Kumpeni Balando

Dari Wikipedia baso Minang, ensiklopedia bebas
Lompek ka: navigasi, cari

Parusaoan Hindia Timua Balando (bahaso Balando: Vereenigde Oostindische Compagnie, disingkek VOC), nan acok disabuik juo Kumpeni Balando, adolah parusaoan dagang Balando nan didirian pado taun 1602, satalah mandapekan ijin monopoli salamo 21 taun dari Dewan Nagara Balando untuak badagang di banua Asia. Parusaoan ko acok dipandang sabagai parusaoan multinasional patamo di dunia[1] dan nan patamo pulo nan manabikan saham.[2] Parusaoan ko sabana bakuaso jo batindak samacam semi-pamarentahan, yaitu dibuliahan untuak baparang, manangkok jo maukum mati tahanan,[3] marundiangan pajanjian dagang, mancetak pitiah, sarato mandirian koloni.[4]

Kumpeni Balando sacaro statistik lah jauah malampaui sadonyo saiangan dagangnyo di Asia. Antaro taun 1602 inggo 1796, parusaoan ko lah mangirim sajuta banso Eropa untuak bakarajo dalam padangangan di Asia jo 4.785 kapa, sarato mandapek kauntuangan barasiah labaih dari 2,5 juta ton, nan babantuak barang-barang dagangan Asia. Sabaliaknyo, gabungan kasaluruahan Eropa laiannyo anyo mangirim 882.412 urang antaro taun 1500 inggo 1795, dan armada kapa dari Parusaoan Hindia Timua Inggirih nan marupoan saiangan tadakeknyo anyo maanta jo 2.690 kapa sajo dan mambao anyo saparlimo dari barek barang nan diangkuik dek Kumpeni Balando. Kauntuangan gadang Kumpen Balanda didapeknyo dari mamonopoli padagangan rampah-rampah salamo abaik ka-15.[5]

Walaupun lah didirian sajak taun 1602 untuak maambiak untuang dari padagangan rampah-rampah Maluku, baru taun 1619 parusaon ko mandirian markas utamonyo di kota palabuahan Jayakarta, nan diubahnyo jadi banamo Batavia (kini ko Jakarta). Labiah dari duo abaik, Kumpeni Balando taruih manambah juo palabuahan-palabuahan nan dijadiannyo pusek-pusek padagangannyo, dan maamanan kapantiangannyo jo caro manguasai daerah-daerah sakuliliangnyo.[6] Usao dagang ko maju bakataruihan dan taruih sajo mambaia dividen 18% tiok taunnyo, salamo ampia 200 taun.[7]

Rujuakan[suntiang | suntiang sumber]

  1. ^ http://www.kb.nl/dossiers/voc/voc.html VOC di Papustakaan Nasional Balando (bahaso Balando)
  2. ^ Mondo Visione web site: Chambers, Clem. "Who needs stock exchanges?" Exchanges Handbook. – retrieved 21 August 2011.
  3. ^ "Slave Ship Mutiny: Program Transcript". Secrets of the Dead. PBS. 11 Nopember 2010. http://www.pbs.org/wnet/secrets/transcripts/slave-ship-mutiny-program-transcript/755/. Diakses pado 12 Nopember 2010. 
  4. ^ Ames, Glenn J. (2008). The Globe Encompassed: The Age of European Discovery, 1500–1700. pp. 102–103. 
  5. ^ Van Boven, M. W.. "Towards A New Age of Partnership (TANAP): An Ambitious World Heritage Project (UNESCO Memory of the World – reg.form, 2002)". VOC Archives Appendix 2, p.14. http://portal.unesco.org/ci/en/files/22635/11546101681netherlands_voc_archives.doc/netherlands%2Bvoc%2Barchives.doc. 
  6. ^ Vickers (2005), p. 10
  7. ^ Ricklefs, M.C. (1991). A History of Modern Indonesia Since c.1300, 2nd Edition. London: MacMillan. p. 110. ISBN 0-333-57689-6.