Tarumbu karang

Wikipedia Minangkabau - Lubuak aka tapian ilimu
Tarumbu karang di Luwuk, Sulawesi Tengah

Tarumbu karang adolah sakumpulan hewan karang nan basimbiosis jo sajinih tumbuahan alga nan disabuik zooxanthellae.[1] Tarumbu karang tamasuak ka dalam jinih filum Cnidaria kelas Anthozoa nan mamiliki tentakel. Kelas Anthozoa tersebut tadiri dari duo Subkelas yoitu Hexacorallia (atau Zoantharia) jo Octocorallia, nan kaduonyo dibedaan sacaro asal-usul. Morfologi jo Fisiologi.[2]

Koloni karang dibantuak dek ribuan hewan ketek nan disebut Polip.[3] Dalam bantuak sederhananyo, karang tadiri dari satu polip sajo nan mampunyoi bantuak tubuh saparti tabuang jo muluik nyo nan talatak di bagian ateh sarato dikaliliangi dek Tentakel. Namun pado kabanyakan Spesies, satu individu polip karang akan bakambang manjadi banyak individu nan disebut koloni. Hewan iko mamiliki bantuak nan unik jo warna nan bamacam-macam sarato dapek maahasikan CaCO3. Tarumbu karang marupoan habitat bagi babagai spesies tumbuahan lauik, hewan lauik, jo mikroorganisme lauik lainnyo nan alun diketahui.[1]

Istilah[suntiang | suntiang sumber]

Tarumbu karang sacaro umum dapek diartian ka struktur fisik sarato jo ekosistem nan manyaratoinyo nan sacaro aktif mambantuak sedimen kalsium karbonat akibaik aktivitas biologi (biogenik) nan balansuang di bawah permukaan lauik.[1] Manuruik ahli geologi, tarumbu karang marupoan struktur batuan sedimen dari kapua (kalsium karbonat) di dalam lauik, atau disingkek jo tarumbu. Bagi ahli biologi tarumbu karang marupoan suatu ekosistem nan dibantuak jo didominasi dek komunitas koral.

Istilah 'tarumbu karang', "karang" nan disabuik adolah koral, sekelompok hewan dari ordo Scleractinia nan mahasiakan kapua sabagai pambantuak utamo tarumbu. Tarumbu adolah batuan sedimen kapua di lauik, nan tamasuak juo karang hiduik jo karang mati nan manempel pado batuan kapua tersebut. Sedimentasi kapua di tarumbu barasa dari karang maupun dari alga. Sacaro fisik tarumbu karang adolah tarumbu nan tabantuak dari kapur nan dihasiakan dek karang. Di Indonesia sadoalah tarumbu barasa dari kapua nan ampiang dolahnyo dihasiakan dek koral. Karangko karang maalami erosi jo takumpua jo manempel di dasa tarumbu.

Habitat[suntiang | suntiang sumber]

Tarumbu karang pado umumnyo iduik di pinggia pantai atau daerah nan masih takanai dek cahayo matoari kurang labiah 50 m di bawah permukaan lauik.[1] Babarapo tipe tarumbu karang dapek iduik jauah di dalam lauik sarato indak butuah cahayo, tatapi tarumbu karang tersebut indak basimbiosis jo zooxanhellae sarato indak mambantuak karang.

Ekosistem tarumbu karang ampiang sadonyo tadapek di parairan tropis, sangaik sensitif taadok parubahan lingkuangan iduiknyo tautamo suhu, salinitas, sedimentasi, Eutrofikasi jo paralu kualitas perairan alami (pristine).[2] Demikian halnyo jo parubahan suhu lingkuangan akibat pamanasan global nan malando parairan tropis pado tahun 1998 alah manyababkan pamutiahan karang (coral bleaching) nan diikuti jo kamatian massal mancapai 90-95%. Salamo peristiwa pamutiahan tersebut, rato-rato suhu permukaan aia di parairan Indonesia adolah 2-3 °C di ateh suhu normal.

Kondisi optimum[suntiang | suntiang sumber]

Untuak dapek tumbuah jo bakambang biak sacaro baik, tarumbu karang mambutuahan kondisi lingkuangan iduik nan optimal, yoitu pado suhu nan hangat sakitar di ateh 20oC.[1] Tarumbu karang ko mamiliah iduik di lingkuangan nan parairan nyo janiah sarato indak ado polusi. Hal iko dapek bapangaruah pado penetrasi cahayo dek tarumbu karang.

Babarapo tarumbu karang mambutuahan cahayo matoari untuak malakukan kagiatan fotosintesis.[1] Polip-polip panyusun tarumbu karang nan talatak pado bagian ateh tarumbu karang dapek manangkok makanan nan tabaok arus lauik jo malakukan fotosintesis. Dek karano itu, oksigen-oksigen hasil fotosintesis nan talaruik dalam aia dapek dimanfaatkan dek spesies lauik lainnyo. Hewan karang sabagai pambangun utamo tarumbu adolah organisme lauik nan efisien karano mampu tumbuah subua dalam lingkuangan nan mamiliki nutrien (oligotrofik) nan saketek.[2]

Fotosintesis[suntiang | suntiang sumber]

Proses fotosintesis dek alga manyababkan batambahnyo produksi kalsium karbonat jo mahilangan karbon dioksida jo marangsang reaksi kimia sabagai berikut[4]:

Fotosintesis dek algae nan basimbiosis mambuek karang pambantuak tarumbu mahasiakan deposit cangkang nan tabuek dari kalsium karbonat, kiro-kiro 10 kali labiah capek daripado karang nan indak mambantuak tarumbu (ahermatipik) jo indak basimbiose jo zooxanthellae.[3]

Di Indonesia jo Indo Pasifik[suntiang | suntiang sumber]

Tarumbu karang marupoan salah satu komponen utamo sumber daya pesisir jo lauik, disampiang hutan bakau atau hutan mangrove jo padang lamun. Tarumbu karang jo sagala kahidupan nan ado di dalamnyo marupoan salah satu kakayoan alam nan dimiliki bangsa Indonesia nan indak tanilai haragonyo. Dipakiroan lueh tarumbu karang nan tadapek di parairan Indonesia adolah labiah dari 60.000 km2, nan tasebar lueh dari parairan Kawasan Barat Indonesia sampai Kawasan Timur Indonesia.[5] Contohnyo adolah ekosistem tarumbu karang di parairan Maluku jo Nusa Tenggara.

Indonesia marupoan tampek bagi sakitar 1/8 dari terumbu karang nan ado di dunia jo marupaoan nagara nan kayo jo kaanekaragaman biota parairan dibandiang jo nagara-nagara Asia Tenggara lainnyo.[5]

Bantangan tarumbu karang nan paliang gadang jo nan paliang kayo dalam hal jumlah spesies karang, ikan, jo moluska tadapek pado regional Indo-Pasifik nan tabantang mulai dari Indonesia sampai ka Polinesia jo Australia lalu ka bagian barat yoitu Samudera Pasifik sampai Afrika Timur.[6]

Manfaat[suntiang | suntiang sumber]

Tarumbu karang menganduang babagai manfaat nan banyak bana jo bamacam-macam, baiak sacaro lingkuangan maupun ekonomi. Pakiroan jinih manfaik nan takanduang dalam tarumbu karang dapek diidentifikasi manjadi duo yoitu manfaat lansuang jo manfaat sacaro indak lansuang.[5]

Manfaat dari tarumbu karang nan lansuang dapek dimanfaatkan dek manusia adolah[3]:

  • sabagai tampek iduik ikan nan banyak dibutuahan manusia dalam bidang pangan, saparti ikan kerapu, ikan baronang, ikan ekor kuning, batu karang,
  • pariwisata, wisata bahari mancaliak kaindahan dari bantuak jo warnanyo.
  • panalitian jo pamanfaatan biota parairan lainnyo nan takanduang di dalamnyo.

Sadangkan nan tamasuak dalam pamanfaatan indak lansuang adolah sabagai panahan abrasi pantai nan disebabkan galombang jo ombak lauik, sarato sabagai sumber keanekaragaman hayati..

Klasifikasi[suntiang | suntiang sumber]

Badasarkan kamampuan mamproduksi kapua[suntiang | suntiang sumber]

Karang hermatipik[suntiang | suntiang sumber]

Karang hermatifik adolah karang nan dapek mambantuak bangunan karang nan dikana maasiakan tarumbu jo panyebarannyo hanyo ditamuan di daerah tropis.[7]

Karang hermatipik basimbiosis mutualisme jo zooxanthellae, yoitu sajinih alga uniseluler (Dinoflagellata unisuler), saparti Gymnodinium microadriatum, nan tadapek di jaringan-jaringan polip binatang karang jo malaksanoan Fotosintesis.[4] Dalam simbiosis, zooxanthellae maasiakan oksigen jo senyawa organik malalui fotosintesis nan akan dimanfaatkan dek karang, sadangkan karang maasiakan komponen inorganik barupo nitrat, fosfat jo karbon dioksida untuak kaperluan iduik zooxanthellae[2]. Hasil sampiang dari aktivitas iko adolah endapan kalsium karbonat nan tastruktur jo bantuak bangunannyo nan khas.[6] Ciri iko akhianyo digunoan untuak manantukan jinih atau spesies binatang karang.

Karang hermatipik mampunyoi sifek nan unik yoitu perpaduan antaro sifek hewan jo tumbuahan sahinggo arah patumbuahannyo salalu basifek Fototropik positif. Umumnyo jinih karang ko iduik di parairan pantai /laut nan cukuik dangka dimano penetrasi cahayo matoari masih sampai ka dasar parairan tersebut. Disampiang itu untuak iduik binatang karang mambutuahkan suhu aia nan hangat bakisar antaro 25-32 °C.[6].

Karang ahermatipik[suntiang | suntiang sumber]

Karang ahermatipik adolah karang nan indak maasiakan tarumbu sarato marupoan kalompok nan tasebar sacaro luas disaluruah dunia.[7]

Badasarkan bantuak jo tampek tumbuah[suntiang | suntiang sumber]

Tarumbu (reef)[suntiang | suntiang sumber]

Endapan masif batu kapua (limestone), tautamo kalsium karbonat (CaCO3), nan utamanyo dihasiakan dek hewan karang ko biota-biota lain, saparti alga bakapua, nan mensekresi kapua, saparti alga bakapua jo Mollusca.[7] Konstruksi batua kapua biogenis nan manjadi struktur dasar suatu ekosistem pesisir.[6] Dalam dunia navigasi lauik, tarumbu adolah punggungan lauik nan tabantuak dek batuan kapua (tamasuak karang nan masih iduik)di lauik nan dangka.

Karang (koral)[suntiang | suntiang sumber]

Disebuik juo karang batu (stony coral), yoitu hewan dari Ordo Scleractinia, nan mampu mensekresi CaCO3.[6] Karang batu tamasuak ka dalam Kelas Anthozoa yoitu anggota Filum Coelenterata nan hanyo mampunyoi stadium polip.[2] Dalam proses pambantuakan tarumbu karang mako karang batu (Scleratina) marupoan panyusun nan paliang paralu atau hewan karang pambangun tarumbu.[7] Karang adolah hewan klonal nan tasusun atas puluhan atau jutaan individu nan disabuik polip. Contoh makhluk klonal adolah tebu atau bambu nan tadiri atas banyak ruas.

Karang tarumbu[suntiang | suntiang sumber]

Pambangun utamo struktur tarumbu, biasonyo disabuik juo sabagai karang hermatipik (hermatypic coral) atau karang nan maasiakan kapua.[6] Karang tarumbu babeda dari karang lunak nan indak maasiakan kapua, babeda jo batu karang (rock) nan marupoan batu cadas atau batuan vulkanik.

Tarumbu karang[suntiang | suntiang sumber]

Ekosistem di dasa lauik tropis nan dibangun tautamo dek biota lauik panghasil kapua (CaCO3) khususnyo jinih­-jinih karang batu jo alga nan bakapua, basamo-samo jo biota nan iduik di dasa lainnyo saparti jinih­-jinih moluska, Krustasea, Echinodermata, Polikhaeta, Porifera, jo Tunikata sarato biota-biota lain nan iduik bebas di parairan sakitarnyo, tamasuak jinih-jinih Plankton jo jinih-jinih nekton.[4]

Badasarkan latak[1][suntiang | suntiang sumber]

Tarumbu karang tapi[suntiang | suntiang sumber]

Tarumbu karang tapi atau karang penerus atau fringing reefs adolah jinih tarumbu karang nan paliang sederhana jo nan paliang banyak ditamui di pinggia pantai nan talatak di daerah tropis. Tarumbu karang tapi bakambang di mayoritas pesisir pantai dari pulau-pulau besar. Pakambangannyo bisa mancapai kadalaman 40 meter jo patumbuahan ka ateh jo ka arah lua manuju lauik lapeh. Dalam proses pakambangannyo, tarumbu ko babantuak malingka nan ditandoi jo adonyo bantukan ban atau bagian endapan karang mati nan mangaliliangi pulau. Pado pantai nan curam, patumbuahan tarumbu mangarah sacaro vertikal.

Contoh tarumbu karang: Bunaken (Sulawesi), Pulau Panaitan (Banten), Nusa Dua (Bali).

Terumbu karang penghalang[suntiang | suntiang sumber]

Sacaro umum, tarumbu karang panghalang atau barrier reefs manyorupoi tarumbu karang tapi, hanyo sajo jinih iko iduik labiah jauah dari pinggia pantai. Tarumbu karang ko talatak sakitar 0.5­2 km ka arah lauik lapeh jo dibatasi dek parairan nan mamiliki kadalaman hinggo 75 meter. Takadang mambantuak lagoon (kolam aia) atau celah parairan nan lebanyo mancapai puluahan kilometer. Umumnyo karang panghalang tumbuah di sakitar pulau nan gadang atau banua jo mambantuak gugusan pulau karang nan taputuih-putuih.

Contoh: Batuan Tengah (Bintan, Kapulauan Riau), Spermonde (Sulawesi Selatan), Kapulauan Banggai (Sulawesi Tengah).

Terumbu karang cincin[suntiang | suntiang sumber]

Tarumbu karang cincin atau attols marupoan tarumbu karang nan babantuak saparti cincin jo baukuran sangat besar manyarupoi pulau. Atol banyak ditamukan pado daerah tropis di Samudra Atlantik. Tarumbu karang nan babantuak cincin nan mangaliliangi bateh dari pulau­-pulau vulkanik nan tanggelam sahinggo indak ado bateh jo daratan.

Terumbu karang datar[suntiang | suntiang sumber]

Tarumbu karang data atau gosong tarumbu (patch reefs), kadang-kadang disabuik juo sabagai pulau data (flat island). Tarumbu ko tumbuah dari bawah ka ateh sampai ka permukaan, dalam kurun wakatu geologis, mambantu pambantuakan pulau data. Umumnyo pulau iko bakambang sacaro horizontal atau vertikal nan mamiliki kadalaman relatif dangkal.

Contoh: Kapulauan Seribu (DKI Jakarta), Kapulauan Ujung Batu (Aceh)

Badasarkan zonasi[suntiang | suntiang sumber]

Tarumbu nan maadok angin[suntiang | suntiang sumber]

Tarumbu nan maadok angin (dalam bahaso Inggirih: Windward reef) Windward marupoan sisi nan maadok arah datangnyo angin.[1] Zona ko diawali dek lereang tarumbu nan maadok ka arah lauik lapeh. Di lereang tarumbu, kahidupan karang malimpah pado kadalaman sakitar 50 meter jo umumnyo didominasi dek karang lunak. Namun, pado kadalaman sakitar 15 meter acok tadapek teras tarumbu nan mamiliki kalimpahan karang nan kareh jo cukuik tinggi sarato karang tumbuah dengan subur.

Maarah ka dataran pulau atau gosong tarumbu, di bagian ateh teras tarumbu tadapek penutupan alga koralin nan cukuik lueh di punggungan bukik tarumbu tampek pangaruah galombang nan kuek.[1] Daerah iko disabuik sabagai pamatang alga. Akhianyo zona windward diakhiri dek ratoan tarumbu nan dangka bana.

Tarumbu nan mambalakangi angin[suntiang | suntiang sumber]

Tarumbu nan mambalakangi angin (Leeward reef) marupoan sisi nan mambalakangi arah datangnyo angin.[1] Zona iko umumnyo mamiliki hamparan tarumbu karang nan labiah sampik daripado windward reef jo mamiliki bantangan laguna nan cukuik leba. Kadalaman laguna biasonyo kurang dari 50 meter, namun kondisinyo kurang ideal untuak patumbuahan karang karano kombinasi faktor galombang jo sirkulasi aia nan lamah sarato sedimentasi nan labiah gadang.

Karusakan tarumbu karang[suntiang | suntiang sumber]

Indonesia marupoan nagara nan mampunyoi potensi tarumbu karang nan paliang gadang di dunia. Lueh tarumbu karang di Indonesia dipakiroan mancapai sakitar 60.000 km2. Hal tersebut mambuek Indonesia manjadi nagara paekspor tarumbu karang patamo di dunia. Sairiang pakambangan zaman, karusakan tarumbu karang, tautamo di Indonesia maningkek sacaro pasek. Tarumbu karang nan masih dalam kondisi nan ancak kini ko hanyo sakitar 6,2%. Karusakan iko manyebabkan maluehnyo takanan pado ekosistem tarumbu karang alami. Maskipun faktanyo kuantitas padagangan tarumbu karang alah dibatasi dek Convention on International Trade in Endangered Species of Wild Fauna and Flora (CITES), laju eksploitasi tarumbu karang masih tinggi karano buruaknyo sistem penanganannyo.[3]

Babarapo aktivitas manusia nan dapek marusak tarumbu karang[8]:

  • mambuang sampah ka lauik jo pantai nan dapek mancemari aia lauik
  • mambaok pulang ataupun maawai tarumbu karang katiko manyilam, maawai saketek se dapek mambunuah tarumbu karang
  • pamborosan aia, samakin banyak aia nan dipakai mako samakin banyak pulo limbah aia nan dihasiakan jo dibuang ka lauik.
  • panggunaan pupuak jo pestisida buatan, sajauah apaopun latak pertanian tersebut dari lauik residu kimia dari pupuk dan pestisida buatan pado akhianyo akan tabuang ka lauik juo.
  • Mambuang jangka pado pasisia pantai sacaro indak sangajo akan marusak tarumbu karang nan barado di bawahnyo.
  • adonyonya predator tarumbu karang, saparti sajinih siput drupella.
  • panambangan
  • pambangunan pamukiman
  • reklamasi pantai
  • polusi
  • panangkapan ikan jo caro nan salah, saparti pamakaian bom ikan

Rujuakan[suntiang | suntiang sumber]

  1. a b c d e f g h i j (Inggirih) Castro P & Huber ME. 2005. Marine Biology Ed ke-5. New York: Mc Graw Hill International.Page 119-125.
  2. a b c d e (Inggirih) Burke IC, Laurenroth WK. 2002. Ecology of the Shortgrass Steppe: A Long-Term Perspective.LTER.Page.56-57.
  3. a b c d (Inggirih) Hutagalung RA. 2005. Lombok frags-the first sustainable coral cultivation on Indonesia for trade and reef conservation. The 9th International Aquarium Fish & Accessories Exhibition & Conference, Aquarama 2005. Singapore.
  4. a b c (Inggirih) Sumich JL, Dudley GH. 1992. Laboratory and field investigations in marine biology. Ed.5. Page. 213
  5. a b c (Inggirih) Walters GE, et al. 1998. Bottom trawl survey of the eastern Bering Sea continental shelf.Page. 201-203.
  6. a b c d e f (Inggirih) Nybakken JW. 1986. Readings in marine ecology. Ed.2. Page.289-291.
  7. a b c d (Inggirih) Zhong Y, Dong W. 1999. Zoological studies. Jilid. 38.Page. 114.
  8. (Inggirih) Schumann G. 2009. 10 Ways to protect coral reefs[pranala nonaktif permanen] Diakses pada 5 Apr 2010.

Pautan lua[suntiang | suntiang sumber]