Bawang merah

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Bawang merah
Bawang merah di pasa
Klasifikasi ilmiah
Kingdom: Plantae
Division: Magnoliophyta
Class: Liliopsida
Order: Asparagales
Family: Amaryllidaceae
Genus: Allium
Species: A.cepa
Variety: A.cepa var. aggregatum
Namo binomial
Allium cepa var. aggregatum
L.

Bawang merah (Latin: Allium cepa L. var. aggregatum, bahaso inggrih: Shallot) adolah ciek dari kebanyakan sayua yang paliang paralu dek urang banyak, apolagi untuak bumbu masak. Indak hanyo untuak masak, bawang ko juo bisa digunoan untuak sayua yang bisa langsuang dimakan mantah, dibuek jadi acar, dan bisa juo dijadian ubek.[1]

Asa-usua[suntiang | suntiang sumber]

Bawang merah ko dipicayo barasa dari negara Iran, Pakistan, jo pagunungan di sabalah utara negara itu. Kamudian manyeba ka panjuru dunia atau ka negara-negara lain, baiak yang sub-tropis jo tropis. Tamasuak Indonesia yang negaranyo tropis.[2] Meski baitu, bawang merah ko indak bisa iduik disadoalah wilayah di Indonesia. Bawang ko hanyo bisa iduik di daerah darek yang punyo suhu dingin. Di Indonesia, bawang merah ko taseba di 24 dari 34 provinsi di Indonesia. Provinsi yang paliang banyak memproduksi bawang merah ko adolah Sumatera Utara, Sumatara Barat, Jawa Barat, Jawa Tengah, Yogyakarta, Jawa Timur, Bali, Nusa Tenggara Barat, dan Sulawesi Selatan.

Bantuak[suntiang | suntiang sumber]

Bawang ko bantuaknyo bulek tapi indak samparono bantuak bola, ado lonjongnyo yang mangarucuik ka bagian ateh. Bawang ko strukturnyo balapis-lapis dari bagian intinyo di tangah sampai ka bagian kuliknyo. Barikuik labiah jalehnyo:

  • Aka

Bawang merah ko akanyo sarabuik yang akanyo tumbuah dangka atau dak talalu dalam. Aka bawang ko bacabang-cabang banyak yang tumbuah sekiro 15-30 senti di dalam tana.[3]

  • Batang

Batang bawang merah ko cukuik iniak, dari pangkanyo sampai ka ujuangnyo ampiang sarupo, indak ado nan kareh alias semu. Bantuaknyo batang sajati atau disabuik "diskus" yang bantuaknyo sarupo jo cakram, tipih jo pendek. Di situ malakek aka nyo sakalian jo mato tunehnyo. Struktur batang bawang ko labiah babantuak palapah-palapah daun yang sampai ka bawahnyo manjadi umbi balapis yang akan manjadi bawang merah. Warna batangnyoko biasonyo putiah jo kadang-kadang kaijauan saketek.[3]

  • Daun

Daun bawang merah ko babantuak silindrih ketek yang mamanjang antaro 50-70 senti, bantuaknyo balubang jo bagian ujuangnyo nan runciang. Warnanyo ijau mudo sampai tuo. Lataknyo pado tangkai yang ukurannyo cukuik pendek.[3]

  • Bungo

Tangkai bungo pado bawang merah ko kalua dari ujuang tanamannyo yang panjangnyo antaro 30-90 senti. Di ujuangnyo ado 50-200 kuntum bungo yang tasusun malingka sarupo payuang. Tiok kuntumnyo ado 5-6 alai daun bungo yang warnanyo putiah. Salanjuiknyo ado 6 banang sari yang warnanyo ijau atau agak kuniang. Ado 1 putiak bungo yang ka manjadi buah yang bantuaknyo sagitigo. Bungo bawang adolah bungo yang samporono (hermaprodit) yang bisa manyarabuik surang.[3]

  • Buah jo incek

Buang bawang merah ko bantuaknyo bulek yang ujuangnyo tumpua. Buahnyo mambungkuih inceknyo yang bajumlah 2-3 butia. Sadangkan bantuak inceknyo labiah pipih yang mudonyo bawarna putiah baniang dan tuonyo bawarna itam. Incek bawang bisa digunuoan untuak mampabanyak tanamannyo sacaro generatif.[3]

Mamfaaik[suntiang | suntiang sumber]

Bawang merah ko cukuik banyak mamfaaiknyo, baik untuk masakan ataupun untuak ubek. Jiko untuak masakan, bawang merahko bisa dicampua langsuang ka masakan sarupo gulai, samba lado, dan yang lainnyo dengan caro dihaluihan, atau bisa juo dicampua kamakanan sarupo soto, mi ayam, sup dan lainnyo dengan caro digoreng talabiah dulu atau dicampua langsuang mode acar.[4]

Jiko untuak ubek, bawang merah ko bamamfaaik untuk ubek tradisional yang bisa maubekan panyakik maag, masuak angin, damam tinggi, batuak, manurunan kada gulo darah, manurutan kolestrol, ubek kanciang manih atau diabetes, malancaran pernafasan dan aliran darah karano bawang merah ko bisa maambek trombosit dan meningkekan aktivitas fibrinotik. Bahkan, bawang merah ko bisa jadi ubek kanker.[4]

Itu karano bawang ko manganduang kuersetin, antioksidan yang kuek yang batindak sabagai agen uantuk maambek sel kanker, dan juo banyak protein, mineral, sulfur, antosianin, karbohidrat, dan serat yang bamamfaat untuak kesehatan tubuah. Dari panalitian yang ado, satu satangah sampai tigo ons bawang merah ko jikok dikosumsi sacaro taratur bisa malindungi tubuah dari kanker. Bawang ko juo dipakayo jo flanoid yang dikatahui untuk mamatian sel kanker.[3]

Salah satu ramuannyo untuak ubek batuak adolah campuran bawang merah ko jo daun poko, daun sembung, herba pegagan, dan buah adas yang bisa diabuih jo aia yang aianyo abuiahannyo tu bisa langsuang diminum atau dibuek sarupo pil atau bisa juo dibuek sarupo gudokan.[5]

Mudaraik[suntiang | suntiang sumber]

Walau banyak mamfaiknyo, tanyato bawang merah ko ado pulo efek sampiangnyo. Bahayo itu bisa timbua pado saat kondisi tatantu sajo, sarupo keadaan tubuah yang indak lamak, dan bisa juo karano alergi. Efek sampiang yang ditimbulkannyo itu adolah, bisa tajadi gangguan pendarahan dek karano bawang mampalambek pambakuan darah sahinggo darang manjadi encer. Jadi urang yang sadang mangalami pandarahan dak dianjurkan makan bawang banyak-banyak apolai ekstrak bawang merah. Baitu pulo urang nan siap oparasi atau yang ka manjalani operasi.[6]

Salanjuiknyo, bagi urang yang alergi saledri dak bisa pulo akan bawang banyak-banyak, karano efek alerginyo samo, bisa sarupo ruam merah di tubuah, gata-gata kalau bawang kanai ka kulik atau uokan bawang sampai ka mato. Atau yang labiah parah bisa tajadi kapocongan, sasak angok, hinggo turunnyo takanan darah tubuah.[6]

Gangguan pancarnaan juo bisa tajadi dek gara-gara makan Bawang Merah banyak-banyak. Itu dek karano bawang merah bisa maningkekan produksi gas di dalam lambuang, sahinggo paruik kambuang, paruik dak lamak, jo mambuak katuik baun jo muluik baun bakalabiahan. Nan labiah parah bisa jadi maloyo jo muntah, dan mencret-mencret. Tapi dak sampai maancam nyao.[6]

Liek Pulo[suntiang | suntiang sumber]

Rujuakan[suntiang | suntiang sumber]

  1. Marlin; Maharijaya, Awang; Sobir; Purwito, Agus (2018). "The characteristic Performace of Quantitative Flowering Characters and Metabolomic Profile of Shallot (Allium cepa var. aggregatum) Induced by Vernalization". Jurnal Hortikultura Indonesia. 9 (3): 197–205. doi:10.29244/jhi.9.3.197-205. ISSN 2614-2872. 
  2. Hassan Shadily. Ensiklopedi Indonesia Volume 1. Jakarta: Ichtiar Baru-Van Hoeve.
  3. a b c d e f "Bawang Merah (Allium cepa L.) – CCRC" (dalam bahasa Inggris). Diakses tanggal 2021-07-17. 
  4. a b Budi Samadi; Bambang Cahyono (2005). Bawang Merah Intensifikasi usaha tani. Yogyakarta: Kanisius. ISBN 979-497-323-8. 
  5. Media, 4 Vision. "Manfaat Bawang Merah Bagi Kesehatan (Allium Cepa) | Yayasan Kesejahteraan Pegawai bank bjb_(YKP bank bjb)". ykpbankbjb.or.id. Diakses tanggal 2021-07-17. 
  6. a b c "Tak Banyak yang Tahu, Ternyata Bawang Merah Tak Boleh Dimakan Orang dengan 5 Kondisi Ini - Halaman all". Blog - TribunJualBeli.com (dalam bahasa Indonesia). Diakses tanggal 2021-07-17. 

Pranala Lua[suntiang | suntiang sumber]