Rajo Malewa
Rajo Malewa (Malayu: Raja Melewar), nan bagala Yang Dipertuan Besar Seri Menanti, adolah rajo patamo katurunan Pagaruyuang nan dijapuik untuak manjadi panguaso Nagari Sembilan di Samananjuang Malayu.[1] Rajo ko dipakiroan mamarentah antaro 1773–1795.[2]
Sijarah
[suntiang | suntiang sumber]Sajak abaik ka-16, nagari-nagari Rembau, Sungai Ujong, Johol, jo Naning di pasisia barat Samananjuang Malayu alah banyak diunyi dek rang rantau asa Minangkabau.[3] Nagari-nagari ko kudian mamintak rajo Pagaruyuang mangirim urang untuak manjadi pamimpin di sinan.[3] Pado taun 1677, Pagaruyuang mangirim Rajo Ibrahim untuak mamimpin nagari-nagari rang rantau Minang tu, tapi inyo indak lamo mamarentah karano tabunuah dek urang Bugih pado taun 1678.[3]
Pado patangahan abaik ka-18, Kasultanan Johor andak malapeh palinduangannyo ateh nagari-nagari tu, dek Kumpeni Balando lah samangkin manguasoi patambangan timah nan lah banyak bakambang nagari-nagari tu.[3] Sultan Johor maisinan nagari-nagari tu majapuik lai urang dari Pagaruyuang untuak diangkek jadi rajo di sinan.[3] Pado taun 1773, rajo Pagaruyuang mangirim anaknyo iyolah Rajo Malewa untuak dirajoan dek panduduak nagari-nagari tu.[3] Datangnyo Rajo Malewa sato mambao juo ranji (teromba) silsilah dari Pagaruyuang, bukti asa-usua nan asali, nan kudian disatujui dek Sultan Johor jo Balando untuak dirajokan di Nagari Sembilan sabagai Yang Dipertuan Besar.[3]
Walau lah rasmi dikirim dek Pagaruyuang jo disatujui dek Johor jo Balando, Rajo Malewa indak lansuang dapek mamimpin karano ado saingan nan alah tibo labiah daulu di sinan, iyolah Rajo Khatib. Rajo Khatib ko sasungguahnyo adolah urang nan dikirim dek Pagaruyuang untuak mampasiapkan kadatangan Rajo Malewa, tapi inyo mangaku dirinyo surang nan diutuih untuak manjadi rajo. Pamimpin nagari Ulu Muar, iyolah Datuak Naam, picayo dek kato Rajo Khatib, bahkan maambiak jadi minantunyo. Kutiko Rajo Malewa akianyo tibo juo di sinan, tajadilah paparangan antaro pandukuangnyo jo pandukuang Rajo Khatib, nan ma akianyo Rajo Khatib jo pandukuangnyo dapek dikalahkan.
Rajo Malewa kudian mambuek istanonyo di Seri Menanti, nan inggo kini tatap jadi ibukota Nagari Sembilan.[3] Kasambilan nagari, atau disabuik juo jo namo luak, nan asanyo mandukuang Rajo Malewa adolah Rembau, Sungai Ujong, Johol, Naning, Segamat, Jelebu, Jelai, Ulu Pahang, jo Kelang.
Satalah wafaiknyo, Rajo Malewa digantian dek Rajo Itam. Rajo Itam ko adolah rajo nan dijapuik juo dari Pagaruyuang dek panduduak Nagari Sembilan. Salain tu, Rajo Itam lah minantu juo ka Rajo Malewa, dek kawin jo anak padusinyo.
Caliak pulo
[suntiang | suntiang sumber]Rujuakan
[suntiang | suntiang sumber]- ↑ Ooi, Keat Gin (2010). The A to Z of Malaysia. Rowman & Littlefield. p. 222. ISBN 9780810876415. https://books.google.co.id/books?id=BkUORUDN4ysC&pg=PA222&dq=raja+melewa&hl=en&sa=X&ved=0ahUKEwjMxODJhL7XAhWHEbwKHZAXBq04ChC7BQhMMAg#v=onepage&q&f=false.
- ↑ Tiwary, Shiv Shanker (2008). Encyclopaedia of Southeast Asian dynasties, Vol. 2. Anmol Publications. p. 39. ISBN 9788126137244. https://books.google.co.id/books?id=KycuAQAAIAAJ&q=raja+melewar+1773+1795&dq=raja+melewar+1773+1795&hl=en&sa=X&ved=0ahUKEwjC2Izshr7XAhXIurwKHf3xBLU4ChDoAQgzMAM.
- ↑ a b c d e f g h Andaya, Leonard Y. (2008). Leaves of the Same Tree: Trade and Ethnicity in the Straits of Melaka. University of Hawaii Press. p. 100-101. ISBN 9780824831899. https://books.google.co.id/books?id=w7AqZR1ZUZgC&pg=PA101&dq=raja+melewa&hl=en&sa=X&ved=0ahUKEwj56dqA5b3XAhVFT7wKHdERB9YQuwUIUjAH#v=onepage&q&f=false.
| Didaului jo: Pandiri |
Yang Dipertuan Besar Seri Menanti 1773-1795 |
Digantian dek: Rajo Itam |