Kaum Paderi
Kaum Paderi atau Gerakan Paderi (diijo pulo Pidari) adolah imbauan nan diagiah ka sakalompok masyarakaik pandukuang utamo panagakan syariaik Islam dalam tatanan masyarakaik Minangkabau.[1] Istilah ko manjadi tanamo utamonyo katiko maso Parang Paderi nan marujuak pado panganuik agamo Islam nan katuju manjalankan hukum Islam sacaro manyaluruah di kawasan Karajaan Pagaruyuang. Ide ko mulonyo dibaok dek tigo urang haji nan baru pulang dari Makah kiro-kiro pado taun 1803: Haji Miskin dari Pandai Sikek, Haji Piobang dari Limopuluah Koto, jo Haji Sumanik dari Sumanik.[2] Kaum Paderi manjadi lawan bagi Kaum Adaik. Samaso Parang Paderi, Kaum Paderi mamakai baju putiah, sadangkan Kaum Adaik babaju itam.[3]
Kato ‘paderi' marupokan kato serapan nan manuruik Sutan Mohammad Zain, barasa dari bahaso Portugih nan aratinyo pandito, atau bamukasuik samo jo kato ‘padre’ dalam bahaso Spanyol nan bisa baarati pandeka agamo.[4] Namun, sabagian sijarawan malah bapandapaik, kato ‘paderi’ adolah sabutan untuak alim ulama nan panah baraja agamo Islam di Pedir, sabuah tampek di Aceh nan kini banamo Pidie.[5][6]
Asa mulo[suntiang | suntiang sumber]
Kamunculan Kaum Paderi sangaik arek kaitannyo jo kondisi urang Minangkabau sangkek tu. Sabalun ado Kaum Paderi, panduduak Minangkabau alah manganuik pulo agamo Islam. Namun, panduduak masih banyak nan maanggap ajaran Islam hanyo sabateh surau atau musajik. Sampai akhianyo di taun 1803 pulanglah tigo urang haji dari Makah: Haji Miskin, Haji Piobang, jo Haji Sumanik. Katigo haji ko pulang jo mambaok pamahaman Wahabi nan sangkeknyo pai haji sadang bakambang. Katiko baliak ka nagari surang-surang, cukuik kaheranan jo sadiah katigonyo dek mancaliak tingkah urang Minangkabau nan dianggap indak sasuai jo ajaran Islam, sarupo manyabuang ayam. Dek hal ikolah, katigo haji ko barundiang dan supakaik untuak mamasuakan ajaran Wahabi ka Ranah Minang satiok badakwah jo tujuan supayo umaik Muslim dapek satia pado ajaran agamonyo.[7]
Tokoh utamo[suntiang | suntiang sumber]
Harimau nan Salapan[suntiang | suntiang sumber]
Haji Miskin nan barasa dari Pandai Sikek, pulang ka nagarinyo untuak maaja agamo Islam sarato maimbau umaik untuak tunduak pado ajaran Islam dalam kaidupan saari-ari. Sampai suatu ari, Haji Miskin, dibantu surang pangulu, pai ka balai adat untuak malarang panduduak Pandai Sikek dari manyabuang ayam. Namun, larangan iko diabaikan dek panduduak Pandai Sikek. Pado malam arinyo, Haji Miskin pai ka balai adat nan salamo ko manjadi tampek manyabuang lalu mambakanyo. Panduduak (nan kudiannyo disabuik Kaum Adaik) nan tau mangajanyo inggo inyo dapek malarikan dari ka Koto Laweh dan disalamaikkan dek Tuanku Mansiangan. Dalam palinduangan Tuanku Mansiangan, Haji Miskin mandakwahi pulo paham Wahabi sainggo Tuanku dapek dipangaruahi.[7]
Kaum Adaik dari Pandai Sikek nan manahan dandam ka bakeh Haji Miskin baulah pulo baliak di Koto Laweh, sainggo mambuek kondisi nan indak aman untuak Haji Miskin. Haji Miskin pun pai mancari palinduangan ka Bukik Kamang. Salamo di Kamang, Haji Miskin dilinduangi dek Tuanku nan Renceh. Bacaritolah Haji Miskin ka Tuanku nan Renceh soal ajaran nan dibaoknyo. Tuanku pun akhianyo katuju pulo untuak turuik sato mangambangkan dakwah Haji Miskin.[7]
Haji Miskin rutin maadoan patamuan jo Haji Sumanik sarato Haji Piobang untuak malarang anak nagari dari manyabuang ayam, baampok, sarato maisok candu. Dari tiok patamuan pun, jumlah pangikuik samakin batambah utamonyo nan dari Luak Agam. Namun, indak sadoalah urang di kampuang satuju jo ajaran tasabuik bahkan ado pulo indak manatang kareh inggo marusak surau, cando nan tajadi di Batu Taba.[7]
Dek panantangan dari Kaum Adaik samakin kareh, Tuanku nan Renceh maraso paralu untuak maimpun massa untuak mahadapinyo. Kudian Tuanku nan Renceh maajak tuanku-tuanku sa-Agam untuak barundiang. Ajakan iko ditarimo sainggo tibo tujuah tuanku dari sagalo panjuru Agam dan lai satuju jo Tuanku nan Renceh malawan Kaum Adaik. Tuanku-tuanku Agam ko kudian mambantuak ikatan alim ulama nan disabuik sabagai Tuanku nan Salapan atau Harimau nan Salapan. Ado babarapo versi tantang sia sajo tokoh nan tamasuak di dalamnyo. Manuruik M. Radjab tokoh-tokoh tasabuik di antaronyo:[7]
- Tuanku nan Renceh dari Kamang
- Tuanku Lubuak Aua dari Canduang
- Tuanku Barapi dari Bukik (Canduang)
- Tuanku Ladang Laweh dari Banuhampu
- Tuanku Padang Lua dari Padang Lua
- Tuanku Galuang dari Sungai Pua,
- Tuanku Biaro dari Biaro, jo
- Tuanku Kapau dari Kapau
Sadangkan dalam panalusuran Mahmoed Yoenus (1979) jo Mestika Zed (2008), namo-namo alim ulama nan tagabuang antaro lain:[8]
- Tuanku di Kubu Sanang
- Tuanku di Ladang Laweh
- Tuanku di Padang Lua
- Tuanku di Galuang
- Tuanku di Koto Ambalau
- Tuanku di Lubuak Aua
- Tuanku nan Renceh, jo
- Tuanku Haji Miskin
Tuanku Lintau[suntiang | suntiang sumber]
Tuanku Lintau atau nan disabuik juo sabagai Tuanku Pasaman marupokan pamimpin Paderi di Tanah Data.[3]
Tuanku nan Barampek[suntiang | suntiang sumber]
Tuanku nan Barampek marupokan ikatan dari ampek tuanku di Bonjol, Pasaman, nan dipimpin dek Tuanku Imam Bonjol.[3]
Tuanku Tambusai[suntiang | suntiang sumber]
Tuanku Tambusai marupokan pimpinan Kaum Paderi di Rokan. Baliau basamo Tuanku Rao turuik sato dalam manyebakan Islam di Mandailing jo Padang Lawas.[3]
Caliak pulo[suntiang | suntiang sumber]
Rujukan[suntiang | suntiang sumber]
Catatan kaki[suntiang | suntiang sumber]
- ↑ Munsyi & Hamiyati 2003, hlm. 143.
- ↑ Radjab 2019, hlm. 8-19.
- ↑ a b c d Amran 1981, hlm. 387-398.
- ↑ Munsyi & Hamiyati 2003, hlm. 62.
- ↑ Ensiklopedia Islam 2002, hlm. 66.
- ↑ Kayo 2010, hlm. 42.
- ↑ a b c d e Radjab 2019, hlm. 3-9.
- ↑ Kayo 2010, hlm. 39.
Daftar pustaka[suntiang | suntiang sumber]
- Radjab, Muhammad (2019). Perang Padri di Sumatra Barat (1803-1838). Jakarta: Balai Pustaka & Kepustakaan Populer Gramedia. ISBN 978-602-481-232-4.
- Amran, Rusli (1981). Sumatra Barat Hingga Plakat Panjang. Jakarta: Sinar Harapan.
- Munsyi, Alif Danya; Hamiyati, Yul (2003). 9 dari 10 Kata Bahasa Indonesia adalah Asing. Kepustakaan Populer Gramedia. http://books.google.co.id/books?id=1wkl03ijMeIC&dq=Minangkabau&hl=id&source=gbs_navlinks_s.
- Dewan Redaksi Ensiklopedia Islam (2002). Ensiklopedia Islam, Jilid 4. Jakarta: Ichtiar Baru van Hoeve. ISBN 979-8276-65-5.
- Kayo, Khatib Pahlawan; Mardjohan (2010). Muhammadiyah Minangkabau (Sumatra Barat) dalam Perspektif Sejarah. Yogyakarta: Suara Muhammadiyah. ISBN 978-979-3708-91-1.
