Songket Siak

Wikipedia Minangkabau - Lubuak aka tapian ilimu

Songket Siak marupoan kain tanun nan barasa dari Siak, Provinsi Riau. Pado mulonyo kain iko hanyo dipakai di lingkuangan Karajaan Siak Sri Indrapura. Karajaan nan balokasi 102 KM dari Kota Pekanbaru.[1] Ado pun pado mulonyo rono-rono nan digunoan dalam mambuek tanunan barasa dari parono alami. Rono jingga dihasiean dari campuran abuihan ubi temu kuniang jo kapua, atau dari campuran kulik manggih nan diabuih jo manggar karambia. Hitam dari pencelup hitam samacam parono tekstil. Hijau dari campuran abuihan daun kayu nodo jo kapua. Rono biru marupoan hasil campuran dari sikaduduak jo tamu lawak.[2] Sadangkan rono coklat dari abuihan kayu samak. Sairiang pakambangan jaman rono nan digunoan barasa dari parono buatan.

Alaik nan digunoan untuak mambuek tanun Siak disabuik jo kik. Kik adolah alaik tanun nan cukuik sederhana, tabuek dari kayu baukuran sakitar 1×2 meter. Karano alaiknyo nan relatif ketek, kain tanun nan dihasiakan ko relatif ketek juo.[2] Samantaro itu, motif nan ado pado tanun Siak, sarupo lazimnyo tanunan Malayu didominasi dek flora jo saketek corak nan barasa dari fauna. Ado juo bantuak nan tainspiriasi dari awan, ombak, bintang nan tacamin dari pola sarupo lingkaran, langkungan, balah katupek, jo swastika. [3]

Bahan nan digunoan[suntiang | suntiang sumber]

  • Kapeh atau banang

Sabalum ado banang nan diproduksi masal, pananun kain tanun Siak manggunoan kapeh sabagai bahan dasar. Kapeh tasabuik didapek dari biji kapeh nan alah dijamua kamudian dipintal hinggo manjadi banang. Fungsi kapeh dalam pambuatan tanun Siak kiniko alah digantiaan dek banang dari pabrik.

  • Parono

Sabalum ditanun, banang nan alah dipintal, dironoi talabiah dulu jo parono alami. Caranyo banang dicelupan ka rono nan tabuek dari abuihan tumbuah-tumbuahan. Kiniko teknik maronoi alah diringkas karano bisa manggunoan banang alah tasadio jo banyak piliahan rono.

  • Banang ameh

Ciri khas tanun nan barasa dari Sumatera yaitunyo ado banang ameh. Banang ameh mancaliakan nilai kamewahan, nilai kaindahan, sarato nilai ekonomi. Banang ameh nan dipakai ado babarapo buah, yaitunyo banang ameh cabutan, banang ameh sartibi, dan banang ameh bangkok. Untuak mandapekan motif tanun babanang ameh, ditambahan banang ameh tasabuik ditanunan di antaro banang tadi.

Alaik[suntiang | suntiang sumber]

Untuak mambuek tanun Siak, digunoan alaik nan disabuik jo kik. Balain jo pananun tradisional di saluruah Indonesia, jo mamakai kik ko pananun Siak duduak biaso sajo di ateh kursi, indak baunjua. Alaik kik iko ditamuan pado tahun 1864.[3] Samantaro tu, sairiang jo pakambangannyo mananun dapek dilakuan jo alaik AMTB (Alat Tenun Bukan Mesin). ATBM marupoan panyampurnaa dari alaik tanun Kik. Jiko pado Kik pakakeh-pakakeh pandukuang tapisah, mako pado ATBM kasado pakakeh manyatu pado ciek alaik, sahinggo proses pambuekan tanunan manjadi labiah efektif jo murah. Jo wakatu pambuekan nan relatif labih capek. Jiko manggunoan Kik wakatu nan dipakai untuak mambuek sahalai kain sakitar 3-4 minggu, mako jo ATBM sahalai kain dapek disalasaian dalam jangko wakatu sakitar 5-14 hari[2].

Untuak pakakeh Kik, nan diparaluan iolah sabagai barikuik:[2]

  • Karap marupoan alaik pamisah banang ateh jo banang bawah.
  • Sisir marupoan yaitu pamisah susunan banang lonsen/longsi.
  • Belebas marupakan alaik bantu manyusun motif.
  • Peleting marupoan tampat banang lintang.
  • Torak marupoan alaik tampek peleting.
  • Lidi pamunguik marupoan alaik bantu mambantuak motif.
  • Pijak-pijak marupoan alaik pijak untuak manggarikan lonsen kaateh dan kabawah untuak mangapik banang pakan.
  • Bangku-bangku, tampek duduak pananun

Pangarajoan kain tanun[suntiang | suntiang sumber]

Ado babarapo urutan dalam mananun;

  • Tahap pasiapan

Tahap paling awa dari proses pambuatan kain tanun Siak adolah mambuek pola jo motif dari tanunan. Mambuek pola jo motif harus dilakuan sacaro taliti jo indak asa manggambar. Sasudah pola jo motif dibuek, mako tahap salanjuiknyo adolah manyiapkan banang-banang, baiak rono nan disukoi sarato jo jumlah nan dipagunoan untuak mambuek sabuah tanunan. Salanjuiknyo, manyiapkan pakakeh nan dipagunoan. Kabaradoan pakakeh sangaik manantuan kalancaran proses pambuatan tanunan. Biasanyo, paralatan untuak mananun alah tasadio sahinggo nan diparaluan salanjuiknyo mamastian kasado alaik-alaik nan kan digunoan dapek baguno dengan baiak[2].

  • Tahap pangarajoan

Sasudah pola jo motif dibuek, banang-banang nan diparaluan mulai disiapan, jo pakakeh alah siap pakai, mako proses pambuatan kain tanun Siak dapek capek dimulai.Tahap patamo pambuatan tenun Siak adolah menerau, yaitunyo mangumpuakan untaian banang sarato jo mangguluangnyo pado sarueh batuang. Salanjuiknyo, guluangan banang tasabuik disusun manyatu jo banang lainnyao hinggo mancapai panjangnyo kiro-kiro 20-30cm. Kamudian dilanjuikan jo mengani, yaitunyo proses mangguluang banang pado guluangan nan talatak diujuang Kik. Selanjuiknyo, banang nan alah diguluang pado ujung kik di rentangan sasuai jo panjang kik. Banang nan tarentang iko disabuik longsi atau longsen. Sasudah banang tarentang, proses mambuat sahalai kain tanun alah dapek dimulai.[2]

Rujuakan[suntiang | suntiang sumber]

  1. Wijanarko, Tulus (2018-02-25). "Melihat Pembuatan Kain Tenun Siak Sambil Belajar Sejarahnya". Tempo (dalam bahasa Inggris). Diakses tanggal 2019-03-05. 
  2. a b c d e f ditindb (2015-12-17). "TENUN SIAK". Direktorat Warisan dan Diplomasi Budaya (dalam bahasa Indonesia). Diarsipkan dari versi asli tanggal 2019-09-21. Diakses tanggal 2019-03-05. 
  3. a b "Tenun Siak". Warisan Budaya Tak Benda Indonesia. Diakses tanggal 05 Maret 2019.