Biologi

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Escherichia coli Paku
Kumbang goliath Gazel
Biologi mangkaji babagai jinih organisme. Saarah jarum jam dari kida ateh: E. coli, paku, gazel, kumbang goliath

Biologi adolah kajian tantang kahidupan, jo organisme iduik, tamasuak struktur, fungsi, patumbuahan, evolusi, pasebaran, jo taksonominyo.[1] Ilimu biologi modern sangaik laweh, dan eklektik, sarato tadiri dari babagai macam cabang, dan subdisiplin. Namun, walaupun lingkuiknyo laweh, ado babarapo konsep umum nan maatua sadoalah panalitian, sainggo manyatukannyo dalam ciek bidang. Biologi umumnyo maakui sel sabagai satuan dasa iduik, gen sabagai satuan dasa pawarisan, jo evolusi sabagai mekanisme nan mandorong taciptanyo spesies baru. Salain itu, organisme diyakini batahan jo mangonsumsi, sarato maubah energi nan jo maregulasi kaadaan dalamnyo bia tatap stabil, jo vital.

Subdisiplin biologi didefinisikan manuruik skala organisme nan dikaji, jinih organisme nan dikai, sarato metode nan dipakai untuak mangkajinyo antaro lain:[2]

Urang nan ahli dalam bidang biologi ko disabuik ahli biologi, biologiwan, atau biolog

Sijarah[suntiang | suntiang sumber]

Istilah biologi barasa dari kato nan dalam bahaso Yunani βίος, bios, yang barati "kahidupan", jo akhiran -λογία, -logia, nan artinyo "ilimu."[3][4] Bantuak Latin dari kato tasabuik (biologi) partamo kali digunoan dek Linnaeus (Carl von Linné) dalam karyanyo nan bajudul Bibliotheca botanica pado taun 1766 dek Michael Christoph Hanov dalam tulisannyo nan bajudul Philosophiae naturalis sive physicae: tomus III, continens geologian, biologian, phytologian generalis. Tajemahan bahaso jermannyo, yaitu Biologie, partamo kali ado dalam tajemahan karya Linnaeaus pado taun 1771. Pado taun 1797, Theodor Georg August Roose mangunoan istilah tasabuik dalam pandahulu bukunyo nan batajuak Grundzüge der Lehre van der Lebenskraft. Karl Friedrich Burdach pado taun 1800 mamakai istilah iko dalam arti nan labiah sampik, yaitu panelitian manusia dari suduik pandang morfologis, fisiologis, jo psikologis (Propädeutik zum Studien der gesammten Heilkunst). Istilah biologi dalam pangartian moderen barulah muncua dalam buku Biologie, oder Philosophie der lebenden Natur (1802–22) nan ditulih dek Gottfried Reinhold Treviranus. Di dalam buku tasabuik tatulih:[5]

Objek panelitian kami adolah babagai macam bantuak jo pawujuikan kahidupan, kaadaan jo hukum nan mangatua fenomena tasabuik, sarato panyebabnyo. Ilimu nan takaik jo objek tasabuik kami sabuik biologi [Biologie] atau doktrin kahidupan [Lebenslehre].

Walaupun bak itu biologi moderen marupokan pakambangan nan relatif baru, ilimu nan takaik alah dipalajari dari maso nan lampau. Filsafat alam dapek ditamui di paradaban Mesopotamia, Mesir, India, jo Cino. Namun, asa usul, jo pandakekan biologi moderen barasa dari maso Yunani Kuno.[6] Walaupun panelitian kedokteran dapek ditiliak ka maso Hippocrates (ca. 460 SM - ca. 370 SM), Aristoteles (384 SM - 322 SM) adolah tokoh nan paliang bajaso untuak pakambangan biologi. Salah ciek karya tapantiannyo iolah Historia Animalium jo babarapo karya lain nan manunjuakan caro pandang urang paneliti alam, sarato karya-karya empirinyo nan mancubo mampalajari sabab-akibat biologis, jo keanekaragaman hayati. Panaruih Aristoteles di Lyceum, yaitu Theophrastus, manulih buku-buku tantang botani nan bapangaruah hinggo ka Abaik Patangahan.

Ilmuwan islam abaik patangahan nan mampalajari biologi maliputi al-jahiz (781-869), Ad-Dinawari (828-896), nan manulih tantang botani, jo ar-Razi (865-925), nan manullih tantang anatomi, jo fisiologi. Kadokteran dipalajari badasaran tradisi filsuf Yunani, samantaro ilimu alam sangaik dipangaruhi dek pamikiran Aristoteles, tautamo parihal hierarki kahidupan.

Biologi mulai bakambang pasaik sasudah Antony van Leeuwenhoek mampabaiki mikroskopnyo. Barakaiknyo, spermatozoa, bakteri, infusoria, jo babagai macam kahidupan mikroskopik lain barasil ditamuan. Panyalidikan nan dilakuan dek Jan Swammerdam mambangkikan katertarikan tahadok bidang entomologi, jo mambantu magambangkan teknik pambedahan, jo pawarnaan (staining) mikroskopik.[7]

Kamajuan mikroskopik juo sangaik mampangaruhi pamikiran tantang biologi ko. Pado awal abaik ka-19, sajumlah ahli biologi mulai manyadari pantiangnyo konsep sel. Kamudian, pado taun 1838, Schleiden, jo Schwann mulai manganjuran gagasan (nan kini ditarimo sacaro luweh) bahwa (1) satuan dasar organisme adolah sel, jo (2) masiang-masiang sel mamiliki karakteristik kehidupan, walaupun inyo manantang gagasan bahwa (3) sadoala sel barasa dari pambagian sel lain. Akan tatapi, barakaik karya Robert Remak, jo Rudolf Virchow, pado taun 1860-an sabagian gadang ahli biologi manarimo katigo hal tasabuik nan kini disabuik jo teori sel.[8]

Samantaro tuh, taksonomi, jo klasifikasi manjadi pusek paratian sajarawan alam. Carl Linnaeus manabikan taksonomi dasar pado taun 1735 (babagai macam variasi alah digunoan samanjak itu), jo pado taun 1750-an mampakenalan namo ilmiah untuak spesies.[9] Georges-Louis Leclerc, Comte de Buffon, manganggap spesies sabagai kategori buatan, jo manyatokan bahwa kahidupan dapek barubah—bahkan mangusuakan kamungkinan adonyo nenek moyang basamo. Walaupun manantang teori evolusi, Buffon marupokan tokoh pantiang dalam sijarah pamikiran evolusi; karyanyo mampangaruhi teori evolusi Lamarck, jo Darwin.[10]

Pamikiran evolusioner dapek dicaliak baliak ka karya Jean-Baptiste Lamarck. Inyo mangatokan bahwa evolusi marupokan hasil dari takanan lingkuangan tahadok sifaik suatu hewan, nan bararti samakin acok suatu organ digunoan, samakin kompleks, jo efisien organ itu, sahinggo mambuek hewan baradaptasi jo lingkuangan. Lamarck juo mayakini bahwasanyo sifaik nan didapek ko dapek diturunan ka generasi barikuiknyo, nan akan taruih bakambang, jo manyamparonokannyo. Namun, hipotesis iko ditulak, dan baru pado akhir abaik ka-19 Charles Darwin barasil marumuihkan teori evolusi badasarkan seleksi alam jo manggabuangan pandakekan biogeografis Humboldt, geologi Lyell, tulisan Malthus manganai patumbuhan populasi, jo keahlian morfologis sarato pangamatan surang di alam; panalaran, jo bukti nan mirip juo mambuek Alfred Russel Wallace mancapai kesimpulan nan samo. Maskipun banyak ditantang dek agamawan, teori Darwin ko ditarimo dek komunitas ilmiah, dan sasagiro manjadi aksioma dasar dalam ilimu biologi.

Pado taun 1940-an, jo awal taun 1950-an, panalitian barasil mambuktian bahwasanyo asam deoksiribonukleat (ADN) marupokan komponen kromosom nan manganduang satuan pewarisan nan kini disabuik gen. Pamusatan paratian pado model organisme baru sarupo virus, jo bakteri sarato panamuan struktur untai ganda ADN pado taun 1953 manandoi jalannyo paralihan ka maso genetika molekuler. Kode genetik barasil dipacahan dek Har Gobind Khorana, Robert W. Holley, jo Marshall Warren Nirenberg sasudah mamahami bahwasanyo ADN ko manganduang kodon. Akhirnyo, Proyek Genom Manusia diluncuahan pado taun 1990 dengan tujuan untuak mametaan sado alah genom manusia DNA. Proyek iko salasai pado taun 2003, dan marupokan langkah partamo dalam mangabuangkan pangatahuan biologi jo definisi badan manusia, jo organisme lain sacaro fungsional, dan molekuler.

Rujuakan[suntiang | suntiang sumber]

  1. Manuruik definisi dari Aquarena Wetlands Project glossary of terms.
  2. Life Science, Weber State Museum of Natural Science
  3. "Who coined the term biology?". Info.com. Diarsipkan dari versi asli tanggal 2013-05-09. Diakses tanggal 2012-06-03.
  4. "biology". Online Etymology Dictionary.
  5. Richards, Robert J. (2002). The Romantic Conception of Life: Science and Philosophy in the Age of Goethe. University of Chicago Press. ISBN 0-226-71210-9.
  6. Magner, A History of the Life Sciences
  7. Magner, A History of the Life Sciences, hal 133–144
  8. Sapp, Genesis, chapter 7; Coleman, Biology in the Nineteenth Century, bab 2
  9. Mayr, The Growth of Biological Thought, chapter 4
  10. Mayr, The Growth of Biological Thought, Bab 7