Kulik manih

Wikipedia Minangkabau - Lubuak aka tapian ilimu
Guluangan kulik manih sailan (Cinnamomum verum, kida) jo kayu manih indonesia (C. burmanni, suok)

Kulik manih atau kulik kayu manih adolah sajinih rampah nan didapek dari kulik batang pohon genus Cinnamomum (pohon kayu manih). Kulik manih diambiak dek urang parak babantuak guluangan panjang kulik kayu nan mancapai kiro-kiro sameter. Dari kulik tasabuik dikariangan, dikarek, dan diolah. Olahannyo nan utamo adolah manjadi rampah untuak makanan nan manih. Salain itu, diolah pulo manjadi minyak atsiri atau oleoresin nan buliah dipakai manjadi bahan parfum, kosmetik, inggo ubek.[1]

Sajak zaman kolonial Hindia Ulando, kulik manih di Indonesia alah banyak dikambangkan manjadi barang niago utamo. Diekspor malalui Penang atau Singapura. Kulik manih manjadi komoditas utamo ekspor Indonesia ka internasional. Kulik manih dari Indonesia umumnyo barasa dari kayu manih spesies Cinnamomum burmanii. Daerah pangasia utamo kulik manih di Indonesia adolah Sumatera Barat jo Kurinci, Jambi.[2] Dari kaduo daerah ko, dapek manyadiokan hampia 45% kabutuahan kulik manih dunia. Dalam pasa dunia, kulik manih asa Indonesia disabuik Kerinci, Korintje, Indonesian cinnamon, Padang cassia, atau Batavia cassia, sadangkan nan dari tampek lain disabuik Verra atau Cassia.[3]

Salain Indonesia, Srilanka jo Cino juo manjadi nagara pangasia kayu manih utamo di dunia. Srilanka manjadi tampek asa kayu manih spesies Cinnamomum verrum, nan dek dunia internsional jinih iko nan disabuik kayu manih nan sabananyo (true cinnamon). Samantaro, kayu manih dari Cino utamonyo dihasiakan dari kayu manih spesies Cinnamomum cassia, nan banyak dipakai sabagai minyak atsiri ataupun ramuan ubek cino.[1]

Pangolahan[suntiang | suntiang sumber]

Hasia panen kulik manih dari parak di Batipuah, Sumatera Barat

Kayu manih dapek dipanen katiko alah barumua ampek taun. Batang kayu manih dikupek kuliknyo, lalu ditabang untuak mangupeh kulik cabang, dahan, inggo rantiangnyo. Salapeh dikupeh, kulik diparam salamo samalaman jo manumpuak kulik di tampek nan talinduang dari cahayo matoari lansuang. Pado kulik kayu nan leba, dikikih talabiah dulu jo katam.[4]

Sasuudah diparam, kulik manih dijamua di bawah cahayo maotari salam 3--4 hari inggo kadar aia manyusuik sampai 16% atau ditandoi jo bakurangnyo barek kulik manih inggo 50%. Salamo proses panjamuran, kulik manih nan lebar manyusuik inggo mangguluang surang cando tungkek. Salapeh dijamua, kulik manih disimpan di tampek kariang nan indak paneh.[4]

Minyak atsiri[suntiang | suntiang sumber]

Olahan lain dari kulik manih salain rampah adolah minyak atsiri. Minyak atsiri didapek dari malakukan distilasi pado kulik manih tasabuik. Minyak atsiri ko banyak dipakai untuak panguek aroma bahan makanan ataupun campuran parfum. Kanduangan eugenol jo formaldehid dari kulik manih basipek aromatik sarato mudah manguok.[4]

Minyak atsiri dibuek dalam babarapo proses. Partamo, kulik manih nan alah dikarek kudian diancuakan dan dimasuakan ka dalam baki. Baki tasabuik dilatakkan di ateh ketel destilasi. Kudian kompor diangekan inggo aia pado ketell uok manguok. Dalam proses destilasi, dihasiakan minyak jo aia nan alah tatampuang pado bak panampuang. Bagian ateh dari lapisan itu marupokan minyak atsiri kulik manih.[4]

Caliak juo[suntiang | suntiang sumber]

Rujuakan[suntiang | suntiang sumber]

  1. a b Siregar, Ameilia Zuliyanti (2021). Rempah, Bumbu, dan Sayuran Kering Indonesia. Malang: Intimedia. pp. 23-28. ISBN 9786236813041. 
  2. Siregar, Ameilia Zuliyanti (2021). Rempah, Bumbu, dan Sayuran Kering Indonesia. Malang: Intimedia. pp. 23. ISBN 9786236813041. 
  3. Siregar, Ameilia Zuliyanti (2021). Rempah, Bumbu, dan Sayuran Kering Indonesia. Malang: Intimedia. pp. 138. ISBN 9786236813041. 
  4. a b c d Siregar, Ameilia Zuliyanti (2021). Rempah, Bumbu, dan Sayuran Kering Indonesia. Malang: Intimedia. pp. 33-35. ISBN 9786236813041.