Baju kuruang

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Baju kuruang.

Baju kuruang (Jawi: باجو كوروڠ) marupokan pakaian adaik masyarakaik Malayu di Brunei Darussalam, Indonesia, Malaysia, Singapura, jo Thailand bagian selatan. Baju kuruang acok diasosiasi jo kaum padusi. Ciri khas baju kuruang adolah rancangan nan longgar pado lubang langan, paruik, jo dado. Pado saat dipakai, bagian paliang bawah baju kuruang sajaja jo pangka paho, tetapi untuak kasus nan jarang ado pulo nan mamanjang hinggo sajaja jo lutuik. Baju kuruang indak dipasangi kanciang, malainkan ampia sarupo jo t-shirt. Baju kuruang indak pulo bakarah, tiok ujuangnya barendo. Babarapo bagiannyo acok dihiasi sulaman bawarna kaamehan.

Mulonyo, baju kuruang biaso dipakai untuak alek gadang malayu dek kaum padusi di dalam karajaan, dipakai basamo-samo kain songket untuak dijadian saruangnyo, aneka parhiasan ameh, jo tas ketek atau kipeh. Karano sabagian gadang masyarakaik malayu mamaluak Islam, banyak padusi nan mamakai baju kuruang kamudian disarasian jo jilbab, walaupun baitu ado pulo nan indak manggunokannyo. Kini baju kuruang banyak dipakai dek masyarakaik biaso, digunokan anak-anak untuak mangaji, atau ibu-ibu untuak ka pasa, tanpa disaratokan maniak-maniak nan takasan tacilak.

Sajarah pakambangan[suntiang | suntiang sumber]

Catatan dari Tiongkok mangabaan bahwasannyo masyarakaik Malayu baiak padusi maupun laki-laki pado abaik ka-13 hanyo mamakai panutuik tubuah bagian bawah. Dalam pakambangannyo, padusi Malayu mamakai saruang nan modelnyo balilikan di sakuliliang dado. Sirawa alah mulai dipakai, modelnyo "Gunting Aceh" iyolah sirawa nan panjangnyo hanyo saketek di bawah lutuik.

Namun kamudian padagang membao pangaruah budayo asiang. Barang-barang dari Tiongkok, India, dan Timur Tangah badatangan. Selain paniagoan, hal iko juo mamapaan masyarakaik Malayu kapado caro bapakaian urang-urang asiang tersebut. Urang Malayu mangadopsi pulo Islam sabagai agamo inyo, dan iko mampangaruhi caro bapakaian karano di dalam agamo baru iko ado kawajiban untuak manutuik aurat baiak untuak padusi maupun laki-laki. Puncaknyo adolah pado taun 1400an, dima pakaian Malayu digambaan sajaleh-jalehnyo dalam karya kesusasteraan Sajarah Malayu (Malay Annals). Di sikolah kito dapek mancaliak kamunculan baju kuruang, dima alah mulai lazim untuak urang Malayu untuak mamakai samacam tunik untuak manutupi tubuah mereka.