Depati Amir

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Depati Amir (lahia di Mendara, Bangka, 1805 - maningga di Air Mata, Kota Lama, Kupang, Nusa Tenggara Timur, 28 September 1869) marupokan salah surang pahlawan nasional nan barasa dari Bangka. Sumangek parewanyo tanamo di ampia sadoalah Pulau Bangka. Depati Amir aktif malawan Balando di Bangka nan pado maso tu manguasoi tambang timah. Palawanannyo dinilai marugikan adok tambang urang Balando, sainggo baliau diasiangkan ka Kupang, Timor. Namonyo kini diabadikan manjadi namo palabuahan udaro, stadion, sarato rumah sakik di Pulau Bangka. Pado taun 2018, basamo limo tokoh lainnyo, baliau dianugerahi gala pahlawan nasional.[1][2]

Kahidupan[suntiang | suntiang sumber]

Depati Amir adolah anak dari pangulu Bangka nan banamo Depati Bahrin. Sabalun mandapek gala depati, Amir alah manjadi tokoh bapangaruah di Bangka. Amir panah pulo mamimpin masyarakaik untuak malawan parompak di lauik sakitaran Bangka. Pado taun 1830, Amir diangkek manjadi depati. Depati marupokan gala nan diagiah dek Kasultanan Palembang untuak surang pamimipin di ciek atau banyak kampuang. Depati Bahrin sabalunnyo mamimpin Kampuang Mendara jo Mentadai. Namun, gala iko ditulak dek Amir lantaran baliau labiah katuju manjadi urang biaso. Walau baitu, Amir tatap bapangaruah di Bangka.[3][1][4][5]

Pajuangan[suntiang | suntiang sumber]

Namo Depati Amir diabadikan manjadi namo palabuahan udaro di Bangka.

Bangka[suntiang | suntiang sumber]

Pajuangan Depati Amir bamulo dari urusan kaluarganyo jo Balando. Maso itu, Balando mulai manggali parik-parik tambang rimah di Pulau Bangka dan bakongsi jo Depati Bahrin untuak manambang di tanahnyo. Namun, Balando indak manyalasaian kawajibannyo baiyua dari hasia tambangnyo ka Depati Bahrin. Hal itu mamanciang berang Depati Amir sainggo baliau maajukan tuntutan ka parusahoan Balando tu dan mandapek dukuangan dari panduduak Bangka.[3][4][5]

Tuntutan Depati Amir tadanga dek Residen Balando di Bangka, F. van Olden. Residen Balando manilai baso upayo nan dilakukan dek Depati Amir dapek mamanciang palawanan dari panduduak Bangka. Lalu, Pamarintah Balando mautuih pajabat-pajabat pantiang untuak manangkoknyo. Namun, upayo tasabuik indak tacapai. Depati Amir samakin mandapek dukuangan dari masyarakaik nan salamo ko alah dipakarajokan dek Balando, baiak dari urang Malayu Bangka ataupun dari urang Cino Bangka. Dukuangan didapek pulo dari tokoh-tokoh lokal lainnyo nan maraso dirugikan dek Balando. Dek dukuangan-dukuangan ko, baliau mandapek banyak bantuan pasukan jo sanjato, baiak dari lokal inggo bantuan sanjato dari Singapura. Palawanan Depati Amir malaweh inggo sapanjang pasisia timur Bangka.[3][4][5]

Pangasiangan[suntiang | suntiang sumber]

Pado 7 Januari 1851, Depati Amir barasia ditangkok dek Balando. Panangkapan tasabuik tajadi dek Balando barasia manyuok 7 urang panglima jo 35 pasukan Depati Amir nan sadang sulik jo logistik. Amir tatangkok dalam kondisi sakik.[3][4][5]

Pado 11 Februari 1851, Depati Amir dikirim ka tampek pangasiangan di Kupang, Timor. Walau dalam pangasiangan, pajuangan Depati Amir malawan Balando indak juo padam. Basamo adiaknyo, Hamzah atau tanamo juo sabagai Cing, liau manjadi panasihaik untuak rajo-rajo di Timor dan juo turuik aktif manyebarkan agamo Islam di Pulau Timor.[3][1][4][5]

Pahlawan Nasional[suntiang | suntiang sumber]

Pado tanggal 8 November 2018, Pamarintah Republik Indonesia malalui Presiden Ir. Joko Widodo maanugerahkan gala Pahlawan Nasional sarato ditabikkannyo Keppres No 123/TK/Tahun 2018, tantang Penganugerahan Gelar Pahlawan Nasional.[2][4][5]

Rujuakan[suntiang | suntiang sumber]

  1. a b c arman, dedi (2018-11-08). "Depati Amir, Pahlawan Nasional Pertama dari Babel". Balai Pelestarian Nilai Budaya Kepulauan Riau (dalam bahasa Inggris). Diakses tanggal 2020-06-13. 
  2. a b Jordan, Ray. "Jokowi Anugerahi Gelar Pahlawan Nasional ke 6 Tokoh". detiknews (dalam bahasa Indonesia). Diakses tanggal 2020-06-13. 
  3. a b c d e "Depati Amir, Pahlawan dari Pulau Timah". Historia - Majalah Sejarah Populer Pertama di Indonesia (dalam bahasa Indonesia). Diakses tanggal 2020-06-13. 
  4. a b c d e f "Pahlawan Nasional 2018: Depati Amir, Penentang Tambang Asing". tirto.id (dalam bahasa Indonesia). Diakses tanggal 2020-06-13. 
  5. a b c d e f "Riwayat Depati Amir, Putra Bangka Penentang Belanda". Republika Online (dalam bahasa Indonesia). 2018-11-11. Diakses tanggal 2020-06-13.