Asam kapeh

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Asam kapeh
Buah asam kapeh
Klasifikasi ilmiah
Kingdom: Plantae
Division: Magnoliophyta
Class: Magnoliopsida
Order: Sapindales
Family: Rutaceae
Genus: Citrus
Species: C. aurantifolia
Namo binomial
Citrus aurantifolia
(Christm.) Swingle

Asam kapeh atau limau kapeh marupoan jinih tumbuahan nan masuak kadalam suku jeruk-jerukan. Buah asam kapeh ko taseba di negara-negara kawasan Asia jo Amerika Tangah. Ado juo nan manyabuik asam ko jo namo sabagai jeruk pecel. Batang asam kapeh ko dapek tumbuah satinggi 3 hinggo 6 meter. Batangnyo bacabang banyak sarato jo baduri. Daunnyo lonjong jo tangkai daunnyo manyarupoi sayok ketek. Bungonyo tabik dari bawah daun. Bungo keteknyo bawarna putiah jo baunyo harum. Buah asam kapeh ko babantuak bulek atau saruo jo bulek talua. Buah asam kapeh bawarna hijau jo bawarna kuning kalau alah tuo sarato jo kulik buahnyo nan tipih nan manganduang banyak minyak atsiri. Dagiang buah asam kapeh ko bawarna putiah kahijauan. Raso buah asam kapeh ko sangaik masam. Buah asam kapeh ko manganduang banyak vitamin C jo asam sitrat. Asam kapeh ko punyo biji banyak, ketek-ketek jo basifaik poliembrioni. Di Indonesia. asam kapehko dapek iduik di dataran randah sampai dataran katinggian 1000 m dari pamukaan lauik. Asam kapeh ko dapek tumbuah rancak di tanah alkali, di tampek-tampek nan kanai sinar matahari sacaro langsuang. Asam kapeh ko bisa di kambangbiakan jo mananam inceknyo atau jo caro teknik cangkok. Buah asam kapeh ko biasonyo digunoan untuak mambuek minuman, ubek batuak sarato jo dapek pulo di jadian panyadap masakan. Salain itu asam kapeh ko acok juo dipakai untuak meailangan karek-karek jo dapek juo untuak mancuci rambuik.[1]

Pamanfaatan[suntiang | suntiang sumber]

Asam kapeh acok dimanfaatkan dalam mamasak. Kanduangan pektin nan dimilikinyo dimanfaatkan untuak mailangan baun anyia dari bahan masakan masakan cando ikan jo dagiang. Bilo dicampua basamo garam, dapek baguno untuak mamacah darah nan takanduang dalam dagiang. [2]

Salain kandungan pektin, adopulo kanduangan asam sitrat. Asam sitrat nan dikanduangnyo duo kali lipek dari limau lainnyo sainggo maagiah raso masam kacuik condong paik. Aia asam limau nan diagiah di bagian akhia proses abuih dapek mampakuek aroma sarato raso kacuiknyo masakan abuih. Samantaro kok dimasuakan sadari mulo atau di patangahan proses abuih, dapek maninggakan raso paik di aia rabusan. Asam kapeh dapek pulo ditambahan katiko masakan alah tahidang.[3]

Rujuakan[suntiang | suntiang sumber]

  1. Hassan Sadhily. Ensiklopedi Indonesia Volume 1. Jakarta: Ichtiar Baru-Van Hoeve.
  2. Sjoekri, Rima,. Senirasa : teman resep masakan Indonesia. Jakarta. ISBN 978-602-03-2691-7. OCLC 981908286. https://www.worldcat.org/oclc/981908286. 
  3. Sjoekri, Rima,. Senirasa : teman resep masakan Indonesia. Jakarta. ISBN 978-602-03-2691-7. OCLC 981908286. https://www.worldcat.org/oclc/981908286.