak pakai paku jo basi nan atok tadiri dari limo lapih nan makin lamo makin ketek dan tatutuik sirap, bahan nan samo jo dipakai untuak atok gareja-gareja di Eropa dan dapek manampuang kurang labiah 3.000 urang. "Dengan teknologi yang begitu sederhana, mereka dapat meneiptakan bangunan yang sebegitu besar," tulih Boelhouwer.[8]

Pangapuangan Bonjol[suntiang | suntiang sumber]

Jatuahnyo Bukit Tajadi ka tangan Balando, diilustrasikan dek G. Kepper.

Pamarintah kolonial manuai sajumlah kagagalan dalam usahonyo untuak manaklukan Benteng Bonjol, pusek komando pasukan Padri nan dipimpin dek Tuanku Imam Bonjol. Gagalnyo panyarangan ka Bonjol dimuek dalam laporan Gubernur-Jenderal Hindia Balando Van den Bosch tanggal 21 September 1833. Sulitnyo manambuih Benteng Bonjol adolah salah satu faktor nan mampalambek garak laju sarangan Balando dalam malumpuahkan Kaum Padri.[9]

Pado 21 April 1835, operasi militer ka Bonjol kambali dilancarkan, dipimpin dek Letnan Kolonel Bauer. Pado tangah malam 16 Juni 1835, pasukan Balando bahasia mandakek ka Bonjol "dalam jarak kiro-kiro hanyo 250 langkah".[10] Babarapo kubu patahanan Kaum Padri nan barado di sakitar Bukik Tajadi dirabuik pado awa September 1835, namun pasukan Balando alum bahasia manguasai Bukik Tajadi. Pasukan Balando justru kambali manuai kagagalan sasudah Kaum Padri ka lua benteng manyarang pasukan Balando dan mahancuan kubu-kubu patahahan Balando nan dibuek di sakitar Bukik Tajadi.[11]

Balando baru dapek manjebol sabagian Benteng Bonjol pado akhia 1836, tetapi Kaum Padri jo kagiagiahan dan samangaik juang tinggi bahasia mausia baliak pasukan Balando dari benteng. Sasudah kagagalan panaklukan Bonjol tu, Gubernur-Jenderal Hindia Balando nan baru Dominique Jacques de Eerens manunjuak Mayor Jenderal Cochius, saurang pawira tenggi Balando nan punyo kapandaian dalam strategi parang Benteng Stelsel, untuak mamimpin sarangan nan labiah gadang ka Benteng Bonjol untuak kasakian kalinyo.[12]

Pado 16 Maret 1837, sarangan intensif ka Bonjol dek pasukan Balando dimulai. Pado 3 Agustus 1837 dipimpin dek Letnan Kolonel Michiels, Balando saketek-saketek manguasai kaadaan. Benteng Bonjol jatuah pado 15 Agustus 1837, dan bisuak harinyo, Benteng Bonjol dapek ditaklukkan sacaro kasaluruahan. Walaupun damikian, Tuanku Imam Bonjol lolos dari pangapuangan dan kalua dari benteng dikawani dek babarapo pangikuiknyo. Imam Bonjol mancubo mangadoan konsolidasi kapado pasukannyo nan alah bacarai-barai jo lamah, sasudah labiah dari tigo taun baparang malawan Balando. Hanyo saketek sajo lai pasukan nan masih siap baparang. Meliek kanyataan samacam iko, Imam Bonjol manyaruan kapado pasukannyo nan alah bacerai-barai bia dapek baliak ka kampuang laman masiang-masiang.[2][13]

Kondisi pado maso kini[suntiang | suntiang sumber]

Manuruik panaluasuran Kompas pado 2010, area Bukik Tajadi nan manjadi bekas Benteng Bonjol kondisinyo alah tak tarawat dan ditumbuahi samak baluka. Jalan mandaki ka ateh bukik masih dapek diliek barupo jalan satapak, tetapi "samakin mandaki ka ateh, jalan tu samakin sulik dilalui". Babarapo bangunan masih dapek diliek bekasnyo, sarupo kolam, gudang untuak ransum makanan pasukan, rumah patahanan, kandang kudo, jo lubang pasambunyian. Salain tu, tadapek area nan punyo lubang-lubang ketek di ateh tanah sabagai siso tungku, nan deipakiroan marupoan bagian dari dapua nan digunoan pado maso pajuangan Tuanku Imam Bonjol.[4][3][14]

Di kaki salah satu sisi Bukik Tajadi, tapeknyo di balakang Pasa Nagari Ganggo Hilia, ditamuan mariam nan tatimbun dalam tanah sadalam 2 meter. Mariam tu kini dikana jo namo "Sutan Palembang", ditutuik karamik di dalam ruangan baukuran 4 × 4 meter. Hanyo moncong atau ujuang bagian ateh mariam nan nampak dari lua. Salain mariam, tadapek lasuang untuak manumbuak mesiu jo babarapo buah palurunyo.[14][15]

Pada 1985, dibangun sabuah tugu paringatan sarato jo tulisan nan dikutip dari Tuanku Imam Bonjol di ateh Bukik Tajadi. Tulisan tu barupo ungkapan kakacewaannyo kapado masyarakaik Bonjol nan tapacah dan indak namuah basatu: "Menghadapi kolonial Belanda bukan persoalan bagiku. Tapi, mempersatukan Bonjol, aku terluka karenanya."[4]

Pado 2007, kabaradoan Bukik Tajadi sabagai bekas Benteng Bonjol dimasuakan dalam daftar inventaris cagar budayo dek Balai Pelestarian Cagar Budaya (BPCB) Sumatra Barat. Salain sabagai objek wisata sajarah, pamanfaaikan Bukik Tajadi diarahan sabagai objek wisata olahraga. Sajak 2015, Pamarentah Kabupaten Pasaman manyiapkan Bukik Tajadi untuak wisata olahraga paralayang.[16]

Catatan kaki
Rujuakan