Teh talua

Teh talua

Jinih	minuman ringan (id) , jajanan jalanan (id) , jajanan pasar (id) jo pancuci muluik
Asa	Indonesia
Bahan	teh, kuning telur (id) , gulo jo susu kental manis (id)

Teh talua adolah minuman nan tabuek dari kuniang talua jo gulo nan alah dikacau kudian diagiah aia teh. Minuman iko marupoan minuman tradisional urang Minangkabau dan kini manjadi bagian menu restoran Padang. Dalam bahaso Indonesia, teh talua disabuik jo teh telur atau teh telor.

Teh talua tanamo di wilayah barat jo tangah pulau Sumatera, wilayah nan mayoritas diuni dek urang Minangkabau. Wakatu ka diminum, inyo diagiah perasan asam kapeh (jeruk nipis) atau pamanih tambahan takah krimer kental manih jo bubuak coklat. Kini teh talua alah divariasikan jo durian dan tapai

Asa jo pakambangan

Wilayah kampuang halaman urang Minangkabau di Sumatera

Teh talua adolah minuman tradisional dari urang Minangkabau di Sumatera, nan dalam pakambangannyo manjadi bagian menu di kadai maupun restoran Padang. Manuruik urang Minang saisuak, indak sumbarang urang dapek maminum teh talua. Minuman iko hanyo dapek dinikmati dek urang kayo gadang. Teh talua baru manjadi minuman untuak urang banyak sasudah kabun-kabun teh dibukak di Sumatera Barat, saindaknyo pado sapartigo mulo abaik ka-20..

Kini, teh talua tanamo di daerah barat jo tangah pulau Sumatera tampek urang Minangkabau manjadi mayoritas, yaitunyo provinsi Sumatera Barat sarato sabagian Bengkulu, Jambi, Riau, jo Sumatera Utara. Urang-urang picayo teh talua elok untuak kasihatan, tarutamo untuak laki-laki sabagai panambah stamina. Teh talua mandapek tampek pulo dek urang di daerah Indonesia lainnyo, sairiang banyaknyo parantau Minang nan mambuek restoran Padang sainggo mambuek idangan tradisional Minang tanamo. Di lua daerah asanyo, teh talua indak lai disabuik dalam bahaso Minangkabau, tapi dalam bahaso Indonesia yaitu teh telur atau teh telor.

Bahan-bahan

Untuak mambuek minuman teh talua ko cukuik murah mambueknyo, indak paralu banyak-banyak bahannyo. Bahan-bahan nan di paruluan antaro lain yaitunyo talua ayam kampuang atau talua itiak. Talua ko dipisaan antaro putiah jo kuniang taluanyo, dan nan diambiek kuniang taluanyo sajo. Sanjuknyo sadion teh bubuak sacukuiknyo. Kamudian aia angek atau aia nan baru mandidiah sakitar 250 mili liter. Salanjuiknyo irisan asam kapeh ciek atau satangah. Tarakhir gulo sakitar duo atau tigo sendok makan atau dapek juo ditambah sasuai jo salero.

Caro mambuek

Kuniang talua nan lah tapisah dari putiahnyo

Bahan utamo untuak mambuek teh talua adolah kuniang talua jo teh. Talua nan dipakai biasonyo talua ayam kampuang, tapi buliah juo jo talua itiak. Kuniang talua dimasuakan ka galeh kaco, kudian diagiah gulo, biasonyo duo sendok teh. Sudah itu, kuniang talua jo gulo dikacau. Kok caro saisuak, paralatan untuak mangacaunyo iyolah lidi-lidi nan alah diikek, jumlahnyo 20-30 lidi. Sendok atau pegas dapek pulo dipakai untuak mangacau. Tapi, kok nio mudah, alaik nan digunoan iyolah alaik mixer pambuek kue.

Kuniang talua dikacau salamo babarapo minik hinggo rono kuniang talua manjadi agak putiah atau manjadi sarupo eggnog atau kogel moel (minuman sarupon nan tanamo di Eropa jo Timur Tangah). Kudian, campuran tu diagiah aia teh nan manggalagak. Teh nan digunoan adolah teh itam pakek. Aia teh dimasukan indak sampai panuah ka dalam galeh supayo buih nan dihasilkan indak tumpah.

Kutiko aia teh dituangan, naiaklah talua nan alah dikacau tadi. Campurannyo kok dicaliak mode tabagi dalam duo lenggek: aia teh nan rononyo coklat di lenggek bawah dan buih jo aia nan rononyo agak putiah di lenggek ateh. Kadang-kadang, indak jaleh bana pabedaan rono di antaro lenggeknyo, tapi nan pasti aia di lenggek ateh punyo buih jo rono nan labiah tarang daripado aia di lenggek bawah.

Wakatu ka diminum, teh talua biasonyo diagiah jo rupo-rupo tambahan. Nan paliang acok iyolah diagiah tambahan asam kapeh supayo baun anyia dari kuniang talua ilang. Dalam panyaijannyo, potongan asam kapeh dilatakan di tadah supayo urang nan maminum dapek manirihnyo sasuai salero. Ado pulo nan manambah tambahan pamanih, takah krimer kental manih jo bubuak coklat, maupun rempah-tempah takah pala, kayu manih, jo kapulaga.

Konsumsi

Teh talua adolah minuman nan dapek dibuek di rumah-rumah, tapi kini alah dijua pulo di kadai jo restoran. Di Sumatera Barat, minuman iko mudah didapek di kadai jo restoran. Bahkan dek tanamonyo ado pulo kadai khusus nan manjua teh talua sajo. Pisang goreng bisa dijadian kawan untuak minum teh talua. Dek urang nan tuo-tuo, maota sambia mamasan teh talua bisa sampai batanggang; urang kadai amuah pulo mambukak kadainyo sampai parak siang. Walau indak banyak, kadai nan manjua teh talua ado pulo di daerah lain di Indonesia, takah di Jakarta.

Teh talua lamaknyo diminum katiko masih angek. Samanjak akhia abaik 20, urang-urang acok maminum pakai pipet. Tapi, kini media alah mulai acok maagih tau bahayo minum minuman angek jo pipet plastik, dek bahan kimianyo bisa tacampua ka minuman. Kok acok bana, bahan kimia tadi dapek manyababkan obesitas, dalam babarapo kasus bahkan dapek manyababkan kanker.

Manfaaik

Minuman teh talua ko mampunyoi babarapo manfaaik atau khasiaik untuak tubuah. Manfaaik nan partamo yaitunyo teh taluo ko dapek manambah tanago. Untuak urang-urang nan pakarajo sangaik cocok karano minuman ko indak manganduang bahan pangawet. Kaduo, manfaaik dari minuman ko iolah untuak manjago kasehatan mato. Di dalam teh taluo ko tadapek zat karoteniod nan baguno untuak manjago kesehatan mato bahkan dapek pulo manurunan resiko tahadok panyakik katarak. Manfaaik salanjuik nyo yaitunyo maningkekan stamina tubuah sarato jo baguna sabagai pangganti makanan, karano di didalam teh taluo ko alah manganduang kalori nan baguno dek tubuah. Kamudian, manfaaik nan tarakhir yaitunyo teh taluo ko dapek mamanuahi kabutuahan vitamin tubuah. Iko dikaranoan kuniang talua nan tadapek dalam teh talua tasabuik manganduang vitamin A, D, E, jo vitamin K.