Songket

Dari Wikipedia baso Minang, ensiklopedia bebas
Loncat ke navigasi Loncat ke pencarian
Songket Minangkabau motif pucuak rabuang, nampak dari motif segitigo nan ado di bawah.

Songket iolah sajinih kain nan biasonyo ditanun jo alaik tradisional nan bacorak rumik sarato basulam jo banang ameh jo perak. Banang logam metalik nan tatanun balatar kain mambuek efek kemilau katiko dicaliak. Songket tamasuak dalam kalompok tanunan brokat. Kain songket ko marupokan kain tanunan khas Indonesia, Malaysia, jo Brunei khususnyo dalam tradisi budaya Melayu jo Minangkabau.

Dalam sijarahnyo, kain songket anyo dipakai dek kaum bangsawan atau kaluarga rajo. Aluihnyo tanunan jo karumitan motif jo corak songket katiko tu manggambakan pangkek jo jabatan tinggi di masyarakaik. Kini, kain ko biaso dipakai dalam acara-acara rasmi sarupo acara adaik. Inyo lah tanamo di Nusantara sajak abaik ka-13.

Istilah[suntiang | suntiang sumber]

Kato songket barasa dari istilah sungkit dalam bahaso Melayu jo bahaso Indonesia, nan bararti "mangaik" atau "mancukia". Hal iko bakaitan jo metode pambuatannyo; mangaikkan jo mangambiak sajumpuik kain tanun, nan kudian manyelipkan banang ameh.[1] Salain itu, manuruik sabagian urang, kato songket mungkin pulo barasa dari kato songka, songkok khas Palembang nan dipacayo partamo kalinyo kabiasoan mananun jo banang ameh bamulo.[2] Istilah manyongket bararti ‘mananun jo banang ameh jo perak’. Songket adolah kain tanun mewah nan biasonyo bapakai wakatu baralek, acara adaik, atau acara rasmi lainnyo. Songket buliah dipakai malilik badan sarupo saruang, disampirkan di bahu, atau sabagai deta atau tanjak, hiasan ikek kapalo. Tanjak adolah samacam topi hiasan kapalo nan tabuek dari kain songket nan lazim bapakai dek sutan jo pangeran sarato datuak Kasutanan Melayu.[3] Manuruik tradisi, kain songket anyo buliah ditanun dek anak daro atau gadih; akan tetapi kini kaum laki-laki pun turuik mananun songket.[2] Babarapo kain songket tradisional Sumatera mampunyoi pola nan manganduang makna tatantu.

Songket musti malalui salapan tahapan sabalun manjadi sapotong kain dan masih ditanun sacaro tradisional. Karano pananun biasonyo barasa dari kampuang, motif-motif nan dipolakan biasonyo juo dari binatang atau tumbuahan sakitar. Motif kadang dinamoan manuruik namo kue-kue khas Melayu-Minang sarupo sarikayo, wajik, jo talam.

Caliak pulo[suntiang | suntiang sumber]

Rujuakan[suntiang | suntiang sumber]

  1. National Geographic Traveller Indonesia, Vol 1, No 6, 2009, Jakarta, Indonesia, page 63
  2. a b Gold Cloths of Sumatra: Indonesia’s Songkets from Ceremony to Commodity, Cantor Art Gallery, Worcester, Massachusetts, 2007, by Susan Rodgers, Anne Summerfield, John Summerfield
  3. "The Art of Songket"