Persatuan Islam

Dari Wikipedia baso Minang, ensiklopedia bebas
Loncat ke navigasi Loncat ke pencarian
Persatuan Islam (PERSIS)
Pasatuan Islam
Logo Persis.png
Logo PERSIS
LocationIndonesia.svg
Wilayah pangaruah
Pambantuakan 12 September 1923
Jinih Lembaga sosial
Tujuan Agamo Islam; Pandidikan
Kantua pusek JL. Perintis Kemerdekaan, No. 2, Bandung
Lokasi Bandung, Indonesia
Wilayah layanan Indonesia
Pamimpin K.H. Aceng Zakaria
Laman web http://www.persis.or.id/

Persatuan Islam (disingkek Persis atau PERSIS, dalam bahaso Minangkabau: Pasatuan Islam) adolah sabuah organisasi Islam di Indonesia. Persis didirikan pado 12 September 1923 di Bandung dek sakalompok Muslim nan katuju mangambangkan dalam pandidikan jo aktivitas kaagamoan nan dipimpin dek Haji Zamzam jo Haji Muhammad Yunus.[1] Organisasi ko biaso disabuik Jam'iyyah Persis dek anggotanyo.

Persis didirikan jo tujuan untuak maagiah pamahaman Islam nan sasuai jo asalinyo nan dibaok dek Rasulullah Saw jo maagiah pandangan babeda dari pamahaman Islam tradisional nan dianggap alah indak orisinil dek bacampua jo budayo lokal, sikap taklid buto, sikap indak kritis, jo indak namuah manggali Islam labiah dalam jo mambukak kitab-kitab Hadits nan shahih. Dek karano itu, malalui para ulamanyo sarupo Ahmad Hassan nan tanamo juo jo Hassan Bandung atau Hassan Bangil, Persis manyiarkan Islam nan hanyo basumber dari Al-Quran jo Hadits.[2]

Sijarah[suntiang | suntiang sumber]

Sabalun kamardekaan[suntiang | suntiang sumber]

Samulo ide ko muncua dari saurang alumnus Darul Ulum, Makah, nan banamo Haji Zamzam nan pado tahun 1910-1912 manjadi guru agamo di sikolah agamo Darul Muta'alimin. H. Zamzam mandirikan organisasi ko basamo jo kawannyo nan banamo Haji Muhammad Yunus. Kaduonyo samo-samo kalahiran Palembang. Muhammad Yunus, saurang padagang sukses, sangkek mudonyo alah mandapek pandidikan agamo tradisionalis sarato manguasoi bahaso Arab, sainggo baliau katuju bana untuak mampalajari teks-teks agamo. Lata balakang pandidikan jo budayo nan samo manyatukan kaduonyo dalam diskusi-diskusi kaislaman. Topik-topik nan didiskusian biasonyo takaik jo pagerakan agamo nan sadang bakambang pado maso itu, atau masalah-masalah agamo nan ditabikan di majalah al-Munir di Padang atau majalah al-Manar nan ditabikan di Mesir.[3]

Suatu katiko, ado sabuah diskusi nan balansuang sasudah alek di rumah salah surang anggota kaluarga, nan barasa dari Sumatera nan lah lamo tingga di Bandung. Masalah diskusi wakatu tu tantang indak supakaiknyo takaik masalah agamo antaro organisasi Al-Irsyad jo Jamiat Kheir. Sajak itulah, patamuan-patamuan salanjuiknyo barubah manjadi kalompok pangajian (studi agamo) dima anggota kalompok jo sanang hati mambahas, manilai, jo manguji ajaran nan alah batarimo salamo ko. Diskusi ko juo diadoan di antaro jamaah-jamaah sasudah sumbayang Jumaik, sainggo frekuensi jamaah nan sato samakin maningkek dan diskusi samakin mandalam. Jumlah urang awanyo anyo sakitar 12 urang. Diskusi samakin intensif dan manjadi indak anyo tabateh pado masalah agamo, tetapi labiah laweh sarato labiah politis, misanyo tantang dikotomi antaro moderasi Islam jo tradisional nan tajadi pado maso itu antaro ulama Jamiat Kheir jo al-Irshad di Batavia, atau masalah infiltrasi kuminih di Sarekat Islam (SI) jo upayo-upayo nan dilakukan umaik Islam untuak mangadapinyo.[3]

Tokoh-tokoh ormas PERSIS (A.Hassan adolah urang nan duduak, kaduo dari kida)

Dari diskusi ketek kolah kudian bakambang manjadi sabuah organisasi nan banamo "Persatuan Islam". Parasmiannyo dilakuan pado tangga 12 September 1923 (1 Shafar 1324 H) di Bandung. Manuruik Tafsir Qanun Asasi Persatuan Islam, 1968:13-14 disabuikan baso namo ko diagiah jo mukasuik untuak mangarahkan ruh ijtihad jo jihad; bakao sakuek tanago mancapai harapan jo cito-cito nan sasuai jo kandak jo cito-cito organisasi, yaitu pasatuan pamikiran Islam, pasatuan raso Islam, pasatuan suaro Islam, jo pasatuan usaho Islam.[4]

Pado tahun 1924, Ahmad Hassan bin Ahmad (lahia di Singapura; 31 Desember 1887 - maningga di Surabaya, 10 November 1958, biaso diimbau A. Hassan, Hassan Bandung, atau Hassan Bangil), surang katurunan dari ayah Tamil (Ahmad) jo mandeh Jawa Tamil (Muznah; lahia di Surabaya tapi dunsanaknyo asali dari Palekat, Madras, India), partamo kali datang ka Bandung untuk mampalajari karajinan tanun. Namun, justru katuju jo diskusi sarato ikuik bagabuang pado diskusi PERSIS.[5] Hassan nan lai santiang juo manguasoi Ilmu Pangatahuan Islam jo ilmu pangatahuan umum sarato fasih babahaso Arab, Inggirih, Malayu, jo Tamil. Baliau baraja ilmu agamo di Singapura jo Johor, sarato manikmati manulih pado surek kaba Utusan Melayu nan tabik di Singapura.[3] Baliau marupokan guru utamo sarato tokoh sentral Persis nan bapangaruah di kancah pamikiran pambaharuan Islam Indonesia jo baparan pantiang sabagai tokoh nan manggadangan namo Persis di kancah nasional.[2] Baliau marupokan tokoh nan tanamo subagai lawan debat sarato kawan diskusi jo Soekarno.[5]

Sajak A. Hassan bagabuang, Persis bakambang manjadi organisasi nan labiah tagok jo tageh daripado Muhammadiyah jo Al-Irsyad dalam mangadapi takhayul, khurafaik, jo bid'ah nan bakambang di masyarakaik.[3][6] Sangkek tu, Persis tanamo kareh dalam mangkritisi Ba' Alawi (Alawiyyin, sebutan untuak sakalompok urang nan punyo patalian darah jo Nabi Muhammad) soal taqlid jo panolakan ijtihad, ziarah kubua nan baujuang pado panyambahan ka urang siak, Kafa'ah antaro padusi bastatus Sayyidah jo laki-laki non-Sayyid, sarato kapicayoan tantang labiah tingginyo status urang Arab Indonesia dalam komunitas Muslim Indonesia.[1] Salain jo kaum Islam tradisional, Persis pun kareh dalam mangkritisi misi misionaris Hindia-Balando maupun aliran nan dianggap sasek dalam Islam sarupo Ahmadiyyah.[5]

Syiar dakwah Persis didapek utamonyo malalui media cetak, nan partamo kali manabikan majalah Pembela Islam pado Oktober 1929 di Bandung. Publikasinyo balansuang inggo 1933 sarato barasia manabikan 72 edisi jo sirkulasi 2.000 eksemplar, taseba ka saluruah nagari bahkan inggo ka Malaysia jo Thailand.

Pado November 1931, Persis manabikan sabuah majalah khusus mandiskusian isu-isu agamo, jo indak ado halangan dari kalompok-kalompok non-Muslim. Majalah itu banamo al-Fatwa nan ditulih dalam huruf-huruf Jawi, nan banyak dimintak dek kaum Muslim di Sumatera, Kalimantan, jo Malaysia. Namun, panabikan majalah ko anyo balangsuang inggo Oktober 1933 jo 20 edisi sarato 1000 eksemplar. Pado tahun 1935 al-Fatwa baganti jo majalah baru banamo al-Lisaan nan tabik inggo Juni 1942 jo 65 sabagai nomor tabik tarakhianyo. Salamo panabikan majalah al-Lisaan, A. Hassan bapindah ka Bangil. Jadi edisi nomor 47 (ditabikan pado Mei 1940) inggo edisi 65 ditabikan di Bangil, Pasuruan, Jawa Timur. Terbitan lainnyo yaitu, Soal Jawab (1931-1940), at-Taqwa (1937-1941), Lasykar Islam (1937), jo al-Hikam (1939).[7]

Pado tahun 1940, A. Hassan basamo 25 urang muridnyo bapindah dari Bandung ka Bangil saiingo batagaklah sikolah asrama (pesantren) PERSIS di Bangil.[8] Samantaro itu, pesantren Persis di Bandung dilanjuikan dek K.H. Endang Abdurrahman.[7]

Salamo awa kamunculan jo pakambangannyo inggo tahun 1942, kaanggotaan Persis indak sampai 300 urang dalam catatan struktural. Namun, alah mampu mangalola anam musajik nan malayani 500 jamaah nan ado di Kota Bandung.[1] Kiprahnyo wakatu itu bukan pado partisipasi sosial-politik, namun labiah kapado pambaharuan pamikiran Islam.[9]

Sasudah kamardekaan[suntiang | suntiang sumber]

Sasudah kamardekaan, dakwah Persis di bidang pamikiran Islam taruih bakambang. Hal iko ditandoi jo ditabikannyo majalah-majalah baru, di antaronyo majalah Aliran Islam pado 1948. Salanjuiknyo ditabikan pulo majalah Risalah (1962), Iber (1967), jo Pemuda Persis Tamaddun (1970). Publikasi dari Persis indak anyo babahaso Indonesia (Melayu), tapi ado juo nan babahaso Sunda. Patimbangan tabiknyo majalah babahaso Sunda adolah dek mayoritas jamaahnyo urang Sunda sainggo manjadi daya tarik di Jawa Barat. Majalah tu di antaronyo At-Taqwa, kudian ado majalah Iber nan bamakna “kaba” atau “ barito” nan batahan cukuik lama. Majalah nan baslogan “Basana Moal Basi (Bahasonyo indak ka basi)” ko dipalopori oleh K.H. Abdullah.[10]

Katalibatan Persis dalam politik nasional amaik dipangaruahi dek sikap para pamimpin jo tokoh-tokohnyo. Kok Ahmad Hassan manjadi palatak dasa prinsip-prinsip Persis nan basifaik pamikiran kaagamoan, mangko M. Natsir jo M. Isa Anshary (kaduonyo murid A. Hassan) basikap amaik politis jo aktif dalam babagai medan politik nasional.

Pado 8 November 1945 di Yogyakarta, didirikanlah partai politik Masyumi sabagai pangganti wadah pasatuan umaik Islam sarato pangganti organisasi Masjumi, nan bantuakan Japang. PERSIS manjadi anggota istimewa basamo jo Muhammadiyah sarato Nahdlatul Ulama (NU). Di antaro tokoh Persis nan talibaik yaitu Mohammad Natsir. Mohammad Natsir, nan marupokan murid dari A. Hassan,[5]tapiliah manjadi katua umum partai Masjumi inggo maantanyo manjadi Pardano Mantari Indonesia.[11]

Pado maso kapamimpinan Muhammad Isa Anshory (Katua Persis dari 1949 sampai 1962), Persis dihadokan jo kondisi politik Indonesia nan indak stabil dek paham kuminih makin manguek.[7] Di bawah kapamimpinannyo, Persis kareh malawan PKI. Baliau tamasuak tokoh nan acok badebat jo tokoh-tokoh kuminih. Pado 4 Maret 1957, baliau manandotangani manifesto politik Persis nan dikaluakan dek Pimpinan Pusek Persis untuak manulak konsepsi Bung Karno nan mambaok kaum kuminih ka dalam pamarintahan Republik Indonesia. Bukti lain karehnyo Persis manantang kuminih adolah tabantuaknyo bagian otonom Persis nan diisi dek kaum mudo nan banamo Pemuda Persis untuak malakukan infiltrasi ka daerah-daerah nan dikuasoi PKI.[8]

Kapamimpinan barikuiknyo, Persis agak manjauah dari dunia politik Indonesia. KH. E. Abdurrahman nan tapiliah manjadi katua umum (1962-1983), mamiliah untuak mampatahankan bantuak asali organisasi. Kapamimpinan baliau maambiak pola kapamimpinan ulama (agamo), bukan kapamimpinan politik sainggo baliau disabuik sabagai panagak khittah Persis. Salamo maso kapamimpinannyo, Persis canduang pado kagiatan-kagiatan dakwah, baiak babantuak tabligh taupun pandidikan dari tingkek pusek inggo cabang.[7][8]

Pado maso kapamimpinan KH. Aceng Zakaria (katua umum sajak 2015), Indonesia dihadapkan jo kondisi politik nan samakin mamaneh, tarutamo manjalang Pemilu 2019. Persis indak mangarahkan dukuangan politiknyo kapado salah satu partai politik maupun salah satu capres jo cawapres. Persis masih manjago jarak jo kontestasi politik nasional.[8][12]

Kini organisasi Persatuan Islam alah tasebar di banyak provinsi di Indonesia, utamonyo di Jawa Barat jo DKI Jakarta. Bahkan, tabantuak pulo Pimpinan Cabang Istimewa (PIC) subagai pimpinan jam'iyyah di lua nagari, sarupo di Singapura, Mesir, Turki, jo nagara-nagara lain.

Organisasi[suntiang | suntiang sumber]

Asas jo Tujuan[suntiang | suntiang sumber]

Jam'iyyah Persis baasaskan Islam sarato batujuan untuak tajalankannyo syarak Islam balandaskan Al-Quran jo As-Sunnah sacaro kaffah dalam sagalo aspek kahidupan.

Lambang[suntiang | suntiang sumber]

  • Jalur-jalur sinar babantuak bintang basuduik duo baleh bamukasuik cahayo Al-Qur'an jo As-Sunnah.
  • Lingkaran tangahnyo batuliskan "Persatuan Islam" jo huruf Arab.
  • Lambang Jam’iyyah PERSIS dibuek jo rono kuniang di ateh dasa barono ijau.
  • Satangah lingkaran bagian ateh jo satangah lingkaran bagian bawah ditulih kaduo semboyan PERSIS.

Semboyan[suntiang | suntiang sumber]

Ado duo semboyan Jam’iyyah PERSIS, yaitu ayaik Al-Qur'an surek Ali Imran 103, nan babunyi:

...وَٱعْتَصِمُوا۟ بِحَبْلِ ٱللَّهِ جَمِيعًا وَلَا تَفَرَّقُوا

"Wa'tashimuu bi hablillaahi jamii'an wa laa tafarraquu"

Aratinyo: "Dan bapaciklah awak sadonyo kapado tali (agamo) Allah, dan ijanlah awak tacarai berai",

sarato hadits Rasulullah riwayat Imam Tirmidzi jo Ibnu Hibban, nan babunyi:

...يَدُ اللَّهِ مَعَ الْجَمَاعَةِ

"Yadullaahi ma'al Jamaa'ah"

Aratinyo: "Tangan Allah basamo Jamaah"

Pimpinan[suntiang | suntiang sumber]

  1. Pimpinan Pusek (PP). Pimpinan Jam'iyyah Persis tingkek nasional.
  2. Pimpinan Wilayah (PW). Pimpinan tingkek propinsi. Pimpinan Wilayah nan alah didirikan dek jam'iyyah tadiri dari 16 PW.
  3. Pimpinan Daerah (PD). Pimpinan tingkek kabupaten/kota. Dari 16 Pimpinan Wilayah mambawahi jalua jam'iyyah sabanyak 62 Pimpinan Daerah.
  4. Pimpinan Cabang (PC). Pimpinan tingkek kecamatan. Dari 62 Pimpinan Daerah mambawahi 358 Pimpinan Cabang
  5. Pimpinan Rantiang (PR). Pimpinan tingkek desa/kelurahan.
  6. Pimpinan Jamaah (PJ). Pimpinan di lingkungan pamukiman.
  7. Pimpinan Cabang Istimewa (PCI). Pimpinan Persis di lua nagari.

Lembaga pandidikan[suntiang | suntiang sumber]

Pesantren Persatuan Islam di Cianjur, Jawa Barat

Persis nan gerakan utamonyo adolah pandidikan alah mampunyoi babarapo lembaga pandidikan, diantaronyo sikolah tahfisz Quran, sikolah umum dari janjang sadarajaik SD inggo SMA, sarato pondok pesantren sabanyak 330 pesantren. Pesantren-pesantren ko tarutamo tasebar di Jawa Barat, DKI Jakarta, Jawa TImur, jo daerah-daerah lain di Indonesia.[2] Untuak Paguruan Tingginyo alah ada babarapo saraupo Sikolah Tinggi Agamo Islam (STAI) Persis nan tasebar di Jawa Barat jo DKI Jakarta. Pado tahun 2019, Persis alah mandapek izin pandirian Universitas Persis dari Kemenristek Dikti.[13][14]

Katua umum[suntiang | suntiang sumber]

Barikuik daftar katua umum PERSIS dari maso ka maso :

Periode Namo Awa Akhia
I KH. Zamzam 12 September 1923 1949
II Ust. M. Isa Anshory 1949 1962
III KH. E. Abdurrahman 1962 1983
IV KH. Abdul Latief Muchtar 1983 1997
V KH. Shiddiq Amien 1997 2010
VI KH. Prof. Maman Abdurrahman 2010 2015
VII KH. Aceng Zakaria 2015 2010

Bagian Otonom[suntiang | suntiang sumber]

Bagian Otonom adolah bagian dari Jam’iyyah PERSIS sabagai kader jo palopor pajuangan PERSIS nan diagiah hak sarato kawajiban, wewenang jo tangguang jawek untuak mangatua jo manguruih surang bidang kagiatannyo sasuai jo kawenangan nan diagiah dek Pimpinan Pusat. Bagian Otonom Jam'iyyah Persis di antaronyo:[15]

  • Persistri (Persatuan Islam Istri)
  • Pemuda Persis
  • Pemudi Persis
  • Hima Persis (Himpunan Mahasiswa Persis)
  • Himi Persis (Himpunan Mahasiswi Persis)

Dewan Hisbah[suntiang | suntiang sumber]

Dewan Hisbah marupokan sabuah wadah patamuan bagi kalangan alim ulama Persis.[4] Dalam dewan ko, alim ulama tasabuik malakukan patukaran ilmu sarato badiskusi mangkaji sagalo pasoalan agamo. Dewan ko batugas untuak:[16]

  1. Manjadi dewan patimbangan hukum syarak dalam jam'iyyah Persis,
  2. Malakukan pangkajian syarak ateh baragam pasoalan nan sadang bakambang,
  3. Mamutuihan pasoalan-pasoalan syarak dalam bidang dakwah, pandidikan, ekonomi, sosial, jo politik.

Pado organisasi Islam lainnyo, dewan ko sarupo jo Dewan Tarjih nan ado di Muhammadiyah atau Lajnah Bahtsul Masail (LBM) di NU. Nan mambedakannyo, Dewan Hisbah Persis ko hanyo ado di tingkek pusek, sadangkan Dewan Tarjih Muhammadiyah atau LBM NU ado inggo tingkek pimpinan daerah atau cabang.

Tokoh[suntiang | suntiang sumber]

Caliak juo[suntiang | suntiang sumber]

Pautan lua[suntiang | suntiang sumber]

Rujuakan[suntiang | suntiang sumber]

  1. a b c Federspiel, Howard M. (2009). Persatuan Islam Islamic Reform in Twentieth Century Indonesia (edisi ke-reprint). Equinox Publishing. ISBN 978-60283-97476. https://books.google.com/books?id=8IcQyA9G0vIC&pg=PT79&lpg=PT79&dq=djamiat+chair&source=bl&ots=WESTEVYhFd&sig=S-jo8Q8XiOIyX8Q8fWwXfcto7p0&hl=en&sa=X&ei=buuZU5G8CYL0oASmz4CoCg&ved=0CDgQ6AEwAw#v=onepage&q=djamiat%20chair&f=false. 
  2. a b c Muhammad, W. I. (2017). Ormas Islam Di Jawa Barat Dan Pergerakannya; Studi Kasus Persis Dan PUI. Analisis: Jurnal Studi Keislaman, 16(2), 75-98.
  3. a b c d "Sejarah Singkat" (dalam bahaso id). http://www.persatuanislam.or.id/home/front/detail/profile/sejarah-singkat. Diakses pado 19 Juli 2014. 
  4. a b Pemahaman Hadis di Kalangan Persatuan Islam (PERSIS) tongkronganislami.net
  5. a b c d Si Raja Debat yang Gigih Membela Islam tirto.id
  6. Ramakrishna, Kumar (2009). Radical Pathways: Understanding Muslim Radicalization in Indonesia (edisi ke-illustrated). Greenwood Publishing Group. ISBN 978-03133-72193. https://books.google.com/books?id=QRarx9P41_wC&pg=PA57&lpg=PA57&dq=irsyad+persis&source=bl&ots=gJ__YQ_WvJ&sig=OIQDfrn2c5qTkb1y4MyrfZb3j-Q&hl=en&sa=X&ei=KDujU4ynAc_woAT6kYCYCA&ved=0CB4Q6AEwADgK#v=onepage&q=irsyad%20persis&f=false. 
  7. a b c d Sejarah Persatuan Islam (Persis) Tahun 1923-1983 M. wawasansejarah.com
  8. a b c d Gerak Pendulum Politik Persatuan Islam. tirto.id
  9. Tiar Anwar Bachtiar, “Sikap Intelektual Persatuan Islam Terhadap Kebijakan Politik Orde Baru”, Tesis, (Pascasarjana Departemen Sejarah Fakultas Ilmu Pengetahuan Budaya Universitas Indonesia, 2008), h. 4.
  10. Sastra, Dakwah, dan Persis (Sebuah Analisa) persis.or.id
  11. Mengapa NU Keluar dari Masyumi historia.id
  12. Tentukan Sikap Politik, Persis Akan Gelar Muskernas. suara-islam.com
  13. Menristek Dikti Serahkan SK, Persis Resmi Miliki Universitas. persis.or.id diakses pada 11 Maret 2019
  14. Jokowi Sanggupi Pembangunan Rusun dan Universitas Persis. CNN Indonesia. 2018
  15. Qanun Dakhili Persatuan Islam Persis Subang
  16. Qanun Dakhili Persatuan Islam. persissubang.com