Lompat ke isi

Umah Gayo

Wikipedia Minangkabau - Lubuak aka tapian ilimu
Umah Gayo saisuak di Gayo Lues, Aceh.

Umah Gayo adolah rumah adat urang Gayo nan taseba di Aceh. Rumah adat iko babantuak rumah pangguang nan panjang. Rumah iko dapek diuni dek babarapo kaluarga.[1][2][3]

Sapinteh Umah Gayo tampak samo jo Rumah Aceh. Kasamoannyo ado pado konstruksi bantuaknyo nan rumah pangguang. Samantaro desain interior, ragi, sarato rononyo mampunyoi pabedaan. Kini, Umah Gayo alah mulai jarang tasuo dibandiangkan Rumah Aceh.[4]

Jinih[suntiang | suntiang sumber]

Umah Pitu Ruang

Umah Gayo dibangun dalam bantuak pangguang dan mamanjang. Arah bangunan atau orientasinyo ditandoi jo adonyo janjang jo tareh atau surambi di muko rumahnyo. Manuruik orientasi bangunannyo, ado tigo jinih rumah:[1]

  • Umah lintang
  • Umah bujur
  • Umah sirong gunteng

Umah lintang marupokan rumah nan dibangun jo orientasi dari timur ka barat. Bagian muko rumah umumnyo talatak di sisi timur. Rumah jinih ko marupokan rumah nan paliang umum dibangun. Samantaro umah bujur adolah umah nan dibangun jo orientasi dari utara ka selatan. Jinih rumah ciek lai yaitu umah sirong gunteng (bahaso Gayo: "rumah serong guntiang"), rumah nan mampunyoi orientasi indah manantu.[1]

Umah Gayo dibangun jo banyak tiang nan manantukan ruang nan dibantuak dalam rumah. Sisi leba dari rumah mampunyoi 3-4 tonggak nan maasiakan batasan 2-3 ruang. Samantaro sisi panjang dari rumah mampunyoi 6-9 tonggak nan maasiakan batasan 5-8 ruang.[1] Dari hal iko, Umah Gayo dapek dibagi ka dalam 4 jinih tipologi ruang.[2]

Ragi[suntiang | suntiang sumber]

Umah Gayo mampunyoi ragi jo rono nan manjadi ciri khasnyo nan mambedakan jo arsitektur aceh lainnyo. Ragi jo rono ko mampunyoi baragam arati. Ragi nan manjadi ornamen pado Umah Gayo idenyo didapek dari alam ataupun bantuak-bantuak geometris.[4]

Ragi pado Umah Gayo saisuak
Ragi pado atok Umah Gayo

Macam-macam ragi nan diukia di Umah Gayo:[4][5]

  1. Emun beriring ("awan baririk") bamakna pasatuan jo kasatuan.
  2. Emun mutumpuk ("awan batumpuak") bamakna musyawarah mupakaik
  3. Emun berkune ("awan bacabang") bamakna panunjuak arah
  4. Emun berangkat ("awan bararak") bamakna marapikan barisan untuak basatu
  5. Emun mupesir ("awan bacarai") bamakna bapisah untuak mambangun kalompok nan baru, tando dapek tagak surang.
  6. Puter tali ("tali bapilin") bamakna basatu taguah bacarai runtuah
  7. Pucuk rebung ("pucuak rabuang") bamakna bahu mambahu dalam masyarakaik
  8. Cucuk penggong bamakna manjago adat jo budaya Gayo
  9. Sarak opat ("kadudukan nan ampek") bamakna ampek unsua masyarakaik Gayo nan bapadu, tadiri ateh reje, imem, petue, jo rayat.
  10. Lelayang ("layang-layang") bamakna manjago etika jo nilai luhua dimanopun barado
  11. Nege ("nago") bamakna palinduang jo panjago gunuang-gunuang
  12. Iken ("ikan") bamakna kasatiaan jo pangabdian ka rajo
  13. Kurik ("ayam") bamakna kakayoan alam nan indak tainggo di Tanah Gayo
  14. Peger ("paga") bamakna patahanan dari pangaruah lua Gayo
  15. Bunge ("bungo") bamakna subua, suki, jo elok
  16. Matan lao ("matoari") bamakna asa kahidupan
  17. Ulen ("bulan") bakmana paputaran wakatu
  18. Tekukur bamakna suki

Samanjak Islam masuak ka Tanah Gayo, unsua-unsua binatang mulai ditinggakan dek larangan agamo untuak maniru gambaran binatang ataupun mailakkannyo sabagai objek panyambahan.[4]

Rono pado Umah Gayo ado limo rono, yaitu:[4]

  1. Putiah bamakna ulama
  2. Kuniang bamakna rajo
  3. Sirah bamakna palime (palimo) sabagai panando kabaranian
  4. Ijau bamakna panasihaik dalam masyarakaik Gayo
  5. Itam bamakna masyarakaik

Rono-rono tasabuik manjadi rono nan indak tapisahkan dari urang Gayo. Kalimo rono ko dipakai indak anyo di Umah Gayo, tapi di baju adat jo karajinan tangan.[4]

Galeri[suntiang | suntiang sumber]

Caliak juo[suntiang | suntiang sumber]

Rujuakan[suntiang | suntiang sumber]

  1. a b c d Ifani, Sylviana Mirahayu; Tribinuka, Tjahja. "Analisa Ruang Arsitektur pada Rumah Gayo, di Provinsi Aceh – Seminar" (dalam bahasa Indonesia). Seminar Ikatan Peneliti Lingkungan Binaan Indonesia. doi:10.32315/sem.2.b055. Diarsipkan dari versi asli tanggal 2021-12-18. Diakses tanggal 2021-12-18. 
  2. a b Salwin, S., & Hendra, A. (2019). TIPOLOGI ARSITEKTUR TRADISIONAL GAYO. Arsitekno, 1(1), 14-25.
  3. Sari, Fani Dila; Pratama, Haria Nanda; Setiawan, Indra (2020-12-25). "IDENTIFIKASI UMAH ADAT PITU RUANG SEBAGAI PRODUK KEBUDAYAAN GAYO. STUDI KASUS: UMAH REJE BALUNTARA DI ACEH TENGAH". Gorga : Jurnal Seni Rupa. 9 (2): 451–454. doi:10.24114/gr.v9i2.22116. ISSN 2580-2380. 
  4. a b c d e f Dafrina, Armelia (2018-03-24). "Analisa Makna dan Motif Ornamen Arsitektur pada Umah Pitu Ruang sebagai Simbol Kebudayaan Masyarakat Gayo, Aceh Tengah". Prosiding Seminar Peng-Konteks-an Arsitektur Nusantara. Ikatan Peneliti Lingkungan Binaan Indonesia. doi:10.32315/sem.2.c024. 
  5. Setianingsih, Putri; Dafrina, Armelia; Lisa, Nova Purnama (2017-10-14). "Analisis Semiotika Simbol pada Umah Pitu Ruang di Kabupaten Aceh Tengah". Temu Ilmiah Ikatan Peneliti Lingkungan Binaan Indonesia 6. Ikatan Peneliti Lingkungan Binaan Indonesia. doi:10.32315/ti.6.i039.