Lapau
Lapau (bahaso Indonesia: lepau) atau kadai marujuak ka tampek manggaleh makanan jo minuman, samacam warung kopi kini. Babedo jo toko nan tampeknyo tatutuik, bangunan lapau hanyo dibuek semiparmanen alias tabukak, tapi alah dilengkapi meja jo tampek duduak. Salain makan jo minum, urang-urang acok pai ka lapau untuak sakadar maota maupun batuka informasi. Fungsi iko masih balansuang inggo kini.[1]
Lapau acok disandiangan jo surau sabagai tampek tumbuah gadangnyo saurang laki-laki di Minangkabau sarato indak bisa dipisahan dari kabudayaan jo karakter masyarakaik Minangkabau.[2]
[suntiang | suntiang sumber]
Lapau identik jo warung kopi kini. Bangunannyo semipermanen, tabuek dari kayu atau papan. Lapau mamiliki meja nan babantuak panjang jo bangku panjang mangikuti panjangnyo meja.
Menu nan digalehan di lapau hanyo makanan jo minuman nan biaso. Minumannyo takah kopi, teh, susu, teh talua, jo minuman instan dalam kemasan. Adapun makanan di antaronyo kue, roti, sarato kulek-kulek takah goreang pisang, godok, katan, kacang padi, jo pinyaram.
Sijarah[suntiang | suntiang sumber]
Indak diketahui pasti bilo sijarah lapau bamulo. Guru besar sijarah dari Universitas Andalas Gusti Asnan mampakiroan lapau ado sairiang jo kamunculan pasa pado akhia abaik ke-18. Lapau ditagakan di tapi jalan nan acok dilalui dek para panggaleh jo musafir, takah di puncak sabuah pandakian atau pasimpangan jalan. Lapau bisa dibuek jo dimiliki dek sia se. Salain urang nan mampunyoi jiwa panggaleh, urang nan punyo lapau biasonyo urang nan laweh pargaulannyo dan indak jarang banyak dari mereka adalah pandeka.[3]
Lapau dimanfaatkan sabagai tampek malapeh panek dan tampek diskusi. Dulu, lapau di kawasan pantai bahkan manjadi tampek bamalam para saudagar nan datang dari daerah padalaman.[1] Di lapau ini pulo kadang-kadang transaksi jo saudagar lain dilakukan. Salain itu, urang di lapau bisa saling babagi informasi, baik mangenai barang dagangan nan dibaok, fluktuasi harago, kondisi pasa, pangalaman dalam manggaleh, hinggo kaadaan sosial jo politik di daerah-daerah nan mereka lalui.[3]
Sairiang wakatu, duduak di lapau manjadi kabiasan laki-laki bahkan ado nan manyabuik sabagai tradisi. Dek sistem kekerabatan matrilineal, laki-laki nan lah gadang indak baitu bebas di rumahnyo surang. Laki-laki nan alun manikah lalok di surau atau pai marantau. Mangko dek itu, lapau manjelma manjadi tampek laki-laki bakumpua atau badiskusi, tarutamo dalam hal baradu argumen.[1] Meski baitu, lapau indak dianggap sebagai limbago tradisional Minangkabau.[3]
Sabagai tampek diskusi, lapau manjadi arena demokratis nan mampatamuan urang-urang tanpa mancaliak status sosial. Manuruik sijawaran Taufik Abdullah, diskusi di lapau dapek mangarah ka sindia-manyindia sampai olok-olok.[2] Samantaro itu, budayawan A.A. Navis mahyabuik lapau sabagai balai randah, sabagai pambanding balai adaik tampek ninik-mamak bamusyawarah.[3] Namun, Buya Hamka dalam bukunyo Islam dan adat Minangkabau mangkritik parangai urang nan maabihan hari duduk maota di lapau.[4]
Banyak kaba jo carita fiksi nan dibuek dek panulih Minangkabau hingga karya sijarah nan maagiah gambaran lapau.[3]
Lapau kini[suntiang | suntiang sumber]
Menuruik kamus bahaso Indonesia, lapau nan ditulih lepau basinonim jo warung.[5] Di Sumatera Barat, kaduo istilah iko samo-samo digunoan, walaupun indak baitu jaleh bedo antaro kaduonyo. Namun baitu, sabagian urang tatap mampatahankan istilah lapau dek ado kaarihan lokal nan takanduang di dalamnyo.
Salain sabagai tampek jual bali babagai kabutuhan harian, lapau pado maso kini masih manjadi tampek para laki-laki bakumpua, maabihan wakatu, jo maota sambia merokok, minum kopi, teh, atau sambil main domino, dan remi.[3]
Lapau masih banyak dijumpai inggo kini. Pangelolaannyo indak dijalanan sacaro modern sahinggo bangunannyo hanyo dibuek semipermanen. Anggota DPR RI periode 2014-2019 Refrizal parnah manjalankan kagiatan badah lapau di Sumatera Barat nan batujuan maningkekan pangelolaan lapau manjadi modern.[6]
Caliak pulo[suntiang | suntiang sumber]
- Maureh lapau
- Lapo (Batak)
Rujuakan[suntiang | suntiang sumber]
- ↑ a b c https://langgam.id/lapau-wadah-pribumi-minang-meramu-kabar-sejak-zaman-penjajahan/
- ↑ a b Abdullah, Taufik. Sekolah & Politik : pergerakan kaum muda di Sumatra Barat, 1927-1933. Yogyakarta. ISBN 9786026268099. OCLC 1090622661. https://www.worldcat.org/oclc/1090622661.
- ↑ a b c d e f https://repositori.usu.ac.id/bitstream/handle/123456789/5009/147047001.pdf?sequence=1&isAllowed=y
- ↑ Hamka (1984) (dalam bahaso ms). Islam dan adat Minangkabau. Pustaka Panjimas. https://books.google.co.id/books?id=ZSsaAQAAMAAJ&q=%22sekarang+sudah+habis+masanya+duduk+%22&dq=%22sekarang+sudah+habis+masanya+duduk+%22&hl=en&sa=X&ved=2ahUKEwiwr86MyJrqAhXUXSsKHVBnCn8Q6AEwAHoECAAQAg.
- ↑ "Badan Pengembangan dan Pembinaan Bahasa, Kementerian Pendidikan dan Kebudayaan | Utamakan Bahasa Indonesia, Lestarikan Bahasa Daerah, Kuasai bahasa Asing". badanbahasa.kemdikbud.go.id. Diakses tanggal 2020-06-24.
- ↑ "Refrizal Tingkatkan Ekonomi Masyarakat Dengan Bedah Lapau". Rmol.id (dalam bahasa Indonesia). Diakses tanggal 2020-06-24.