Bagindo Aziz Chan

Dari Wikipedia baso Minang, ensiklopedia bebas
Loncat ke navigasi Loncat ke pencarian
Bagindo Azizchan
Bagindo Azizchan.jpg
Wali kota Padang ka-2
Maso jabatan
1946–1947
Didaului jo Mr. Abubakar Jaar
Digantian dek Said Rasad
Data paribadi
Lahia 30 September 1910
Bendera Balando Padang, Hindia Balando
Wafaik 19 Juli 1947 (umua 36)
Bendera Indonesia Padang, Indonesia
Kabangsaan  Indonesia Indonesia
Pasangan hiduik Zaora Oesman
Profesi Pandidik
Agamo Islam

Bagindo Azizchan (lahia di Padang, 30 September 1910 – maningga di Padang, 19 Juli 1947 pado umua 36 taun) adolah pajuang kamardekaan Indonesia. Baliau manjabat Wali Kota Padang nan kaduo sasudah kamardekaan nan dilantiak pado tanggal 15 Agustus 1946 manggantian Mr. Abubakar Jaar.[1] Baliau maningga pado umua 36 taun sasudah talibat dalam sabuah patampuran malawan Balando. Jasadnyo dimakamkan di Taman Makam Pahlawan Bahagia, Bukittinggi. Gala Pahlawan Nasional Indonesia diagiahan kapado baliau pado 9 November 2005.

Laia pado 30 September 1910, Bagindo Azizchan manjalani pandidikan HIS di Padang, MULO di Surabaya, sarato AMS di Batavia. Tamat dari AMS jo sempat duo taun duduak di Rechts Hooge School (RHS), baliau sempat mambukak praktik pangacara sarato aktif di babarapo organiasi, di antaranyo sabagai anggota panguruih Jong Islamieten Bond di bawah pimpinan Agus Salim. Babaliak ka kampuang halamannyo pado taun 1935, baliau mangabdi sabagai guru di babarapo sakola di Padang sarato bakali-kali pindah maaja ka lua kota. Baliau sempat aktif di Persatuan Muslim Indonesia (Permi) sampai organisasi tu dibubaran pado taun 1937. Sasudah proklamasi kamardekaan, baliau ditunjuak sabagai wakil Wali Kota Padang pado 24 Januari 1946 sarato pado 15 Agustus 1946 dilantiak sabagai wali kota manggantian Mr. Abubakar Jaar nan pindah tugas manjadi residen di Sumatera Utara.

Di tangah situasi pasca-kadatangan Sakutu di Padang pado 10 Oktober 1945, baliau manulak tunduak kapado kakuatan tantara Balando nan barado di balakang tantara Sakutu.[2] Baliau taruih malakuan palawanan jo caro manabik-an surek kaba pajuangan nan banamo Republik Indonesia Jaya, bahkan turun langsuang mamimpin palawanan kapado Balando sampai akhianyo tewas pado tanggal 19 Juli 1947.[3] Manuruik hasil visum (nan dilakuan di Rumah Sakit Tentara Dr. Reksodiwiryo, Ganting kini), baliau maningga karano takanai barang tumpua sarato tadapek tigo bakeh tembakan di wajahnyo.

Pahormatan[suntiang | suntiang sumber]

Untuak mahormati jaso-jaso sarato pangorbanannyo, namonyo diabadian manjadi namo jalan di babarapo kota, sarupo di Padang jo Bukiktinggi. Di Padang, sabuah monumen babantuak kapalan tinju didirian di pasimpangan Jalan Gajah Mada jo Jalan Jhoni Anwar, Kampuang Olo, Nanggalo. Walaupun diresmian sabagai Monumen Bagindo Azizchan dek Wali Kota Padang Syahrul Ujud pado 19 Juli 1983, monumen tu labiah dikana jo namo Tugu Simpang Tinju. Monumen lainnyo, talatak di Taman Melati (kompleks Museum Adityawarman), hasil karya palukih Wisran Hadi jo pemaek Arby Samah.

Rujuak-an[suntiang | suntiang sumber]

  1. ↑ Husein, Ahmad (1992). Sejarah Perjuangan Kemerdekaan R.I. di Minangkabau/Riau 1945-1950. Volume 1. Badan Pemurnian Sejarah Indonesia-Minangkabau. ISBN 978-979-405-126-9.
  2. ↑ Kahin, A. (1999). Rebellion to Integration: West Sumatra and the Indonesian Polity. 1926-1998. Amsterdam University Press. ISBN 90-5356-395-4.
  3. ↑ Sudarmanto, J. B. (2007). Jejak-jejak Pahlawan: Perekat Kesatuan Bangsa Indonesia. Grasindo. ISBN 978-979-759-716-0.

Pautan lua[suntiang | suntiang sumber]

Jabatan politik
Didaului jo:
Mr. Abubakar Jaar 		Wali kota Padang
1946—1947 		Digantian dek:
Said Rasad

Templat:Daftar wali kota Padang

Didapek dari "https://min.wikipedia.org/w/index.php?title=Bagindo_Aziz_Chan&oldid=485561"