Karajaan Indopuro

Wikipedia Minangkabau - Lubuak aka tapian ilimu
Kasultanan Indopuro
Ujuang Pagaruyuang

1347–1792

Bandera Karajaan Indopuro

Bandera

Lokasi Karajaan Indopuro
Lokasi Karajaan Indopuro
Wilayah karajaan Indopuro
Ibu kota Indopuro
Bahaso Minang, Malayu, Sanskerta
Agamo Islam
Pamarentahan Monarki
Sejarah
 - Awal kakuasoan 1347
 - Karuntuahan 1792

Karajaan Indopuro (bahaso Indonesia: Inderapura) marupoan karajaan nan barado di wilayah kabupaten Pasisia Salatan, provinsi Sumatra Barat. Sacaro rasmi karajaan ko parnah manjadi bawahan (vazal) dari Karajaan Pagaruyuang. Walaupun pado prakteknyo karajaan ko tagak surang sarato bebas maatua urusan dalam jo lua nagarinyo.

Karajaan ko pado maso jayonyo maliputi wilayah pantai barat Andaleh (bahaso Indonesia: Andalas) (kini Sumatera) mulai dari Padang di utara sampai Sungai Hurai di selatan. Panghasilan paliang utamo Indopuro adolah lado kaciang junjuang (bahaso Indonesia: lada), dan manggaleh ameh.

Pangaruah kakuasoan Karajaan Indopuro sampai ka Banten di Pulau Jao. Manuruik Sejarah Banten, Kasultanan Banten alah malakukan kontak dagang jo Karajaan Indopuro nan ditandoi jo pambarian karih dari Sultan Munawar Syah ka bakeh Sultan Hasanuddin.[1][2][3][4] Manuruik Hamka, Sultan Munawar Syah manikahkan putinyo jo Hasanuddin dan mahadiahkan Silebar (daerah pangasia merica di Bengkulu) kapado Kasultanan Banten.[5][6][7][8]

Kabangkitan[suntiang | suntiang sumber]

Indopuro tanamo juo jo sabagai Ujuang Pagaruyuang. Malamahnyo kakuasaan Pagaruyuang salamo abaik ka-15, babarapo daerah pado kawasan pasisia Minangkabau lainnyo, takah Inderagiri, Jambi, jo Indopuro dibiakan manguruih dirinyo surang.[9]

Namun pakambangan Indopuro baru dimulai katiko Malaka jatuah ka tangan Portugis pado tahun 1511. Arus padagangan nan tadinyo malalui Selat Malaka sabagian gadang baraliah ka pantai barat Sumatra jo Selat Sunda. Pakambangan jo ekspansi Indopuro tarutamo ditunjang dek marica.[9]

Wakatu tapeknyo Indopuro mancapai status nagari merdeka indak ado dikatahui sacaro pasti. Namun, iko dipakirokan batapatan jo mulai maraknyo padagangan marica di wilayah tu pado patangahan abaik ka-16, didorong usaho pananaman marica tu di bateh selatan Indopuro mancapai Silebar (kini di Provinsi Bengkulu). Pado maso iko, Indopuro alah manjalin pasahabatan jo Banten sarato Aceh.

Katiko Kasultanan Aceh malakukan ekspansi sampai ka wilayah Pariaman, Indopuro mahantikan ekspansinyo sarato manjalin pasahabatan jo Aceh malalui ikatan pakawinan antaro Rajo Dewi, putri Sultan Munawar Syah dari Indopuro,[10] jo Sultan Firman Syah, saudara raja Aceh katiko itu, Sultan Ali Ri'ayat Syah (1568-1575). Lewat hubuangan pakawinan iko jo kakuatan ekonominyo Indopuro mandapek pangaruah gadang di Kotaraja (Banda Aceh), bahkan para hulubalang dari Indopuro disabuik-sabuik bakomplot dalam pambunuhan putra Sultan Ali Ri'ayat Syah, sahingga malancarkan jalan untuak suami Raja Dewi naik tahta jo nama Sultan Sri Alam pada 1576. Walau kakuasaannyo hanyo balangsuang salamo tigo tahun sabalum tasingkia dari tahtanyo karano patentangan jo ulama-ulama di Aceh.

Namun pangaruah Indopuro taruih batahan di Kasultanan Aceh, dari 1586 sampai 158. Ado sorang nan masih bakaitan jo Raja Dewi, yakni Sultan Buyong, mamarintah jo gala Sultan Ali Ri'ayat Syah II[11] sabaalum akhianyo tabunuah dek intrik ulama Aceh.[9]

Perekonomian[suntiang | suntiang sumber]

Badasarkan laporan dari Balando pado tahun 1616, Indopuro digambarkan sabagai sabuah karajaan nan makmur di bawah pamarintahan Rajo Itam, sarato sakitar 30.000 rakyatnyo talibat dalam patanian jo pakabunan nan mangandalkan komoditas lada jo bareh. Selanjutnyo pado maso Rajo Gadang sakitar tahun 1624, VOC barasia mambuek pajanjian dalam pangumpulan hasia patanian tasabuik langsuang dimuek ka ateh kapa tanpa harus marapek dulu dipalabuhan, sarato dibebaskan dari cukai palabuhan. Baitu juo pado maso Rajo Puti, pangganti Rajo Gadang, Indopuro tetap manerapkan palabuhan bebas cukai dalam mandorong parekonomian.[12]

Satalah ekspedisi penghukuman padi tahun 1633 dek Kasultanan Aceh, sampai tahun 1637 Indopuro tetap indak talok mandongkrak hasia pataniannyo mancapai hasia nan alah diperoleh pado maso-maso sabalunnyo. Di saat panurunan pangaruah Aceh, Sultan Muzzaffar Syah mulai malakuan konsolidasi kakuatan nan kamudian dilanjuikan dek anak Sultan Muhammad Syah nan naiak tahta sakitar tahun 1660 jo mulai baliak manjalin hubungan diplomatik jo Balando jo Inggirih.

Pamarintahan[suntiang | suntiang sumber]

Sacaro etimologi, Indopuro barasa dari bahasa Sanskerta, jo dapek bamakna Kota Raja. Indopuro pado awalnyo adolah kawasan rantau dari Minangkabau, marupakan kawasan pasisia di pantai barat Pulau Sumatra. Sabagai kawasan rantau, Indopuro dipimpin dek wakia nan ditunjuak dari Pagaruyung jo bergelar Raja[13] kamudian bagala Sultan. Rajo Indopuro diidentifikasikan sabagai putra Raja Alam atau Yang Dipertuan Pagaruyung.[14]

Daftar Rajo Indopuro[suntiang | suntiang sumber]

Barikuik iko adolah daftar Rajo Indopuro:

Tahun Namo atau gala Catatan jo peristiwa penting
1550 Sultan Munawar SyahRaja Mamulia
1580 Raja Dewi Nama lainnya adalah Putri Rekna Candra Dewi
1616 Raja Itam
1624 Raja Besar
1625 Raja Puti Nama lainnya Putri Rekna Alun
1633 Sultan Muzzaffar SyahRaja Malfarsyah
1660 Sultan Muhammad Syah Raja Adil menuntut hak yang sama.
1691 Sultan Mansur Syah Sultan Gulemat putra Raja Adil berkedudukan di Manjuto melepaskan diri dari Inderapura.
1696 Raja Pesisir
1760 Raja Pesisir II
1790 Raja Pesisir III

Wilayah kakuasaan[suntiang | suntiang sumber]

Pado akhia abat ka-17, pusaik wilayah Indopuro mancangkup lambah sungai Air Haji jo Batang Indopuro nan tadiri ateh duo puluah koto. Masiang- masiang koto diparintah dek saurang mantri, nan bafungsi sarupo panghulu di wilayah Minangkabau lainnyo. Samantaro pado daerah anak sungai nan mancangkup lambah Manjuto dan Airdikit (disabuk sabagai Nagari Ampek Baleh Koto), jo Muko-muko (Lima Koto), sistem pamarintahannyo indak jauah babeda.

Untuak kawasan utaro, disabuik jo Banda Sapuluah yang dipimpin dek Rajo Nan Barampek (ampek urang nan bagala rajo, yaitu Rajo Aiahaji, Rajo Bungo Pasang, Rajo Kambang, jo Rajo Palangai). Kawasan iko marupoan samacam konfederasi dari 10 daerah atau nagari nan juo masiang-masiang dipimpin dek 10 urang panghulu.

Pado kawasan bagian salatan, di mano sistem pamarintahan nan tadiri dari desa-desa barado di bawah wewenang peroatin (kapalo nan batangguang jawab manyalasaikan sangketa di muaro sungai). Peroatin iko pado awalnyo bajumlah 59 urang (peroatin nan kurang dari ciek anam puluah). Para mentri jo peroatin tunduak pado kakuasaan rajo atau sultan.

Kamunduran[suntiang | suntiang sumber]

Di bawah Sultan Iskandar Mudo, Kasultanan Aceh mamarangi negeri-negeri panghasia lada di Samananjuang Malaya sambia barusaho mampakuek ganggaman ateh monopoli lada dari pantai barat Sumatera. Kandati ketatnyo para wakia Aceh (disabuik sabagai panglima) di Tiku jo Pariaman ateh panjualan lada magancam padagangan Indopuro lewat palabuhan di utaro. Karano itu Indopuro mulai mangambangan bandarnyo di salatan, Silebar, nan biasonyo digunoan untuak mangekspor lada lewat Banten.

Indopuro juo barusaho mangelak supayo indak mambayia cukai pado panglima Aceh. Iko mamanciang kamarahan panguaso Aceh nan mangirim armadanyo pado 1633 untuak mangukum Indopuro. Rajo Puti yang mamarintah Indopuro saat itu dihukum mati sarato babarapo bangsawan lainnyo, jo banyak urang ditawan jo dibaok ka Kotaraja. Aceh manampekan panglimanyo di Indopuro jo Rejo Malfarsyah diangkek manjadi jado manggantian Rajo Puti.

Kandali Aceh malamah katiko dimpimpin dek pangganti Iskandar Muda, Sultan Iskandar Tsani. Salanjuiknyo pado maso pamarintahan Ratu Tajuk Alam, pangaruah Aceh di Indopuro mulau digantian dek Balando malalui VOC. Dominasi VOC diawali katiko Suktan Muhammad Syah maminta bantuan ka Balando mamadamkan pambarontakan di Indopouro pado tahun 1662.

Pambarontakan iko dipicu dek tuntutan Rajo Adil nan maraso punyo hak ateh tahta Indopuro badasarkan sistem matrilinieal. Akibaiknyo, Sultan Indopuro tapaso malarikan diri basamo jo ayahnyo jo karabaiknyo. Kamudian Sultan Mansur Syah dikirim ka Batavia manandotangani pajanjuan nan disepakati taun 1663 jo maagiah VOC hak untuak mamonopoli pambalian lada sato hak pangarajoan tambang ameh. Pado Oktober 1663 pamarintah Indopuro baliak puliah jo Sultan Indopuro mangakui Rajo Adil sabagai wakia nan bakadudukan di Manjuto.

Rujuakan[suntiang | suntiang sumber]

  1. Sudarman (2019). Jaringan Perniagaan dan Islamisasi di Kerajaan Inderapura. hlm. 41.
  2. Mulyadi, S. W. R. (1991) (dalam bahaso id). Naskah dan kita. Fakultas Sastra Universias Indonesia. https://books.google.co.id/books?id=vPobAAAAIAAJ&q=%22laju+maring+lor+turun+pasisir,+tiba+/+ing+Sirem+iya+iku+*%22&dq=%22laju+maring+lor+turun+pasisir,+tiba+/+ing+Sirem+iya+iku+*%22&hl=en&sa=X&ved=2ahUKEwjBvPnYvdLsAhV683MBHZMRDR4Q6AEwAHoECAAQAg. 
  3. Hernadi, Edi (dalam bahaso id). Sejarah Nasional Indonesia: Edisi Revisi 2013. Uwais Inspirasi Indonesia. ISBN 978-623-227-121-0. https://books.google.co.id/books?id=W0yqDwAAQBAJ&pg=PA197&dq=%22+raja+Malangkabu%22&hl=en&sa=X&ved=2ahUKEwixtJ2WvdLsAhXJdCsKHZ0MBJQQ6AEwA3oECAUQAg#v=onepage&q=%22%20raja%20Malangkabu%22&f=false. 
  4. Ōta, Atsushi (2006) (dalam bahaso en). Changes of Regime And Social Dynamics in West Java: Society, State And the Outer World of Banten, 1750-1830. BRILL. ISBN 978-90-04-15091-1. https://books.google.co.id/books?id=0gOMTC8I7s4C&pg=PA175&dq=%22+Malangkabu%22&hl=en&sa=X&ved=2ahUKEwiy-4_7vdLsAhXCbn0KHdGvBpMQ6AEwBXoECAEQAg#v=onepage&q=%22%20Malangkabu%22&f=false. 
  5. Hamka (2020-04-24) (dalam bahaso id). Sejarah Umat Islam: Pra-Kenabian hingga Islam di Nusantara. Gema Insani. ISBN 978-602-250-714-7. https://books.google.co.id/books?id=WWjeDwAAQBAJ&pg=PA576&dq=Hasanuddin+%22indrapura%22&hl=en&sa=X&ved=2ahUKEwj_rcGYv9LsAhXSfn0KHRfNCl0Q6AEwAHoECAUQAg#v=onepage&q=Hasanuddin%20%22indrapura%22&f=false. 
  6. Djaja, Tamar (1965) (dalam bahaso ms). Pustaka Indonesia: riwajat hidup orang-orang besar tanah air. Bulan Bintang. https://books.google.co.id/books?id=ZQ8-AAAAMAAJ&q=Hasanuddin+%22indrapura%22&dq=Hasanuddin+%22indrapura%22&hl=en&sa=X&ved=2ahUKEwjoo-bev9LsAhUXfX0KHW5tD5Y4ChDoATACegQIBBAC. 
  7. Rasjid, Tamrur (1955) (dalam bahaso ms). Pahlawan dan Ulama Islam Indonedia. Kementerian Agama. https://books.google.co.id/books?id=U6Y5AAAAMAAJ&q=Hasanuddin+%22indrapura%22&dq=Hasanuddin+%22indrapura%22&hl=en&sa=X&ved=2ahUKEwjoo-bev9LsAhUXfX0KHW5tD5Y4ChDoATAGegQICRAC. 
  8. Saleh, Zainoeddin; Dusky, Anwar (1952) (dalam bahaso ms). Sedjarah Indonesia, disusun oleh Zainoeddin Saleh. Pustaka Dewata. https://books.google.co.id/books?id=Y2IeAAAAMAAJ&q=Hasanuddin+%22indrapura%22&dq=Hasanuddin+%22indrapura%22&hl=en&sa=X&ved=2ahUKEwjBl-XSwNLsAhX-IbcAHSklDUw4HhDoATADegQIBRAC. 
  9. a b c Kathirithamby-Wells, J. (1976). "The Inderapura Sultanate: The Foundation of its Rise and Decline, from the Sixteenth to the Eighteenth Century". Indonesia. 21: 65–84. 
  10. Iskandar, T., (1966), Bustanu's-Salatin, Kuala Lumpur: Dewan Bahasa dan Pustaka.
  11. Lombard, D., (2006), Kerajaan Aceh: Zaman Sultan Iskandar Muda (1607-1636), Jakarta: Kepustakan Populer Gramedia, ISBN 979-9100-49-6.
  12. Kathirithamby-Wells, J. (1976). "The Inderapura Sultanate: The Foundation of its Rise and Decline, from the Sixteenth to the Eighteenth Century". Indonesia. 21: 65–84. 
  13. Translation of the Undang Undang of Moco Moco, by Richard Farmer, Governor of Benkulen (1717-18), in Malayan Miscellanies, 11/13 (1822), pp. 8-9.
  14. Netscher, E., (1850), Verzameling van over1everingen van het rijk van Manangkabau uit het oorspronkelijk Maleisch vertaald, Indisch Archief, II/2.