Rangkiang

Dari Wikipedia baso Minang, ensiklopedia bebas
Loncat ke navigasi Loncat ke pencarian

Rangkiang atau Lumbuang adolah bangunan nan dipakai untuak tampek manyimpan padi punyo suatu kaum di Minangkabau, nan pado umumnyo talatak di laman Rumah Gadang.[1]

Rangkiang barasa dari kato Ruang hyang, nan kudian mangalami parubahan bunyi manjadi Rangkiang. Padi di dalam rangkiang ado dalam pangawasan mamak atau tungganai dalam suatu kaum, sadangkan kuaso panuahnyo dipacik dek Bundo Kanduang.[2]

Rangkiang mampunyoi pintu ketek nan talatak di bagian ateh dari salah satu dindiang singkok. Untuak naiak ka rangkiang dipakai janjang nan tabuek dari batuang. Janjang iko dapek dipindahan, bilo indak digunokan mako janjang ko disimpan di bawah kolong rangkiang.

Etimologi[suntiang | suntiang sumber]

Asa kato rangkiang iolah dipasingkek dari kato bahaso Minangkabau "ruang hyang (Dewi Sri)" ("ruang Dewi Sri"), dewi padi.[3]

Jinih[suntiang | suntiang sumber]

Rangkiang mamiliki babarapo jinih jo fungsi sarato bantuak nan babeda, diantaronyo:[4]

Sitinjau Lauik[suntiang | suntiang sumber]

Duo buah Rangkiang nan di muko Rumah Gadang

Rangkiang iko dipakai untuak manyimpan padi nan ka digunokan untuak kabutuahan rumah tanggo. Bantuak Rangkiang nan disabuik juo jo Kapuak Adaik Jo Pusako iko labiah langsiang dibandiangan jo Rangkiang nan lain, batagak di ateh ampek tiang jo talatak di tangah di antaro rangkiang nan lain.

Sibayau-Bayau[suntiang | suntiang sumber]

Disabuik juo Kapuak Salang Tenggang, padi nan disimpan dalam Rangkiang iko dipakai untuak kabutuahan makan sahari-hari anggota kaluarga Rumah Gadang. Rangkiang nan lataknyo di ujuang kanan iko batagak di ateh anam tiang, jo bantuaknyo nan labiah gadang dari Rangkiang nan lain.

Salain itu, Rangkiang iko dipakai pulo untuak kabutuahan acara adaik, misalnyo acara Batagak Pangulu, Baralek Gadang, aqiqah, sunaik rasul jo lain sabagainyo nan diadokan dalam Rumah Gadang.

Sitangguang Lapa atau Sitangka Lapa[suntiang | suntiang sumber]

Rangkiang iko digunokan untuak manyimpan padi cadangan nan kan dipakai di musim paceklik. Bantuaknyo samo jo Rangkiang Sitinjau Lauik hanyo sajo Rangkiang iko dilatakan di ujuang kiri. Rangkiang iko disabuik juo jo Kapuak Gantuang Tungku.

Kaciak[suntiang | suntiang sumber]

Rangkiang iko digunokan untuak manyimpan Padi Abuan nan ka dijadian baniah nan akan ditanamkan[5]. Pado umumnyo, bantuak dari rangkiang ko samo halnyo jo bantuak dari Rangkiang Sitinjau Lauik, hanyo sajo bantuak atoknyo nan kadang indak bagonjong.

Galeri[suntiang | suntiang sumber]

Rujuakan[suntiang | suntiang sumber]